Bo Mester Investigá Otro Religion?

“MI TABATA bai reunion cristian pa casi un aña, i mi tabata gusta papia cu otro hende tocante e Reino di Dios,” segun Miguel, kende awe ta un Testigo di Jehova na Sur América. “Anto mi a cuminsá scucha programanan religioso na radio i wak predicadónan religioso na television. Mi a pensa cu programanan asina por a yuda mi comprendé hende di otro religion mihó. Mi a realisá cu nan siñansanan no tabata na armonia cu Bijbel, pero mi tabata curioso.”

Den e mésun pais, Jorge tabata celoso den siña otronan tocante adoracion berdadero. Tog, na un dado momento, e tambe a cuminsá scucha programanan religioso na radio i television. “Bo mester sa kico otro hende ta pensa,” e tabatin custumber di bisa. Ora nan tabata puntr’é tocante e potencial peligernan di exponé su mes na siñansa falsu, e tabata contestá: “No tin nada cu por debilitá e fe di un persona cu conocé e berdad di Bijbel.” E experencianan aki ta lanta un pregunta importante: Ta sabí pa scucha loke otronan ta kere?

Reconociendo Cristianismo Berdadero

Despues cu e apostelnan a muri, e desaroyo progresivo di hopi forma di cristianismo di imitacion a contaminá adoracion berdadero. Premirando esaki, Jesus a revelá un manera pa distinguí e formanan falsu aki for di cristianismo berdadero. Na promé lugá, el a spierta: “Vigilá contra e profetanan falsu cu ta bini cerca boso den bistí di carné, pero cu di paden ta lobo feros.” Anto el a agregá: “Na nan frutanan boso lo reconocé nan.” (Mateo 7:15-23) Jesus su berdadero siguidónan ta practicá loke el a siña, i bo por reconocé nan fácilmente na nan frutanan excelente. Mescos cu  Jesus mes a haci, nan ta bishitá hende pa splica e Reino di Dios for dje Scritura. Siguiendo Jesus su ehempel, nan ta apartá nan for dje política i controversianan social di mundu. Nan ta aceptá Bijbel como e Palabra di Dios i ta respet’é como e berdad. Nan ta haci Dios su nomber conocí. I siendo cu nan ta haci esfuerso pa practicá e amor cu Dios ta siña nan, nan no ta participá den guera. Mas bien, nan ta trata otro como ruman.—Lucas 4:43; 10:1-9; Juan 13:34, 35; 17:16, 17, 26.

Segun e Scritura, ta posibel pa “mira . . . e distincion entre un hustu i un malbado, entre un cu ta sirbi Dios i unu cu no a sirbié.” (Malakías 3:18) Adoradónan berdadero awe ta uní den pensamentu i accion, mescos cu e cristiannan di promé siglo tabata. (Efesionan 4:4-6) Una bes bo identificá un grupo di cristian asina, pakico keda curioso tocante e creencianan di otro hende?

Cuidou cu Maestro Falsu

Bijbel ta reconocé cu asta despues di a siña e berdad di Bijbel, tin e peliger cu siñansa falsu por contaminá bo spiritualmente. Apostel Pablo a spierta: “Tene cuidou: kisas por tin un hende cu lo hiba boso como su víctima mediante e filosofia i engaño bano segun e tradicion di hende, segun e cosnan elemental di mundu i no segun Cristo.” (Colosensenan 2:8) Ki un descripcion gráfico e cuadro aki ta pinta! Mescos cu bestia cu kier caba cu bo i devorá bo, asina maestronan falsu por presentá un peliger real pa bo.

Ta cierto cu Pablo a tuma nota di loke otronan tabata kere. Un biaha el a cuminsá un discurso bisando: “Hombernan di Aténas, mi ta contemplá cu den tur cos boso ta parce di ta mas entregá cu otronan na temor di deidadnan. Por ehempel, ora mi tabata pasando i observando cuidadosamente boso obhetonan di adoracion, mi a haña tambe un altar riba cua ta pará skirbí ‘Pa un Dios Desconocí.’” (Echonan 17:22, 23) Sin embargo, Pablo no a alimentá su mente regularmente cu filosofia di oradornan griego.

Ta un cos pa busca pa sa tocante e orígen i creencia di religion falsu, pero henteramente un otro cos pa alimentá bo mes cu nan. * Jehova a nombra “e esclabo fiel i discreto” pa percurá siñansa basá riba su Palabra. (Mateo 4:4; 24:45) Pablo mes a skirbi: “Boso no por ta participando di ‘e mesa di Jehova’ i dje mesa di demoño. Of ‘nos ta instigando Jehova na yaluzí’?”—1 Corintionan 10:20-22.

Kisas un tempu algun maestro falsu tabata cristian berdadero, pero na un dado momento nan a cambia di berdad pa eror. (Hudas 4, 11) Esaki no mester sorprendé nos. Despues di a papia dje “esclabo fiel i discreto” cu ta representá e cuerpo di cristiannan ungí, Jesus a papia dje “esclabo malbado,” un clase cu ta keha, “mi doño ta tarda,” i ta cuminsá suta su co-esclabonan. (Mateo 24:48, 49) Hopi bes, e individuonan aki i nan compañeronan no tin siñansanan claro di nan mes; nan ta interesá solamente den destruí e fe di otro hende. Relacioná cu nan, apostel Juan a skirbi: “Si un hende ta bini cerca boso i no ta trece e siñansa aki, no ricibié nunca den boso cas ni salud’é.”—2 Juan 10; 2 Corintionan 11:3, 4, 13-15.

Hende sincero cu ta en busca dje berdad ta haci bon pa considerá cuidadosamente loke nan ta tende for di diferente religion. Cu tempu, Dios lo bendicioná personanan di curason onrado cu ta busca e berdad. Bijbel ta bisa di sabiduria djariba: “Si bo sigui busk’é manera ta plata, i manera pa tesoro scondí bo sigui en busca di dje, den tal caso lo bo . . . haña e conocimentu mes di Dios.” (Proverbionan 2:4, 5) Despues cu cristiannan berdadero a haña e conocimentu aki di Dios mediante Bijbel i e congregacion cristian i despues cu nan a mira con Jehova ta bendicioná esnan cu ta laga e conocimentu ei guia nan, nan no ta sigui scucha siñansa religioso falsu.—2 Timoteo 3:14.

[Nota]