Hosías Humilde Tabatin Jehova Su Aprobacion

PRINS Hosías di cincu aña di edad lo ta spantá. Su mama Jedida ta yora. Jedida tin motibu pa yora pasobra Hosías su tawela, rey Manases, a muri.—2 Reynan 21:18.

Awor Hosías su tata Amon lo bira rey di Huda. (2 Crónicanan 33:20) Dos aña despues (659 P.E.C.), Amon su sirbidónan ta mat’é. E pueblo ta ehecutá e conspiradónan i ta haci e hóben Hosías rey. (2 Reynan 21:24; 2 Crónicanan 33:25) Durante e reinado di Amon, Hosías a custumbrá cu e holó di censia cu a yena aire di Jerusalem debí n’e gran cantidad di altarnan riba dak dilanti cua e hendenan tabata cai na suela den adoracion na diosnan falsu. Bo por a mira sacerdotenan ta cana rond na grandi, i nan debotonan—asta algun cu a pretendé di ta adorá Jehova—tabata hura n’e dios Malcam.—Sofonías 1:1, 5.

Hosías sa cu Amon a haci malu dor di adorá dios falsu. Ademas, Huda su rey hóben a yega na un mihó comprendimentu dje proclamacionnan di e profeta di Dios, Sofonías. Pa tempu cu Hosías tabatin 15 aña (652 P.E.C.), e tabatin ocho aña ta goberná i e tabata decididu pa haci caso dje palabranan di Sofonías. Miéntras e tabata un mucha ainda, Hosías a cuminsá busca Jehova.—2 Crónicanan 33:21, 22; 34:3.

Hosías Ta Drenta Accion!

Cuater aña ta pasa i Hosías ta cuminsá limpia Huda i Jerusalem for di religion falsu (648 P.E.C.). E ta destruí ídolo, e palunan sagrado i e altarnan di censia cu a ser usá den adoracion di Baal. Nan a garna imágen di diosnan falsu na puiru i despues plama nan riba graf di esnan cu a haci sacrificio na nan. Altarnan cu a ser usa pa adoracion impuru ta ser profaná i despues destruí.—2 Reynan 23:8-14.

Hosías su limpiesa tabata den pleno proceso ora Jeremías, e yu homber di un sacerdote levita, a yega Jerusalem (647 P.E.C.). Jehova Dios a nombra e hóben Jeremías como su profeta, i el a declará Jehova su mensahe contra religion falsu cu gran conviccion! Hosías tabatin mas o ménos e mésun edad cu Jeremías. Apesar di Hosías su limpiesa cu curashi i Jeremías su proclamacionnan sin miedu, tog e pueblo a cai lihé bek den adoracion falsu.—Jeremías 1:1-10.

Un Descubrimentu di Balor Incalculabel!

Mas o ménos cincu aña a pasa. Hosías di binticincu aña tin mas o ménos 18 aña ta goberná. E ta yama Safan e secretario, Maaseya e cabesante dje stad i Joa e registradó. E rey ta duna ordu na Safan pa: ‘Bisa Hilkías, e sumo sacerdote, pa tuma e cen cu e bewakernan dje tempel a reuní for dje pueblo i pon’é den man dje trahadónan pa nan por drecha e cas di Jehova.’—2 Reynan 22:3-6; 2 Crónicanan 34:8.

For di mainta trempan, esnan cu ta drecha e tempel ta traha diligentemente. Hosías ta gradicidu sigur na Jehova cu e trahadónan ta drechando e daño cu algun di su antepasadonan malbado a causa na e cas di Dios. Segun cu e trabou ta avansá, Safan ta trece un informe. Pero, ta kico esaki? Wak, e tin un rol den su man! E ta splica cu Sumo Sacerdote Hilkías a haña “e buki di ley  di Jehova na man di Moises.” (2 Crónicanan 34:12-18) Esta un descubrimentu—sin duda, e copia original dje Ley!

Hosías ta ansioso pa tende cada palabra dje buki. Segun cu Safan ta lesa, e rey ta purba wak con cada mandamentu ta aplicá na dje i e pueblo. Loke foral ta impresion’é ta e manera cu e buki ta enfatisá adoracion berdadero i ta predicí e plaganan i exilio cu lo bini si e pueblo participá den religion falsu. Realisando awor cu nan no a cumpli cu tur e mandamentunan di Dios, Hosías a sker su paña i a duna Hilkías, Safan i otronan e ordu: ‘Consultá cu Jehova tocante e palabranan di e buki aki; pasobra grandi ta e furia di Jehova cu tin cendí contra nos pasobra nos antepasadonan no a scucha e palabranan di e buki aki.’—2 Reynan 22:11-13; 2 Crónicanan 34:19-21.

Ta Transmití e Palabra di Jehova

E mensaheronan di Hosías ta bai cerca e profetisa Hulda na Jerusalem i ta regresá cu un informe. Hulda a transmití e palabra di Jehova, indicando cu e calamidadnan registrá den e buki cu nan a descubrí recientemente, lo bini riba e nacion apóstata. Sin embargo, dor cu Hosías a humiyá su mes dilanti Jehova Dios, e lo no tin cu mira e calamidad. Lo e ser hibá den su santana i reuní cu su antepasadonan na pas.—2 Reynan 22:14-20; 2 Crónicanan 34:22-28.

Hulda su profecia tabata exacto, mirando e echo cu Hosías a muri den guera? (2 Reynan 23:28-30) Sí, pasobra e “pas” den cua el a ser reuní den su graf tabata na contraste cu “e calamidad” cu mester a bini riba Huda. (2 Reynan 22:20; 2 Crónicanan 34:28) Hosías a muri promé cu e calamidad di aña 609 pa 607 P.E.C., ora e babilonionan a sitia i destruí Jerusalem. I ‘ser reuní cu un persona su antepasadonan,’ no necesariamente ta excluí un morto violento. Bijbel ta usa un expresion similar pa referí na tantu morto violento como no-violento.—Deuteronomio 31:16; 1 Reynan 2:10; 22:34, 40.

Adoracion Berdadero Ta Avansá

Hosías ta reuní e pueblo di Jerusalem n’e tempel i ta lesa pa nan “tur e palabranan di e buki dje pacto” cu nan a haña den e cas di Jehova. Anto e ta cera un pacto “pa sigui Jehova i warda su mandamentunan i su testimonionan i su statutonan cu henter curason i cu henter alma dor di cumpli cu e palabranan dje pacto cu ta skirbí den e buki aki.” Tur hende ta tuma posicion na fabor dje pacto.—2 Reynan 23:1-3.

Awor rey Hosías ta lansa un otro campaña contra idolatria i cu evidentemente ta mas intensivo. E sacerdotenan dje diosnan stranhero di Huda ta perde nan trabou. Sacerdotenan levita enbolbí den adoracion impuru ta perde nan privilegio di sirbi na Jehova su altar, i e lugánan haltu construí durante e reinado di rey Sálomon a ser hací inapropiado pa adoracion. E limpiesa a incluí tambe e teritorio dje reino di dies tribu anterior di Israel, cu mas promé e asirionan a vence (740 P.E.C.).

Den cumplimentu di e palabranan expresá 300 aña promé dor di ‘un homber desconocí dje Dios berdadero,’ Hosías ta kima wesu dje sacerdotenan di Baal riba e altar cu rey Jeróboam I a traha na Betel. Ta remové lugánan haltu for di einan i den otro stadnan, i sacerdotenan idólatra ta ser sacrificá riba e mésun altar caminda nan a rindi sirbishi.—1 Reynan 13:1-4; 2 Reynan 23:4-20.

Ta Celebrá un Pascu Grandioso

Hosías su actonan pa promové adoracion puru tin respaldo divino. Tanten cu e ta na bida, e rey ta gradicí Dios cu e pueblo “no a desviá di sigui Jehova e Dios di nan antepasadonan.” (2 Crónicanan 34:33) I con Hosías por lubidá un suceso maraviyoso cu a tuma lugá durante su di 18 aña di reinado?

E rey ta manda e pueblo: “Celebrá un pascu na Jehova boso Dios di acuerdo cu loke ta skirbí den e buki di pacto [cu a ser hañá recientemente].” (2 Reynan 23:21) Hosías ta keda contentu di mira e excelente reaccion. Pa e celebracion aki, e mes a contribuí cu 30.000 animal di Pascu i 3.000 baca. Esei sí ta un Pascu! Pa loke ta su ofrendanan, areglonan bon planeá i e cantidad di adoradó, e Pascu ei ta surpasá tur Pascu cu nan a celebrá desde e tempu di profeta Samuel.—2 Reynan 23:22, 23; 2 Crónicanan 35:1-19.

 Nan Ta Lamentá Su Morto Profundamente

P’e resto di su 31 aña di reinado (659-629 P.E.C.), Hosías ta goberná como un bon rey. No hopi tempu promé cu su reinado terminá, e ta haña sa cu fárao Neko tin plan pa pasa dor di Huda pa bai interceptá e ehércitonan di Babilonia i asina yuda e rey di Asiria na Carkemis banda di riu Eufrátes. Pa un cierto motibu desconocí, Hosías ta sali pa bringa contra e egipcio. Neko ta manda mensahero p’e, bisando: “Stop, pa bo mes bon pa motibu di Dios, kende ta cu mi, i no lagu’é ruiná bo.” Pero Hosías a disfrasá su mes i a purba manda e egipcionan bek Megido.—2 Crónicanan 35:20-22.

Jammer p’e rey di Huda! Tiradó di flecha enemigu a alcansá nan blanco, i el a bisa su sirbidónan: “Baha mi, pasobra mi ta gravemente heridá.” Nan ta saca Hosías for di su garoshi di guera, pon’é den un otro, i bai rumbo pa Jerusalem. Einan of na caminda p’e stad, Hosías ta hala su último rosea. E relato inspirá ta bisa: “Asina el a muri i a ser derá den santana di su antepasadonan, i henter Huda i Jerusalem a tene rou pa Hosías.” Jeremías a canta di dje, i despues di esei, e rey a bira tema pa cantica di lamento na ocasionnan special.—2 Crónicanan 35:23-25.

Sí, rey Hosías a cometé un eror lamentabel ora el a bai guera contra e egipcionan. (Salmo 130:3) Apesar di esei, su humildad i firmesa a pone cu e tabatin e aprobacion di Dios. E bida di Hosías ta ki un bon prueba cu Jehova ta mustra fabor na su sirbidónan dedicá cu curason humilde!—Proverbionan 3:34; Santiago 4:6.

[Plachi na página 29]

E hóben rey Hosías a busca Jehova sinceramente

[Plachi na página 31]

Hosías a destruí e lugánan haltu i a promové adoracion berdadero