Mustra un Actitud di Warda!
Mustra un Actitud di Warda!
“Lo mi mustra un actitud di warda riba e Dios di mi salbacion. Mi Dios lo tende mi.”—MIKÉAS 7:7.
1, 2. (a) Con un actitud robes a perhudicá e israelitanan den desierto? (b) Kico lo por pasa cu un cristian cu no cultivá un actitud corecto?
NOS por mira hopi cos den bida sea den un manera positivo of negativo, dependiendo di nos actitud. Ora e israelitanan tabata den desierto, nan tabata ricibí mana milagrosamente. Eigenlijk nan mester a wak e paisahe desolá rond di nan i keda profundamente gradicidu na Jehova cu el a percurá cuminda pa nan. Asina nan lo a reflehá un actitud positivo. Pero en bes di esei, nan a corda riba e gran variedad di cuminda na Egipto i a keha cu e mana a kita nan apetit. Esta un actitud negativo!—Númeronan 11:4-6.
2 Di igual manera e actitud di un cristian awe por laga cos parce sea briyante of scur. Si un cristian no tin e actitud corecto, fácilmente lo e por perde su goso, i esei lo ta algu serio pasobra, manera Nehemías a bisa: “E goso di Jehova ta [nos] fortalesa.” (Nehemías 8:10) Un actitud positivo i gososo ta yuda nos keda fuerte i ta promové pas i unidad den e congregacion.—Romanonan 15:13; Filipensenan 1:25.
3. Con un actitud corecto a yuda Jeremías den tempu difícil?
3 Jeremías a desplegá un actitud positivo apesar di a biba den tempu difícil. Asta ora e tabata testigo dje horornan dje caida di Jerusalem na aña 607 P.E.C., e por a mira aspectonan positivo. Jehova lo no a lubidá Israel, i e nacion lo a sobrebibí. Jeremías a skirbi den e buki di Lamentacionnan: “Ta e echonan di bondad amoroso di Jehova cu nos no a yega na nos fin, pasobra su misericordianan sigur lo no yega na un fin. Nan ta nobo tur mainta. Bo fieldad ta abundante.” (Lamentacionnan 3:22, 23) Atrabes di historia, sirbidónan di Dios den e circunstancianan di mas difícil a trata na mantené un actitud positivo i asta gososo.—2 Corintionan 7:4; 1 Tesalonicensenan 1:6; Santiago 1:2.
4. Jesus a mantené ki actitud, i con esei a yud’é?
4 Seishen aña despues di Jeremías, Jesus su actitud positivo a yud’é perseverá. Nos ta lesa: “P’e goso cu a ser poné dilanti [Jesus] el a wanta un staca di tormento, despreciando bergwensa, i a sinta na man drechi dje trono di Dios.” (Hebreonan 12:2) Sea cual sea tabata e oposicion of persecucion cu Jesus tabatin cu confrontá—asta e agonia di un staca di tormento—el a mantené su mente riba “e goso cu a ser poné su dilanti.” E goso ei tabata tantu e privilegio di vindicá Jehova su soberania i santificá su nomber como e prospecto di trece bendicionnan grandi pa humanidad obediente den futuro.
Adoptá un Actitud di Warda
5. Cua ta un situacion típico caminda un actitud di warda lo yuda nos mantené un punto di bista corecto di asuntunan?
5 Si nos cultivá un actitud mental manera esun di Jesus, nos lo no perde e goso di Jehova asta si cos no ta bai semper n’e manera of momento cu nos ta verwagt. Profeta Mikéas a bisa: “En cuanto ami, ta pa Jehova lo mi mantené mi mes vigilante. Lo mi mustra un actitud di warda riba e Dios di mi salbacion.” (Mikéas 7:7; Lamentacionnan 3:21) Nos tambe por demostrá un actitud di warda. Con? Den hopi manera. Por ehempel, podisé nos ta haña cu un ruman homber den autoridad a actua robes i cu mester corigí e asuntu mesora. Un actitud di warda lo permití nos considerá: ‘Di berdad el a actua robes, of ta ami ta ekibocá? Si el a actua robes mes, lo por ta cu Jehova ta permití asuntunan sigui nan rumbo pasobra e ta haña cu e persona lo mehorá i cu medidanan drástico pa corigí e asuntu lo no ta necesario?’
6. Con un actitud di warda lo yuda un hende cu ta luchando cu un problema personal?
6 Kisas nos tin mester di un actitud di warda si un problema personal ta molestiá nos of nos ta luchando cu un debilidad. Suponé cu nos ta pidi Jehova su yudansa, pero e problema ta persistí. Kico e ora ei? Nos tin cu sigui haci loke ta na nos alcanse pa resolvé e problema, anto tene fe den e palabranan di Jesus: “Sigui pidi, i lo e ser duná na boso; sigui busca, i boso lo haña; sigui bati, i lo ser habrí pa boso.” (Lucas 11:9) Sigui haci oracion i warda riba Jehova. Na e tempu apropiado i na su manera, Jehova lo contestá bo oracionnan.—1 Tesalonicensenan 5:17.
7. Con un actitud di warda lo yuda e manera cu nos ta mira e forma progresivo cu nos comprendimentu di Bijbel ta ser refiná?
7 Segun cu profecianan bíblico ta cumpli, nos comprendimentu dje Scritura ta ser refiná. Pero tin biaha, nos por pensa cu nos mester a haña un cierto clarificacion fo’i hopi dia caba. Si esei no bini ora cu nos lo a preferá p’e bini, nos ta dispuesto pa warda? Corda cu Jehova a haña bon di revelá “e secreto sagrado di e Cristo” tiki-tiki i durante un periodo di un 4.000 aña. (Efesionan 3:3-6) Pues anto, nos tin cualkier motibu pa ta impaciente? Nos ta duda cu tin un “esclabo fiel i discreto” cu a ser nombrá pa duna e pueblo di Jehova “nan alimento n’e debido tempu”? (Mateo 24:45) Pakico priva nos mes di goso divino djis pasobra tur cos no ta completamente comprendibel? Corda, ta Jehova ta dicidí ki ora i con e ta revelá su ‘asuntunan confidencial.’—Amos 3:7.
8. Con Jehova su pacenshi a resultá probechoso pa hopi hende?
8 Kisas algun ruman ta desanimá pasobra nan ta sinti cu despues di hopi aña di sirbishi fiel, por ta nan lo no biba pa mira “e dia di Jehova, grandi i inspirador di temor.” (Joël 2:30, 31) Pero tog, nan por ser animá ora nan wak e banda positivo. Pedro a consehá: “Considerá e pacenshi di nos Señor como salbacion.” (2 Pedro 3:15) Jehova su pacenshi a permití miyones di hende mas di curason sincero siña e berdad. Esei no ta maraviyoso? Ademas, mas largu Jehova tene pacenshi, mas tempu nos tin pa “sigui traha pa alcansá [nos] mes salbacion cu temor i temblamentu.”—Filipensenan 2:12; 2 Pedro 3:11, 12.
9. Si nos ta limitá den loke nos por haci den sirbishi di Jehova, con un actitud di warda lo yuda nos wanta e situacion?
9 Un actitud di warda ta yuda nos pa no desanimá ora oposicion, malesa, edad cu ta subi of otro problemanan ta stroba nos den sirbishi di Reino. Jehova ta verwagt nos sirbié cu henter nos curason. (Romanonan 12:1) Sin embargo, e Yu di Dios, cu ta sinti “duele di esun di condicion humilde i esun pober,” no ta exigí mas di loke nos por ofrecé razonablemente; i Jehova tampoco no ta hacié. (Salmo 72:13) Pues, nos ta ser animá pa haci loke nos por, wardando cu pacenshi te ora cu circunstancia cambia, sea den e sistema di cosnan aki of den esun binidero. Corda: “Dios no ta inhustu p’e lubidá boso trabou i e amor cu boso a mustra pa su nomber, p’e echo cu boso a sirbi e santunan i ta sigui sirbi.”—Hebreonan 6:10.
10. Un persona cu un actitud di warda por evitá ki característica malbado? Splica.
10 Tambe un actitud di warda ta yuda nos evitá arogancia. Algun cu a bira apóstata no tabata dispuesto pa warda. Por ta nan a sinti cu tabata necesario pa haci ahuste, sea den comprendimentu bíblico of den asuntunan dje organisacion. Sin embargo, nan no a reconocé cu ta Jehova su spiritu ta impulsá e esclabo fiel i discreto pa haci ahuste na Jehova su debido tempu, i no ora nos kisas ta haña cu esei ta necesario. I cualkier ahuste mester ta na armonia cu e boluntad di Jehova, no cu nos ideanan personal. Personanan apóstata ta permití un actitud arogante troce nan forma di pensa i trompecá nan. Pero si nan a adoptá e actitud mental di Cristo, nan lo por a mantené nan goso i keda entre e pueblo di Jehova.—Filipensenan 2:5-8.
11. Con nos por usa e tempu di warda den un manera probechoso, siguiendo ehempel di ken?
11 Claro cu mantené un actitud di warda no kier men ser floho of sinta pornada. Nos tin cos di haci. Por ehempel, nos mester ta ocupá cu studio bíblico personal i dje manera ei demostrá e mésun interes profundo den cosnan spiritual cu e profetanan fiel i asta e angelnan a demostrá. Papiando dje interes ei, Pedro ta bisa: “En cuanto e salbacion aki, e profetanan . . . a haci un investigacion diligente i un búskeda cuidadoso. . . . Angelnan ta deseá di loer den net e cosnan aki.” (1 Pedro 1:10-12) No solamente studio personal, sino tambe asistencia regular na reunion i oracion ta indispensabel. (Santiago 4:8) Esnan cu ta mustra cu nan ta conciente di nan necesidad spiritual dor di regularmente ingerí alimento spiritual i asociá cu compañeronan cristian, ta demostrá cu nan a adoptá e actitud mental di Cristo.—Mateo 5:3.
Tene un Punto di Bista Realístico
12. (a) Ki independencia Adam cu Eva a busca? (b) Kico tabata e resultado dje echo cu humanidad a sigui e rumbo di Adam cu Eva?
12 Ora Dios a crea e promé pareha humano, el a reservá pa su mes e derecho di fiha e normanan di loke ta bon i malu. (Génesis 2:16, 17) Adam cu Eva kier tabata independiente di Dios su guia, i esei a resultá den e mundu cu nos ta mira rond di nos awe. Apostel Pablo a bisa: “Pa medio di un solo hende picá a drenta mundu i morto pa medio di picá, i asina morto a plama na tur hende pasobra nan tur a peca.” (Romanonan 5:12) Seis mil aña di historia humano contando for di tempu di Adam, a demostrá e berdad dje palabranan di Jeremías: “Mi sa masha bon, o Jehova, cu e caminda di hende terenal no ta pertenecé na dje. No ta pertenecé na hende cu ta canando pa ni sikiera dirigí su paso.” (Jeremías 10:23) Reconocé cu e palabranan di Jeremías ta berdad no kier men cu nos ta conformá cu derota. Esei ta nificá ser realístico. E palabranan ei ta splica tur e siglonan largu cu “hende a dominá hende pa su perhuicio” dor cu hende a goberná independiente di Dios.—Eclesiástes 8:9.
13. Ki punto di bista realístico Testigonan di Jehova tin di loke hende por logra?
13 En bista dje situacion di humanidad, Testigonan di Jehova ta realisá cu tin límite na loke hende por logra den e actual sistema di cosnan. Un actitud positivo por yuda conserbá nos goso, pero esei no ta e solucion pa tur cos. Na principio di añanan ’50, un pastor mericano a publicá un buki cu a bende bon, titulá The Power of Positive Thinking (E Poder di Pensamentu Positivo). E buki a indicá cu hende por superá mayoria obstáculo si trata nan cu un actitud positivo. Pensa positivo sigur ta algu admirabel. Pero experencia ta mustra cu conocimentu, abilidad, medionan material i un cantidad di otro factor ta restringí loke nos como personanan individual por logra. I riba escala mundial, e problemanan gewoon ta demasiado grandi pa hende solucioná nan cu éxito, maske con positivo nan pensamentunan ta!
14. Testigonan di Jehova tin un actitud negativo? Splica.
14 Debí n’e Testigonan di Jehova su punto di bista realístico dje asuntunan ei, hende tin bes ta acusá nan di tin un actitud negativo. Al contrario, nan ta ansioso pa conta hende tocante e único Persona cu por drecha humanidad su situacion permanentemente. Den esaki tambe nan ta imitá e actitud mental di Cristo. (Romanonan 15:2) I nan ta druk yudando hende adkerí un bon relacion cu Dios. Nan sa cu a lo largu, esei ta loke lo haci mas tantu bon.—Mateo 28:19, 20; 1 Timoteo 4:16.
15. Con e trabou di Testigonan di Jehova ta mehorá hende?
15 Testigonan di Jehova no ta ignorá e problemanan social rond di nan—foral e prácticanan no-bíblico cu ta haci hende impuru. Promé cu un persona interesá bira un Testigo di Jehova, e ta haci cambio, hopi bes e tin cu vence bicionan cu ta desagradá Dios. (1 Corintionan 6:9-11) Pues Testigonan di Jehova a yuda esnan cu a reaccioná faborabel pa vence buracheria, adiccion na droga, inmoralidad i adiccion na wega di placa. E personanan reformá ei a siña percurá pa nan famia den un manera responsabel i onesto. (1 Timoteo 5:8) Ora yuda personanan individual i famianan den e manera aki, esei ta reducí problemanan den comunidad, tin ménos drogadicto, ménos caso di violencia den famia, etcétera. Dor cu e Testigonan mes ta ciudadanonan cu ta cumpli cu ley i dor di yuda otro hende mehorá nan bida, e Testigonan di Jehova ta baha e carga di agencianan cu ta trata cu problemanan social.
16. Di con Testigonan di Jehova no ta enbolbé nan mes den movementunan seglar pa haci reforma?
16 Pues, Testigonan di Jehova a cambia e ambiente moral na mundu? Wel, den e último década e cantidad di Testigo activo a aumentá for di un poco ménos di 3.800.000 pa casi 6.000.000. Esaki ta un aumento di 2.200.000 persona, di cua hopi a stop cu prácticanan inhustu ora nan a bira cristian. Ta hopi bida a mehorá! Tog, e cantidad aki ta hopi chikitu compará cu e aumento di poblacion durante e mésun periodo ei: 875.000.000! Testigonan di Jehova ta haña goso den yuda personanan cu reaccioná faborabel, aunke nan ta realisá cu ta poco hende lo tuma e caminda cu ta hiba na bida. (Mateo 7:13, 14) Miéntras cu e Testigonan ta warda riba e cambionan mundial cu Dios so por haci pa drecha mundu, nan no ta enbolbé nan mes den movementunan seglar pa haci reforma, movementunan cu hopi bes ta cuminsá cu bon intencion pero cu ta caba na desilusion i asta violencia.—2 Pedro 3:13.
17. Kico Jesus a haci pa yuda hende rond di dje, pero kico e no a haci?
17 Siguiendo e curso aki, Testigonan di Jehova ta demostrá e mésun confiansa den Jehova cu Jesus tabatin tempu e tabata riba tera. Aya den promé siglo, Jesus a efectuá curacionnan milagroso. (Lucas 6:17-19) El a asta resucitá hende morto. (Lucas 7:11-15; 8:49-56) Pero e no a eliminá e problema di malesa ni a vence e enemigu, morto. E tabata sa cu ainda no tabata Dios su debido tempu pa esei. Cu e abilidadnan superior cu Jesus tabatin como hende perfecto, probablemente lo e por a haci hopi cos pa solucioná problemanan político i social serio. Ta parce cu algun di su contemporáneonan tabata kier pa e tuma poder i actua den e manera aki, pero Jesus a nenga. Nos ta lesa: “Ora e hendenan a mira e señalnan cu el a haci, nan a cuminsá bisa: ‘Esaki siguramente ta e profeta cu mester a bini den mundu.’ P’esei, Jesus, sabiendo cu nan tabata cerca di bini i cog’é i hacié rey, a retirá su mes atrobe n’e montaña su so.”—Juan 6:14, 15.
18. (a) Con Jesus semper a demostrá un actitud di warda? (b) Con Jesus su actividad a cambia desde 1914?
18 Jesus a nenga di enbolbé su mes den política of den trabou puramente social, pasobra e tabata sa cu e tempu pa e tuma poder como rey i cura tur hende na tur parti, ainda no a yega. Asta despues cu el a subi na shelu como un persona spiritual inmortal, e tabata dispuesto pa warda riba Jehova su tempu señalá promé cu e tuma accion. (Salmo 110:1; Echonan 2:34, 35) Sin embargo, desde su entronisacion na 1914 como Rey dje Reino di Dios, “el a sali venciendo i pa completá su victoria.” (Revelacion 6:2; 12:10) Esta gradicidu nos ta di por someté na su reinado, miéntras cu otro hende cu ta pretendé di ta cristian ta scoge pa keda ignorante dje siñansanan di Bijbel tocante e Reino!
Warda—Un Fuente di Frustracion of di Goso?
19. Ki ora warda riba algu ta “haci e curason enfermo,” i ki ora e ta un fuente di goso?
19 Sálomon tabata sa cu warda riba algu por ta frustrante. El a skirbi: “Expectativa posponé ta haci e curason enfermo.” (Proverbionan 13:12) Sigur si un persona tin expectativanan infundá, e curason por bira enfermo di decepcion. Sin embargo, warda riba sucesonan felis—kisas un casamentu, nacementu di un yu of un reencuentro cu hende cu nos stima—por yena nos cu goso di anticipacion hopi tempu promé cu e dia p’e suceso cumpli. E goso ei ta bira mas intenso si nos usa e tempu di warda den un manera sabí, haciendo preparacion pa e binidero suceso.
20. (a) Ki sucesonan maraviyoso nos ta verwagt di mira sigur? (b) Con nos por haña goso miéntras cu nos ta warda pa Jehova su propósitonan cumpli?
20 Ora nos tin pleno confiansa cu nos expectativanan lo ser cumplí—asta si nos no sa ki dia nan lo cumpli—e periodo di warda no tin nodi “haci e curason enfermo.” Dios su fiel adoradónan sa cu Cristo su Reinado di Mil Aña ta cerca. Nan tin sigur cu nan lo mira fin di morto i malesa. Cu anticipacion ansioso nan ta warda cu goso e tempu ora cu nan lo duna bon biní na miles di miyones di hende for di morto, incluso nan defuntu sernan kerí. (Revelacion 20:1-3, 6; 21:3, 4) Den e tempu aki di crísis ecológico, nan ta disfrutá dje prospecto sigur di mira Paradijs ser establecí riba tera. (Isaías 35:1, 2, 7) Ki sabí ta anto pa usa e tempu di warda aki cu sano huicio, “semper teniendo hopi di haci den e trabou di Señor”! (1 Corintionan 15:58) Sigui ingerí alimento spiritual. Desaroyá un relacion mas estrecho posibel cu Jehova. Busca hende cu nan curason ta impulsá nan pa sirbi Jehova. Animá compañeronan creyente. Probechá plenamente di tur e tempu cu Jehova lo permití ainda. E ora ei warda riba Jehova nunca lo haci bo ‘curason enfermo.’ Mas bien, esei lo yena bo cu goso!
Bo Por Splica?
• Con Jesus a demostrá un actitud di warda?
• Den ki situacionnan cristiannan tin mester di un actitud di warda?
• Di con Testigonan di Jehova ta contentu pa warda riba Jehova?
• Den ki manera warda riba Jehova por ta un fuente di goso?
[Preguntanan di Estudio]
[Plachinan na página 12]
Jesus a wanta pa e goso cu tabatin poné su dilanti
[Plachi na página 13]
Asta despues di hopi aña di sirbishi, nos por mantené nos goso
[Plachinan na página 15]
Miyones di hende a mehorá nan bida dor di bira Testigo di Jehova