Un Gritu di Auxilio
Un Gritu di Auxilio
“DIOS a lubidá riba mi!” un muher brazilero a sclama. Despues dje morto repentino di su casá, el a sinti cu su bida no tabatin ningun sentido mas. Bo a yega di purba consolá un hende cu ta asina afligí, of cu kisas ta sclama pa auxilio?
Algun hende ta bira asina desesperá cu nan ta pone fin na nan bida, i hopi di nan ta hóben. Segun e korant Folha de S. Paulo, un estudio na Brazil ta mustra cu “suicidio bou di hóbennan a aumentá cu 26 porciento.” Por ehempel, considerá e caso di Walter, * un hóben na São Paulo. E no tabatin mayor, ni cas, ni privacidad, ni amigu cu e por a conta cuné. El a dicidí di bula for di brug pa caba cu su miseria.
Edna, un mama soltero, tabatin dos yu caba ora el a conocé un otro homber. Despues di un luna so, nan a bai biba huntu na cas dje mama di e homber, cu tabata mors cu spiritismo i tabata un alcohólico. Edna a haña un yu mas; el a cuminsá bebe di mas, i a bira asina deprimí cu el a purba cometé suicidio. Finalmente, el a perde custodia di su yunan.
Kico di hende di edad avansá? Ántes Maria tabata gusta papia i pasa pret. Pero segun cu el a bira grandi el a cuminsá preocupá pa su trabou como verpleegster dor cu e tabatin miedu cu lo e haci fout. E cos a deprimié. Despues di a purba usa remedi riba su mes, el a busca atencion médico, i e tratamentu cu el a ricibí a parce di ta yuda. Pero ora el a perde su trabou cu 57 aña di edad, e depresion a bini bek asina fuerte cu e no por a mira un salida. Maria a cuminsá pensa di cometé suicidio.
“Rond di 10 porciento di hende deprimí ta purba cometé suicidio,” segun profesor José Alberto Del Porto di Universidad di São Paulo. “Ta duru pa kere cu mas hende a yega di muri di suicidio cu di asesinato; ta tristu, pero berdad,” segun hefe di departamento di salubridad na Merca, dr. David Satcher.
Tin bes cu un intento di suicidio no ta nada otro cu un gritu di auxilio. I sin duda e miembronan di famia i amigunan di esun cu a perde speransa kier yud’é. Claro cu nan lo no yud’é si nan usa expresionnan manera: “Stop di sinti duele di bo mes,” “Yen di hende ta mas mal pará cu bo” of: “Tur dia no ta mésun dia.” Mas bien, di con no ser un berdadero amigu i un bon scuchadó? Sí, purba yuda esun desesperá mira cu bida ta bale la pena.
E autor frances Voltaire a skirbi: “E homber cu mata su curpa awe den un atake di melancolia, lo a deseá di ta na bida si el a laga ocho dia pasa.” Wel, con anto hende desesperá por descubrí cu bida ta bale la pena?
[Nota]
^ par. 3 A cambia algun nomber.
[Plachi na página 3]
Cada bes mas hóben i adulto ta cometé suicidio
[Plachi na página 4]
Con bo por yuda un hende cu a perde speransa?