E Reino di Dios—Gobernacion Nobo p’e Tera

“E reino . . . lo aplastá i pone un fin na tur e reinonan aki, i e mes lo permanecé te na tempu indefiní.”—DANIEL 2:44.

1. Ki confiansa nos por tin den Bijbel?

BIJBEL ta Dios su revelacion na hende. Apostel Pablo a skirbi: “Ora boso a ricibí e palabra di Dios, cu boso a tende for di nos, boso a acept’é, no como palabra di hende, sino, como loke e berdaderamente ta, como palabra di Dios.” (1 Tesalonicensenan 2:13) Bijbel ta contené loke nos mester sa tocante Dios: informacion tocante su personalidad, su propósitonan i su rekisitonan pa nos. E tin e mihó conseho riba bida di famia i conducta diario. E ta duna detaye di profecianan cu a cumpli den pasado, di esnan cu ta cumpliendo awor i cu lo cumpli den futuro. Sí, “tur Scritura ta inspirá di Dios i probechoso pa siña, pa reprendé, pa rectificá cosnan, pa disipliná den husticia, p’e hende di Dios por ta plenamente competente, completamente ekipá pa tur bon obra.”—2 Timoteo 3:16, 17.

2. Con Jesus a enfatisá e tema di Bijbel?

² E tema principal di Bijbel ta: e vindicacion di Dios su soberania (su derecho di goberná) pa medio di su Reino celestial. Jesus a haci esei e punto central di su ministerio. “Jesus a cuminsá predicá i bisa: ‘Boso repentí, pasobra e reino di shelu a yega cerca.’” (Mateo 4:17) El a mustra ki lugá e Reino mester tin den nos bida, ora el a urgi: “Sigui busca, anto, promé e reino i Su husticia.” (Mateo 6:33) Tambe el a mustra su importancia dor di siña su siguidónan pa pidi Dios den oracion: “Laga bo reino bini. Laga bo boluntad sosodé, mescos cu den shelu, tambe riba tera.”—Mateo 6:10.

 Gobernacion Nobo di Tera

3. Pakico e Reino di Dios ta di sumo importancia pa nos?

³ Pakico e Reino di Dios ta asina importante pa hende? Pasobra pronto lo e tuma accion cu lo cambia e gobernacion dje tera aki pa semper. E profecia na Daniel 2:44 ta declará: “Den e dianan dje reynan ei [cu awor ta goberná riba tera] e Dios di shelu lo establecé un reino [un gobiernu den shelu] cu nunca lo no ser reducí na ruina. I e reino mes lo no pasa na ningun otro pueblo. Lo e aplastá i pone un fin na tur e reinonan aki [gobiernunan terenal], i e mes lo permanecé te na tempu indefiní.” Ora e Reino celestial di Dios ta goberná completamente, hamas hende lo bolbe haña dominio riba tera. Pa semper gobiernu humano incapas i cu ta causa division lo ta cos di pasado.

4, 5. (a) Pakico Jesus ta e persona mas cualificá pa ta Rey dje Reino? (b) Ki tarea Jesus lo tin den futuro cercano?

⁴ E Gobernante Principal den e Reino celestial, bou di Jehova su mando directo, ta e persona mas cualificá: Cristo Jesus. Promé cu el a bini na tera, el a existí den shelu como Dios su “obrero maestro,” e primogénito di henter Dios su creacion. (Proverbionan 8:22-31) “E ta e imágen di e Dios invisibel, e primogénito di tur creacion; pasobra pa medio di dje tur otro cos a ser creá den shelu i riba tera.” (Colosensenan 1:15, 16) I ora Dios a manda Jesus na tera, semper el a cumpli cu e boluntad di Dios. El a wanta e prueba di mas difícil i a muri fiel na su Tata.—Juan 4:34; 15:10.

⁵ Dios a recompensá Jesus pa su lealtad na dje te na morto. Dios a resucit’é na shelu i a dun’é e derecho pa ta Rey dje Reino celestial. (Echonan 2:32-36) Como e Rey dje Reino, Cristo Jesus lo tin e tarea grandi di parti di Dios pa guia miriadanan di criatura spiritual poderoso pa eliminá gobernacion humano for di tera i caba cu tur maldad for di mundu. (Proverbionan 2:21, 22; 2 Tesalonicensenan 1:6-9; Revelacion 19:11-21; 20:1-3) E ora ei Dios su Reino celestial bou di Cristo lo ta e autoridad nobo na mando, e único gobiernu riba henter e tera.—Revelacion 11:15.

6. Ki tipo di gobernacion nos por spera for dje Rey dje Reino?

⁶ E Palabra di Dios ta bisa dje Gobernante nobo di tera: “A dun’é gobernacion i dignidad i reino, pa pueblo, grupo nacional i idioma tur sirbi asta e.” (Daniel 7:14) Dor cu Jesus lo imitá Dios su amor, e pas i felicidad bou di su gobernacion lo ta abundante. (Mateo 5:5; Juan 3:16; 1 Juan 4:7-10) “Dje aumento di su gobiernu i di pas lo no tin fin, . . . pa sosten’é cu husticia i cu rectitud.” (Isaías 9:7, Revised Standard Version) Esta un bendicion di por tin un Gobernante cu ta goberná cu amor, husticia i rectitud! P’esei, 2 Pedro 3:13 ta profetisá: “Tin shelu nobo [Dios su Reino celestial] i un tera nobo [un sociedad terenal nobo] cu nos ta spera segun su promesa, i den esakinan husticia lo tin cu biba.”

7. Con Mateo 24:14 ta cumpliendo awe?

⁷ Siguramente e Reino di Dios ta e mihó noticia pa tur hende cu ta stima loke ta recto. P’e motibu ei, como parti dje señal di cu awor aki nos ta den “e último dianan” dje sistema malbado aki, Jesus a profetisá: “E bon nobo aki dje reino lo ser predicá den tur e tera habitá como testimonio pa tur nacion; i e ora ei e fin lo yega.” (2 Timoteo 3:1-5; Mateo 24:14) E profecia ei ta cumpliendo awor ya cu rond di seis miyon Testigo di Jehova den 234 pais ta dedicá mas cu mil miyon ora pa aña na conta otronan tocante e Reino di Dios. Ta na su lugá anto cu tur e lugánan di adoracion pa mas o ménos 90.000 congregacion rond mundu yama Salon di Reino. Ei, hende ta bin siña dje binidero gobernacion nobo.

Co-Gobernantenan

8, 9. (a) Di unda Cristo su co-gobernantenan ta bini? (b) Ki confiansa nos por tin den e gobernacion dje Rey i su co-gobernantenan?

⁸ Lo tin co-gobernante huntu cu Cristo Jesus den Dios su Reino celestial. Revelacion  14:1-4 a predicí cu ‘for di entre humanidad’ lo a ‘cumpra’ 144.000 persona cu lo ser resucitá na bida celestial. Esakinan ta homber i muhernan cu, en bes di ser sirbí, a sirbi Dios i nan próhimo humildemente. “Nan lo ta sacerdote di Dios i di Cristo, i lo reina como rey cuné p’e mil añanan.” (Revelacion 20:6) Nan cantidad ta hopi mas chikitu cu e “multitud grandi, cu ningun hende por a conta, for di tur nacion i tribu i pueblo i lenga” cu lo sobrebibí e fin dje sistema aki. Nan tambe ta rindi Dios “sirbishi sagrado . . . di dia i anochi,” pero nan no tin un yamada celestial. (Revelacion 7:9, 15) Nan ta forma e núcleo dje tera nobo como súbdito di Dios su Reino celestial.—Salmo 37:29; Juan 10:16.

⁹ Ora Jehova a scoge esnan cu lo goberná cu Cristo den shelu, el a selectá hende fiel cu a pasa den experencia di bida cu tur su problemanan. No tin prácticamente nada cu hende a pasa den cu e rey-sacerdotenan aki tambe no a pasa aden. Di manera cu nan bida riba tera lo mehorá nan abilidad di goberná riba hende. Asta Jesus mes “a siña obedencia for dje cosnan cu el a sufri.” (Hebreonan 5:8) Apostel Pablo a bisa di dje: “Nos tin como sumo sacerdote no unu cu no por compadecé cu nos debilidadnan, sino unu cu a ser probá den tur sentido mescos cu nos mes, pero sin picá.” (Hebreonan 4:15) Ta ki un consuelo pa sa cu esnan cu lo goberná hende den Dios su hustu mundu nobo lo ta rey i sacerdotenan amoroso i compasivo!

E Reino Tabata den Dios Su Propósito?

10. Di con e Reino di shelu no tabata parti di Dios su propósito original?

¹⁰ E Reino celestial tabata parti di Dios su propósito original ora el a crea Adam i Eva? Den e relato di creacion di Génesis, e no ta mencioná nada di un Reino cu lo a goberná humanidad. Jehova mes tabata nan Gobernante, i tanten cu nan a obedec’é, no tabatin necesidad di ningun otro gobernacion. Génesis capítulo 1 ta mustra cu Jehova, probablemente mediante su Yu primogénito celestial, tabata trata cu Adam cu Eva. E relato ta usa expresionnan manera “Dios a bisa nan” i “Dios a pasa na bisa” nan.—Génesis 1:28, 29; Juan 1:1.

11. Ki comienso perfecto humanidad tabatin?

¹¹ Bijbel ta bisa: “Dios a mira tur cos cu el a traha i, mira! e tabata hopi bon.” (Génesis 1:31) Tur cos den e hofi di Eden tabata henteramente perfecto. Adam cu Eva tabata biba den un paradijs. Nan tabatin mente i curpa perfecto. Nan por a comunicá cu nan Creador i e cu nan. I dor di keda fiel, nan lo a haña yu perfecto. Lo no tabatin mester di un gobernacion celestial nobo.

12, 13. Segun cu humanidad perfecto a multiplicá, di con Dios lo por a sigui comunicá cu nan tog?

¹² Segun cu e famia humano a multiplicá, con Dios lo a comunicá cu nan tur? Pensa  riba e streanan di shelu. Nan ta agrupá den áreanan di universo cu yama galaxia. Algun galaxia ta contené mil miyon strea. Otronan ta contené mas o ménos un biyon. I científiconan ta calculá cu tin rond di 100 mil miyon galaxia te asina leu cu nos por wak den universo! Tog, e Creador ta bisa: “Hisa boso wowo na haltu i mira. Ken a crea e cosnan aki? Ta Esun cu ta saca e ehército di nan asta pa number, cu tur e ta yama asta pa nomber. Debí n’e abundancia di energia dinámico, pasobra tambe e ta vigoroso den poder, ni un di nan no ta falta.”—Isaías 40:26.

¹³ Si Dios por tene cuenta cu tur e cuerponan celestial aki, sigur lo no ta ningun problema p’e tene cuenta cu un cantidad muchu mas chikitu di hende. Awor akí mes, miyones di su sirbidónan ta haci oracion tur dia na dje. E oracionnan ei ta alcansá Dios instantáneamente. Pues, pa comunicá cu tur hende perfecto lo no a presentá ningun problema p’e. Lo e no tabatin mester di un Reino celestial pa tene cuenta cu nan. Ki un areglo maraviyoso—di por tin Jehova como Gobernante, di por tin acceso directo na dje i di por tin e prospecto di no muri nunca, di biba pa semper den un paradijs riba tera!

“No Ta Pertenecé na Hende”

14. Pakico hende lo tin mester di Jehova su gobernacion pa semper?

¹⁴ Sin embargo, pa semper hende, asta hende perfecto, lo tin mester di Jehova su gobernacion. Di con? Pasobra Jehova no a crea nan cu e capacidad pa biba sin problema independiente di su gobernacion. Esei ta un ley di humanidad, manera profeta Jeremías a reconocé: “Mi sa masha bon, o Jehova, cu e caminda di hende terenal no ta pertenecé na dje. No ta pertenecé na hende cu ta canando pa ni sikiera dirigí su paso. Corigí mi, o Jehova.” (Jeremías 10:23, 24) Lo ta bobedad pa hende pensa cu nan lo por dirigí un sociedad exitosamente sin e gobernacion di Jehova riba nan. Esei lo ta contrario cu e manera cu nan a ser creá. Independencia di Jehova su mando lo resultá inevitablemente den egoismo, odio, crueldad, violencia, guera i morto. ‘Hende lo dominá hende pa su perhuicio.’—Eclesiástes 8:9.

15. Ki tabata e consecuencianan dje decision robes cu nos promé mayornan a tuma?

¹⁵ Lamentablemente, nos promé mayornan a dicidí cu nan no tabatin mester di Dios como nan Gobernante, i nan a scoge pa biba independiente for di dje. Como resultado, Dios no a sostené nan mas den perfeccion. Awor nan a bira manera un aparato eléctrico sacá for di coriente. Pues, cu tempu nan a bai atras i caba—den morto. Nan a bira manera un malchi dañá, i e condicion ei tabata tur loke nan por a pasa pa nan desendientenan. (Romanonan 5:12) “E Baranca [Jehova], perfecto ta su actividad, pasobra tur su camindanan ta husticia. . . . Nan a obra ruinosamente riba nan propio cuenta; nan no ta su yunan, e defecto ta di nan mes.” (Deuteronomio 32:4, 5) Ta berdad cu ta e criatura spiritual rebelde cu a bira Satanas, a influenciá Adam cu Eva, pero nan tabatin mente perfecto i por a rechasá su mal sugerencianan.—Génesis 3:1-19; Santiago 4:7.

16. Con historia ta duna prueba dje resultado di independencia for di Dios?

¹⁶ Historia ta mustra masha cla kico ta e resultado di independencia for di Dios. Pa miles di aña hende a purba tur forma di gobiernu humano, tur sistema económico i social. Tog, maldad ta sigui “bai di malu pa pió.” (2 Timoteo 3:13) Siglo 20 a duna prueba di esei. E tabata yen di odio feros i e tempu di mas violencia, guera, hamber, pobresa i sufrimentu cu cualkier tempu den historia. I maske con dilanti ciencia médico a bai, tardi of trempan tur hende ta muri. (Eclesiástes 9:5, 10) Dor di purba dirigí nan mes pasonan, hende a laga nan mes bira víctima di Satanas i su demoñonan, te n’e grado cu Bijbel ta yama Satanas “e  dios dje sistema di cosnan aki.”—2 Corintionan 4:4.

E Don di Boluntad Liber

17. Con hende mester a usa Dios su don di boluntad liber?

¹⁷ Pakico Jehova ta permití hende sigui nan mes caminda? Pasobra el a crea nan cu e don maraviyoso di boluntad liber, e facultad di dicidí pa bo mes. “Caminda e spiritu di Jehova ta, tin libertad,” segun apostel Pablo. (2 Corintionan 3:17) Ningun hende kier ta un robot, i cu otro tin cu dicidí cada seconde di dia kico lo e bisa of haci. Pero Jehova a rekerí pa hende usa e don di boluntad liber ei di un manera responsabel, pa mira e sabiduria di haci su boluntad i keda sumiso na dje. (Galationan 5:13) Pues libertad no mester tabata algu absoluto, ya cu esei lo a resultá den anarkia. Mester tabatin un forma di regul’é den e límitenan dje leynan bondadoso di Dios.

18. Kico Dios a demostrá dor di laga hende ehercé boluntad liber?

¹⁸ Dor di laga e famia humano sigui su mes caminda, Dios a demostrá di una bes pa semper cu nos mester di su gobernacion. Su manera di goberná, su soberania, ta e único manera corecto. Esei ta resultá den e mayor felicidad, satisfaccion i prosperidad. Esaki ta asina pasobra Jehova a crea nos curpa i mente pa funcioná mihó na armonia cu su leynan. “Ami, Jehova, ta bo Dios, Esun cu ta siña bo beneficiá bo mes, Esun cu ta haci bo stap den e caminda den cua bo mester cana.” (Isaías 48:17) Boluntad liber den e límitenan dje leynan di Dios lo no ta un carga pisá sino lo resultá den un variedad deleitabel di cuminda, cas, arte i música. Si hende a ehercé boluntad liber na un manera corecto, esei lo a resultá den un bida maraviyoso i semper fasinante den un paradijs riba tera.

19. Ki medio Dios ta usa pa reconciliá hende cuné?

¹⁹ Pero dor cu hende a scoge robes, nan a alehá nan mes for di Jehova, i asina a bira imperfecto, degenerá i muribundo. P’esei mester rescatá nan for dje condicion lamentabel ei i  trece nan bek den un relacion corecto cu Dios como su yu homber i muhernan. E medio cu Dios a scoge pa cumpli cu esaki ta e Reino, i e Rescatador ta Jesucristo. (Juan 3:16) Mediante e areglo aki, hende berdaderamente repentí—manera e yu perdí di Jesus su ilustracion—lo ser reconciliá cu Dios i aceptá bek dor di dje como su yunan.—Lucas 15:11-24; Romanonan 8:21; 2 Corintionan 6:18.

20. Con e Reino lo cumpli cu e propósito di Dios?

²⁰ Jehova su boluntad lo cumpli riba tera sin faya. (Isaías 14:24, 27; 55:11) Pa medio di su Reino bou di Cristo, Dios lo vindicá (hustificá of proba) completamente su derecho di ta nos Soberano. E Reino lo trece fin na gobiernu humano i demoniaco riba e tera aki, i e so lo goberná for di shelu pa mil aña. (Romanonan 16:20; Revelacion 20:1-6) Pero durante e tempu ei, con e superioridad di Jehova su manera di goberná lo keda demostrá? I despues dje mil aña, kico lo ta tarea dje Reino? E siguiente artículo lo considerá e preguntanan aki.

Puntonan di Repaso

• Kico ta e tema di Bijbel?

• Ken ta forma parti dje gobernacion nobo di tera?

• Di con gobernacion humano independiente di Dios hamas por tin éxito?

• Con hende mester ehercé boluntad liber?

[Preguntanan di Estudio]

[Plachi na página 10]

Jesus su siñansa a enfatisá Dios su gobernacion pa medio dje Reino

[Plachinan na página 12]

Den tur pais e siñansa principal di Testigonan di Jehova ta e Reino

[Plachinan na página 14]

Historia ta duna prueba dje mal resultadonan di independencia for di Dios

[Rekonosementu]

Soldánan di WWI: U.S. National Archives photo; campo di concentracion: Oświęcim Museum; mucha: UN PHOTO 186156/J. Isaac