Mi A Haci e Spiritu Santu Mi Yudante Personal?

TÉOLOGONAN, pa no papia mes di hende en general, tin un cantidad di idea tocante e identidad di Dios su spiritu santu. Tog, e incertidumbre ei no ta necesario. Bijbel ta splica bon cla kico spiritu santu ta. En bes di ta un persona, manera algun hende ta pretendé, e ta e poderoso forsa activo cu Dios ta usa pa cumpli cu su boluntad.—Salmo 104:30; Echonan 2:33; 4:31; 2 Pedro 1:21.

Siendo cu spiritu santu ta asina estrechamente ligá cu e cumplimentu di e propósitonan di Dios, nos deseo lo mester ta pa nos bida ta na armonia cuné. Nos deseo lo mester ta p’e ta nos yudante personal.

Di Con un Yudante Ta Necesario?

Anticipando su baimentu for di tera, Jesus a trankilisá su disipelnan: “Lo mi pidi e Tata i lo e duna boso un otro yudante pa keda cu boso pa semper.” I un bes mas: “No obstante, mi ta bisa boso e berdad: Ta pa boso probecho cu mi ta bai. Pasobra si mi no bai, e yudante lo no bini di ningun manera cerca boso; pero si mi sigui mi caminda, lo mi mand’é cerca boso.”—Juan 14:16, 17; 16:7.

Jesus a duna su disipelnan un comision serio dor di instruí nan: “Bai pues, i haci disipel di hende di tur nacion, bautisando nan den e nomber dje Tata i dje Yu i dje spiritu santu, siñando nan pa warda tur loke mi a manda boso.” (Mateo 28:19, 20) Esaki lo no tabata un tarea fácil, ya cu nan mester a cumpli cuné enfrentando oposicion.—Mateo 10:22, 23.

Huntu cu oposicion externo lo tabatin tambe un grado di friccion den e congregacion. Pablo a skirbi e cristiannan na Roma rond di aña 56 E.C.: “Awor mi ta exhortá boso, rumannan, pa vigilá esnan cu ta causa desunion i ocasion pa tropieso contrario cu e siñansa cu boso a siña, i evitá nan.” (Romanonan 16:17, 18) Una bes cu e apostelnan a muri e situacion aki lo a bira pió. Pablo a spierta: “Mi sa cu despues di mi baimentu lobonan opresivo lo drenta meimei di boso i lo no trata e tou cu ternura, i for di den boso mes lo lanta hombernan i papia cosnan trocí pa lastra e disipelnan tras di nan mes.”—Echonan 20:29, 30.

Nan tabatin mester di Dios su yudansa pa contrarestá e obstáculonan aki. El manda esaki mediante Jesus. Despues di su resureccion, riba dia di Pentecoste aña 33 E.C., un 120 di su siguidónan “tur a yena cu spiritu santu.”—Echonan 1:15; 2:4.

E disipelnan a reconocé cu e spiritu santu cu a ser dramá n’e ocasion aki tabata e yudansa cu Jesus a primintí. Sin duda, awor nan a comprendé mihó e identificacion cu Jesus a duna nan: “E yudante, e spiritu santu, cu e Tata lo manda den mi nomber, esei lo siña boso tur cos i pone boso corda tur loke mi a bisa boso.” (Juan 14:26) Tambe el a yam’é ‘e yudante, e spiritu dje berdad.’—Juan 15:26.

Den Ki Manera e Spiritu Ta un Yudante?

E spiritu ta sirbi como un yudante den diferente manera. Promé, Jesus a primintí cu e spiritu lo recordá su disipelnan e cosnan cu el a bisa nan. Cu esaki e tabata kier men mas cu djis yuda nan corda palabra. E spiritu lo a yuda nan comprendé e nificacion profundo i importancia di loke el a siña nan. (Juan 16:12-14)  Brevemente bisá, e spiritu lo a guia Jesus su disipelnan na un mihó comprendimentu dje berdad. Despues apostel Pablo a skirbi: “Ta na nos Dios a revelá nan mediante su spiritu, pasobra e spiritu ta scudriñá tur cos, asta e cosnan profundo di Dios.” (1 Corintionan 2:10) Pa Jesus su siguidónan ungí por a pasa conocimentu exacto na otronan, nan mes mester tabatin un comprendimentu bon fundá.

Di dos, Jesus a siña su disipelnan haci oracion, i hacié cu regularidad. Si de bes en cuando nan no tabata sa sigur kico nan tin cu pidi den oracion, e spiritu por a intercedé pa nan of yuda nan. “Di igual manera e spiritu tambe ta bin na yudansa di nos debilidad; pasobra e problema di loke nos tin cu pidi den oracion segun loke nos mester, nos no sa, pero e spiritu mes ta boga pa nos cu suspiro no-expresá.”—Romanonan 8:26.

Di tres, e spiritu lo a yuda e disipelnan di Jesus defendé e berdad públicamente. El a spierta nan: “Nan lo entregá boso na e cortenan local, i nan lo suta boso den nan snoanan. Sí, nan lo hiba boso dilanti gobernadónan i reynan pa mi causa, como testimonio pa nan i pa e nacionnan. Sin embargo, ora nan entregá boso, no bira anshá en cuanto con of kico pa papia; pasobra loke boso tin cu papia lo ser duná na boso n’e ora ei; pasobra esnan cu ta papia no ta únicamente boso, sino ta e spiritu di boso Tata ta papia mediante boso.”—Mateo 10:17-20.

Tambe e spiritu santu lo a yuda identificá e congregacion cristian i motivá su miembronan pa tuma decision personal sabí. Laga nos considerá e dos aspectonan ei dje tema aki mas ampliamente i mira ki nificacion nan tin pa nos awe.

Pa Sirbi Como un Marca di Identificacion

Pa siglonan e hudiunan a sirbi bou dje Ley di Moises como Dios su pueblo scogí. Dor cu nan a rechasá Jesus como e Mesías, el a predicí cu lo no dura mashá cu nan mes lo ser rechasá: “Boso nunca a lesa den e Scritura: ‘E piedra cu e constructornan a rechasá ta esun cu a bira e piedra principal di skina. Esaki a bini di Jehova, i e ta maraviyoso den nos bista’? P’esei mes mi ta bisa boso: E reino di Dios lo ser kitá for di boso i lo ser duná na un nacion cu ta producí su frutanan.” (Mateo 21:42, 43) Una bes cu a funda e congregacion cristian na Pentecoste 33 E.C., siguidónan di Cristo a bira e “nacion cu ta producí su frutanan.” For dje tempu ei padilanti, e congregacion aki tabata Dios su canal di comunicacion. Pa hende por a reconocé cu Jehova a transferí su aprobacion divino, Dios a duna un marca di identificacion cu tabata claramente bisto.

Na Pentecoste spiritu santu a capacitá e disipelnan pa papia den idiomanan cu nunca nan no a siña, i esei a pone observadónan reaccioná cu asombro i puntra: “Con por ta cu nos ta tende, cada un di nos, su mes idioma den cua nos a nace?” (Echonan 2:7, 8) E abilidad pa papia un idioma desconocí, huntu cu “hopi indicacion profético i señal [cu] a cuminsá sosodé pa medio dje apostelnan,” a pone tres mil hende reconocé cu di berdad Dios su spiritu tabata den accion.—Echonan 2:41, 43.

Tambe por a identificá e disipelnan di Cristo bon cla como e sirbidónan di Dios dor cu nan a producí “fruta di spiritu,” esta, amor, goso, pas, gran pacenshi, amabilidad, bondad, fe, suavedad, dominio propio. (Galationan 5:22, 23) De facto, amor tabata un marca di identificacion sobresaliente dje berdadero congregacion cristian. Jesus a predicí: “Dor di esaki tur lo sa cu boso ta mi disipelnan, si boso tin amor entre boso.”—Juan 13:34, 35.

Miembronan dje congregacion cristian di promé a aceptá e guia di Dios su spiritu santu i a probechá dje yudansa cu el a ofrecé. Aunke cristiannan djawe ta realisá cu Dios no ta lantando hende morto ni haci milager manera den promé siglo, nan ta permití fruta dje spiritu di Dios identificá nan como berdadero disipel di Jesucristo.—1 Corintionan 13:8.

 Un Yudante ora di Tuma Decision Personal

Bijbel ta producto di spiritu santu. Pues, ora nos permití Bijbel persuadí nos, ta como si fuera spiritu santu ta instruyendo nos. (2 Timoteo 3:16, 17) E por yuda nos tuma decisionnan sabí. Pero nos ta permitié haci esei?

Kico di nos scogementu di profesion of empleo? Spiritu santu lo capacitá nos pa mira un posibel empleo desde e punto di bista di Jehova. Nos empleo mester ta na armonia cu principionan bíblico, i preferiblemente e mester yuda nos sigui tras di metanan teocrático. E salario of prominencia i prestigio conectá cu un trabou ta realmente di ménos importancia. Loke ta mas importante ta si e ta duna nos e necesidadnan di bida i ta permití nos suficiente tempu pa cumpli cu nos obligacionnan cristian.

Ta normal i corecto cu hende ta deseá di disfrutá di bida. (Eclesiástes 2:24; 11:9) Pues, un cristian balansá kisas ta recreá p’e relahá i disfrutá. Pero e mester scoge recreo cu ta reflehá fruta di spiritu, i no recreo cu ta ser caracterisá p’e “obranan di carni.” Pablo ta splica: “Awor e obranan di carni ta bisto, i nan ta fornicacion, impuresa, conducta inmoral, idolatria, práctica di spiritismo, enemistad, pleitu, yaluzí, atake di rabia, contencion, desunion, secta, envidia, buracheria, paranda, i cosnan semehante.” Tambe cristiannan mester evitá di bira “egoista, instigando competencia un cu otro, envidiando otro.”—Galationan 5:16-26.

Esei ta e caso tambe ora di scoge amigu. Ta sabí pa scoge amigu a base di nan spiritualidad i no a base di nan aparencia externo of posesion. Tabata bisto cu e homber David tabata amigu di Dios, ya cu Dios a describié como “un homber agradabel pa [su] curason.” (Echonan 13:22) Ignorando aparencia externo, Dios a scoge David pa ta rey di Israel, di acuerdo cu e principio: “No ta manera hende ta mira, ta e manera cu Dios ta mira, pasobra e simpel hende ta mira loke ta parce na bista; pero en cuanto Jehova, e ta mira loke e curason ta.”—1 Samuel 16:7.

Miles di amistad a fracasá pasobra nan tabata basá riba aparencia externo of posesion. Amistad basá riba rikesa insigur por terminá di ripiente. (Proverbionan 14:20) Dios su Palabra inspirá dor di spiritu santu ta consehá nos pa ora di scoge amigu, nos scoge esnan cu por yuda nos sirbi Jehova. E ta bisa nos pa concentrá riba duna mas bien cu ricibí pasobra duna ta trece mas goso. (Echonan 20:35) Tempu i cariño ta entre e cosnan mas balioso cu nos por duna nos amigunan.

Pa un cristian cu ta busca un casá, Bijbel tin conseho inspirá dor di spiritu. Den un sentido, e ta bisa: ‘Wak mas leu cu e cara i figura. Wak e pianan.’ E pianan? Sí, den e sentido aki: Nan ta ser usá pa haci Jehova su trabou di predicá e bon nobo, i p’esei, na moda di bisa, nan ta bunita den su bista? Nan ta ekipá cu e mensahe dje berdad i e bon nobo di pas? Nos ta lesa: “Ki bunita riba e cerunan ta e pianan di esun cu ta trece bon nobo, esun cu ta publicá pas, esun cu ta trece bon nobo di algu mihó, esun cu ta publicá salbacion, esun cu ta bisa Síon: ‘Bo Dios a bira rey!’”—Isaías 52:7; Efesionan 6:15.

Siendo cu nos ta bibando den “tempu crítico, duru pa trata cuné,” nos tin mester di yudansa pa cumpli cu Dios su boluntad. (2 Timoteo 3:1) E yudante, e spiritu santu di Dios, a duna apoyo poderoso n’e trabou di cristiannan den promé siglo, i tambe e tabata nan yudante personal. Un studio diligente dje Palabra di Dios, un producto di spiritu santu, ta e manera principal cu nos tambe por haci e spiritu santu nos yudante personal. Nos ta hacié?

 [Plachi di henter página na página 23]