Pronto—Un Mundu sin Desesperacion

BIDA ta bira cada bes mas difícil, i tin hopi motibu pa desesperá. Ora nos ta sinti nos frustrá, por ta difícil pa controlá nos emocionnan. I, asta hende cu stima bida por bira desesperadamente infelis! Considerá un par di ehempel.

Den antigwedad, profeta Moises a bira asina desanimá cu el a bisa Dios: “Por fabor, mata mi i caba cu mi completamente, si mi a haña fabor den bo wowo, i no laga mi mira mi calamidad.” (Númeronan 11:15) Huyendo di su enemigunan, profeta Elías a sclama: “Basta! Awor, o Jehova, kita mi alma [bida].” (1 Reynan 19:4) I profeta Jónas a bisa: “O Jehova, kita, por fabor, mi alma for di mi, pasobra mihó mi muri cu mi keda na bida.” (Jónas 4:3) Pero ni Moises ni Elías ni Jónas no a cometé suicidio. Nan tur a conocé Dios su mandamentu: “Bo no mag mata.” (Éxodo 20:13) Dor cu nan tabatin fe fuerte den Dios, nan tabata conciente cu niun situacion no ta sin speransa, i cu bida ta un regalo di Dios.

Kico dje problemanan cu nos ta enfrentá awe? Ademas di sufrimentu emocional i problema di salú, por tin bes cu nos mester wanta abusu cerca famia, bisiña of coleganan. Bijbel  ta papia di hende cu ta yen di “tur inhusticia, perversidad, cudishi, maldad, siendo yen di envidia, asesinato, pleitu, engaño, disposicion malicioso, siendo hende cu ta fluister, calumniadó, odiadó di Dios, insolente, halsá, soberbe, inventor di cosnan perhudicial, desobediente na mayornan, sin comprendimentu, falsu na acuerdonan, sin cariño natural, sin misericordia.” (Romanonan 1:28-31) Ser rondoná dor di hende asina dia aden dia afó, por haci bida parce difícil. Con nos por yuda esnan cu tin mester di consuelo i alivio?

Sea Dispuesto pa Scucha

Contratempu i sufrimentu por pone un hende perde su balansa mental. E homber sabí a bisa: “Simpel opresion por haci un hende sabí actua manera un hende loco.” (Eclesiástes 7:7) P’esei, si un hende papia di suicidio, mester tum’é na serio. E problemanan cu e tin, sea nan ta emocional, físico, mental of spiritual, kisas ta rekerí accion inmediato. Claro cu tin diferente tipo di tratamentu profesional i terapia, i cada persona mester dicidí pa nan mes ki tipo di terapia nan lo tuma.—Galationan 6:5.

Sin importá pakico e persona ta sinti cu e kier mata su curpa, por haci un gran diferencia p’e si e tin un hende comprensivo, cu dicernimentu i pacenshi pa e por confia aden. Famia i amigunan cu ta dispuesto di scucha lo por yuda. Ademas di sinti pa nan i mustra bondad, esnan cu a perde speransa lo por ser yudá mashá si compartí pensamentu edificante for dje Palabra di Dios cu nan.

Yudansa Spiritual pa Esnan Afligí

Kisas lo sorprendé bo di sa con animador lesamentu di Bijbel por ta. Maske Bijbel no ta un manual di salú mental, e por yuda nos balorá bida. Rey Sálomon a bisa: “Mi a yega di sa cu no tin nada mihó pa nan cu alegrá i haci bon durante bo bida; i tambe pa tur hende come i en berdad bebe i mira e bon pa tur su trabou duru. Esei ta e don di Dios.” (Eclesiástes 3:12, 13) Ademas di trabou satisfaciente cu ta duna bida nificacion, cos simpel manera aire frescu, lus di solo, flor, palu i para, ta donnan di Dios cu nos por disfrutá di dje.

Mas animador ainda ta e siguransa cu Bijbel ta duna nos cu Jehova Dios i su Yu Jesucristo ta interesá den nos. (Juan 3:16; 1 Pedro 5:6, 7) Ta apropiado cu e salmista a bisa: “Bendicioná sea Jehova, kende diariamente ta hiba e carga pa nos, e Dios berdadero di nos salbacion.” (Salmo 68:19) Apesar cu talbes nos ta sinti nos mes insignificante i indigno, Dios ta invitá nos pa resa na dje. Bo por ta sigur cu lo e no despreciá ningun hende cu pidi su yudansa cu humildad i sinceridad.

Niun hende no por spera un bida sin problema awendia. (Job 14:1) Sin embargo, e berdad den e Palabra di Dios a mustra hopi hende cu suicidio no ta e manera corecto pa resolvé nan problemanan. Djis pensa con apostel Pablo a yuda un carcelero desesperá cu ‘a ser lantá for di soño i mirando cu e portanan dje prizon tabata habrí, a saca su spada i tabata cerca di mata su mes, keriendo cu tur e prizoneronan a scapa.’ Den un instante e carcelero a dicidí cu suicidio tabata mihó cu un morto humiyante i kisas lento como castigu pa su fayo. E apostel a grita: “No haci bo mes daño, pasobra nos tur ta aki!” Pablo no a keda te einan. De echo, e cu Sílas a consolá e carcelero i a contestá su pregunta: “Señornan, kico mi mester haci pa ser salbá?” Nan a contestá: “Kere den Señor Jesus i lo bo ser salbá, abo i bo famia di cas.” E ora ei nan a papia e palabra di Jehova cuné i cu su hendenan di cas, i como resultado “e i esnan di dje tabata bautisá sin tarda.” E carcelero ei i tur su hendenan di cas a alegrá mashá i bida a haña mas nificacion pa nan.—Echonan 16:27-35.

Awe, ta un gran alivio pa sa cu no ta Dios ta responsabel pa maldad! Su Palabra ta identificá un spiritu malbado, “esun yamá Diabel i Satanas,” como esun cu ta “gañando henter e tera habitá.” Pero su tempu ta cabando. (Revelacion 12:9, 12) Pronto tur e afliccion cu Satanas  i su demoñonan a causa e habitantenan di tera lo caba pa medio di intervencion divino. E ora ei e mundu nobo di husticia cu Dios a primintí, lo trece un fin permanente n’e causanan di desesperacion i suicidio.—2 Pedro 3:13.

Consuelo pa Esnan Cu Ta Sclama pa Auxilio

For di awor mes, hende cu a perde speransa por haña alivio for dje Scritura. (Romanonan 15:4) Salmista David a canta: “Un curason kibrá i aplastá, o Dios, lo bo no despreciá.” (Salmo 51:17) Ta berdad cu nos no por scapa di enfrentá algun prueba i di sinti e efectonan di imperfeccion. Pero dor di gana conocimentu di nos Tata celestial bondadoso, amoroso i razonabel, nos lo haña un siguransa cu nos ta precioso den su bista. Dios por bira nos principal Amigu i Instructor. Si nos cultivá un relacion íntimo cu Jehova Dios, lo e no desapuntá nos nunca. “Ami, Jehova, ta bo Dios,” nos Creador ta bisa, “Esun cu ta siña bo beneficiá bo mes, Esun cu ta haci bo stap den e caminda den cua bo mester cana.”—Isaías 48:17.

Dependé riba Dios ta algu cu a yuda hopi hende. Un ehempel: Depresion prolongá ya caba tabatin Mara hopi débil ora el a perde su único yu homber den un accidente di tráfico. * El a drenta pánico, i a purba kita su bida. Sin embargo, awendia e ta lanta tur dia trempan pa haci su trabounan di cas. E gusta scucha música i yuda hende. E speransa cu “lo bai tin un resureccion di tantu e hustunan como e inhustunan” a yuda plakia e dolor dje morto trágico di su yu stimá, i a fortalecé su fe den Dios. (Echonan 24:15) Dor cu nunca Mara no tabatin deseo di bira manera un angel den shelu, e palabranan di Salmo 37:11 a toca su curason: “E mansunan mes lo poseé e tera, i berdaderamente nan lo haña nan deleite exkisito den e abundancia di pas.”

Un otro señora brazilero, Sandra, a traha masha duru pa e ta e mama perfecto pa su tres yunan. E ta admití: “Mi tabata asina druk cu ora mi tata a muri di ripiente i cu den e mésun tempu mi a haña sa cu mi casá tabatin un relacion  cu un otro muher, mi no a ni pensa pa resa pidi Dios yudansa.” Den su desesperacion, Sandra a purba mata su curpa. Kico a yud’é recuperá? Su aprecio pa cos spiritual. “Tur anochi promé cu mi bai drumi, mi ta lesa Bijbel anto purba imaginá mi mes den e situacion dje hendenan cu mi ta lesa di dje. Tambe mi ta lesa E Toren di Vigilancia i Spierta!, i loke mas mi gusta ta e historianan di bida real, pasobra nan ta yuda mi keda contentu cu loke bida a duna mi.” Ya cu e sa cu Jehova ta su mihó amigu, el a siña ser specífico ora e haci oracion.

Un Futuro sin Desesperacion

Ta un gran consuelo pa sa cu sufrimentu humano ta temporal! Bou di mando dje Reino di Dios, mucha i hende grandi cu awor ta víctima di crímen, inhusticia of prehuicio lo alegrá. Manera un salmo profético a pronosticá, Jehova su Rey nombrá Jesucristo, ‘lo libra esun pober cu ta sclama pa yudansa, tambe esun afligí i ken cu no tin yudante.’ Ademas, “lo e sinti duele di esun di condicion humilde i esun pober, i e alma di esnan pober lo e salba.” Sí, “for di opresion i for di violencia lo e rescatá nan alma, i nan sanger lo ta precioso den su bista.”—Salmo 72:12-14.

E tempu pa e palabranan profético ei cumpli ta cerca. E idea di gosa di bida eterno riba tera den condicionnan asina ta atraé bo? Si ta asina, bo tin motibu pa alegrá i balorá bida como un don di Dios. I si bo compartí e promesanan bíblico consolador aki cu otro hende, lo bo por trece hopi felicidad den bida di esnan cu ta sclama pa auxilio den e mundu sin heful i sin amor aki.

[Nota]

[Plachi na página 6]

Tin hopi motibu pa felicidad awe

[Plachi na página 7]

Bo ta anhelá un mundu sin desesperacion?