Tera—Djis un Lugá pa Test Hende?

ESTA un alivio! El a slag. Finalmente e studiante cu a pasa den dos siman duru di examen a ricibí un bunita ‘puntenlijst’. Awor e por dal bai i haña e trabou cu semper el a deseá.

Hopi hende ta mira bida riba tera como algu similar. Nan ta pensa cu e ta un test cu tur hende mester pasa. Esnan cu “slag” ta pasa pa algu mihó den un of otro forma di bida despues di morto. En berdad lo ta tristu si hende no por a spera nada mihó cu e bida aki, cu pa hopi hende no ta nificá mas cu djis existí. Maske e personahe bíblico Job tabatin bon salú i prosperidad pa gran parti di su bida, el a remarcá: “Hende, nací di muher, tin un bida corticu i hartá cu molester.”—Job 14:1.

Reflehando e punto di bista di hopi hende, New Catholic Encyclopedia ta bisa: “Gloria celestial ta e destino cu Dios a disponé pa hende. . . . Por bisa cu felicidad di hende ta dependé di cu si e ta poseé gloria celestial of no.” Un encuesta recien di Church of Christ (Iglesia di Cristo) na Merca ta bisa cu 87 porciento di esnan cu a respondé ta kere cu probablemente nan lo bai shelu despues cu nan muri.

Hopi hende no-cristian tambe ta spera di bai laga tera pa un mihó lugá despues cu nan muri. Moslimnan, por ehempel, ta spera di bai un paradijs celestial. Miembronan dje sectanan budista Pure Land (Pais Puru) na China i Hapon ta kere cu dor di keda ripití “Amitabha,” nomber dje Buda di Lus Ilimitá, nan lo renacé den e Pais Puru, e Paradijs den West, caminda nan lo biba den felicidad supremo.

Ta interesante pa nota cu Bijbel, e buki santu mas traducí i distribuí na mundu, no ta describí tera como un lugá pa scapa di dje, un sorto di trampolin. E ta declará, por ehempel: “E hustunan mes lo poseé e tera, i nan lo biba pa semper riba dje.” (Salmo 37:29) Ta den Bijbel tambe nos por haña e declaracion famoso aki di Jesus: “Bendicioná ta e mansunan: pasobra nan lo heredá e tera.”—Mateo 5:5, King James Version.

E punto di bista comun di cu nos bibá riba tera ta temporal, ta implicá cu morto ta e porta cu ta hiba na un bida di felicidad total despues di morto. Si ta asina, anto sin duda morto ta un bendicion. Pero ta asina hende ta pensa generalmente tocante morto, of nan ta purba alargá e bida aki? Experencia ta mustra cu si un hende ta gosa di un grado razonabel di bon salú i siguridad, e no kier muri.

Sin embargo, dor cu bida riba tera ta yen di sufrimentu i cos malu, ainda hopi hende ta considerá shelu como e único lugá caminda nan por haña berdadero pas i felicidad. Shelu ta simplemente un lugá di pas i felicidad completo, totalmente liber di maldad of falta di armonia? I ta den un region celestial so por tin bida despues di morto? Kisas e contestanan cu Bijbel ta duna lo sorprendé bo. Por fabor sigui lesa.