Con Bo Ta Trata cu Desacuerdo?

DIARIAMENTE nos tin di haber cu un variedad di personalidad. Hopi bes esaki ta duna nos goso i perspectivanan nobo. Tin biaha, esaki ta causa tambe desacuerdo, di cua algun ta serio miéntras cu otronan ta djis raspánan chikitu den nos bida di tur dia. Sea cual sea nan naturalesa, e manera cu nos ta trata cu desacuerdo ta influenciá nos mentalmente, emocionalmente i spiritualmente.

Si nos haci loke ta na nos alcanse pa resolvé desacuerdonan den un manera agradabel, esei lo yuda nos disfrutá di un bida mas salú i di relacionnan mas pacífico cu otro hende. Un proverbio antiguo ta bisa: “Un curason calmu ta e bida dje organismo di carni.”—Proverbionan 14:30.

Na un contraste skerpi ta pará e berdad obvio: “Manera un stad invadí, cu no tin muraya, asina ta e hende cu no tin frena pa su spiritu.” (Proverbionan 25:28) Cua di nos lo kier haci nos mes vulnerabel pa invasion di mal pensamentunan cu por pone nos actua robes—actua di un forma cu por haci daño na otronan i na nos mes? Ta net esei ta loke reaccionnan descontrolá i rabiá por haci. Den e Sermon riba Ceru, Jesus a recomendá nos pa examiná nos actitud, ya cu esaki por influenciá e manera cu nos ta trata cu cualkier desacuerdo cu nos por tin cu otro personanan. (Mateo 7:3-5) En bes di ta criticá otro hende, nos mester pensa riba con nos por cultivá i mantené amistad cu esnan cu tin opinion i antecedente diferente for di nos.

Nos Actitud

E promé paso pa resolvé un supuesto of berdadero desacuerdo ta di reconocé cu ta fácil pa nos tin actitud i pensamentunan robes. E Scritura ta recordá nos cu nos tur ta peca “i no ta alcansá e gloria di Dios.” (Romanonan 3:23) Ademas, dicernimentu lo por revelá cu e fuente di nos problema no ta e otro persona. En coneccion cu esaki, laga nos considerá e experencia di Jónas.

Riba instruccion di Jehova, Jónas a bai e stad di Nínive pa predicá tocante Dios su huicio inminente riba e habitantenan. E resultado felis tabata cu henter e stad di Nínive a repentí i pone fe den e Dios berdadero. (Jónas 3:5-10) Jehova a haña cu nan actitud repentí a merecé pordon, pues el a spar nan. “Pero pa Jónas esaki tabata sumamente desagradabel, i el a bira ardiente di rabia.” (Jónas 4:1) E manera cu Jónas a reaccioná riba Jehova su misericordia tabata sorprendente. Pakico Jónas mester a rabia cu Jehova? Aparentemente, Jónas a preocupá cu su mes sintimentunan, pensando cu el a keda na bergwensa den e comunidad. E no a apreciá Jehova su misericordia. Bondadosamente, Jehova a duna Jónas un les práctico cu a yud’é cambia su actitud i mira e balor  sobresaliente di Dios su misericordia. (Jónas 4:7-11) Ta bisto cu ta Jónas mester a cambia su actitud i no Jehova.

Por tin biaha cu nos tambe lo mester haci un cambio asina den nos actitud tocante un asuntu? Apostel Pablo ta amonestá nos: “Den mustra onor na otro hiba delantera.” (Romanonan 12:10) Kico e tabata kier men? Den un sentido, e ta animá nos pa ta razonabel i trata otro cristiannan cu respet profundo i dignidad. Esaki ta encerá, reconocé cu cada individuo tin e privilegio di libertad di scoge. Tambe Pablo ta recordá nos: “Cada un lo hiba su mes carga di responsabilidad.” (Galationan 6:5) P’esei, promé cu desacuerdo causa kiebro, ki sabí lo ta pa wak si nos mes no mester ahustá nos actitud! Nos tin cu traha duru pa reflehá e manera di pensa di Jehova i conserbá pas cu otronan cu di berdad ta stima Dios.—Isaías 55:8, 9.

Nos Manera di Abordá e Desacuerdo

Imaginá bo dos mucha ta bringa pa un co’i hunga, cada un ta ranca mas duru i mas duru cu e meta pa hañ’é. Kisas palabranan rabiá ta acompañá e lucha te cu finalmente un di nan laga bai of un otro hende intervení.

E relato di Génesis ta conta nos cu Abraham a tende cu tabatin pleitu entre su cuidadónan di bestia i esnan di su subrino Lot. Abraham a tuma e iniciativa pa acercá Lot i bisa: “Por fabor, no laga tin mas pleitu entre ami cu bo i entre mi cuidadónan di bestia cu bo cuidadónan di bestia, pasobra ta ruman nos ta.” Abraham tabata decididu pa no laga niun conflicto daña nan relacion. A costo di kico? E tabata cla pa sacrificá su privilegio di scoge promé como e homber di mas edad; e tabata prepará pa entregá algu. Abraham a permití Lot scoge e lugá cu e kier a tuma pa su famia di cas i tounan di bestia. Consecuentemente, Lot a scoge e área berde di Sódoma i Gomora. Abraham i Lot a bai for di otro na pas.—Génesis 13:5-12.

Nos ta prepará pa actua cu e spiritu cu Abraham a actua, pa nos mantené pas cu otro hende? E episodio aki di Bijbel ta pone un bunita ehempel pa nos sigui ora di trata cu un desacuerdo. Abraham a apelá: “No laga tin mas pleitu.” Abraham su deseo sincero tabata pa yega na un solucion amical. Un invitacion asina pa mantené relacionnan pacífico lo a yuda pone cualkier malcomprendimentu un banda. Anto Abraham a concluí cu e expresion, “pasobra ta ruman nos ta.” Pakico sacrificá un relacion asina balioso pa motibu di preferencia personal of orguyo? Abraham a mantené un enfoke cla riba loke tabata importante. El a haci esei cu respet propio i onor, i na e mésun tempu el a duna su subrino dignidad.

Aunke ta surgi situacionnan cu lo por rekerí intervencion externo pa resolvé un desacuerdo, ta cuanto mihó si por resolvé un asuntu den privá! Jesus ta animá nos pa tuma e iniciativa den haci pas cu nos ruman, i si ta necesario pidi despensa. * (Mateo 5:23, 24) Esaki lo rekerí humildad, esta, humildad di mente, pero Pedro a skirbi: “Faha boso mes cu humildad di mente un pa cu otro, pasobra Dios ta oponé esnan halsá, pero e ta duna bondad inmerecí na esnan humilde.” (1 Pedro 5:5) E manera cu nos ta trata nos co-adoradónan tin un efecto directo riba nos relacion cu Dios.—1 Juan 4:20.

Den e congregacion cristian, kisas nos ta haña nos obligá na sacrificá un derecho cu nos tin, pa por mantené pas. Un gran cantidad di hende cu awor ta asociá cu Testigonan di Jehova  a drenta den Dios su famia di berdadero adoradó den e último cincu añanan aki. Esta contentu esaki ta haci nos curason! E manera cu nos ta comportá nos mes sigur tin un efecto riba e personanan aki i otronan den e congregacion. Esaki ta un bon motibu pa pensa seriamente ora di scoge entretenimentu, hobi, actividadnan social of empleo, teniendo cuenta con otronan lo por mira nos. Cualkier accion of palabra di nos por ser malinterpretá i asina pone otronan trompecá?

Apostel Pablo ta recordá nos: “Tur cos ta legal; pero no ta tur cos ta bentahoso. Tur cos ta legal; pero no ta tur cos ta edificá. Laga cada un sigui busca, no su mes bentaha, sino esun dje otro persona.” (1 Corintionan 10:23, 24) Como cristian, nos ta ègt interesá den edificá e amor i unidad dje hermandad cristian.—Salmo 133:1; Juan 13:34, 35.

Palabranan Curativo

Palabra por tin un efecto poderoso pa bon. “Dichonan agradabel ta un panal di honing, dushi pa e alma i un curacion p’e wesunan.” (Proverbionan 16:24) E relato dje manera cu Gídeon a evitá un posibel conflicto cu e pueblo di Efraim ta mustra con cierto e proverbio aki ta.

Gídeon, kende tabata seriamente enbolbí den un bataya contra Madian, a pidi e tribu di Efraim yudansa. Sin embargo, despues cu e bataya a terminá, e hombernan di Efraim a bai cerca Gídeon i nan a keha rabiá cu e no a pidi nan bin yuda for di principio dje lucha. E registro ta declará cu “nan a purba masha pisá pa haña un pleitu cuné.” Gídeon a contestá: “Awor ta kico ami a haci compará cu boso? E pikimentu di wijndruif cu a keda atras den cunucu di Efraim no ta mihó cu e cosecha di wijndruif di Abiezer? Ta den boso man Dios a duna e prinsnan di Madian, Oreb i Zeeb, i kico ami por a haci compará cu boso?” (Huesnan 8:1-3) Dor di su palabranan calmu i bon scogé, Gídeon a evitá loke lo por a bira un guera desastroso entre e tribunan. Kisas e problema dje hombernan dje tribu di Efraim tabata cu nan a sinti nan mes importante i nan tabata orguyoso. Sin embargo, esaki no a stroba Gídeon di haci esfuerso pa logra un resultado pacífico. Nos por haci mescos?

Rabia por lanta den otro hende i pone nan bira hostil pa cu nos. Reconocé nan sintimentunan, i haci esfuerso pa comprendé nan punto di bista. Por ta cu den un manera of otro nos a contribuí na loke nan ta sinti? Si ta asina, pakico no admití e parti cu nos tabatin den crea e problema i mustra cu ta duel nos cu nos a haci e problema mas grandi. Un par di palabra bon pensá lo por drecha un relacion cu a daña. (Santiago 3:4) Kisas nos mester djis trankilisá un persona ofendí bondadosamente. Bijbel ta bisa cu “unda cu no tin palu, candela ta paga.” (Proverbionan 26:20) Sí, palabranan bon scogé, expresá den e spiritu corecto por “apartá rabia” i resultá di ta un curacion.—Proverbionan 15:1.

Apostel Pablo ta recomendá: “Si ta posibel, cuantu cu ta dependé di boso, sea pacífico cu tur hende.” (Romanonan 12:18) Ta cierto cu nos no por controlá sintimentu di otronan, pero nos por haci nos parti pa promové pas. En bes di entregá na nos mes reaccionnan imperfecto of na esnan di otro hende, nos por actua awor pa aplicá principionan bíblico bon fundá. Trata cu desacuerdo den e manera cu Jehova ta instruí nos, lo resultá den pas i felicidad eterno pa nos.—Isaías 48:17.

[Nota]

[Plachi na página 24]

Nos ta insistí pa cosnan bai manera nos kier?

[Plachi na página 25]

Abraham a pone un excelente ehempel di ser flexibel pa asina resolvé un desacuerdo