Felicidad Eterno—Den Shelu of Riba Tera?

BO FELICIDAD ta dependé principalmente di unda bo ta biba? Mayoria hende lo no tin problema pa reconocé cu felicidad ta dependé mas bien di factornan manera bon salú, un propósito den bida i bon relacion cu otro hende. Un proverbio bíblico ta splica e asuntu asin’akí: “Mihó un plato di berdura unda tin amor cu un toro gordá for di pesebre i odio huntu cuné.”—Proverbionan 15:17.

Pero lamentablemente, nos cas terenal tin un historia largu di odio, violencia i otro formanan di maldad. Awor, kico di shelu, e region di spiritu, caminda hopi hende ta spera di bai despues cu nan muri? Semper shelu tabata un lugá di pas, felicidad i trankilidad completo, sin ningun tipo di disturbio, manera comunmente hende ta asumí?

Bijbel ta siña cu Dios ta biba den shelu huntu cu miyones di criatura spiritual cu yama angel. (Mateo 18:10; Revelacion 5:11) Nan ta ser describí como “yunan [spiritual] di Dios.” (Job 38:4, 7) Mescos cu hende, angel tambe tin boluntad liber; nan no ta robot. Pues, nan tambe por scoge pa haci bon of malu. Angel lo scoge pa haci malu? Esaki por ta un sorpresa pa algun hende, pero de echo, miles di aña pasá, un cantidad considerabel di angel a peca contra Dios; nan a rebelá contra dje!—Hudas 6.

Rebeldenan den Shelu

Picá a aparecé den e region di spiritu pa motibu di rebeldia di un angel cu despues a ser yamá Satanas (Resistidó) i Diabel (Calumniadó). E angel aki cu un tempu tabata obediente, di su propio boluntad a scoge pa haci malu. Despues di esei el a bira un influencia coruptivo pa e otro criaturanan spiritual, di manera cu pa tempu di Noe, promé cu Diluvio, un gran cantidad di nan a uni cu Satanas den rebelion contra Dios.—Génesis 6:2, nota na pia di página; 2 Pedro 2:4.

E angelnan pecadó aki no a ser expulsá for di shelu mesora. Mas bien, pa miles di aña Dios a tolerá cu nan por a drenta shelu, aparentemente bou di cierto restriccion. * Pero ora Dios su tolerancia dje malbadonan aki a terminá, nan a ser “tirá” for di shelu, pa finalmente destruí nan. E ora ei un stem den shelu a bisa: “P’e motibu aki alegrá, shelu i boso cu ta biba den dje!” (Revelacion 12:7-12) Claramente, e angelnan fiel a alegrá mashá cu por fin nan a scapa di e buscadónan di problema baho ei!

Mirando e detayenan poco conocí aki, ta bisto cu no por tin berdadero pas tanten cu criaturanan inteligente ta ignorá Dios su ley i principionan. (Isaías 57:20, 21; Jeremías 14:19, 20) Di otro banda, ora tur persona obedecé Dios su ley, pas i trankilidad ta prevalecé. (Salmo 119:165; Isaías 48:17, 18) Pues, si tur hende stima i obedecé Dios i stima otro, tera lo no ta un lugá berdaderamente deleitabel i felis pa biba ariba? Bijbel ta contestá cu sí!

 Pero kico di esnan cu den nan egoismo ta nenga di cambia nan custumbernan malbado? Ta pa semper nan lo keda stroba e pas di esnan cu di berdad kier haci Dios su boluntad? No, Dios a tuma accion contra e angelnan malbado den shelu, i lo e tuma accion contra hende malbado aki riba tera tambe.

Un Tera Limpiá

Dios a bisa: “Shelu ta mi trono, i tera ta mi bank’i pone pia.” (Isaías 66:1) Como e culminacion di santidad, Dios lo no laga nan keda susha su “bank’i pone pia” cu maldad pa semper. (Isaías 6:1-3; Revelacion 4:8) Mescos cu el a purificá shelu di mal spiritu, lo e libra tera di tur hende malbado, manera e siguiente pasashinan di Bijbel ta mustra:

“Malechornan mes lo ser cortá kita afó, pero esnan cu ta spera den Jehova ta esnan cu lo poseé e tera.”—Salmo 37:9.

“E rectonan ta esnan cu lo biba riba tera, i esnan sin culpa ta esnan cu lo keda riba dje. En cuanto e malbadonan, nan lo ser cortá for dje tera mes; i en cuanto esnan traicionero, nan lo ser rancá for di dje.”—Proverbionan 2:21, 22.

“Ta hustu di parti di Dios pa paga bek tribulacion na esnan cu ta causa tribulacion pa boso, pero, pa boso cu ta sufri tribulacion, alivio huntu cu nos n’e revelacion di Señor Jesus for di shelu cu su angelnan poderoso den un vlam di candela, ora e trece vengansa riba esnan cu no conocé Dios i esnan cu no ta obedecé e bon nobo tocante nos Señor Jesus. Esakinan mes lo sufri e castigu hudicial di destruccion eterno di dilanti Señor i dje gloria di su poder.”—2 Tesalonicensenan 1:6-9.

“Mundu [di humanidad malbado] ta pasa bai i tambe su deseo, pero esun cu haci e boluntad di Dios ta permanecé pa semper.”—1 Juan 2:17.

Tera Lo Keda Pacífico?

Maske Scritura ta mustra bon cla cu tin un límite na cuantu Dios lo tolerá e malbadonan, con nos por ta sigur cu despues cu a eliminá maldad, lo e no reaparecé mas? Con cu bai bin, maldad a bolbe lanta cabes poco tempu despues dje Diluvio den tempu di Noe, te n’e grado cu Dios mester a frustra e plannan malbado di humanidad dor di confundí nan lenga.—Génesis 11:1-8.

Nos motibu principal pa confia cu maldad lo no lanta cabes mas ta cu tera lo no ser goberná dor di hende mas, manera tabata e caso poco despues dje Diluvio. Mas bien, e Reino di Dios lo gobern’é. Gobernando for di shelu, e Reino aki lo ta e único gobiernu di tera. (Daniel 2:44; 7:13, 14) Lo e actua lihé contra ken cu purba introducí maldad atrobe. (Isaías 65:20) De echo, un dia lo e destruí e originadó di maldad mes, Satanas e Diabel, huntu cu su demoñonan, e angelnan malbado cu a bai su tras.—Romanonan 16:20.

Ademas, humanidad lo no tin nodi ta anshá tocante cuminda, paña, lugá di biba i trabou; falta di e cosnan aki awe a hiba algun hende na un bida di crímen. Sí, tera henter lo ser transformá den un paradijs productivo cu abundancia pa un i tur.—Isaías 65:21-23; Lucas 23:43.

Mas importante ainda, e Reino lo educá su súbditonan pa nan hiba un moda di biba pacífico, i na mes momento hisa nan te na top di perfeccion humano. (Juan 17:3; Romanonan 8:21) Despues di esei, humanidad lo no tin nodi lucha mas contra debilidad i tendencianan pecaminoso, di manera cu lo ta posibel i tambe deleitabel pa obedecé Dios perfectamente, mescos cu tabata e caso cu e homber perfecto Jesus. (Isaías 11:3) De echo, Jesus a keda leal na Dios asta enfrentando tentacionnan enorme i  tortura, cosnan cu lo ta completamente ausente den bida den Paradijs.—Hebreonan 7:26.

Pakico Algun Ta Bai Shelu

Pero hopi lesadó di Bijbel ta conciente di e palabranan aki di Jesus: “Den e cas di mi Tata tin hopi habitacion. . . . Mi ta bai pa prepará un lugá pa boso.” (Juan 14:2, 3) E palabranan aki no ta contradicí e idea di bida pa semper riba un tera paradísico?

E siñansanan aki no ta contradicí otro. De echo, un ta apoyá e otro. Pa cuminsá, Bijbel ta bisa cu solamente un cantidad limitá di cristian fiel, esta, 144.000 di nan lo resucitá como criatura spiritual pa biba den shelu. Pakico nan ta haña e recompensa maraviyoso aki? Dor cu nan ta forma e grupo cu Juan a mira den un vision, cu “a bira bibu i reina como rey cu e Cristo pa mil aña.” (Revelacion 14:1, 3; 20:4-6) Compará cu e miles di miyones di hende riba tera, en berdad e 144.000 ta un “trupa chikitu.” (Lucas 12:32) Ademas, ya cu nan a experimentá problemanan cu ta comun pa humanidad, nan lo ta capas mescos cu Jesus pa “compadecé cu nos debilidadnan” miéntras nan ta supervisá e rehabilitacion di humanidad i tera.—Hebreonan 4:15.

Tera—E Cas Eterno di Humanidad

Dor di percurá e sacrificio di rescate di Jesucristo, Dios a cuminsá recogé e 144.000 casi 2000 aña pasá, i tin indicacion cu e grupo aki ta completo awor. (Echonan 2:1-4; Galationan 4:4-7) Pero e sacrificio di Jesus no tabata pa e picánan dje 144.000 so, “sino tambe pa esnan di henter mundu.” (1 Juan 2:2) P’esei, tur hende cu ehercé fe den Jesus tin e prospecto di bida eterno. (Juan 3:16) Esnan morto den graf, pero cu ta den Dios su memoria, lo ser resucitá, no den shelu, pero pa biba riba un tera hací limpi. (Eclesiástes 9:5; Juan 11:11-13, 25; Echonan 24:15) Kico lo spera nan ei?

Revelacion 21:1-4 ta contestá, bisando: “Mira! E tent di Dios ta cu humanidad . . . I lo e seca tur lágrima di nan wowo, i lo no tin morto mas, ni lo no tin lamento ni sclamacion ni dolor mas. E cosnan anterior a pasa bai.” Imaginá bo: hende lo ser librá di morto, i e dolor i sclamacion cu e ta trece cuné lo a bai pa semper! Por fin Jehova su propósito original pa tera i humanidad lo yega na su cumplimentu glorioso.—Génesis 1:27, 28.

Nos Opcion: Bida of Morto

Nunca Adam cu Eva no a haña e opcion di bai shelu. Nan mester a scoge pa sea obedecé Dios i biba pa semper riba un tera paradísico, of desobedec’é i muri. Lamentablemente, nan a scoge pa desobedecé, i p’esei nan a bolbe na “stof” di suela. (Génesis 2:16, 17; 3:2-5, 19) Nunca tabata Dios su propósito p’e famia humano en general muri, i pa nan yena shelu via graf. Dios a crea miles i miles di angel pa biba den shelu; e criaturanan spiritual aki no ta hende morto cu a resucitá pa biba den shelu.—Salmo 104:1, 4; Daniel 7:10.

Kico nos mester haci pa nos ricibí e bendicion di biba pa semper den Paradijs riba tera? Un promé paso ta di studia e Palabra di Dios, Bijbel Santu. “Esaki ta nificá bida eterno,” Jesus a bisa den oracion, “cu nan ta ganando conocimentu di bo, e único Dios berdadero, i di esun cu bo a manda, Jesucristo.”—Juan 17:3.

Pone e conocimentu ei na práctica ta un otro paso pa haña felicidad eterno den Paradijs. (Santiago 1:22-24) Esnan cu biba segun e Palabra di Dios, tin e prospecto di mira cumplimentu di profecianan emocionante cu nan propio wowo, manera esun registrá na Isaías 11:9, cu ta bisa: “Nan [humanidad] lo no haci ningun daño ni causa ningun ruina den henter mi ceru santu; pasobra tera siguramente lo ta yená cu e conocimentu di Jehova mescos cu e awanan ta cubri laman mes.”

[Nota]

 [Plachinan na página 7]

“E hustunan mes lo poseé tera, i nan lo biba pa semper riba dje.”—Salmo 37:29