Con Bo Por Hala Cerca Dios

“Hala cerca Dios, i lo e hala cerca boso,” segun Santiago 4:8. Dor di manda su Yu pa nos beneficio, Jehova Dios a mustra cuantu e ta deseá pa hende tin un relacion íntimo cuné.

COMO reaccion riba e iniciativa ei, apostel Juan a skirbi: “Nos ta stima [Dios], pasobra el a stima nos promé.” (1 Juan 4:19) Pero pa nos hala cerca Dios personalmente, nos tin cu dal cierto paso. Eseinan ta e mésun cuater pasonan cu nos ta dal pa hala cerca nos próhimo, manera e artículo anterior a mustra. Laga nos examiná esakinan.

Ripará Dios Su Cualidadnan Maraviyoso

Dios tin hopi cualidad maraviyoso. Algun di esnan mas sobresaliente ta su amor, sabiduria, husticia i poder. Su sabiduria i poder ta keda claramente demostrá tantu den e inmenso universo como den e mundu rond di nos, for di galaxianan imponente pa atom sumamente chikitu. E salmista a skirbi: “Shelunan ta declarando e gloria di Dios; i dje obra di su mannan e expansion ta informá.”—Salmo 19:1; Romanonan 1:20.

Creacion tambe ta reflehá Dios su amor. Por ehempel, e manera cu Dios a traha nos ta mustra cu e kier pa nos disfrutá di bida. El a duna nos e abilidad pa mira color, pa smak i hole, pa apreciá música, pa hari i pa disfrutá di bunitesa. Tambe el a duna nos masha hopi otro facultad i característica cu no ta absolutamente esencial pa bida. Sí, Dios en berdad ta generoso, bondadoso i amoroso—cualidadnan cu sin duda ta contribuí n’e echo cu e ta “e Dios felis.”—1 Timoteo 1:11; Echonan 20:35.

Jehova ta alegrá den e echo cu e manera cu e ta ehercé su soberania i e apoyo cu su criaturanan inteligente ta duna esaki, ta basá principalmente riba amor. (1 Juan 4:8) Ta cierto cu Jehova ta e Soberano Universal, pero e ta trata hende, specialmente su sirbidónan leal, mescos cu un tata amoroso ta trata su yunan. (Mateo 5:45) E no ta retené nada cu ta pa nan bienestar. (Romanonan 8:38, 39) Manera a ser mencioná, el a asta duna e bida di su Yu unigénito pa nos beneficio. Sí, ta pa motibu di Dios su amor nos ta existí i tin e prospecto di bida eterno.—Juan 3:16.

Jesus a duna nos perspicacia profundo den Dios su personalidad pasobra el a imitá su Tata perfectamente. (Juan 14:9-11) E tabata totalmente inegoista, compasivo i bondadoso. Na un ocasion, nan a presentá Jesus na un homber cu tabata surdu i cu no por a papia. Bo por imaginá bo cu kisas e homber a sinti su mes incómodo den e multitud. Interesantemente, Jesus a hiba e homber aki na un sitio privá i a cur’é ei. (Marco 7:32-35) Abo no ta apreciá hende cu ta comprendé bo sintimentunan i cu ta respetá bo dignidad? Si ta asina, e ora ei sigur lo bo hala mas cerca Jehova i Jesus segun cu bo ta siña mas tocante nan.

Pensa Riba Dios Su Cualidadnan

Un hende por tin masha bon cualidad mes, pero nos tin cu pensa riba e persona ei pa por hala cerca dje. Ta mescos relacioná cu Jehova. Un di dos paso vital pa hala cerca dje ta meditá riba su cualidadnan. Rey David, un homber cu di berdad a stima Jehova i cu tabata “agradabel pa [Jehova su] curason,” a bisa: “Mi a corda dianan di hopi tempu atras; mi a meditá riba tur bo actividad; di buena gana mi a mantené mi mes intensamente interesá den e obra di bo propio mannan.”—Echonan 13:22; Salmo 143:5.

 Ora bo observá e maraviyanan di creacion of lesa Bijbel, e Palabra di Dios, bo ta meditá riba loke bo ta mira i lesa mescos cu David a haci? Imaginá bo un yu cu a caba di ricibí un carta for di su tata pa ken e tin cariño profundo. Con lo e mira e carta ei? Sigur lo e no pasa dor di dje aríbariba i despues bent’é den un lachi. Mas bien, lo e studi’é i saca tur detaye i matis for di dje. Asina tambe, e Palabra di Dios mester ta precioso pa nos, mescos cu e tabata p’e salmista, cu a canta: “Cuantu mi stima bo ley! Henter dia e ta mi interes intenso.”—Salmo 119:97.

Mantené Bon Comunicacion

Bon comunicacion ta e sanger cu ta tene cualkier relacion na bida. E ta encerá papia i scucha—no djis cu e mente sino tambe cu e curason. Nos ta papia cu e Creador pa medio di oracion, cu ta adoracion dirigí na Dios. Jehova tin deleite den e oracion di esnan cu ta stim’é i cu ta sirbié i cu ta reconocé Jesucristo como Su representante principal.—Salmo 65:2; Juan 14:6, 14.

Den pasado, Dios a papia cu hende den un variedad di manera, incluso den vision, den soño, i mediante angel. Sin embargo, awendia e ta haci esei pa medio di su Palabra skirbi, Bijbel Santu. (2 Timoteo 3:16) E Palabra skirbí tin hopi bentaha. Bo por consultá cuné tur ora. Mescos cu un carta, bo por disfrutá bes tras bes di dje. I hende no por troce su detayenan manera nan ta haci cu historia oral. Pues pensa riba Bijbel manera un coleccion grandi di carta for di bo kerido Tata celestial, i lagu’e papia cu bo tur dia mediante e cartanan aki.—Mateo 4:4.

Por ehempel, Bijbel ta exponé Jehova su punto di bista di loke ta bon i malu. E ta splica su propósito pa humanidad i p’e tera. I e ta revelá su trato cu un variedad amplio di pueblo i nacion, for di apoyadónan leal te na enemigunan amargá. Dor di a laga registrá su trato cu hende den e manera aki, Jehova a pinta un cuadro en detaye di su personalidad. E ta revelá su amor, goso, tristesa, decepcion, rabia, misericordia, interes—sí, henter e coleccion di su pensamentu i sintimentunan, i e motibunan básico pa esakinan—i tur esei na un manera cu hende por comprendé fácilmente.—Salmo 78:3-7.

Despues cu bo a lesa un parti dje Palabra di Dios, con bo por beneficiá di loke bo a lesa? I particularmente, con bo por hala mas cerca Dios? Di promé, pensa riba loke bo a lesa i siña tocante Dios como persona, lagando e puntonan alcansá bo curason. Anto den oracion bisa Jehova kico bo ta pensa i con bo ta sinti di curason tocante e material cu bo a considerá i con lo bo purba saca beneficio for di dje. Esei ta comunicacion. Claro cu si bo tin otro cos na mente tambe, siguramente bo por incluí nan den bo oracion.

Haci Cosnan Huntu cu Dios

Bijbel ta bisa di cierto hombernan fiel di antigwedad cu nan a cana cu e Dios berdadero, of dilanti dje. (Génesis 6:9; 1 Reynan 8:25) Kico esei ta nificá? Básicamente cu nan a biba tur dia como si fuera Dios tabata ei mes cerca nan. Ta cierto cu nan tabata pecadó. Ma nan a stima Dios su ley i principionan, i nan a biba na armonia cu Dios su propósito. Jehova ta sinti su mes atraí na personanan asina, i e ta percurá pa nan, manera Salmo 32:8 ta mustra: “Lo mi haci pa bo tin perspicacia i instruí bo den e caminda cu bo mester bai. Lo mi duna conseho cu mi wowo riba bo.”

 Abo tambe por tin Jehova como un amigu íntimo—unu cu ta cana cu bo, cu ta interesá den bo, i cu ta duna bo conseho manera un tata. Profeta Isaías a describí Jehova como “Esun cu ta siña bo beneficiá bo mes, Esun cu ta haci bo stap den e caminda den cua bo mester cana.” (Isaías 48:17) Segun cu nos ta experenciá e beneficionan aki, nos ta sinti Jehova su presencia “na [nos] man drechi,” na moda di papia, mescos cu David.—Salmo 16:8.

E Nomber di Dios—Enfocá Riba Su Cualidadnan

Hopi religion i un cantidad aumentante di traduccion di Bijbel no ta usa ni declará Dios su nomber personal. (Salmo 83:18) Tog, den e texto hebreo original, e nomber ei—Jehova—ta aparecé rond di 7.000 bes! (Mayoria traductor di Bijbel no ta consistente dor cu nan a saca e nomber divino, miéntras cu nan ta retené nomber dje hopi diosnan falsu mencioná den e texto  original, manera Baal, Bel, Merodac i asta Satanas!)

Algun hende ta haña cu e omision dje nomber di Dios ta un asuntu insignificante. Pero pensa riba esaki: Ta mas difícil of mas fácil pa desaroyá un relacion íntimo i franco cu un persona sin nomber? Títulonan manera Dios i Señor (cu hende ta usa pa dios falsu tambe) lo por hala atencion na Jehova su poder, autoridad of posicion, pero ta solamente su nomber personal ta identifik’é di un manera inekibocabel. (Éxodo 3:15; 1 Corintionan 8:5, 6) E nomber personal dje Dios berdadero ta representá su cualidad i característicanan. Teólogo Walter Lowrie a bisa corectamente: “Un hende cu no conocé Dios pa nomber no conoc’é realmente como persona tampoco.”

Considerá e ehempel di Maria, un católico sincero cu ta biba na Australia. Ora Testigonan di Jehova a bishit’é promé bes, Maria a laga e Testigonan mustr’é Dios su nomber den Bijbel. Con el a reaccioná? “Ora mi a mira Dios su nomber den Bijbel pa promé bes, mi a yora. Sabiendo cu mi por a realmente conocé i usa Dios su nomber personal a conmové mi.” Maria a sigui studia Bijbel, i pa promé bes den su bida, el a conocé Jehova como un persona i tabata capas pa edificá un relacion duradero cuné.

Sí, nos por “hala cerca Dios,” maske nos no por mir’é cu nos wowonan literal. Nos por “mira” su personalidad exkisitamente bunita den nos mente i curason i asina crece den nos amor p’e. Un amor asina “ta e laso perfecto di union.”—Colosensenan 3:14.

[Kuadro/Plachi na página 6]

Jehova Ta Respondé na Bo Amor P’e

UN RELACION ta un comunicacion di dos via. Segun cu nos ta hala cerca Dios, e ta respondé dor di hala mas cerca nos. Considerá su sintimentunan pa cu Simeon i Ana di edad avansá, kendenan tur dos a ricibí mencion special den Bijbel. E escritor di Evangelio Lucas ta bisa cu Simeon tabata “hustu i reverente,” en espera dje Mesías. Jehova a observá e cualidadnan excelente aki den Simeon i a mustra amor p’e kerido homber bieu aki dor di revelá na dje cu “lo e no mira morto promé cu e mira e Cristo.” Jehova a cumpli cu su promesa i a dirigí Simeon n’e criatura Jesus, cu Su mayornan a hiba n’e tempel den Jerusalem. Emocioná i cu aprecio profundo, Simeon a tuma e criatura den su brasa i a bisa den oracion: “Awor, Señor Soberano, bo ta laga bo esclabo bai liber na pas segun bo declaracion; pasobra mi wowonan a mira bo medio di salba.”​—Lucas 2:​25-35.

“N’e ora ei mes,” tambe Jehova a demostrá su amor pa Ana di 84 aña di edad dor di dirigí e tambe na Jesus. E biuda stimá aki, segun Bijbel, semper tabata n’e tempel “rindiendo sirbishi sagrado” na Jehova. Yen di aprecio, mescos cu Simeon, el a gradicí Jehova pa su bondad extraordinario, despues di cua el a papia tocante e mucha “cu tur esnan cu tabata sperando e liberacion di Jerusalem.”​—Lucas 2:​36-38.

Sí, Jehova a observá ki un amor i temor profundo Simeon i Ana tabatin p’e i con interesá nan tabata den e realisacion di su propósito. E relatonan di Bijbel ei no ta atraé bo na Jehova?

Mescos cu su Tata, Jesus tambe a dicerní e berdadero persona interno. Ora e tabata siña n’e tempel, el a observá un “biuda den necesidad” ta haci un donacion di apénas “dos moneda chikitu di masha poco balor.” Pa otro observadónan su regalo lo tabata insignificante, pero no pa Jesus. El a elogiá e muher aki pasobra el a duna tur loke e tabatin. (Lucas 21:​1-4) P’esei, nos por ta sigur cu Jehova i Jesus ta apreciá nos si nos duna nan lo mihó di nos, sea nos regalo ta grandi of chikitu.

Dios tin deleite den esnan cu ta stim’é, pero e ta sintié ofendí ora hende ta alehá for di dje i ta sigui curso di malecho. Génesis 6:6 ta bisa nos cu Jehova “a sintié ofendí den su curason” pa motibu dje maldad di humanidad promé cu e Diluvio dje tempu di Noe. Mas despues, bes tras bes e israelitanan desobediente a ‘pone Dios na prueba, i a causa dolor asta n’e Santu di Israel,’ segun Salmo 78:41. Sí, Dios no ta un “Promé Causa” indiferente sin sintimentu. E ta berdaderamente un persona, unu kende su sintimentunan no ta desbalansá of sin heful dor di imperfeccion, manera esnan di nos.

[Plachinan na página 7]

Un manera pa hala cerca Jehova ta dor di meditá riba su creacion