Lesamentu di Bijbel—Probechoso i Placentero

“Bo mester lesa den dje . . . di dia i anochi.”—HOSUÉ 1:8.

1. Kico ta algun beneficio di lesamentu en general, i di lesamentu di Bijbel en particular?

LESA cos cu bale la pena ta un actividad beneficioso. E filósofo político frances Montesquieu (Charles-Louis de Secondat) a skirbi: “Pa mi, semper studiamentu tabata e gran remedi pa disgustunan di bida. Ningun afliccion a yega di bini riba mi, cu un ora di lesamentu no por a core cuné.” Na un grado supremo, esaki ta cierto pa loke ta trata lesamentu di Bijbel. E salmista inspirá a bisa: “E ley di Jehova ta perfecto, e ta restorá e alma. E recordatorio di Jehova ta digno di confiansa, e ta haci hende sin experencia sabí. E ordunan di Jehova ta recto, nan ta haci curason alegrá.”—Salmo 19:7, 8.

2. Pakico Jehova a preservá Bijbel atrabes di siglonan, i kico e ta spera pa su pueblo haci cuné?

² Como su Autor, Jehova Dios a preservá Bijbel atrabes di siglonan di oposicion maligno di su enemigunan, tantu esnan religioso como esnan seglar. Ya cu ta su boluntad pa “tur clase di hende ser salbá i yega na un conocimentu exacto dje berdad,” el a soru haci su Palabra disponibel pa henter humanidad. (1 Timoteo 2:4) Nan ta calculá cu usando 100 idioma bo por comunicá cu rond di 80 porciento di hende riba tera. E contenido di Bijbel completo ta disponibel na 370 idioma, i por lesa algun parti dje Scritura den 1.860 idioma i dialecto mas. Jehova kier pa su pueblo lesa su Palabra. E ta bendicioná su sirbidónan cu presta atencion na su Palabra, sí, cu ta les’é tur dia.—Salmo 1:1, 2.

Lesamentu di Bijbel, un Rekisito pa Superintendente

3, 4. Kico Jehova a rekerí dje reynan di Israel, i con e motibunan pa esaki ta aplicá na ancianonan cristian djawe tambe?

³ Papiando di antemano tocante e tempu ora e nacion di Israel lo tin un rey humano, Jehova a bisa: “Tin cu sosodé cu ora e tuma su asiento riba e trono di su reino, e tin cu skirbi den un buki pa su mes un copia dje ley aki for di esun cu ta den man dje sacerdotenan, e levitanan. I esaki tin cu continuá cuné, i e mester lesa den dje tur e dianan di su bida, p’e por siña teme Jehova su Dios afin di warda tur e palabranan dje ley aki i e disposicionnan reglamentario aki dor di haci nan; pa su curason no halsa su mes riba su rumannan i pa e no desviá for dje mandamentu bai banda drechi of banda robes.”—Deuteronomio 17:18-20.

⁴ Wak pa ki motibu Jehova a rekerí pa tur futuro rey di Israel lesa e buki di ley divino diariamente: (1) “p’e por siña teme Jehova su Dios afin di warda tur e palabranan dje ley aki i e disposicionnan reglamentario aki dor di haci nan,” (2) “pa su curason no halsa su mes riba su rumannan,” (3) “pa e no desviá for dje mandamentu bai banda drechi of banda robes.” Acaso superintendentenan cristian djawe no tin cu teme Jehova, obedecé su leynan, keda sin halsa nan mes riba nan rumannan, i evitá di desviá di Jehova su mandamentunan? Sin duda, lesamentu di Bijbel tur dia no ta ménos  importante pa nan, cu e tabata p’e reynan di Israel.

5. Kico Cuerpo Gobernante a skirbi miembronan di Comiténan di Sucursal recientemente tocante lesamentu di Bijbel, i pakico ta bon pa tur anciano cristian sigui tal conseho?

⁵ Ancianonan cristian awendia tin un schedule hopi druk, loke ta haci lesamentu diario di Bijbel un reto. Por ehempel, miembronan dje Cuerpo Gobernante di Testigonan di Jehova i miembronan di Comiténan di Sucursal rond mundu, tur ta hombernan masha druk. Tog, un carta recien di Cuerpo Gobernante na tur Comité di Sucursal a enfatisá e necesidad pa lesa Bijbel tur dia i tin bon custumber di studio. E carta a mustra cu esaki lo aumentá nos amor pa Jehova i e berdad, i lo e “yuda nos mantené nos fe, goso i perseverancia te n’e glorioso fin.” Tur anciano den congregacionnan di Testigonan di Jehova ta sinti e mésun necesidad. Lesamentu di Bijbel tur dia lo yuda nan “actua sabiamente.” (Hosué 1:7, 8) Pa nan specíficamente, lesamentu di Bijbel ta “útil pa siñansa, pa reprendementu, pa korekshon, pa eduká den hustisia.”—2 Timoteo 3:16, Beibel Santu.

Un Necesidad pa Hóben i Bieu

6. Pakico Hosué a lesa tur e palabranan di Jehova su ley na bos haltu dilanti e tribunan congregá di Israel i e residentenan stranhero?

⁶ Den antigwedad no tabatin copia individual dje Scritura pa uso personal, p’esei lesamentu di Bijbel tabata sosodé dilanti di multitud congregá. Despues cu Jehova a dun’é victoria riba e stad Ai, Hosué a congregá e tribunan di Israel dilanti ceru Ebal i ceru Guerizim. E ora ei, segun e relato: “El a lesa tur e palabranan dje ley na bos haltu, e bendicion i e maldicion, di acuerdo cu tur loke ta pará skirbí den e buki dje ley. No a resultá di tin un palabra di tur loke Moises a manda, cu Hosué no a lesa na bos haltu dilanti henter e congregacion di Israel, huntu cu e muhernan i e chikitinnan i e residentenan stranhero cu a cana meimei di nan.” (Hosué 8:34, 35) Hóben i bieu, nativo i residente stranhero, mester a, como si fuera, graba den nan curason i mente, ki sorto di conducta lo a trece Jehova su bendicion, i kico lo a trece su desaprobacion. Lesamentu di Bijbel riba un base regular lo yuda nos sigur den e sentido aki.

7, 8. (a) Ken awendia ta manera “e residentenan stranhero,” i pakico nan mester lesa Bijbel tur dia? (b) Den ki manera e “chikitinnan” den Jehova su pueblo por sigui Jesus su ehempel?

⁷ Awe, miyones di sirbidó di Jehova ta manera e “residentenan stranhero” ei, den un sentido spiritual. Un tempu nan tabata biba segun e normanan di mundu, pero nan a transformá nan bida. (Efesionan 4:22-24; Colosensenan 3:7, 8) Constantemente nan mester keda corda nan mes di Jehova su normanan di loke ta bon i malu. (Amos 5:14, 15) Lesa e Palabra di Dios tur dia ta yuda nan haci esaki.—Hebreonan 4:12; Santiago 1:25.

⁸ Tin hopi ‘chikitin’ tambe den Jehova su pueblo cu a siña e normanan di Jehova cerca nan mayornan, pero cu mester convencé nan mes cu su boluntad ta bon. (Romanonan 12:1, 2) Con nan por haci esei? Den Israel e sacerdotenan i ancianonan a ricibí e instruccion aki: “Lo bo lesa e ley aki dilanti henter Israel den orea di nan tur. Congregá e pueblo, e hombernan i e muhernan i e chikitinnan i bo  residente stranhero cu ta den bo portanan, afin cu nan por scucha i afin cu nan por siña, ya cu nan mester teme Jehova boso Dios i percurá pa cumpli cu tur e palabranan dje ley aki. I nan yunan cu no tabata sa mester scucha, i nan mester siña teme Jehova boso Dios.” (Deuteronomio 31:11-13) Bibando bou dje Ley, Jesus na e edad hóben di 12 aña, a demostrá masha interes pa comprendé e leynan di su Tata. (Lucas 2:41-49) Despues tabata su custumber pa scucha i participá den lesamentu di Scritura na snoa. (Lucas 4:16; Echonan 15:21) Ta bon pa hóbennan djawe sigui Jesus su ehempel dor di lesa e Palabra di Dios tur dia i asistí regularmente na reunionnan caminda Bijbel ta ser lesá i studiá.

Lesamentu di Bijbel—Un Prioridad

9. (a) Di con nos mester ta selectivo en cuanto loke nos ta lesa? (b) Kico e redactor fundadó dje revista aki a declará tocante yudansanan pa studia Bijbel?

⁹ Sálomon, e rey sabí, a skirbi: “Aceptá un advertencia: Na trahamentu di hopi buki no tin fin, i dedicá bo mes muchu na nan ta cansancio p’e carni.” (Eclesiástes 12:12) Lo bo por bisa acerca cu lesamentu di hopi buki publicá awendia no ta solamente un cansancio p’e carni, sino francamente, peligroso pa bo mente. P’esei, ta importante pa nos ta selectivo. Ademas di lesa nos publicacionnan pa studio di Bijbel, nos mester lesa Bijbel mes tambe. E redactor fundadó dje revista aki a skirbi su lesadónan: “Nunca lubidá cu Bijbel ta nos norma, i cu maske cuantu nos haña cu nos yudansanan ta procedente di Dios, ta ‘yudansa’ nan ta, no substituto pa Bijbel.” * Pues, maske nos lo no neglishá publicacionnan bíblico, nos mester lesa Bijbel mes.

10. Con “e esclabo fiel i discreto”a enfatisá e importancia di lesa Bijbel?

¹⁰ Conciente dje necesidad aki, “e esclabo fiel i discreto” tin basta aña caba ta programá lesamentu di Bijbel como parti dje Scol di Ministerio  Teocrático den cada congregacion. (Mateo 24:45) E programa actual di lesamentu di Bijbel ta cubri henter Bijbel den un periodo di mas o ménos shete aña. E programa aki ta beneficioso pa tur hende, pero principalmente pa esnan nobo cu nunca no a lesa e Bijbel completo ainda. Ta ser rekerí di esnan cu asistí na e Scol Bíblico di Galad di Watchtower pa misionero i e Scol di Entrenamentu Ministerial, i tambe miembronan nobo dje famia di Betel, pa nan lesa Bijbel completo den un aña. Sin importá ki programa bo sigui, si ta bo so of como famia, pa bo tene bo mes na e programa ei bo mester duna lesamentu di Bijbel prioridad.

Kico Bo Custumber di Lesamentu Ta Revelá?

11. Con i pakico nos mester alimentá nos mes cu e expresionnan di Jehova tur dia?

¹¹ Si bo tin problema pa tene bo mes na bo programa pa lesamentu di Bijbel, por ta apropiado pa bo puntra bo mes: ‘Ki efecto mi custumber di lesa of di wak television por tin riba mi lesamentu di Jehova su Palabra?’ Corda kico Moises a skirbi, i Jesus a ripití: “Hende mester biba, no di pan so, sino di tur expresion cu ta sali for dje boca di Jehova.” (Mateo 4:4; Deuteronomio 8:3) Mescos cu nos tin cu come pan of algu ekivalente tur dia di nos bida pa sostené nos curpa físico, di igual manera nos tin cu absorbá Jehova su pensamentunan tur dia pa mantené nos spiritualidad. Nos por tin acceso na Dios su pensamentunan tur dia dor di lesa e Scritura.

12, 13. (a) Con apostel Pedro ta ilustrá e anhelo cu nos mester tin pa e Palabra di Dios? (b) Con Pablo ta usa e ilustracion di lechi diferente di e manera cu Pedro a us’é?

¹² Si nos mira Bijbel “no como palabra di hende, sino, como loke e berdaderamente ta, como palabra di Dios,” lo e atraé nos mescos cu un baby ta anhelá e lechi di su mama. (1 Tesalonicensenan 2:13) Apostel Pedro a haci e comparacion ei, ora el a skirbi: “Manera criaturanan recien nací, desaroyá un anhelo p’e lechi no-adulterá cu ta pertenecé n’e palabra, pa mediante dje boso por crece na salbacion, con tal cu boso a experimentá cu Señor ta bondadoso.” (1 Pedro 2:2, 3) Si di berdad nos a purba, dor di experencia personal, cu “Señor ta bondadoso,” nos lo desaroyá un anhelo pa lesamentu di Bijbel.

¹³ Mester remarcá cu den e pasashi aki Pedro ta usa e ilustracion di lechi den un otro sentido cu apostel Pablo a us’é. Pa un baby recien nací, lechi ta yena tur su necesidadnan di nutricion. E ilustracion di Pedro ta mustra cu e Palabra di Dios ta contené tur loke nos tin mester pa nos “crece na salbacion.” Di otro banda, Pablo a usa e necesidad pa lechi pa ilustrá e deficiencia den hábito di alimentacion cerca algun cu a pretendé di ta adulto den sentido spiritual. Den su carta na e cristiannan hebreo, Pablo a skirbi: “Aunke boso mester tabata maestro en bista dje tempu, atrobe boso mester di un hende pa siña boso for di principio e cosnan elemental dje declaracionnan sagrado di Dios, i boso a bira manera hende cu mester di lechi, no cuminda sólido. Pasobra tur cu ta participá di lechi no conocé e palabra di husticia, pasobra e ta un baby. Pero cuminda sólido ta pertenecé na hende maduro, na esnan kende mediante uso tin nan facultadnan perceptivo entrená pa distinguí tantu loke ta bon como loke ta malu.” (Hebreonan 5:12-14) Lesamentu atento di Bijbel por yuda mashá pa nos desaroyá nos facultadnan perceptivo i stimulá nos apetit pa cos spiritual.

Con pa Lesa Bijbel

14, 15. (a) Ki privilegio e Autor di Bijbel ta ofrecé nos? (b) Con nos por beneficiá di sabiduria divino? (Duna ehempel.)

¹⁴ Lesamentu di Bijbel ta mas probechoso ora e cuminsá, no cu lesamentu, sino cu oracion. Oracion ta un privilegio remarcabel. Ta como si fuera bo a cuminsá examiná un buki tocante un cierto tema profundo, yamando e autor p’e yuda bo comprendé loke bo ta bai lesa. Esta un tremendo bentaha esei por ta! E Autor di Bijbel, Jehova, ta ofrecé bo e privilegio ei.  Un miembro dje cuerpo gobernante di promé siglo a skirbi su rumannan: “Si cualkier un di boso tin deficiencia en cuanto sabiduria, lagu’é sigui pidi Dios, pasobra e ta duna generosamente na tur i sin tira na cara, i lo e ser duná na dje. Pero lagu’é sigui pidi cu fe, sin duda nada.” (Santiago 1:5, 6) E Cuerpo Gobernante den tempu moderno ta urgi nos constantemente pa nos lesa Bijbel huntu cu oracion.

¹⁵ Sabiduria ta e aplicacion práctico di conocimentu. P’esei, promé cu bo habri bo Bijbel, pidi Jehova p’e yuda bo reconocé puntonan den bo lesamentu cu bo mester aplicá den bo bida personal. Relacioná cos nobo cu bo siña cu conocimentu cu bo tin caba. Hinca nan den e “patronchi di palabranan saludabel” cu bo a yega na reconocé. (2 Timoteo 1:13) Meditá riba episodionan den bida di Jehova su sirbidónan di pasado, i puntra bo mes con abo lo a actua den circunstancianan similar.—Génesis 39:7-9; Daniel 3:3-6, 16-18; Echonan 4:18-20.

16. Ki sugerencianan práctico tin pa yuda nos haci nos lesamentu di Bijbel mas beneficioso i útil?

¹⁶ No lesa djis pa cubri algun página. Tuma bo tempu. Keda pensa riba loke bo ta lesa. Si un cierto asuntu ta lanta bo curiosidad, busca e textonan di referencianan, si bo Bijbel tiné. Si ainda e asuntu no ta muchu cla, haci un anotacion pa bo haci mas investigacion despues. Segun cu bo ta lesa, marca e textonan cu mas bo kier keda corda, of skirbi nan over. Lo bo por skirbi algun remarke of referencia personal tambe den banda. Wak cua ta e palabra clave den textonan cu segun bo lo bo por usa un dia den bo trabou di predicá i siña hende, i busk’é den e index di palabranan di Bijbel, patras den bo Bijbel. *

Haci Lesamentu di Bijbel un Placer

17. Di con nos lo mester tin placer den lesa Bijbel?

¹⁷ E salmista a skirbi tocante e homber felis cu “su deleite ta den e ley di Jehova, i den su ley e ta lesa na bos abou di dia i anochi.” (Salmo 1:2) Nos lesamentu di Bijbel diario lo no mester ta un carga, sino un berdadero placer. Un manera pa hacié placentero ta dor di keda semper conciente dje balor di e cosnan cu nos a siña. Sálomon e rey sabí a skirbi: “Felis ta e hende cu a haña sabiduria . . . Su camindanan ta camindanan agradabel, i tur su bereanan ta pas. E ta un palu di bida pa esnan cu gar’é, i esnan cu ta ten’é firmemente gará mester ser yamá felis.” (Proverbionan 3:13, 17, 18) E esfuerso necesario pa adkerí sabiduria ta bale la pena di berdad, pasobra su camindanan ta agradabel, nan ta di pas, felicidad, i finalmente, di bida.

18. Kico mas ta necesario fuera di lesa Bijbel, i kico nos lo considerá den nos siguiente artículo?

¹⁸ Sí, lesamentu di Bijbel ta tantu beneficioso como placentero. Pero e ta suficiente? Miembro di iglesianan di cristiandad tin siglonan largu ta lesa Bijbel, “semper siñando i tog nunca nan por yega na un conocimentu exacto dje berdad.” (2 Timoteo 3:7) Pa lesamentu di Bijbel ta beneficioso, nos mester les’é cu e intencion di aplicá e conocimentu cu nos a adkerí, den nos bida personal, i us’é den nos trabou di predicá i siña hende. (Mateo 24:14; 28:19, 20) Esaki ta exigí esfuerso i bon métodonan di studio, cu tambe por ta agradabel i recompensador, manera nos siguiente artículo lo mustra.

[Nota]

Preguntanan di Repaso

• Ki conseho duná na e reynan di Israel ta aplicá na superintendentenan awe, i di con?

• Ken awe ta manera “e residentenan stranhero” i “e chikitinnan,” i di con nan mester lesa Bijbel tur dia?

• Den ki maneranan práctico e “esclabo fiel i discreto” a yuda nos pa nos lesa Bijbel regularmente?

• Con nos por saca berdadero beneficio i placer for di nos lesamentu di Bijbel?

[Preguntanan di Estudio]

[Plachi na página 9]

Ancianonan foral mester lesa Bijbel tur dia

[Plachi na página 10]

Jesus tabatin custumber di participá den lesamentu di e Scritura den snoa