Reflehá e Actitud Mental di Cristo

“Laga e Dios cu ta suministrá awante i consuelo permití boso tene den boso mes e mésun actitud mental cu Cristo Jesus tabatin.”—ROMANONAN 15:5.

1. Con e actitud di un persona por influenciá su bida?

ACTITUD ta haci un diferencia grandi den bida. Un actitud indiferente of diligente, un actitud positivo of negativo, un actitud cla pa bringa of cla pa cooperá, un actitud kehoso of gradicidu, por influenciá mashá con un persona ta trata cu situacionnan i con otro hende ta reaccioná riba e persona. Un hende cu un bon actitud por ta felis asta den situacionnan basta difícil. Pa un persona cu un mal actitud nada no ta bon, asta ora—for di un punto di bista obhetivo—bida ta bon.

2. Con un persona ta siña un actitud?

² Hende por siña un actitud, sea bon of malu. De echo, ta siña bo tin cu siña un actitud. Papiando di un mucha recien nací, Collier’s Encyclopedia ta bisa: “E actitudnan cu lo e bai tin cu tempu, e mester adkerí of siña, casi mescos cu e tin cu siña un idioma of cualkier otro abilidad.” Con nos ta siña un actitud? Aunke tin hopi cos ta hunga un rol, ambiente i asociacion tin hopi influencia. E enciclopedia ariba mencioná ta comentá: “Nos ta siña of absorbá, como si fuera mediante e proceso di osmósis, e actitudnan di esnan cu ken nos tin asociacion estrecho.” Miles di aña pasá, Bijbel a bisa algu similar: “Esun cu ta cana cu hende sabí lo bira sabí, pero esun cu tin trato cu hende estúpido lo bai e malu.”—Proverbionan 13:20; 1 Corintionan 15:33.

Un Modelo pa Actitud Corecto

3. Ken tabata ehemplar den su actitud, i con nos por imit’é?

³ Den e asuntu di actitud, mescos cu den tur otro cos, Jesucristo a pone e mihó ehempel. El a bisa: “Mi a pone e modelo pa boso, pa, mescos cu mi a haci cu boso, boso tambe mester haci.” (Juan 13:15) Pa nos ta manera Jesus, nos tin cu siña tocante dje promé. * Nos ta studia e bida di Jesus cu e intencion di haci loke apostel Pedro a recomendá: “P’e curso aki boso a ser yamá, pasobra asta Cristo a sufri pa boso, lagando un modelo pa boso sigui su pasonan cu sumo cuidou i atencion.” (1 Pedro 2:21) Nos meta ta pa ser mas tantu posibel manera Jesus. Esei ta encerá cultivá e actitud mental cu e tabatin.

4, 5. Romanonan 15:1-3 ta resaltá ki aspecto dje actitud mental di Jesus, i con cristiannan por imit’é?

⁴ Kico ta encerá tin e actitud mental di Cristo Jesus? Capítulo 15 di Pablo su carta n’e romanonan ta yuda nos contestá e pregunta ei. Den e promé par di versículonan dje capítulo aki, Pablo ta referí na un cualidad sobresaliente di Jesus ora e ta bisa: “Pero, nos cu ta fuerte mester soportá debilidadnan di esnan cu no ta fuerte, i no ta agradando nos mes. Laga cada un di nos agradá su próhimo den loke ta bon pa su edificacion. Pasobra asta e Cristo no a  agradá su mes; sino net manera ta pará skirbí: ‘Reproche di esnan cu tabata reprochá bo a cai riba mi.’”—Romanonan 15:1-3.

⁵ Imitando e actitud di Jesus, cristiannan ta ser animá pa ta prepará pa sirbi e necesidadnan di otro hende cu humildad en bes di kier agradá nan mes so. De echo, tal actitud humilde i dispuesto pa sirbi otro hende ta un característica di esnan “cu ta fuerte.” Jesus, cu tabata mas fuerte spiritualmente cu cualkier hende cu a yega di biba, a bisa tocante su mes: “E Yu di hende a bini, no pa ser sirbí, sino pa sirbi i pa duna su alma como rescate en cambio pa hopi.” (Mateo 20:28) Como cristian, nos tambe kier haci esfuerso pa sirbi otro hende, incluso “esnan cu no ta fuerte.”

6. Con nos por imitá e manera cu Jesus a reaccioná riba oposicion i reproche?

⁶ Un otro característica excelente cu Jesus a manifestá tabata un forma di pensa i actua cu tabata semper constructivo. Nunca el a permití e actitud negativo di otro hende influenciá su propio actitud excelente pa cu sirbi Dios; nos tampoco no mester permití esei. Ora nan a reprochá i persiguí Jesus pasobra el a adorá Dios fielmente, el a wanta esei cu pacenshi sin keha. E tabata sa cu esnan cu ta purba agradá nan próhimo “den loke ta bon pa su edificacion” por verwagt oposicion di parti di un mundu incrédulo i sin comprendimentu.

7. Con Jesus a manifestá pacenshi, i di con nos mester haci mescos?

⁷ Jesus a demostrá un actitud corecto den otro maneranan. Nunca el a expresá falta di pacenshi cu Jehova, sino a warda cu pacenshi riba e realisacion di Jehova su propósitonan. (Salmo 110:1; Mateo 24:36; Echonan 2:32-36; Hebreonan 10:12, 13) Ademas, Jesus no a bira impaciente cu su siguidónan. El a bisa nan: “Siña di mi”; ya cu e tabata “di genio suave,” su instruccion tabata edificante i refrescante.  I pasobra e tabata “humilde di curason,” nunca e no tabata pretensioso of arogante. (Mateo 11:29) Pablo ta animá nos pa imitá e aspectonan aki dje actitud di Jesus ora e ta bisa: “Mantené den boso e actitud mental aki cu tabatin den Cristo Jesus tambe, kende, aunke tabata existí den e forma di Dios, no a duna consideracion na un tumamentu di poder, esta, cu e mester ta igual cu Dios. No, sino a rebahá su mes i a tuma forma di un esclabo i a yega di ta den e semehansa di hende.”—Filipensenan 2:5-7.

8, 9. (a) Di con nos tin cu traha pa cultivá un actitud inegoista? (b) Di con nos no mester descurashá si nos no por sigui perfectamente e modelo cu Jesus a laga atras, i con Pablo tabata un bon ehempel relacioná cu esaki?

⁸ Ta fácil pa bisa cu nos kier sirbi otro hende i kier pone nan necesidadnan promé cu di nos mes. Pero un examinacion onesto di nos actitud mental podisé ta revelá cu nos curason no ta completamente incliná na esei. Di con no? Na promé lugá, pasobra nos a heredá característicanan egoista di Adam cu Eva; na di dos lugá, pasobra nos ta biba den un mundu cu ta promové egoismo. (Efesionan 4:17, 18) Hopi bes, desaroyá un actitud inegoista ta nificá cultivá un forma di pensa cu ta contrali na e naturalesa imperfecto cu nos a nace cuné. Esei ta exigí determinacion i esfuerso.

⁹ Nos imperfeccion obvio, cu ta para na contraste skerpi cu e modelo perfecto cu Jesus a laga atras pa nos, tin biaha por descurashá nos. Podisé nos ta duda si ta asta posibel pa nos tin e mésun actitud mental cu Jesus tabatin. Pero tuma nota di Pablo su palabranan animador: “Mi sa cu den mi, esta, den mi carni, no ta biba nada bon; pasobra e facultad di deseá ta presente cu mi, pero e facultad di obra loke ta excelente no ta presente. Pasobra e bon cu mi ta deseá mi no ta haci, pero e malu cu mi no ta deseá ta loke mi ta practicá. Realmente mi tin deleite den e ley di Dios segun e hende cu mi ta paden, pero mi ta contemplá den mi miembronan un otro ley cu ta haci guera contra e ley di mi mente i ta hiba mi catibu n’e ley di picá cu ta den mi miembronan.” (Romanonan 7:18, 19, 22, 23) Ta cierto cu Pablo su imperfeccionnan a strob’é bes tras bes di efectuá Dios su boluntad manera el a deseá, pero su actitud—e manera cu el a pensa i sinti tocante Jehova i Su ley—tabata ehemplar. Di nos tambe por ta asina.

Con pa Corigí Actitud Robes

10. Pablo a animá e filipensenan pa cultivá cua actitud mental?

¹⁰ Ta posibel cu algun hende tin cu corigí un actitud robes? Sí. Evidentemente esaki tabata e caso cu cierto cristiannan den promé siglo. Den su carta n’e filipensenan, Pablo a papia tocante tene e actitud corecto. El a skirbi: “No cu mi a ricibié caba [esta, bida celestial mediante e resureccion mas promé] of a ser perfeccioná caba, sino cu mi ta sigui pa mira si ami tambe por haña gara dje cos pa cua Cristo Jesus tambe a haña gara di mi. Rumannan, mi no ta considerá cu mi a haña gara di dje ainda; pero tin un solo cos tocante dje: Lubidando loke ta patras i forsando padilanti pa loke ta mas ayá, mi ta sigui den direccion dje meta p’e premio dje yamada djariba di Dios mediante Cristo Jesus. Laga nos, anto, cuantu di nos cu ta maduro, sea dje actitud mental aki.”—Filipensenan 3:12-15.

11, 12. Den ki maneranan Jehova ta revelá un actitud mental corecto na nos?

¹¹ Pablo su palabranan ta mustra cu ken cu ta sinti cu despues cu el a bira cristian e no tin nodi haci progreso, tin un actitud robes. E persona ei no a adoptá e actitud mental di Cristo. (Hebreonan 4:11; 2 Pedro 1:10; 3:14) E situacion di un persona asina ta sin speransa? Absolutamente cu no. Dios por yuda nos cambia nos actitud si di berdad nos kier. Pablo ta sigui bisa: “Si boso ta incliná mentalmente di otro manera den cualkier sentido, Dios lo revelá e actitud mencioná ariba na boso.”—Filipensenan 3:15.

¹² Sin embargo, si nos kier pa Jehova revelá e actitud corecto na nos, nos tin cu haci nos  parti. Studia e Palabra di Dios compañá cu oracion i cu yudansa di publicacionnan cristian cu “e esclabo fiel i discreto” a percurá, lo capacitá esnan “incliná mentalmente di otro manera” pa desaroyá un actitud corecto. (Mateo 24:45) Ancianonan cristian, cu spiritu santu a nombra “pa pastoreá e congregacion di Dios,” lo ta contentu di por ofrecé apoyo. (Echonan 20:28) Ki gradicidu nos ta cu Jehova ta tene cuenta cu nos imperfeccionnan i amorosamente ta ofrecé yudansa! Laga nos acept’é.

Siña for di Otro Hende

13. Kico e relato bíblico di Job ta siña nos tocante un actitud corecto?

¹³ Na Romanonan capítulo 15, Pablo ta mustra cu meditá riba ehempelnan histórico por yuda nos ahustá nos actitud. E ta skirbi: “Tur loke a ser skirbí den tempu pasá a ser skirbí pa nos instruccion, pa mediante nos awante i mediante e consuelo for dje Scritura nos por tin speransa.” (Romanonan 15:4) Algun fiel sirbidó di Jehova di pasado mester a corigí cierto aspectonan di nan actitud. Por ehempel, en general Job tabatin un actitud excelente. Nunca el a atribuí malu na Jehova, i niun ora so e no a permití sufrimentu sagudí su confiansa den Dios. (Job 1:8, 21, 22) Sin embargo, e tabata incliná na hustificá su mes. Jehova a manda Elihú pa yuda Job rectificá e inclinacion aki. En bes di sinti su mes ofendí, Job a aceptá humildemente cu e mester cambia su actitud i a cuminsá haci esei mesora.—Job 42:1-6.

14. Con nos por ta manera Job si nos haña conseho en cuanto nos actitud?

¹⁴ Nos lo reaccioná manera Job si un compañero cristian bisa nos bondadosamente cu nos a duna prueba di tin un actitud robes? Mescos cu Job, laga nos nunca “atribuí nada impropio na Dios.” (Job 1:22) Si nos ta sufri inhustamente, laga nos nunca keha of tene Jehova responsabel pa nos problemanan. Laga nos evitá di purba hustificá nos mes, cordando cu sin importá ki privilegionan nos por tin den Jehova su sirbishi, tog nos ta solamente “esclabo cu no ta sirbi pa nada.”—Lucas 17:10.

15. (a) Algun siguidó di Jesus a revelá ki actitud robes? (b) Con Pedro a demostrá un actitud excelente?

¹⁵ Durante promé siglo, algun hende cu a scucha Jesus, a desplegá un actitud robes. Na un ocasion, Jesus a bisa algu cu tabata difícil pa comprendé. Como reaccion riba esei, “hopi di su disipelnan, ora nan a tende esaki a bisa: ‘E discurso aki ta ofensivo; ken por scuch’é?’”  Ta bisto cu esnan cu a papia asina tabatin un actitud robes. I nan actitud robes a pone nan stop di scucha Jesus. E registro ta bisa: “Debí na esaki hopi di su disipelnan a bolbe na e cosnan cu nan a laga atras i no a cana cuné mas.” Pero ta nan tur tabatin un actitud robes? No. E relato ta sigui: “P’esei Jesus a bisa e diesdosnan: ‘Boso no kier bai tambe, berdad?’ Simon Pedro a contest’é: ‘Señor, cerca ken nos lo bai?’” Eigenlijk, Pedro e ora ei a contestá su mes pregunta: “Abo tin e dichonan di bida eterno.” (Juan 6:60, 66-68) Esta un actitud excelente! Ora nos haña nos confrontá cu splicacionnan of un comprendimentu mas refiná dje Scritura cu na promé instante kisas nos ta hañá ta difícil pa aceptá, lo no ta bon pa desplegá e actitud cu Pedro a demostrá? Esta bobo lo ta pa stop di sirbi Jehova of pa papia den un manera cu ta contrali na “e patronchi di palabranan saludabel” djis pasobra algun cos na promé instante ta difícil pa comprendé!—2 Timoteo 1:13.

16. E lidernan religioso hudiu di Jesus su tempu a manifestá ki actitud escandaloso?

¹⁶ E lidernan religioso hudiu di promé siglo no a manifestá e actitud mental cu Jesus tabatin. Ora Jesus a lanta Lázaro for di morto nan a demostrá nan determinacion firme pa no scucha Jesus. Pa ken cu tabatin un actitud corecto, e milager ei lo tabata un prueba absoluto cu ta Dios a manda Jesus. Sin embargo, nos ta lesa: “Consecuentemente, e sacerdotenan principal i e fariseonan a reuní e Sanedrin huntu i a cuminsá bisa: ‘Kico nos mester haci, pasobra e homber aki ta ehecutá hopi señal? Si nos lagu’e asina akí, nan tur lo pone fe den dje, i e romanonan lo bini i kita tantu nos lugá como nos nacion.’” Nan solucion? “For dje dia ei padilanti nan a cuminsá deliberá pa mat’é.” Fuera di traha complot pa mata Jesus, nan a prepará pa destruí e evidencia bibu cu e ta un hacidó di milager. “E sacerdotenan principal a cuminsá deliberá pa mata Lázaro tambe.” (Juan 11:47, 48, 53; 12:9-11) Esta repugnante lo ta si nos mester fomentá un actitud similar i ta bira iritá of rabia pa cosnan pa cua en realidad nos mester alegrá! Sí, i esta peligroso!

Imitando Cristo Su Actitud Positivo

17. (a) Bou di ki circunstancia Daniel a demostrá un actitud di no tin miedu? (b) Con Jesus a demostrá cu e tin curashi?

¹⁷ Jehova su sirbidónan ta mantené un actitud positivo. Ora cu Daniel su enemigunan a conspirá pa laga pasa un ley cu a prohibí pa haci peticion durante 30 dia na cualkier dios of hende cu no ta n’e rey, Daniel tabata sa cu esaki tabata un atake contra su relacion cu Jehova Dios. Lo el a keda 30 dia sin haci oracion na Dios? No, sin miedu el a sigui haci oracion na Jehova tres bes pa dia, manera tabata su custumber. (Daniel 6:6-17) Di igual manera Jesus a nenga di laga su enemigunan intimid’é. Riba un sabat, el a topa un homber cu man secu. Jesus tabata sa cu hopi hudiu presente lo a keda malcontentu si el a cura un hende riba sabat. El a puntra nan stret pa bisa kico nan ta pensa di esei. Ora nan a nenga di contestá, Jesus a dal bai i cura e homber. (Marco 3:1-6) Jesus nunca a hala atras i keda sin cumpli cu su comision ora el a sinti cu esei tabata e cos corecto pa haci.

18. Pakico algun hende ta oponé nos, pero con nos mester reaccioná riba nan actitud negativo?

¹⁸ Testigonan di Jehova awe ta reconocé cu nunca nan tampoco mester laga posibel reaccion negativo di opositor intimidá nan. Sino  nan lo no ta desplegando e actitud mental di Jesus. Hopi hende ta oponé Testigonan di Jehova, algun pasobra nan no conocé e echonan i otronan pasobra nan ta odia e Testigonan of nan mensahe. Pero nunca laga nan actitud antipático afectá nos actitud positivo. Nunca nos mester laga otro hende dicta e manera cu nos ta adorá.

19. Con nos por manifestá un actitud mental manera di Jesucristo?

¹⁹ Jesus semper a desplegá un actitud mental positivo pa cu su siguidónan i pa cu e areglonan di Dios, maske con difícil esei tabata. (Mateo 23:2, 3) Nos mester imitá su ehempel. Ta cierto cu nos rumannan ta imperfecto, pero nos tambe. I unda otro nos por haña mihó compañero i amigunan berdaderamente leal cu no ta den nos hermandad mundial? Ainda Jehova no a duna nos un comprendimentu completo di su Palabra skirbí, pero cua grupo religioso ta comprendé mas? Laga nos semper mantené e actitud mental corecto, e actitud mental cu Jesucristo tabatin. Entre otro cosnan, esei ta encerá sa con pa warda riba Jehova, loke nos lo bai considerá den e siguiente artículo.

[Nota]

Bo Por Splica?

• Con nos actitud ta afectá nos bida?

• Describí e actitud mental di Jesucristo.

• Kico nos por siña for dje actitud di Job?

• Cua ta e actitud corecto cu nos mester tin ora nos ta confrontá oposicion?

[Preguntanan di Estudio]

[Plachinan na página 7]

Un cristian cu e actitud corecto ta haci esfuerso pa yuda otro hende

[Plachi na página 9]

Studia e Palabra di Dios compañá cu oracion ta yuda nos adoptá e actitud mental di Cristo