Bo Por Hala Cerca un Dios Invisibel?

Kisas bo ta puntra: ‘Con mi por desaroyá un relacion íntimo cu un persona cu mi no por mira?’ Esei por parce di ta un bon pregunta. Pero pensa riba esaki:

CON importante bo bista ta pa desaroyá relacionnan amoroso i duradero? Factornan invisibel no ta mes importante, si no ta mas? En berdad! P’e motibu ei algun hende a desaroyá un relacion íntimo cu otro dor di skirbi otro regularmente. I nan cartanan ta transmití di un manera franco loke nan ta gusta of laga, nan meta, principionan, sentido di humor i otro rasgonan di personalidad of interesnan.

Hende ciegu tambe ta demostrá cu bista no ta algu crucial pa desaroyá un relacion íntimo cu un otro persona. Considerá e ehempel di Edward i Gwen, un pareha casá cu ta ciegu. * Edward a topa Gwen na un scol pa hende ciegu, caminda e último aki tabata un colega studiante adulto. E tabata admirá Gwen su cualidadnan, foral su onestidad den abla i conducta, i su actitud excelente pa cu trabou. Gwen na su turno a sinti su mes atraí na Edward pasobra, pa usa su palabranan, “el a desplegá tur e cualidadnan cu segun mi criansa tabata importante.” Nan a cuminsá namorá otro, i tres aña despues nan a casa.

Edward ta bisa: “Ora boso ta huntu, e echo cu bo ta ciegu no ta haci muchu diferencia den edificá un relacion cu un otro persona. Por ta boso no ta mira otro, pero e sintimentunan sí no ta ciegu.” Awor, 57 aña despues, ainda nan ta profundamente enamorá. Nan ta splica cu e secreto di nan relacion maraviyoso ta enbolbé por lo ménos cuater cos: (1) tuma nota dje cualidadnan dje otro persona, (2) pensa riba e cualidadnan ei i ser atraí na nan, (3) mantené bon comunicacion, i (4) haci cos huntu.

E cuater puntonan aki ta vital pa cualkier bon relacion, sea entre amigu, parehá casá of, mas importante, entre hende i Dios. Den e siguiente artículo, nos lo mira con aplicacion dje puntonan aki por yuda nos desaroyá un relacion íntimo cu Dios, maske nos no por mir’é. *

[Nota]