Rumbo pa Islanan di Pacífico—Pa Traha!

 E SALANAN di partida dje aeropuertonan internacional na Brisbane i Sydney, Australia, tabata mas druk i excitá cu custumber. Un grupo di 46 hende tabata cla pa sali pa e isla di Samoa, pa bai topa 39 otro hende di Nueva Zelandia, Hawai i Merca. Nan ekipahe tabata masha inusual; principalmente hermentnan manera martin, zag i boormashin, no e tipo di cos cu lo bo hiba normalmente riba un biahe pa un bunita isla di Pacífico. Pero ya, nan mision tambe tabata inusual.

Biahando riba gastu propio, nan tabata bai traha dos siman den un programa di construccion como boluntario sin pago, bou di supervision dje Oficina Regional di Maneho di Construccion dje sucursal di Australia di Testigonan di Jehova. E trabou, financiá cu contribucion boluntario, ta encerá traha Salon di Reino, Salon di Asamblea, cas di misionero, i oficina di sucursal of di traduccion, pa e congregacionnan di Testigonan di Jehova cu ta creciendo lihé riba e islanan di Pacífico. Laga nos cera conocí cu un par di trahadó cu a forma parti di timnan di construccion di Salon di Reino den nan mes pais.

Max, cu ta pega dak, ta bini di Cowra na New South Wales, Australia. E ta casá, i tin cincu yu. Arnold ta di Hawai. E cu su casá tin dos yu, i e ta pionero tambe, esta, un minister di tempu completo. Mescos cu Max, Arnold ta sirbi como anciano den su congregacion. Obviamente no ta dor cu nan no tin nada di haci cu nan tempu e hombernan aki ta traha boluntario. I mayoria cu ta den e trabou ei ta den e mésun situacion cu nan. Mas bien, nan i nan famia ta mira cu tin un necesidad, i nan kier haci loke nan por pa yuda.

Trahadónan di Diferente Nacion Ta Yena un Necesidad Vital

Un caminda cu tabatin mester di nan yudansa tabata na Tuvalu, un pais den océano Pacífico di un 10.500 hende, situá riba un grupo lehano di isla di coral, cerca di evenar i nortwest di Samoa. E grandura promedio dje islanan ta aproximadamente 2,5 kilometer cuadrá cada un. Pa 1994, e 61 Testigonan cu tin ei tabatin mester di un Salon di Reino nobo i un oficina di traduccion mas grandi urgentemente.

Den e área aki di Pacífico tropical, edificionan mester ta diseñá i trahá pa wanta tormenta i ciclon  fuerte cu ta pasa cu frecuencia. Pero no tin masha material di construccion di bon calidad disponibel riba e islanan. Ki solucion tabatin? Nan a trece delaster un material, for di plachi cu span pa dak te na mueble cu cortina, pochi di w.c. i ducha pa baño, i asta schroef cu clabu, den container for di Australia.

Promé cu e materialnan a yega, un grupo chikitu a prepará e sitio i a basha e fundeshi di antemano. Despues e trahadónan internacional a bini pa lanta e edificionan, verf nan i muebla nan.

De echo, tur e actividad aki na Tuvalu a lanta e furia di un miembro local di clero cu a anunciá na radio cu e Testigonan tabata trahando un “Toren di Babel”! Pero kico tabata berdad? Graeme, un dje trahadónan boluntario, a comentá: “Ora cu e hendenan cu tabata traha e Toren di Babel di Bijbel a mira cu nan no por a comprendé otro mas dor cu Dios a confundí nan idioma, nan mester a bandoná nan proyecto anto laga e toren na mitar.” (Génesis 11:1-9) “Ta net contrali ora bo ta traha pa Jehova Dios. Apesar di diferencia di idioma i cultura, semper e proyectonan ta keda cla.” I asina a sosodé cu esun aki tambe, anto den dos siman so. Sí, 163 persona, incluso casá dje promé minister, a asistí n’e ceremonia di dedicacion.

Cordando riba e experencia, Doug, supervisor dje proyecto, ta bisa: “Tabata un goso pa traha cu e boluntarionan di otro pais. Nos ta haci cos otro, nos terminologia ta diferente, i asta e sistema métrico cu nos ta usa ta varia. Tog e cosnan aki no a causa ningun problema.” Ya cu el a yega di forma parti di vários dje tipo di proyectonan ei, e ta agregá: “Esaki ta duna mi mas confirmacion cu Jehova su pueblo por lanta un edificio unda cu ta na mundu cu Su apoyo, sin importá con isolá of con difícil e sitio por ta. Ta berdad cu nos tin hopi homber cu talento, pero ta Jehova su spiritu ta hacié posibel.”

Tambe e spiritu di Dios ta motivá e famianan Testigo riba e islanan aki pa percurá cumindá i alohamentu pa nos, loke ta nificá un gran sacrificio pa algun di nan. I esnan cu ta ricibí tal hospitalidad ta apreciá esei mashá. Ken, di Melbourne, Australia, a yega di traha riba un proyecto similar na Polinesia frances. E ta remarcá: “Nos a bini como catibu, pero nan a trata nos manera rey.” Caminda ta posibel, e Testigonan local tambe ta yuda cu e trabou di construccion. Na Islanan Sálomon, hende muher tabata mescla cement, anto na man. Shen homber i muher a subi ceru, papa muhá dor di yobida, anto baha 40 ton di palu. Hóbennan tambe a duna un man. Un trahadó di Nueva Zelandia ta corda: “Mi ta corda un ruman homber hóben dje isla cu tabata carga dos pa tres sacu di cement  pareu. Anto el a saca greis cu skop henter dia den calor i den awaceru.”

E echo cu e Testigonan local ta participá den e obra ta trece un otro beneficio cuné. E sucursal di Sociedad Watch Tower na Samoa ta informá: “E rumannan riba e isla a siña algun fishi cu nan por usa ora di traha Salonnan di Reino, i pa haci trabou di reparacion i reconstruccion despues di horcan. Ademas e por yuda nan gana nan pan den un comunidad caminda hopi hende tin dificultad pa haci esei.”

E Programa di Construccion Ta Duna un Excelente Testimonio

Colin tabata na Honiara, anto el a mira con nan a traha e Salon di Asamblea di Islanan Sálomon. Impresioná, el a skirbi e sucursal local di Sociedad Watch Tower e mensahe aki na ingles pidgin: “Nan tur ta uní, niun hende tin mal beis, nan ta un solo famia tambe.” Poco despues, ora el a bolbe na su pueblo na Aruligo, 40 kilometer leu, e cu su famia a traha nan propio Salon di Reino. E ora ei nan a manda un otro mensahe pa sucursal: “Nos Salon di Reino ta cla, asta plataforma e tin, pues nos por tene algun dje reunionnan aki?” A haci areglo lihé pa esaki, i tin mas cu 60 hende ta asistí regularmente.

Un consehero di Union Europeo a mira e proyecto na Tuvalu. El a comentá na un dje trahadónan: “Casi sigur tur hende ta bisa boso mescos, pero pa ami, e cos aki ta simplemente un milager!” Un señora cu ta traha n’e central di telefon a puntra un otro boluntario di bishita: “Con bin boso tur ta asina contentu? Ta haci masha calor aki!” Nunca nan a yega di mira cristianismo den accion di un forma asina práctico i cu sacrificio propio.

Sacrificio sin Duele

“Esun cu ta sembra miskiñamente lo cosechá miskiñamente tambe,” Bijbel ta bisa na 2 Corintionan 9:6. E trahadónan, nan famia i nan congregacionnan ta sigui sembra generosamente dor di yuda compañeronan Testigo den Pacífico. Ross, un anciano di Kincumber, cerca di Sydney, ta bisa: “Mi congregacion mes a contribuí cu un tercer parti di mi pasashi, i mi sua, cu tambe a bini, a contribuí cu 500 dollar mas.” Un otro trahadó a paga pa su biahe dor di bende su auto. Un otro a bende un pida tereno. Dor cu Kevin tabata falta 900 dollar, el a dicidí di bende su 16 palombanan di dos aña bieu. Via un conocí, el a localisá un cumpradó cu a pagu’é net 900 dollar pa nan!

Nan a puntra Danny cu Cheryl: “E cen di pasashi i e entrada cu boso a perde a suma como 6000 dollar. El a bale la pena?” Nan a contestá: “Sí! Asta dòbel di e suma ei lo a bale la pena.” Alan, di Nelson, Nueva Zelandia, a bisa acerca: “Cu loke a sali mi pa bai Tuvalu, mi por a bai Europa te sobra cen. Pero lo mi a ricibí e bendicionnan, i cera asina tantu amistad di diferente antecedente, of haci algu pa otro hende en bes di pa mi mes? No! Di tur manera, kico cu mi por a duna nos rumannan isleño, nan a duna mi hopi mas en buelta.”

Un otro clave dje éxito dje programa ta apoyo di famia. Algun esposa por compañá nan casá i asta yuda cu e construccion, pero otronan tin yu cu ta bai scol pa cuida, of negoshi di famia pa atendé. Clay a bisa: “E disponibilidad di mi casá pa cuida e muchanan i e cas miéntras mi no tabat’ei, tabata un sacrificio hopi mas grandi cu esun di mi.” Sí, tur e esposonan cu no por a bai cu nan casá lo por bisa un fuerte “Amen” tras di e expresion ei!

Di tempu cu e proyecto na Tuvalu a keda completá, e trahadónan boluntario a traha Salon di Reino, Salon di Asamblea, cas di misionero i oficina pa traduccion na Fidji, Tonga, Papua Nueva Guinea, Nueva Caledonia i mas lugá. Tin hopi proyecto mas den fase di planeamentu ainda, incluso pa zuidoost Asia. Lo tin suficiente hende pa traha?

Parce cu esei lo no ta un problema. E sucursal di Hawai ta skirbi: “Tur hende aki cu a yega di participá den un proyecto di construccion internacional a pidi pa corda riba nan ora cu planea un otro proyecto. Asina cu nan bolbe cas bek, nan ta cuminsá spar p’e.” Con e programa aki por laga di tin éxito ora Jehova agregá su bendicion ricu na dedicacion inegoista manera esaki?

[Plachi na página 9]

Material pa e proyecto

[Plachi na página 9]

Tim di construccion na e sitio

[Plachinan na página 10]

Na fin dje proyectonan, nos a gosa di mira loke Dios su spiritu a logra