“E Ora A Yega!”
“E Ora A Yega!”
“Su ora a yega p’e sali for dje mundu aki pa bai n’e Tata.”—JUAN 13:1.
1. Segun cu Pascu hudiu di aña 33 E.C. ta acercá, ki tipo di speculacion tin tur caminda na Jerusalem, i di con?
NA SU bautismo na aña 29 E.C., Jesus a tuma un curso cu lo a hiba n’e “ora” di su morto, resureccion i glorificacion. Awor ta primavera di aña 33 E.C. Un par di siman so a pasa desde cu e corte supremo hudiu, Sanedrin, a deliberá pa mata Jesus. Ora Jesus a haña sa di nan plan, posiblemente via Nicodemo, un miembro di Sanedrin cu tabata na su fabor, el a sali for di Jerusalem i bai n’e region di cunucu na otro banda di riu Jordan. Segun cu e Fiesta di Pascu ta yega cerca, hopi hende ta bini Jerusalem for di cunucu, i tur caminda den e stad tin speculacion tocante Jesus. Hende ta puntra otro: “Kico boso ta opiná? Cu lo e no bini mes n’e fiesta?” E sacerdotenan principal i e fariseonan a haci e asuntu mas interesante ainda dor di duna ordu pa ken cu mira Jesus, raportá na nan unda e ta.—Juan 11:47-57.
2. Kico Maria a haci cu a lanta controversia, i kico e contesta cu Jesus a duna pa defend’é ta mustra tocante con conciente e tabata di “su ora”?
2 Riba dia 8 di nísan, seis dia promé cu Pascu hudiu, Jesus ta bek den becindario di Jerusalem. E ta bai Betania, pueblo di Marta, Maria i Lázaro, su amigunan stimá, cu ta keda rond di 3 kilometer leu di Jerusalem. Ta diabierne anochi, i Jesus ta pasa Sabat einan. Su siguiente anochi ora Maria ta sirbié usando zeta perfumá hopi caru, e disipelnan ta protestá. Jesus ta contestá: “Lagu’e, p’e observá e custumber aki en bista dje dia di mi entiero. Pasobra boso semper tin hende pober cu boso, pero ami boso lo no tin semper.” (Juan 12:1-8; Mateo 26:6-13) Jesus tabata sa cu “su ora a yega p’e sali for dje mundu aki pa bai n’e Tata.” (Juan 13:1) Cincu dia mas i lo e “duna su alma como un rescate en cambio pa hopi.” (Marco 10:45) Di awor pa dilanti, un sentido di urgencia ta afectá tur loke Jesus ta haci i siña. Esta un ehempel maraviyoso esei ta pa nos, segun cu nos ta warda ansiosamente riba e fin dje sistema di cosnan aki! Wak kico ta pasa den e caso di Jesus e siguiente dia mes.
E Dia di Jesus Su Entrada Triunfal
3. (a) Con Jesus ta drenta Jerusalem riba diadomingo, dia 9 di nísan, i con mayoria hende rond di dje ta reaccioná? (b) Kico Jesus ta contestá e fariseonan cu ta keha tocante e multitud?
3 Riba diadomingo dia 9 di nísan Jesus ta bai Jerusalem na moda triunfal. Segun cu e ta acercando e stad riba un yu di buricu, cumpliendo cu Zacarías 9:9, mayoria hende cu a reuní rond di dje ta habri nan paña riba caminda, miéntras cu otronan ta corta rama di palu pa habri nan abou na suela. Nan ta grita: “Bendicioná ta Esun cu ta bini como Rey den e nomber di Jehova!” Algun fariseo den e multitud kier pa Jesus reprendé su disipelnan. Pero Jesus ta respondé: “Mi ta bisa boso: Si esakinan keda ketu, e piedranan mes lo sclama.”—Lucas 19:38-40; Mateo 21:6-9.
4. Di con Jerusalem ta cai den un tumulto ora Jesus drenta e stad?
4 Djis un par di siman promé, hopi di esnan den e multitud a mira Jesus resucitá Lázaro. Awor nan ta sigui conta otro hende tocante e milager ei. P’esei, ora Jesus drenta Jerusalem, henter e stad ta den un tumulto. Hendenan ta puntra: “Ken esei ta?” Anto e multitud ta sigui bisa: “Esaki ta e profeta Jesus, di Názaret di Galilea!” Mirando kico ta sosodé, e fariseonan ta lamentá: “Mundu a bai tras di dje.”—Mateo 21:10, 11; Juan 12:17-19.
5. Kico ta pasa ora Jesus bai n’e tempel?
5 Manera ta su custumber ora e bishitá Jerusalem, Jesus, e Gran Maestro, ta bai n’e tempel p’e siña hende. Einan, esnan ciegu i lam ta bai cerca dje, i e ta cura nan. Ora e sacerdotenan principal i e escribanan mira esaki i tende e muchanan den tempel grita: “Salba, nos ta roga, Yu di David!”, nan ta rabia. Nan ta protestá bisando: “Bo ta tende loke esakinan ta bisa?” Jesus a contestá: “Sí. Boso no a lesa esaki nunca: ‘For di boca di baby i yu na pechu bo a percurá alabansa’?” Miéntras cu Jesus ta sigui duna siñansa, e ta observá cu atencion kico ta tuma lugá den e tempel.—Mateo 21:15, 16; Marco 11:11.
6. Con Jesus su moda di procedé ta diferente compará cu promé, i di con?
6 Ki diferente Jesus su moda di procedé ta awor compará cu seis luna promé! E tempu ei el a drenta Jerusalem p’e Fiesta di Tabernáculo “no abiertamente sino na secreto.” (Juan 7:10) I semper el a tuma medida pa scapa ora su bida tabata na peliger. Awor e ta drenta abiertamente den e stad caminda nan a duna ordu pa gar’é! Tampoco no tabata Jesus su custumber di duna su mes di conocé como e Mesías. (Isaías 42:2; Marco 1:40-44) E no tabata kier pa sensacionalismo of informenan trocí tocante dje bai rond di boca pa boca. Awor e multitud ta declará abiertamente cu e ta Rey i Salbador, e Mesías, anto e ta scual e lidernan religioso cu ta pidi pa bisa nan keda ketu! Di con un cambio asina? Dor cu, manera Jesus ta anunciá su siguiente dia mes: “E ora a yega p’e Yu di hende ser glorificá.”—Juan 12:23.
Accion cu Curashi—Despues Siñansa Cu Ta Salba Bida
7, 8. Con loke Jesus a haci riba dia 10 di nísan di aña 33 E.C., a parce loke el a haci den e tempel na Pascu hudiu di aña 30 E.C.?
7 Ora Jesus yega n’e tempel riba dialuna dia 10 di nísan, e ta tuma accion contra di loke el a mira e atardi promé. E ta cuminsá ‘saca afó esnan cu tabata bende i cumpra den e tempel, i boltu e mesanan di trocadó di placa i e bankinan di esnan cu tabata bende palomba; i e no a laga ningun hende carga un artículo di uso dor dje tempel.’ Condenando e malechornan, e ta declará: “No ta pará skirbí: ‘Mi cas lo ser yamá un cas di oracion pa tur e nacionnan’? Pero boso a hacié un cueba di ladron.”—Marco 11:15-17.
8 E accionnan di Jesus ta parce loke el a haci tres aña promé, tempu el a bishitá e tempel na Pascu hudiu di aña 30 E.C. Pero e biaha aki su denuncia ta mas skerpi. E biaha aki e ta yama e comerciantenan den tempel “ladron.” (Lucas 19:45, 46; Juan 2:13-16) Nan ta ladron dor cu nan ta cobra esnan cu mester cumpra bestia pa haci sacrificio prijsnan exorbitante. E sacerdotenan principal, escribanan i esnan prominente den e pueblo ta tende loke Jesus ta haci, i nan ta bolbe busca manera pa mat’é. Pero nan no sa con pa caba cu Jesus, pasobra henter e pueblo, siendo asombrá cu su siñansa, ta rond di dje tur ora pa scuch’é.—Marco 11:18; Lucas 19:47, 48.
9. Ki les Jesus ta duna, i ki invitacion e ta extendé na esnan cu ta scuch’é den tempel?
9 Continuando cu su siñamentu den tempel, Jesus ta declará: “E ora a yega p’e Yu di hende ser glorificá.” Sí, e sa cu ta un par di dia so di bida humano a ked’é. Despues cu Jesus relatá con un grano di trigu mester muri pa e por duna fruta—mescos cu e mes tambe tin cu muri i bira un medio pa duna otronan bida eterno—e ta extendé un invitacion na esnan cu ta scuch’é: “Si un hende kier sirbi mi, lagu’e sigui mi, i unda mi ta mi sirbidó lo ta tambe. Si un hende kier sirbi mi, e Tata lo onr’é.”—Juan 12:23-26.
10. Con Jesus ta sinti tocante e morto agonisante cu ta sper’é?
10 Pensando riba su morto agonisante cu ta bai tuma lugá aki cuater dia so, Jesus ta sigui bisa: “Awor mi alma ta perturbá, i kico lo mi bisa? Tata, salba mi for dje ora aki.” Pero loke ta spera Jesus ta inevitabel. E ta bisa: “No obstante, ta p’esaki mes mi a yega n’e ora aki.” Sí, Jesus ta di acuerdo cu henter e areglo di Dios. E ta determiná pa laga boluntad divino goberná su accionnan te na su morto sacrificial. (Juan 12:27) Esta un ehempel di sumision completo na boluntad divino el a pone pa nos!
11. Ki siñansanan Jesus a impartí na e multitud cu a caba di tende e stem for di shelu?
11 Profundamente preocupá tocante con reputacion di su Tata lo ser afectá dor di su morto, Jesus ta resa: “Tata, glorificá bo nomber.” Pa asombro di e multitud reuní n’e tempel, un stem a bini for di shelu, cu a proclamá: “Mi a glorifik’é i tambe lo glorifik’é atrobe.” E Gran Maestro ta usa e oportunidad aki pa splica e multitud pakico nan a tende e stem, kico lo ta e consecuencianan di su morto, i di con nan tin cu ehercé fe. (Juan 12:28-36) Sin duda e último dos dianan tabata yen di accion pa Jesus. Pero tin un dia crucial na caminda.
E Dia di Denuncia
12. Con e lidernan religioso a purba coge Jesus den trampa riba diamars 11 di nísan, i cu ki resultado?
12 Diamars dia 11 di nísan, Jesus ta bolbe bai den tempel pa siña. Tabatin un grupo di oyente hostil presente. Papiando di loke Jesus a haci e dia promé, e sacerdotenan principal i e ancianonan dje pueblo ta puntr’é: “Cu ki autoridad bo ta haci e cosnan aki? I ken a duna bo e autoridad aki?” E Gran Maestro ta confundí nan cu su contesta, anto e ta relatá tres ilustracion bibu cu a saca na cla con malbado su opositornan ta. Dos dje ilustracionnan ta tocante un hofi di wijndruif i unu ta tocante un fiesta di casamentu. Rabiá dor di loke nan ta tende, e lidernan religioso ta purba gar’é. Pero nan tin miedu dje multitud cu ta considerá Jesus un profeta. Pues, nan ta purba nek e p’e bisa algu pa cua nan por laga arest’é. E contestanan cu Jesus ta duna ta laga nan boca cerá.—Mateo 21:23–22:46.
13. Ki conseho Jesus ta duna su oyentenan relacioná cu e escriba i fariseonan?
13 Ya cu e escriba i fariseonan ta profesá di ta siña hende e Ley di Dios, awor Jesus ta urgi su oyentenan, bisando: “Tur loke nan bisa boso, haci nan i warda nan, pero no haci segun nan obranan, pasobra nan ta bisa pero nan no ta haci.” (Mateo 23:1-3) Esei sí ta un denuncia público poderoso! Pero ainda Jesus no ta cla cu nan. Ta su último dia n’e tempel, i cu curashi e ta trece dilanti un seri di denuncia, un tras di otro nan ta keda resoná manera bos durante mal tempu.
14, 15. Cua denuncianan pisá Jesus a pronunciá contra e escriba i fariseonan?
14 Seis biaha Jesus ta declará: “Ai di boso, escriba i fariseonan, hipócritanan!” Hipócrita nan ta, pasobra, manera e ta splica, nan ta cera Reino di shelu dilanti hende. Nan no ta laga esnan drentando, drenta. E hipócritanan aki ta crusa laman i tera secu pa haci un prosélito, djis pa hacié bira merecedor di destruccion eterno. Nan ta paga masha tinu na dunamentu di diesmo, anto neglishá “asuntunan di mas peso dje Ley, esta, husticia i misericordia i fieldad.” De echo, loke nan ta haci ta limpia “e parti pafó dje kopi i e skotter, pero di paden nan ta yen di plunder i golosidad,” pasobra nan corupcion interno ta scondí tras di un despliegue exterior di debocion. Ademas, nan tabata dispuesto di traha graf p’e profetanan i decorá nan pa hala atencion na nan propio obranan di caridad, apesar cu nan “ta yunan di esnan cu a mata e profetanan.”—Mateo 23:13-15, 23-31.
15 Condenando e falta di balornan spiritual di su oponentenan, Jesus ta bisa: “Ai di boso, guianan ciegu.” Nan ta ciegu den sentido moral, pasobra nan ta duna mas énfasis n’e oro dje tempel cu na e balor spiritual dje lugá di adoracion ei. Na continuacion, Jesus ta expresá su palabranan di denuncia di mas fuerte. El a bisa: “Colebranan, yunan di víbora, con boso lo por hui dje huicio di Gehena?” Sí, Jesus ta bisando nan cu dor cu nan ta sigui un curso malbado, nan ta bai haña destruccion eterno. (Mateo 23:16-22, 33) Laga nos tambe mustra curashi ora di proclamá e mensahe di Reino, asta ora e ta encerá exponé religion falsu.
16. Cua profecia importante Jesus a duna su disipelnan ora nan tabata sintá riba Ceru di Olijfi?
16 Awor Jesus ta bai for dje tempel. Bou dje solo ménos fuerte di atardi, e cu su apostelnan ta subi Ceru di Olijfi. Sintá ei riba, Jesus ta duna e profecia tocante destruccion dje tempel i e señal di su presencia i di conclusion dje sistema di cosnan. E importancia dje palabranan profético aki ta yega te den nos tempu. Tambe Jesus ta bisa su disipelnan e anochi ei: “Boso sa cu aki na dos dia lo tin pascu, i e Yu di hende lo ser entregá pa ser clabá na un staca.”—Mateo 24:1-14; 26:1, 2.
Jesus ‘A Stima Esnan di Dje te na Fin’
17. (a) Cua les Jesus ta siña e diesdosnan durante e Pascu hudiu riba 14 di nísan? (b) Cua conmemoracion Jesus ta instituí despues cu el a manda Hudas Iscariote bai?
17 E siguiente dos dianan, 12 i 13 di nísan, Jesus no ta mustra su mes abiertamente n’e tempel. E lidernan religioso ta busk’é pa mata, i e no kier pa nada strob’é di celebrá Pascu hudiu cu su apostelnan. Ora solo baha diahuebs, dia 14 di nísan ta cuminsá, e último dia di Jesus su bida como ser humano riba tera. Riba e anochi ei, Jesus i su apostelnan ta huntu den un cas na Jerusalem, caminda tabatin preparacion hací pa nan celebrá Pascu hudiu. Durante cu nan ta disfrutá dje Pascu hudiu, e ta siña e diesdosnan un bunita les di humildad dor di laba nan pia. Despues cu e ta manda Hudas Iscariote bai—kende a cumbiní pa traicioná su Maestro pa 30 pida plata, prijs di un simpel esclabo segun e Ley di Moises—Jesus ta introducí e Conmemoracion di su morto.—Éxodo 21:32; Mateo 26:14, 15, 26-29; Juan 13:2-30.
18. Ki otro siñansanan Jesus a impartí amorosamente na su 11 apostelnan fiel, i con el a prepará nan pa su baimentu cu tabata cerca?
18 Despues dje inauguracion dje Conmemoracion, e apostelnan ta cai den un pleitu pisá tocante cua di nan ta esun mas grandi. Na lugá di scual nan, Jesus ta siña nan cu pacenshi tocante e importancia di rindi sirbishi na otronan. Cu aprecio p’e echo cu nan a keda cuné durante su pruebanan, e ta cera un pacto personal cu nan pa un reino. (Lucas 22:24-30) Ademas, Jesus ta manda nan pa stima otro mescos cu e a stima nan. (Juan 13:34) Promé cu Jesus sali for dje sala, e ta prepará nan amorosamente pa su baimentu cu ta asina cerca. E ta sigurá su amistad na nan, ta animá nan pa mustra fe, i ta primintí nan cu nan lo ricibí yudansa di spiritu santu. (Juan 14:1-17; 15:15) Promé cu e sali for dje cas, Jesus ta pidi su Tata: “E ora a yega; glorificá bo yu, p’e yu glorificá bo.” Sí, Jesus a prepará e apostelnan pa su baimentu, i di berdad el a ‘stima esnan di dje te na fin.’—Juan 13:1; 17:1.
19. Di con Jesus ta den agonia den e hofi di Getsémani?
19 Kisas ta basta despues di mei anochi ora Jesus cu su 11 apostelnan fiel ta yega n’e hofi di Getsémani. El a yega di bai einan hopi bes cu su apostelnan. (Juan 18:1, 2) Den cuestion di un par di ora, Jesus ta bai muri como si fuera e ta un criminal despreciabel. E agonia di e experencia aki cu ta sper’é i e manera cu esei lo por trece reproche riba su Tata ta algu asina intenso, cu miéntras Jesus ta resa, su sodó a bira manera gota di sanger cu ta cai na suela. (Lucas 22:41-44) “E ora a yega!” Jesus ta bisa su apostelnan. “Mira! Mi traidor a yega cerca.” Promé cu e caba di papia, Hudas Iscariote ta yega cerca, compañá cu un multitud grandi cu flambeu i lampi i arma. Nan ta bini pa arestá Jesus. E no ta duna resistencia. “Den tal caso,” manera el a splica, “con e Scritura lo por cumpli tocante cu ta asin’akí mester sosodé?”—Marco 14:41-43; Mateo 26:48-54.
E Yu di Hende Glorificá!
20. (a) Ki atrocidadnan Jesus ta pasa aden despues di su aresto? (b) Di con Jesus ta grita: “El a ser cumplí!” net promé cu e muri?
20 Despues di su aresto, testigonan falsu ta acusá Jesus, huesnan cu prehuicio ta declar’é culpabel, Poncio Pilato a sentenci’é, sacerdotenan i un multitud desordená ta harié, i soldánan ta tene bofon di dje i tortur’é. (Marco 14:53-65; 15:1, 15; Juan 19:1-3) Pa diabierne merdia, Jesus ta clabá na un staca di tormento, sufriendo un dolor teribel segun cu peso di su curpa ta sker e heridanan di clabu na su man cu pia. (Juan 19:17, 18) Rond di tres or djatardi, Jesus ta grita: “El a ser cumplí!” Sí, el a completá tur loke el a bini na tera pa haci. Confiando su spiritu den man di Dios, el a sak su cabes i muri. (Juan 19:28, 30; Mateo 27:45, 46; Lucas 23:46) Tres dia despues, Jehova ta resucitá su Yu. (Marco 16:1-6) Cuarenta dia despues cu el a resucitá, Jesus ta subi na shelu i ta ser glorificá.—Juan 17:5; Echonan 1:3, 9-12; Filipensenan 2:8-11.
21. Con nos por imitá Jesus?
21 Con nos por ‘sigui Jesus su pasonan cu sumo cuidou i atencion’? (1 Pedro 2:21) Mescos cuné, laga nos haci esfuerso vigoroso den e trabou di predicá e Reino i haci disipel, i mustra curashi ora di papia e palabra di Dios. (Mateo 24:14; 28:19, 20; Echonan 4:29-31; Filipensenan 1:14) Laga nos nunca perde for di bista unda nos ta den tempu, of keda sin incitá otro na amor i obranan excelente. (Marco 13:28-33; Hebreonan 10:24, 25) Laga e boluntad di Jehova Dios i e realisacion di cu nos ta bibando den “e tempu di fin” goberná henter nos curso di accion.—Daniel 12:4.
Con Lo Bo Contestá?
• E echo cu Jesus tabata sa cu su morto tabata cerca tabatin ki efecto riba su último ministerio den e tempel na Jerusalem?
• Kico ta mustra cu Jesus a ‘stima esnan di dje te na fin’?
• Kico e sucesonan dje último oranan di Jesus su bida ta mustra tocante dje?
• Con nos por imitá Cristo Jesus den nos ministerio?
[Preguntanan di Estudio]
[Plachi na página 18]
Jesus a “stima nan te na fin”