Informe di Proclamadónan di Reino

Muhando Simia dje Berdad na Chile

DEN e desierto situá den parti nort di Chile, por pasa añanan promé cu awaceru cai. Pero ora esei sosodé, e tera secu yen di baranca ta bira un berdadero tapijt di flor multicolorido. E despliegue espectacular aki ta atraé turistanan for di henter e pais.

Sin embargo, tin un fenómeno hopi mas interesante ta tumando lugá entre e pueblo di Chile. Awa di berdad di Bijbel ta flui bai na tur skina dje pais, i hopi hende sincero ta “florecé” bira disipel di Jesucristo. Un medio cu nan ta usa pa plama e awa di berdad aki ta telefon. E siguiente experencianan ta ilustrá e excelente resultadonan cu ta ser lográ cu e método aki di duna testimonio.

• A pidi un evangelisadó di tempu completo cu yama Karina, pa durante un programa di asamblea di circuito, e demostrá con pa duna testimonio via telefon. Sin embargo, nunca Karina no a participá den e rasgo aki dje trabou di duna testimonio. Pa anim’é pa participá den e programa di asamblea, un anciano huntu cu su esposa a repasá cu Karina algun punto en cuanto con pa duna testimonio via telefon. Tambe nan a urgié pa haci oracion pidi Jehova su guia den e asuntu aki. El a haci esaki i finalmente el a dicidí di purba haci un yamada di telefon.

Karina a scoge un number di telefon cu ta pertenecé na un pueblo den cercania. Un operadora a contestá, i Karina a splica e propósito di su yamada. E operadora a reaccioná bon, i nan a haci areglo pa papia atrobe denter di tres dia. E rebishita via telefon a resultá den un studio di Bijbel, usando e foyeto Kico Dios Ta Rekerí di Nos? Desde e tempu ei, nan a disfrutá di sesionnan di studio interesante i animá, i Karina a manda literatura pa contestá e señora su preguntanan.

• Bernarda a tuma iniciativa pa duna testimonio na un homber cu a yama number robes. En bes di mustra cu e ta iritá, Bernarda a introducí su mes como un Testigo di Jehova i a ofrecé pa yuda e persona. Un combersacion a sigui, i e homber a scuch’é segun cu el a splica con djis akí e Reino di Dios lo eliminá inhusticia. E homber a duna Bernarda su number di telefon, i Bernarda a haci rebishita via telefon. Durante un di nan combersacionnan, Bernarda a lesa un parti for dje buki Conocimentu cu Ta Hiba na Bida Eterno p’e homber. E homber a puntra con e por a haña un ehemplar, i Bernarda a manda unu p’e huntu cu un Bijbel. A haci areglo pa un ruman homber local bishit’é, i awor esaki ta sigui “muha” e “mata” cu ta floreciendo aki.

Sí, den e tera spiritual secu dje mundu aki, simianan scondí ta wardando pa spruit ora e awa dje berdad dunadó di bida alcansá nan. Miles di hende cu sed ta sigui “brota” i “florecé” bira fiel sirbidónan di Jehova Dios.—Isaías 44:3, 4.