Historia di Bida

Jehova Semper Ta Recompensá Su Lealnan

SEGUN E RELATO DI VERNON DUNCOMBE

Despues di a caba di come mi pasaboca di anochi lat, manera semper mi a cende un sigaria. Anto, mi a puntra mi casá Aileen: “Con a bai awe na reunion?”

EL A keda ketu un ratu i a bisa: “Nan a lesa un carta cu a anunciá asignacionnan nobo, i bo nomber a ser mencioná. Bo a ser nombrá como sirbidó di zonido. E último frase dje carta a bisa: ‘Si un dje rumannan aki cu a caba di ser nombrá ta usa tabaco, nan ta obligá di skirbi Sociedad pa bisa cu nan no por aceptá e asignacion.’” * Mi reaccion tabata un “wel-l-l!” largu i decididu. “Esei e carta a bisa anto.”

Mi a cera mi djentenan i a primi e sigaria den e asbak cu tabatin banda di mi. “Mi no sa di con nan a scoge mi p’e asignacion aki. Pero nunca mi no a yega di rechasá un asignacion, i mi no tin intencion di cuminsá hacié.” Mi a dicidí di no huma nunca mas. E decision ei a influenciá mi bida como cristian i como músico profundamente. Laga mi relatá algun suceso cu a pone mi tuma e decision ei.

Mi Bida di Famia na Principio

Mi a nace na Toronto, Cánada, dia 21 di september 1914, como e yu homber mayó di mayornan amoroso i trahadó, Vernon cu Lila. Nan tabatin un famia di cuater yu homber i dos yu muher. Djis despues di mi tabatin Yorke, caba Orlando, Douglas, Aileen i Coral. Ora mi tabatin nuebe aña so, mi mama a duna mi un violin i a haci areglo pa mi haña les di música na Scol di Música Harris. E situacion económico no tabata fácil, pero Mama cu Tata a haña manera pa paga bus i les pa mi. Despues mi a studia teoria i armonia  di música na Conservatorio Real di Música na Toronto, i na edad di 12 aña, mi a tuma parti na un contest di concierto na Massey Hall, e prestigioso auditorio di música den centro di ciudad. Mi a sali como e ganadó i como regalo mi a haña un excelente violin den un estuche trahá di cueru di crocodil.

Cu tempu mi a siña toca piano i bas violin. Hopi bes un grupo di nos a toca pa fiestanan chikitu riba diabierne i diasabra anochi i na fiesta di studiante. Tabata na un dje fiestanan aki cu mi a topa Aileen pa promé bes. Durante mi último aña di scol secundario, mi a toca cu vários orkesta den henter e stad. Despues cu mi a caba scol, mi a haña invitacion pa djoin e Orkesta Ferde Mowry, i esaki a resultá di ta un trabou bon i stabil, te cu 1943.

Con Mi A Siña Conocé Jehova

Mi mayornan a ser introducí n’e berdad bíblico promé, djis promé cu Guera Mundial I a dal aden, tempu cu Tata tabata traha como drechadó di showcase pa un pacus grandi den centro di ciudad di Toronto. Den cantina, e tabata scucha e combersacion entre dos otro trahadó kendenan tabata Studiantenan di Bijbel (manera Testigonan di Jehova tabata conocí e tempu ei), i despues ora e bini cas anochi, e tabata compartí cu Mama loke el a tende. Algun aña despues, na 1927, Studiantenan di Bijbel a tene un congreso grandi na Toronto den e Coliseo n’e Tereno di Exhibicion Nacional Canades. A usa nos cas, cu tabata situá dos blok for dje entrada west dje tereno, pa acomodá 25 hende cu a bini for di Ohio, Merca.

Despues di esei, un Studiante di Bijbel, Ada Bletsoe, a cuminsá bishitá Mama frecuentemente, lagando e último publicacionnan cerca dje. Un dia el a bisa: “Señora Duncombe, mi tin algun tempu caba ta laga literatura cerca bo. Bo a yega di lesa algun di nan?” Aunke Mama tabata lantando seis yu, desde e dia ei padilanti, el a dicidí di cuminsá lesa e revistanan i nunca el a stop. Ami sin embargo, no a presta masha atencion n’e publicacionnan. Mi tabata traha duru pa caba scol, i mi tabata hopi enbolbí den música.

Na juni 1935, ami cu Aileen a casa den un misa anglicano. Debí cu mi a bandoná Iglesia Uní na edad di 13 aña, mi no tabatin ningun otro afiliacion religioso; pues den e registro di matrimonio mi a firma cu mi ta Testigo di Jehova, aunke mi no tabata Testigo ainda.

Nos a spera di lanta un famia den futuro, i nos a deseá di ta bon mayornan. Pues, nos a cuminsá lesa e Testament Nobo huntu. Sin embargo, maske nos tabatin bon intencion, otro cosnan a stroba. Un poco tempu despues, nos a purba atrobe cu e mésun resultado. Anto como regalo di Pascu na 1935, nos a haña lorá den papel di regalo, un buki cu e título E Harpa di Dios. Mi casá di: “O, e regalo di Pascu aki cu bo mama a manda pa nos sí ta straño.” Tog, despues cu mi a bai trabou, el a cuminsá les’é, i a gusta loke el a lesa. Pa basta tempu mi no tabata sa nada di esaki. Pa loke ta e expectativanan pa lanta un famia cu nos tabatin, nan no a realisá. Nos yu muher cu a nace dia 1 di februari 1937, no a keda na bida. Esta tristu nos tabata!

Durante e tempu aki, mi famia tabata participá activamente den e trabou di predicá, i mi a haña sa cu Tata tabata e único publicadó di Reino den famia cu ainda no a logra cera un abonament dje revista Consuelo (awor Spierta!) cu un hende. Esaki tabata e meta di sirbishi p’e luna ei. Aunke nunca mi no a lesa ningun publicacion di Sociedad, mi a sinti duele di Tata i a bisa: “OK Tata, cera un abonament pa mi; i lo bo ta mescos cu e otronan.” A bira zomer, i e orkesta a sali for dje stad pa toca den un resort. Consuelo a sigui mi via post. A bira otoño, i e orkesta a muda bai Toronto bek. E revistanan a sigui bini na nos adres nobo, i mi no a saca niun di nan ni sikiera for di nan enboltura.

Durante un vakansi di Pascu, mi a wak e stapel di revista i a concluí cu si mi tabata paga pa nan, mi mester lesa sikiera algun di nan pa mira loke nan tabatin di bisa. E promé cu mi a habri, a spanta mi. El a exponé intriga i corupcion político cu tabata existí e tempu ei. Mi a cuminsá papia cu mi coleganan músico di loke mi tabata lesa. Sin embargo, nan a duda cu loke mi tabata bisando ta berdad, i mi mester a sigui lesa pa mi por a defendé mi mes. Inconcientemente, mi a  cuminsá duna testimonio tocante Jehova. I desde e tempu ei, mi no a stop di lesa e maraviyoso publicacionnan basá riba Bijbel di “e esclabo fiel i discreto.”—Mateo 24:45.

Aunke mi tabata ocupá cu trabou durante siman, no a dura mashá cu mi tabata asistí n’e reunionnan di diadomingo huntu cu Aileen. Ora nos a yega reunion riba un diadomingo na 1938, dos ruman muher di edad a cumindá nos, i un di nan a puntra: “Ruman hóben, bo a tuma bo posicion na banda di Jehova caba? Bo sa, Armagedon ta djis tras di porta!” Mi tabata sa cu Jehova ta e único Dios berdadero, i mi tabata convencí cu esaki ta su organisacion. Mi tabata kier ta parti di dje, pues dia 15 di october 1938, mi a bautisá. Aileen a bautisá mas o ménos seis luna despues. Mi ta contentu di por bisa cu henter mi famia a bira sirbidó dedicá di Jehova.

Esta un goso mi a experenciá dor di asociá cu Dios su pueblo! No a dura mashá cu mi a sinti mi na cas entre nan. Ora mi no por a asistí, semper mi tabata ansioso pa sa loke a sosodé n’e reunionnan. E anochi en particular, mencioná na principio dje artículo, a resultá di ta un punto decisivo den mi sirbishi na Jehova.

Un Tempu di Cambio Grandi pa Nos

Un otro ahuste significativo pa nos a tuma lugá dia 1 di mei 1943. Nos a asistí na nos promé congreso grandi, Asamblea Teocrático di Mundu Nobo, na Cleveland, Ohio, na september 1942. Einan, net meimei di un guera mundial teribel, un guera sin un fin na bista, nos a tende ruman Knorr, kende e tempu ei tabata presidente di Sociedad Watch Tower, duna cu entusiasmo e discurso cautivador: “Pas Por Dura?” Nos ta corda bon con el a usa Revelacion capítulo 17 pa mustra cu despues di guera lo tin un periodo di pas durante cua un gran obra di predicá lo ser efectuá.

Loke tabatin mas tantu efecto riba nos tabata un discurso cu ruman Knorr a duna mas promé, esta, “Jefte i Su Voto.” E ora ei a haci un yamada pa mas pionero! Ami cu Aileen a wak otro i a bisa den un solo bos (huntu cu hopi otro hende e tempu ei): “Esei ta nos!” Mesora nos a cuminsá planea pa bai cuminsá cu un trabou mas importante.

For di 4 di juli 1940, e obra di Testigonan di Jehova tabata prohibí na Cánada. Ora nos a cuminsá traha pionero dia 1 di mei 1943, ainda duna testimonio tocante Jehova i ofrecé literatura di Sociedad den sirbishi di veld, tabata ilegal. Sirbiendo como cristian, nos tabatin solamente nos copia personal dje version di Bijbel King James huntu cu nos. Djis un par di dia despues cu nos a yega na nos promé asignacion di pionero na Parry Sound, Ontario, e oficina di sucursal a manda Stewart Mann, un pionero experenciá, bin traha huntu cu nos den sirbishi. Esta un provision amoroso! Ruman Mann tabatin bon manera i tabata semper cla pa smile. Nos a siña for di dje i nos a pasa bon huntu cuné. Nos tabata conduciendo vários studio di Bijbel ora Sociedad a reasigná nos n’e stad Hamilton. No hopi tempu despues di esei, apesar dje echo cu mi a pasa e edad di bai den servicio militar, nan a manda yama mi. Debí cu mi a nenga di djoin ehército, nan a arestá mi dia 31 di december 1943. Despues cu a cumpli cu e formalidadnan den corte, mi a ser sentenciá na campo di sirbishi alternativo, caminda mi a keda te na augustus 1945.

Inmediatamente despues cu mi a haña mi libertad, ami cu Aileen a haña un asignacion di pionero cu a hiba nos na Cornwall, Ontario. Djis despues, nos tabata rumbo pa Quebec cu un asignacion special cu nos a ricibí for di e Departamento Legal di Sociedad pa bai traha n’e corte  policial (corte pa casonan chikitu). Esaki tabata durante e periodo cu Duplessis tabata na mando na Quebec, tempu cu persecucion contra Testigonan di Jehova tabata particularmente intenso. Vários dia pa siman, mi tabata haña mi den cuater corte diferente pa yuda nos rumannan. Esakinan tabata tempunan excitante i fortalecedor di fe.

Despues dje congreso na Cleveland na 1946, nos a ricibí asignacionnan pa trabou di circuito i di distrito cu a hiba ami cu mi casá rond Cánada. Cosnan tabata sosodé lihé. Na 1948, nos a haña invitacion p’e di 11 klas dje Scol Bíblico di Galad di Watchtower. Ruman Albert Schroeder i ruman Maxwell Friend tabata dos di nos instructornan, i den nos klas di 108 studiante tabatin 40 ruman ungí. Cu asina tantu sirbidó di Jehova di hopi tempu presente, e experencia aki tabata realmente enrikesedor i recompensador!

Un dia ruman Knorr a bishitá nos for di Brooklyn. Den su discurso, el a pidi pa 25 ruman boluntario pa siña e idioma hapones. Nos tur 108 a ofrecé nos mes como boluntario! E presidente a keda cu e tarea pa scoge esnan cu lo haña les. Mi ta pensa cu Jehova a dirigí e seleccion pasobra el a bai masha bon mes. Vários di e 25 personanan cu a ser scogé i cu despues tabatin e privilegio di habri e trabou na Hapon, ainda ta den nan asignacion. Nan ta di edad avansá, pero nan ta ei sí. Algun di nan, manera Lloyd cu Melba Barry, despues a bai otro asignacion. Lloyd tabata miembro dje Cuerpo Gobernante te na su morto aña pasá. Nos ta alegrá cu nan tur den e recompensa cu Jehova a duna.

Dia di graduacion a yega, i nos a ser asigná na Jamaica. Sin embargo, debí na casonan di corte pendiente na Quebec, nos a haña instruccion pa bai Cánada bek.

Hopi Mas Música!

Aunke mi a laga música atras p’e sirbishi di pionero, a parce cu música sí no a laga mi. E siguiente aña, e presidente di Sociedad, Nathan Knorr, i su secretario, Milton Henschel, a bini Maple Leaf Gardens na Toronto. Ruman Knorr su discurso público titulá “Ta Mas Lat Cu Bo Ta Pensa!” a emocioná tur hende. Pa promé bes mi a haña invitacion pa dirigí e orkesta di congreso. Nos a prepará areglo di wals pa algun cantica popular den e Buki di Cantica di Sirbishi di Reino (1944). Parce cu el a cai na agrado dje rumannan. Ora cu e programa di diasabra atardi a caba, nos a ensayá e programa cu nos a planea pa diadomingo. Mi bista a cai riba ruman Henschel biniendo den nos direccion, i mi a para e orkesta pa mi por a bai cumind’é. El a puntra: “Cuantu músico bo tin den e orkesta aki?” Mi a contestá: “Ora nan tur ta presente, nan ta mas o ménos 35.” “Wel, e siguiente zomer, lo bo haña dos biaha e cantidad ei na New York,” el a contestá.

Sin embargo, promé cu zomer, mi a haña invitacion pa bai Brooklyn. Circunstancia a pone cu na principio Aileen no por a bini huntu cu mi. E edificio nobo di 124 Columbia Heights no tabata completo ainda, p’esei mi a haña un cama den e edificio original, den un kamber chikitu huntu cu dos ruman homber ungí: un ruman di edad, Payne, i Karl Klein cu mi a topa pa promé bes. E kamber tabata pertá? Sí. Pero tog nos a sali masha bon mes cu otro. E ruman hombernan di mas edad tabatin hopi pacenshi. Ami tabata djis purba pa mi no ta den caminda! Esei tabata un les balioso den loke Dios su spiritu por logra. Esta hopi bendicion mi encuentro i trabou huntu cu ruman Klein a trece pa mi! E tabata semper cariñoso i cla pa yuda. Nos a traha bon huntu i a keda amigu cerá pa mas cu 50 aña.

Mi tabatin e privilegio di yuda cu música n’e congresonan na Yankee Stadium na 1950, 1953, 1955 i 1958 i tambe di compartí e responsabilidadnan di orkesta cu Al Kavelin n’e congreso di 1963 cu a ser tené na Rose Bowl na Pasadena, California. Durante e congreso di 1953 na Yankee Stadium, a presentá un programa musical promé cu e discurso público riba diadomingo. Erich Frost a introducí Edith Shemionik (despues Weigand), soprano, cu a canta “Padilanti, Boso Testigonan!,” cu acompañamentu di nos orkesta. Despues, nos a keda emocioná ora pa promé bes, nos a di tende e bosnan bunita i sonoro di nos rumannan africano. Misionero Harry Arnott a trece un excelente grabacion riba caset for di Nort Rodesia (awor Zambia) pa  nos disfrutá di dje. E zonido a yena henter e stadion.

Grabacion dje Buki di Cantica di 1966

Bo ta corda e buki cantica cu kaft furá cu venil, color ros scur, “Canta i Compañá Boso Mes cu Música den Boso Curason”? Ora esaki su preparacion final tabata yegando, ruman Knorr a bisa: “Nos ta bai haci algun grabacion. Mi kier pa bo organisá un orkesta chikitu, djis un par di violin i un par di fluit. Mi no kier pa ningun hende ‘supla su cachu’!” E Salon di Reino na Betel lo a sirbi como nos studio, pero tabatin algun problema pa us’é. Kico mester sosodé cu refleho di zonido riba muraya cu no ta furá, flur di mosaico i klap stul di metal? Ken por a yuda nos solucioná e problemanan desagradabel aki di zonido? Un hende a sugerí: “Tommy Mitchell! E ta traha na ABC Network Studios.” Nos a busca contacto cu ruman Mitchell, kende tabata contentu pa yuda nos.

E promé diasabra pa graba a yega, i segun cu e músiconan tabata ser introducí, un dje ruman hombernan tabatin un estuche pa trombon. Mi a corda ruman Knorr su spiertamentu: “Mi no kier pa ningun hende ‘supla su cachu’!” Kico mi por haci awor? Mi a wak miéntras e ruman a saca e trombon for di su estuche, pone su accesorionan na nan lugá, i a cuminsá calentá. E ruman homber tabata Tom Mitchell, i su promé tononan tabata bunita. El a laga e trombon zona manera un violin! Mi a pensa: ‘E ruman aki tin cu keda!’ Ruman Knorr no a reclamá nunca.

Den e orkesta ei nos tabatin un grupo di músico excelente cu tambe tabata ruman homber i muhernan amoroso. No tabatin hende extremadamente sensitivo of indisipliná! Haci grabacion tabata un trabou duru, pero niun hende no a keha. Ora e trabou a caba, tabatin lágrimanan di despedida; i un laso di amistad fuerte a keda existí entre esnan cu a participá. Nos tur a disfrutá dje privilegio, i danki na Jehova, nos a logra haci e trabou.

Mas Privilegionan Recompensador

Despues di asina tantu aña, mi ta sigui disfrutá dje ministerio di tempu completo. Mi tabatin 28 aña den e trabou di circuito i di distrito, i mi a disfrutá di cada un. Despues a sigui cincu aña di manehá e Salon di Asamblea di Norval na Ontario. Ami cu Aileen tabata druk, tur fin di siman cu un asamblea di circuito i tambe congresonan di distrito den idioma stranhero. Na 1979/80, arkitecto i ingenieronan a usa e facilidadnan dje Salon di Asamblea ora nan tabata planea e futuro sucursal di Sociedad na Halton Hills. Despues di nos trabou na e Salon di Asamblea, un otro asignacion a hiba na mas participacion riba tereno di música na Brooklyn, for di 1982 te cu 1984.

Mi kerida esposa a muri dia 17 di juni 1994, net shete dia despues cu nos a haci 59 aña casá. Nos a completá 51 aña di sirbishi di pionero dedicá huntu.

Segun cu mi ta refleccioná riba hopi di mi experencianan den bida, mi ta corda con Bijbel tabata un guia hopi balioso. Tin biaha, mi ta usa Aileen su Bijbel personal i mi ta saca hopi goso ora mi ripará loke a toca su curason, sea ta versículonan completo, frasenan specífico i palabranan individual cu el a marca. Mescos cu den caso di Aileen, mi tambe tin versículonan cu tin nificacion special pa mi. Un pasashi ta Salmo 137, cu ta expresá e bunita oracion aki na Jehova: “Laga cu nunca mas mi por toca harpa si mi lubidá bo, Jerusalem! Laga cu nunca mas mi por canta atrobe si mi no corda riba bo, si mi no pensa riba bo como mi goso di mas grandi!” (Salmo 137:5, 6, Today’s English Version) Aunke mi ta stima música, mi goso di mas grandi ta bini di sirbi Jehova lealmente, esun cu a recompensá mi cu un bida yen i satisfaciente.

[Nota]

[Plachi na página 28]

Huntu cu Aileen na 1947

[Plachi na página 30]

Na un dje promé sesionnan di grabacion