Cumpra Tempu pa Lesa i Studia

“[Cumpra] e tempu oportuno pa boso mes, pasobra e dianan ta malu.”—EFESIONAN 5:16.

1. Di con ta sabí pa nos planea nos tempu, i kico e manera cu nos ta usa nos tempu por revelá tocante nos?

HENDE a yega di bisa cu “scoge tempu ta scapa tempu.” Un persona cu ta apartá un cantidad specífico di tempu pa cosnan cu e mester haci, hopi bes lo saca mas probecho di su tempu. E rey sabí Sálomon a skirbi: “Tin un tempu stipulá pa tur kos. I tin un tempu pa tur evento bou di shelu.” (Eclesiástes 3:1, Beibel Santu) Nos tur tin e mésun cantidad di tempu na nos disposicion; ta keda na nos con nos ta us’é. E manera cu nos ta fiha nos prioridadnan i ta parti nos tempu, ta revelá pa un gran parti kico ta mas pegá na nos curason.—Mateo 6:21.

2. (a) Kico Jesus a bisa tocante nos necesidad spiritual den su Sermon Riba Ceru? (b) Ki examinacion propio lo ta na su lugá?

² Nos ta ser obligá di dedicá tempu na come i drumi, pasobra esakinan ta necesidadnan físico. Pero ke tal di nos necesidadnan spiritual? Nos sa cu mester satisfacé nan tambe. Den su Sermon Riba Ceru, Jesus a declará: “Felis ta esnan cu ta conciente di nan necesidad spiritual.” (Mateo 5:3) Ta p’esei “e esclabo fiel i discreto” ta recordá nos regularmente dje importancia di dedicá tempu na lesa i studia Bijbel. (Mateo 24:45) Kisas bo ta realisá con importante esaki ta, pero podisé bo ta sinti cu gewoon bo no tin tempu pa studia of lesa Bijbel. Si ta asina, laga nos examiná manera i medionan pa traha mas lugá den nos bida pa por lesa e Palabra di Dios, haci studio personal i meditá.

Con pa Haña Tempu pa Lesa i Studia Bijbel

3, 4. (a) Ki conseho apostel Pablo a duna relacioná cu e uso di nos tempu, i kico esaki ta encerá? (b) Kico Pablo tabata kier men ora el a consehá nos pa ‘cumpra e tempu oportuno pa nos mes’?

³ En bista dje tempu cu nos ta biba aden, nos tur tin cu haci caso dje palabranan aki di apostel Pablo: “Vigilá cuidadosamente p’e manera cu boso ta cana no ta manera hende imprudente sino manera hende sabí, cumprando e tempu oportuno pa boso mes, pasobra e dianan ta malu. P’e motibu aki, stop di bira irazonabel, sino sigui percibí loke ta e boluntad di Jehova.” (Efesionan 5:15-17) Claro cu e conseho aki ta abarcá tur rasgo di nos bida como cristiannan dedicá, i ta encerá haña tempu pa haci oracion, studia, bai reunion i participá mas pleno posibel den  predicacion dje ‘bon nobo dje reino.’—Mateo 24:14; 28:19, 20.

⁴ Ta parce cu hopi sirbidó di Jehova djawe tin dificultad pa haña tempu den nan bida pa lesa Bijbel i haci studio profundo. Ta obvio cu nos no por agregá un ora extra na nos dia, pues Pablo su conseho lo mester kier men un otro cos. Na griego, e frase “cumprando e tempu oportuno” ta implicá cumpra a costo di algu otro. Den su Expository Dictionary, W. E. Vine ta duna e frase e nificacion di “saca lo máximo di tur oportunidad, haci mihó uso di cada oportunidad ya cu oportunidadnan cu bo perde bo no por haña nan mas.” For di kico of unda nos por cumpra e tempu oportuno pa lesa i studia Bijbel?

Nos Tin cu Fiha Prioridadnan

5. Pakico i con nos mester “haci sigur dje cosnan mas importante”?

⁵ Ademas di nos obligacionnan seglar, nos tin hopi cos di caracter spiritual pa atendé. Como sirbidónan dedicá di Jehova, nos tin “hopi di haci den e trabou di Señor.” (1 Corintionan 15:58) Pa e motibu aki, Pablo a instruí cristiannan na Filípos pa “haci sigur dje cosnan mas importante.” (Filipensenan 1:10) Esaki ta nificá cu mester fiha prioridadnan. Cosnan spiritual semper mester bini promé cu consideracionnan material. (Mateo 6:31-33) Sin embargo, ta necesario pa ser balansá tambe ora di cumpli cu nos obligacionnan spiritual. Con nos ta parti nos tempu entre e vários aspectonan di nos bida cristian? Superintendentenan biahero ta informá cu entre “e cosnan mas importante” cu un cristian mester atendé, rumannan tin tendencia di neglishá studio personal i lesamentu di Bijbel.

6. Kico cumpra e tempu oportuno por encerá ora ta trata di trabou seglar of trabou di cas?

⁶ Manera nos a mira, cumpra e tempu oportuno ta encerá “saca lo máximo di tur oportunidad” i “haci mihó uso di cada oportunidad.” Pues si nos custumbernan di lesa i studia Bijbel ta laga hopi di deseá, lo ta bon pa haci un análisis personal pa wak con nos ta gasta nos tempu. Si nos trabou seglar ta demasiado exigente, kitando muchu hopi tempu i energia for di nos, nos mester haci esei un asuntu di oracion na Jehova. (Salmo 55:22) Podisé nos lo por haci ahustenan cu lo laga nos cu mas tempu pa e cosnan importante cu tin di haci cu e adoracion di Jehova, entre nan studia i lesa Bijbel. Corectamente nan a yega di bisa cu hende muher su trabou no ta caba nunca. Pues ruman muhernan cristian tambe tin cu fiha nan prioridadnan i reservá tempu definí pa lesa Bijbel i haci studio profundo.

7, 8. (a) For di ki actividadnan hopi bes nos por cumpra tempu pa lesa i studia? (b) Kico ta e propósito di recreo, i con cordando esaki por yuda nos fiha nos prioridadnan?

⁷ En general, mayoria di nos por cumpra tempu pa studia a costo di actividadnan inesencial. Nos lo por puntra nos mes: ‘Cuantu tempu mi ta dedicá na lesa revista seglar of korant, wak television, scucha música of hunga weganan di video? Mi ta pasa mas ora dilanti computer cu mi ta dedicá na lesa Bijbel?’ Pablo ta bisa: “Stop di bira irazonabel, sino sigui percibí loke ta e boluntad di Jehova.” (Efesionan 5:17) Ta parce cu uso irazonabel di television ta un motibu principal pakico hopi Testigo no ta dedicá suficiente tempu na studio personal i lesamentu di Bijbel.—Salmo 101:3; 119:37, 47, 48.

 ⁸ Tin ruman kisas ta bisa cu nan no por studia henter dia, cu nan tin mester di un poco recreo. Aunke esaki ta berdad, lo por ta bon pa considerá e cantidad di tempu cu nos ta dedicá na relahá i compar’é cu e tempu cu realmente nos ta dedicá na studia of lesa Bijbel. E resultado lo por ta sorprendente. Mester mantené recreo i relahamentu, aunke nan ta necesario, na nan debido lugá. Nan propósito ta pa duna nos vigor pa reanudá actividadnan spiritual. Hopi programa di television i wega di video ta laga un persona agotá, miéntras cu lesa i studia e Palabra di Dios ta refrescante i ta duna bo vigor.—Salmo 19:7, 8.

Con Algun Ruman Ta Traha Tempu pa Studia

9. Cua ta e bentahanan di sigui e conseho duná den e foyeto Examinando e Scritura Diariamente—1999?

⁹ E introduccion dje foyeto Examinando e Scritura Diariamente pa 1999 ta bisa: “Lo ta masha beneficioso mes pa considerá e texto di dia i e comentario for dje foyeto aki parti mainta. Lo bo sinti como si fuera ta Jehova, e Magnífico Instructor, ta lantá bo for di soño cu su instruccionnan. Bijbel a profetisá cu Jesucristo lo a beneficiá di Jehova su instruccionnan tur mainta: ‘E [Jehova] ta spierta di mainta pa mainta; e ta spierta mi orea pa tende manera esnan siñá.’ E instruccionnan aki a duna Jesus ‘e lenga di esnan siñá’ di manera cu e tabata ‘sa con pa contestá esun cansá cu un palabra.’ (Isa. 30:20; 50:4; Mat. 11:28-30) Lanta tur mainta i haña conseho oportuno for dje Palabra di Dios lo no solamente yudá bo trata cu bo mes problemanan, sino lo ekipá bo tambe cu ‘e lenga di esnan siñá’ pa yuda otronan.” *

10. Con algun ruman ta traha tempu pa lesa i studia Bijbel, i cu ki beneficio?

¹⁰ Hopi cristian ta sigui e conseho aki dor di lesa e texto di dia i comentario i dor di lesa Bijbel of studia mainta trempan. Na Francia  un pionero fiel ta lanta tur mainta trempan i ta dedicá 30 minuut na lesa Bijbel. Kico a yud’é haci esaki durante añanan? E ta bisa: “Mi ta profundamente motivá, i mi ta pega na mi programa maske kico pasa!” Sea cual sea e ora di dia cu nos scoge, e cos importante ta pa nos pega na nos programa. René Mica, cu ta den e sirbishi di pionero pa mas cu 40 aña na Europa i Nort África, ta bisa: “Desde 1950 tabata mi meta pa lesa henter e Bijbel tur aña, algu cu mi a haci awor 49 biaha caba. Mi ta sinti cu esaki ta vital pa mi mantené un relacion estrecho cu mi Creador. Meditá riba e Palabra di Dios ta yuda mi comprendé mihó Jehova su husticia i otro cualidadnan, i tabata un fuente di fortalesa increibel.” *

“Artículonan di Cuminda na e Debido Tempu”

11, 12. (a) Ki “artículonan di cuminda” spiritual “e fiel mayordomo” a percurá? (b) Den ki manera e “artículonan di cuminda” a ser percurá na e debido tempu?

¹¹ Mescos cu e custumber di come regular ta contribuí na bon salú físico, un programa regular pa studia i lesa Bijbel ta hiba na bon salú spiritual. Den e Evangelio di Lucas, nos ta lesa e palabranan aki di Jesus: “Ken realmente ta e fiel mayordomo, esun discreto, ken su doño lo nombra riba henter su cuerpo di sirbidó pa sigui duna nan nan midí di artículonan di cuminda na e debido tempu?” (Lucas 12:42) Ya pa mas cu 120 aña, E Toren di Vigilancia i tambe otro buki i publicacionnan basá riba Bijbel ta percurá “artículonan di cuminda [spiritual] na e debido tempu.”

¹² Tuma nota dje expresion “na e debido tempu.” Na e momento corecto, nos “Magnífico Instructor,” Jehova, mediante su Yu i e clase di esclabo, a guia su pueblo den asuntunan di doctrina i conducta. Tabata como si fuera colectivamente nos a tende un stem ta bisa nos: “‘Esaki ta e caminda. Cana den dje,’ den caso cu boso mester bai na banda drechi of den caso cu boso mester bai na banda robes.” (Isaías 30:20, 21) Ademas, ora hende individual lesa Bijbel i tur e publicacionnan bíblico cu atencion, hopi bes nan ta sinti cu e pensamentunan expresá den nan ta dirigí specialmente na nan. Sí, conseho i guia divino lo bini na e debido tempu pa nos, capacitando nos pa resistí tentacion of pa tuma un decision sabí.

Desaroyá Bon Custumber di Come

13. Cua ta algun mal custumber di come spiritualmente?

¹³ Pa beneficiá plenamente dje “artículonan di cuminda” percurá na e debido tempu, nos mester tin bon custumber di come.  Ta esencial pa nos tin un programa regular pa lesa Bijbel i haci studio personal, i pega na dje. Bo tin bon custumber di come spiritualmente i periodonan regular di studio personal profundo? Of bo ta djis pasa aríbariba dje informacion cu a ser prepará cuidadosamente pa nos, comiendo purá-purá, na moda di papia, of asta saltando algun cuminda? Mal custumber di come spiritualmente a pone cu algun ruman a bira swak den fe, i a asta cai for dje fe.—1 Timoteo 1:19; 4:15, 16.

14. Pakico ta probechoso pa tog considerá cuidadosamente informacion cu ta parce conocí?

¹⁴ Podisé algun ruman ta sinti cu nan sa e doctrinanan básico caba i cu no ta tur artículo ta presentá algu completamente nobo. P’esei, no ta necesario pa haci studio sistemático i asistí na tur reunion. Sin embargo, Bijbel ta mustra cu ta necesario pa recordá nos di cosnan cu nos a siña caba. (Salmo 119:95, 99; 2 Pedro 3:1; Hudas 5) Mescos cu un bon koki ta prepará e mésun ingredientenan básico den hopi manera sabroso, asina e esclabo fiel ta percurá alimento spiritual nutritivo den un gran variedad di manera. Asta den artículonan cu ta trata temanan cu a yega di ser considerá cu frecuencia, tin puntonan mas detayá cu nos lo no kier keda sin capta. Echo ta cu loke nos ta saca for dje informacion cu nos lesa ta dependé pa gran parti di cuantu tempu i esfuerso nos ta dedicá na studi’é.

Beneficionan Spiritual Cu Ta Bini di Lesa i Studia

15. Con lesa i studia Bijbel ta yuda nos ser mihó minister dje Palabra di Dios?

¹⁵ E beneficionan cu nos ta saca di lesa i studia Bijbel ta hopi. E ta yuda nos cumpli cu un di nos responsabilidadnan cristian básico, esta, pa individualmente nos por bira “un trahadó sin nada di tene bergwensa di dje, manehando e palabra dje berdad corectamente.” (2 Timoteo 2:15) Mas nos lesa i studia Bijbel, mas nos mente lo yena cu e pensamentunan di Dios. E ora ei, mescos cu Pablo, nos lo por ‘razoná cu hende for dje Scritura, splicando i dunando prueba via referencianan’ dje berdad maraviyoso di Jehova su propósito. (Echonan 17:2, 3) Nos abilidad di siña lo profundisá, i nos combersacion, partinan i conseho lo ta spiritualmente mas edificante.—Proverbionan 1:5.

16. Den ki maneranan personal nos ta beneficiá di lesa i studia e Palabra di Dios?

¹⁶ Mas ainda, tempu dedicá na examiná e Palabra di Dios lo yuda nos armonisá nos bida mas plenamente na e camindanan di Jehova. (Salmo 25:4; 119:9, 10; Proverbionan 6:20-23) Esei lo fortalecé nos cualidadnan spiritual, manera humildad, lealtad i felicidad. (Deuteronomio 17:19, 20; Revelacion 1:3) Ora nos aplicá e conocimentu cu nos a adkerí dor di lesa i studia Bijbel, nos ta disfrutá di un fluho liber dje spiritu di Dios den nos bida, loke lo resultá den un mayor abundancia di fruta di spiritu den tur loke nos haci.—Galationan 5:22, 23.

17. Con e cantidad i calidad di nos lesamentu i studio personal di Bijbel ta influenciá nos relacion cu Jehova?

¹⁷ Mas importante, e tempu cu nos cumpra for di otro actividadnan pa por lesa i studia e Palabra di Dios lo trece recompensanan ricu en coneccion cu nos relacion cu Dios. Pablo a pidi den oracion pa su compañeronan cristian por ‘ser yená cu e conocimentu exacto di [Dios] su boluntad den tur sabiduria i comprendimentu  spiritual, pa nan cana di un manera digno di Jehova afin di agrad’é plenamente.’ (Colosensenan 1:9, 10) Di igual manera, pa nos “cana di un manera digno di Jehova,” nos tin cu ser “yená cu e conocimentu exacto di su boluntad den tur sabiduria i comprendimentu spiritual.” Ta keda claro anto cu pa nos gana Jehova su bendicion i aprobacion, ta dependé pa gran parti dje cantidad i calidad di nos lesamentu i studio personal di Bijbel.

18. Ki bendicionnan nos por tin si nos sigui e palabranan di Jesus registrá na Juan 17:3?

¹⁸ “Esaki ta nificá bida eterno, cu nan ta ganando conocimentu di bo, e único Dios berdadero, i di esun cu bo a manda, Jesucristo.” (Juan 17:3) Esei ta un dje textonan cu mas Testigonan di Jehova ta usa pa yuda otro hende comprendé e importancia di studia e Palabra di Dios. Sigur no ta ménos importante pa nos cada un haci esei personalmente. Nos speransa di biba pa semper ta dependé di si nos ta crece den conocimentu di Jehova i su Yu, Jesucristo. I djis pensa riba loke esei ta nificá. Nunca nos lo caba di siña tocante Jehova, i lo tin un eternidad pa nos siña tocante dje!—Eclesiástes 3:11; Romanonan 11:33.

[Nota]

Preguntanan di Repaso

• Kico e manera cu nos ta usa nos tempu ta revelá?

• For di cua actividadnan nos por cumpra tempu pa lesa i studia Bijbel?

• Di con nos tin cu vigilá nos custumber di come spiritualmente?

• Ki beneficionan ta bin di lesa i studia e Scritura?

[Preguntanan di Estudio]

[Plachinan na página 20, 21]

Lesa i studia Bijbel regularmente lo capacitá nos pa ‘manehá e palabra dje berdad corectamente’

[Plachinan na página 23]

Balansá otro actividadnan den nos bida druk cu cosnan spiritual ta trece recompensanan ricu