Balornan Moral Ta Decayendo

“ÁNTES nunca cos asina tabata sosodé,” segun Helmut Schmidt, ex-canciyer di Alemania. E tabata lamentá casonan recien di desonestidad grave cerca funcionarionan público, cu a sali den titular di noticia. El a bisa: “Golosidad a pone normanan moral bai perdí.”

Hopi hende lo bai di acuerdo cuné. Balornan moral fundá riba Bijbel, e Palabra di Dios, i cu pa hopi tempu ta ampliamente aceptá como guia di loke ta bon i malu, ta ser halá un banda. Esei ta e caso asta na paisnan cu pa nomber ta ser asociá cu cristianismo.

Moralidad Bíblico Tin Importancia?

Moralidad basá riba siñansanan di Bijbel ta incluí onrades i integridad. Tog violacion di regla, corupcion i fraude ta reina. The Times di Londen ta raportá cu segun alegacionnan hací, algun recherche “tabata tuma te £100.000 cada un bes, pa pone droga confiscá bek den circulacion, of pa deshací di evidencia contra figuranan prominente di baho mundu.” Na Austria, nan ta bisa cu fraude di seguro ta un práctica comun. I na Alemania,  comunidad científico a keda babucá ora cu recientemente algun investigadó científico a descubrí “un dje casonan mas escandaloso di fraude den ciencia na Alemania.” Un profesor, un “strea di ciencia genético na Alemania,” a keda acusá di falsificá of inventá dato na gran escala.

Moralidad bíblico ta incluí fieldad den matrimonio tambe, cu lo mester ta un relacion permanente. Pero cada bes mas pareha ta caba den corte. E korant católico Christ in der Gegenwart (Cristian Contemporáneo) ta raportá cu “asta na Suisa, cu ta un pais ‘conservativo,’ mas i mas matrimonio ta kibra.” Na Hulanda, 33 porciento di tur matrimonio ta caba na divorcio. Un señora cu a observá e cambionan social na Alemania durante e último añanan a skirbi tocante su preocupacion: “Awendia hende ta considerá matrimonio como ouderwets, como algu cu no ta pas pa nos tempu. Hende no ta casa cu un partner pa bida largu mas.”

Di otro banda, miyones di hende ta considerá cu e normanan moral cu Bijbel ta siña ta digno di confiansa i importante pa bida den nos mundu moderno. Un pareha casá cu ta biba na grens di Suisa cu Alemania a descubrí cu nan a bira mas felis dor di biba segun moralidad bíblico. Segun nan, “ta un guia tin pa tur aspecto di bida. E guia ei ta Bijbel.”

Kico abo ta pensa? Bijbel por sirbi como un guia balioso? Moralidad bíblico ta práctico awendia?