Bo Por Keda Moralmente Limpi
Bo Por Keda Moralmente Limpi
“Esaki ta loke e amor di Dios ta nificá, cu nos ta warda su mandamentunan.”—1 JUAN 5:3.
1. Ki contraste den conducta di hende ta bisto awe?
HOPI tempu atras, profeta Malakías a ser inspirá pa profetisá tocante un tempu ora lo tin un contraste skerpi entre e conducta di Dios su pueblo i esun di hende cu no ta sirbi Dios. E profeta a skirbi: “Boso siguramente lo mira atrobe e distincion entre un hustu i un malbado, entre un cu ta sirbi Dios i un cu no a sirbié.” (Malakías 3:18) Awe, e profecia aki ta cumpliendo. Warda Dios su mandamentunan, incluso esnan cu ta manda pa nos ta limpi moralmente, ta e curso sabí i corecto den bida. Sin embargo, no semper e ta un curso fácil. Cu bon motibu Jesus a bisa cu cristiannan mester haci esfuerso vigoroso pa gana salbacion.—Lucas 13:23, 24.
2. Ki preshonnan externo ta haci difícil pa algun hende keda decente den sentido moral?
2 Di con ta difícil pa keda decente den sentido moral? Un motibu ta, cu tin preshon externo. Industria di entretenimentu ta pinta sex ilícito como algu fasinante, placentero, un cos pa hende adulto, anto prácticamente nan ta ignorá su consecuencianan negativo. (Efesionan 4:17-19) Mayoria relacion íntimo cu nan presentá, ta di parehanan cu no ta casá cu otro. Hopi bes película i programa di television ta mustra relacion sexual como parti di un relacion casual i sin compromiso. En general, falta calor personal i respet mutuo. Hopi hende a ser exponé na e mensahenan aki for di tempu cu nan tabata mucha. Ademas, tin preshon fuerte di nos pareunan pa nos adaptá na e ambiente moral liberal djawendia, i tin bes hende ta tene mofa i asta papia malu di esnan cu no ta adaptá nan mes n’e forma aki.—1 Pedro 4:4.
3. Cua ta algun motibu cu hopi hende den mundu a enbolbé nan mes den inmoralidad?
3 Preshon interno tambe ta haci difícil pa hende keda decente den sentido moral. Jehova a crea hende cu deseo sexual, i e deseonan aki por ta fuerte. Deseo tin hopi di haber cu loke nos ta pensa, i inmoralidad ta conectá cu pensamentu cu no ta na armonia cu Jehova su pensamentunan. (Santiago 1:14, 15) Por ehempel, segun un encuesta recien, publicá den British Medical Journal, hopi hende cu a tene relacion sexual pa promé bes tabata simplemente curioso pa sa con sex ta. Otronan a pensa cu mayoria hende di nan edad tabata sexualmente activo, di manera cu nan tambe kier a perde nan birginidad. Otronan a bisa cu nan a perde control di nan emocionnan, of cu nan tabata “un tiki burachi ora e cos a pasa.” Si nos kier agradá Dios, nos mester razoná diferente. Ki forma di pensa lo yuda nos keda limpi den sentido moral?
Forma Conviccion Firme
4. Kico nos mester haci pa keda decente den sentido moral?
4 Pa nos keda moralmente limpi, nos mester reconocé cu ta bale la pena pa sigui un estilo di bida asina. Esaki ta na armonia cu loke apostel Pablo a skirbi e cristiannan na Roma: “Proba pa boso mes loke ta e bon i aceptabel i perfecto boluntad di Dios.” (Romanonan 12:2) Reconocé cu decencia moral ta bale la pena ta encerá mas cu djis sa cu e Palabra di Dios ta condená inmoralidad. E ta encerá cu nos ta comprendé e motibunan di con Bijbel ta condená inmoralidad, i ki beneficio nos ta saca dor di evit’é. E artículo anterior a considerá algun dje motibunan aki.
5. Pa cua motibu principal cristiannan lo kier keda decente den sentido moral?
5 Pero en realidad, e motibu mas poderoso cu cristiannan tin pa evitá inmoralidad sexual tin di haci cu nos relacion cu Dios. Nos a siña cu e sa kico ta mihó pa nos. Nos amor p’e lo yuda nos odia loke ta malu. (Salmo 97:10) Dios ta e Dunador di “tur bon don i tur regalo perfecto.” (Santiago 1:17) E ta stima nos. Dor di obedec’é, nos ta demostrá cu nos ta stim’é i ta apreciá tur loke el a haci pa nos. (1 Juan 5:3) Nunca nos lo kier desapuntá Jehova i hacié dolor dor di kibra su mandamentunan hustu. (Salmo 78:41) Nos no kier actua di un manera cu lo pone hende papia malu di su forma di adoracion santu i hustu. (Tito 2:5; 2 Pedro 2:2) Dor di keda decente den sentido moral, nos ta haci Esun Supremo alegrá.—Proverbionan 27:11.
6. Di con ta beneficioso pa laga otro hende sa di nos normanan moral?
6 Una bes nos a dicidí pa keda decente den sentido moral, un proteccion adicional ta di duna otronan di conocé nos conviccion. Laga hende sa cu bo ta un sirbidó di Jehova Dios, i cu bo ta determiná pa sigui su normanan haltu. Ta bo bida, bo curpa, bo escoho. Kico ta den wega? Bo relacion precioso cu bo Tata celestial. Pues, duna di conocé bon cla cu bo integridad moral no ta algu cu tin espacio pa papia ariba. Sea orguyoso di representá Dios dor di sostené su principionan. (Salmo 64:10) Nunca tene bergwensa di papia di bo conviccionnan moral cu otro hende. Dor di expresá bo mes cu curashi, bo por haña mas fortalesa i proteccion, i lo bo por animá otronan pa sigui bo ehempel.—1 Timoteo 4:12.
7. Con nos por mantené nos determinacion pa keda decente den sentido moral?
7 Siguientemente, despues cu nos a determiná di mantené un norma moral haltu, i a laga otro hende sa di nos posicion, nos mester tuma medida pa pega na nos determinacion. Un manera pa haci esaki ta di tene cuidou ora di scoge amigu. Bijbel ta bisa: “Esun cu ta cana cu hende sabí lo bira sabí.” Asociá cu hende cu ta compartí bo balornan moral; nan lo fortalecé bo. E mésun texto aki ta bisa tambe: “Pero esun cu tin trato cu hende estúpido lo bai e malu.” (Proverbionan 13:20) Te caminda por, evitá hende cu por swak bo determinacion.—1 Corintionan 15:33.
8. (a) Di con nos mester alimentá nos mente cu cos sano? (b) Kico nos mester evitá?
8 Ademas, nos mester alimentá nos mente cu cos cu ta berdadero, serio, hustu, decente, amabel, di bon reputacion, birtuoso i digno di alabansa. (Filipensenan 4:8) Nos ta haci esaki dor di ta selectivo en cuanto loke nos ta mira i lesa, i e música cu nos ta scucha. Bisa cu literatura inmoral no tin un influencia coruptivo ta mescos cu bisa cu literatura moral no tin influencia positivo. Corda, hende imperfecto por cai fácil den inmoralidad. Pues, buki, revista, película i música cu ta promové sintimentu sexual lo hiba na deseo robes, i esakinan por bin hiba na picá. Pa nos mantené limpiesa moral, nos mester yena nos mente cu sabiduria divino.—Santiago 3:17.
Pasonan Cu Ta Hiba na Inmoralidad
9-11. Manera Sálomon a relatá, cua pasonan a hiba cierto hóben progresivamente na inmoralidad?
9 Hopi bes, ta cierto pasonan specífico a hiba na inmoralidad. Despues di cada paso, ta bira mas i mas difícil pa bira bek. Mira con Proverbionan 7:6-23 ta describí esei. Sálomon ta observá “un yoncuman cu falta curason,” of bon motivacion. E yoncuman ta “pasa riba caya cerca di [un prostituta] su skina, i den e caminda cu ta hiba na [e muher] su cas e ta marcha, den scuritu, ora anochi ta cera, ora anochi i scuridad ta acercá.” Ei ta su promé fout. Ora anochi cera, su “curason” a hib’é, no na cualkier caya, sino na unu caminda e sa cu en general bo por haña prostituta.
10 Despues nos ta lesa: “Mira! un muher tabata bini pa top’é, cu paña di prostituta i astuto di curason.” Awor e ta mir’é! Lo e por bira bai cas bek, pero ta mas difícil awor, specialmente dor cu e ta moralmente swak. E muher ta gar’é i dun’é un sunchi. Despues di aceptá e sunchi, awor e ta scucha su persuasion seductivo. E muher ta bisa: “Mi tabatin cu ofrecé sacrificio di comunion. Awe mi a paga mi votonan.” Sacrificio di comunion a incluí carni, hariña, zeta i biña. (Levítico 19:5, 6; 22:21; Númeronan 15:8-10) Dor di mencioná esakinan, kisas el a duna di comprendé cu e no a falta spiritualidad, i na mes momento e por a lagu’é sa cu tabatin bon cos di come i bebe na abundancia na su cas. “Ban,” e muher ta suplik’é, “laga nos sacia nos mes bebiendo di amor te mainta; sí, laga nos gosa di otro cu expresionnan di amor.”
11 No ta difícil pa nos pronosticá e resultado. “Cu e suavedad di su lipnan e ta seducié.” E ta sigui e muher bai cas cuné “manera un toro cu ta bini pa ser matá” i “mescos cu un para ta pura drenta e trampa.” Sálomon ta caba cu e palabranan spiertador aki: “E no tabata sa cu esei ta encerá su alma.” Su alma, of su bida, ta enbolbí pasobra “Dios lo husga fornicadónan i adúlteronan.” (Hebreonan 13:4) Esta un les poderoso pa tantu hende homber como hende muher! Nos mester evitá di tuma asta e pasonan inicial riba e caminda cu lo hiba na Dios su desaprobacion.
12. (a) Kico e expresion “cu falta curason” kier men? (b) Con nos por edificá fortalesa moral?
12 Nota cu e hóben dje relato tabata “falta curason.” E expresion aki ta mustra nos cu su pensamentu, deseo, afecto, emocion i metanan den bida no tabata na armonia cu loke Dios ta aprobá. Su debilidad moral a hiba na consecuencianan trágico. Den e “último dianan” crítico aki, edificá fortalesa moral ta exigí esfuerso. (2 Timoteo 3:1) Dios ta percurá yudansa pa nos. E ta percurá reunionnan di congregacion cristian cu ta animá nos pa cana riba e caminda corecto, i ta pone nos den contacto cu otronan cu tin e mésun meta cu nos. (Hebreonan 10:24, 25) Tin ancianonan di congregacion cu ta pastoreá nos i siña nos e caminda di rectitud. (Efesionan 4:11, 12) Nos tin e Palabra di Dios, Bijbel, pa dirigí i guia nos. (2 Timoteo 3:16) I semper nos tin oportunidad di pidi yudansa di Dios su spiritu den oracion.—Mateo 26:41.
Siña for di e Picánan di David
13, 14. Con rey David a enbolbé su mes den picá serio?
13 Pero lamentablemente, asta sirbidónan sobresaliente di Dios a yega di enbolbé nan mes den inmoralidad sexual. Un di nan ta rey David, cu a sirbi Jehova fielmente pa décadanan largu. No tin duda cu el a stima Dios intensamente. Tog el a cai den un curso di picá. Mescos cu cerca e hóben cu Sálomon a describí, tabatin cierto pasonan cu a hiba na David su picá, i cu despues a hacié mas grave.
14 E tempu ei probablemente David tabata den su cincuent’i picu aña. For di riba su dak el a mira e bunita Bat-seba ta baña. El a busca pa sa tocante dje i a haña sa ken e ta. El a descubrí cu su casá, Urías, tabata na e sitiamentu di Raba, un stad amonita. David a laga nan trece Bat-seba na su palacio i el a tene relacion cuné. Despues cos a complicá: Bat-seba a haña sa cu e tabata na estado di David. Sperando cu Urías lo pasa anochi cu su casá, David a manda yam’é for di guera. Asina lo a parce cu ta Urías ta tata di Bat-seba su yu. Pero Urías no a bai su cas. Desesperá pa sconde su picá, David a manda Urías Raba bek cu un carta p’e hefe di ehército, bisando cu nan mester a posicioná Urías na un puesto caminda lo e ser matá. Asina Urías a perde su bida, i David a casa cu e biuda promé cu a sali na cla cu e tabata na estado.—2 Samuel 11:1-27.
15. (a) Con e picá di David a keda exponé? (b) Con David a reaccioná na e reprendementu ábil di Natan?
15 A parce cu e plan di David pa tapa su picá a funcioná. Lunanan a pasa. E yu, un mucha homber, a nace. Si David tabatin e incidente aki na mente ora el a componé Salmo 32, anto claramente su concenshi tabata torment’é. (Salmo 32:3-5) Sin embargo, e picá no tabata scondí pa Dios. Bijbel ta bisa: “E cos cu David a haci a parce malu den Jehova su bista.” (2 Samuel 11:27) Jehova a manda profeta Natan, kende a confrontá David ábilmente cu loke el a haci. Mesora David a confesá i a suplicá Jehova su pordon. Su repentimentu genuino a trece reconciliacion cu Dios. (2 Samuel 12:1-13) David no a resentí e reprendementu. Mas bien, el a desplegá e actitud describí na Salmo 141:5: “Si e hustu mester golpia mi, esei lo ta un bondad amoroso; i si e mester reprendé mi, esei lo ta zeta riba cabes, cu mi cabes lo no kier nenga.”
16. Ki advertencia i conseho Sálomon a duna relacioná cu transgresion?
16 Kisas Sálomon, cu tabata e di dos yu di David cu Bat-seba, a refleccioná riba e capítulo scur aki den bida di su tata. Despues el a skirbi: “Esun cu ta tapa su transgresionnan lo no tin éxito, pero esun cu ta confesá nan i ta bandoná nan lo ser mustrá misericordia.” (Proverbionan 28:13) Si nos cai den picá serio, nos mester scucha e conseho inspirá aki, cu ta tantu un advertencia como un palabra di conseho. Nos mester confesá na Jehova i acercá e ancianonan di congregacion pa yudansa. Un responsabilidad importante di anciano ta di reahustá esnan cu cai den malecho.—Santiago 5:14, 15.
Wanta Consecuencia di Picá
17. Maske Jehova ta pordoná picá, di kico e no ta protehá nos?
17 Jehova a pordoná David. Di con? Dor cu David tabata un homber íntegro, dor cu e tabata misericordioso cu otronan, i dor cu su repentimentu tabata genuino. Tog David no a ser protehá dje consecuencianan desastroso cu a bini. (2 Samuel 12:9-14) Mescos ta e caso awe. Maske Jehova no ta trece cos malu riba hende repentí, e no ta spar nan dje consecuencianan natural di nan accionnan robes. (Galationan 6:7) Algun resultado di inmoralidad sexual por ta divorcio, embaraso no deseá, malesa transmití sexualmente i pérdida di confiansa i respet.
18. (a) Con Pablo a bisa e congregacion corintio pa trata cu un caso di mal conducta sexual grave? (b) Con Jehova ta mustra amor i misericordia pa hende pecadó?
18 Si personalmente nos a cometé un fayo serio, ta fácil pa nos sinti nos desanimá ora nos ta sufri consecuencia dje erornan cu nos a haci. Apesar di esei, nos no mester laga nada stroba nos di repentí i bira reconciliá cu Dios. Den promé siglo, Pablo a skirbi e corintionan cu nan mester a remové un homber for dje congregacion, cu tabata practicá fornicacion den forma di incesto. (1 Corintionan 5:1, 13) Despues cu e homber a repentí di berdad, Pablo a instruí e congregacion: “Pordon’é bondadosamente i consol’é, [i] confirmá boso amor p’e.” (2 Corintionan 2:5-8) Den e conseho inspirá aki nos ta mira Jehova su amor i misericordia pa pecadónan repentí. Angel den shelu ta alegrá ora un pecadó repentí.—Lucas 15:10.
19. E duele apropiado pa un curso robes por hiba na ki beneficio?
19 Apesar cu un curso robes lo duel nos, e duele cu nos sinti por yuda nos ‘vigilá pa nos no dirigí nos mes atrobe na loke ta perhudicial.’ (Job 36:21) Sí, e consecuencianan amargo di picá mester impedí nos di ripití un eror. Ademas, David a usa e experencia tristu cu el a gana dor di su conducta pecaminoso pa e consehá otronan. El a bisa: “Lo mi siña e transgresornan bo camindanan, pa pecadónan mes por bira bek directamente na bo.”—Salmo 51:13.
Felicidad Ta Resultá dor di Sirbi Jehova
20. Ki beneficionan nos ta saca ora nos obedecé Dios su rekisitonan hustu?
20 Jesus a bisa: “Felis ta esnan cu ta tende e palabra di Dios i ta ward’é!” (Lucas 11:28) Obedencia na Dios su rekisitonan hustu ta trece felicidad awor i te den futuro infinito. Si nos a permanecé limpi den sentido moral, laga nos sigui den e curso ei dor di probechá di tur e percuracionnan cu Jehova a haci pa yuda nos. Si nos a cai den inmoralidad, laga nos saca animacion for dje echo cu Jehova ta cla pa pordoná esnan cu repentí di berdad, i laga nos keda determiná pa no ripití e picá ei nunca mas.—Isaías 55:7.
21. Cua spiertamentu di apostel Pedro por yuda nos keda limpi den sentido moral si nos aplik’é?
21 Pronto e mundu inhustu aki lo pasa bai, huntu cu tur su actitudnan i prácticanan inmoral. Dor di mantené nos decencia den sentido moral, nos lo beneficiá awor i pa semper. Apostel Pedro a skirbi: “Stimánan, siendo cu boso ta spera e cosnan aki, haci boso sumo posibel p’e haña boso finalmente sin mancha i sin defecto i na pas. . . . Teniendo e conocimentu aki di antemano, keda vigilante pa boso no ser hibá cu nan via eror di hende desafiadó di ley i cai for di boso mes firmesa.”—2 Pedro 3:14, 17.
Bo Por Splica?
• Di con por ta difícil pa keda limpi den sentido moral?
• Cua ta algun manera pa yuda nos keda determiná di sigui normanan moral haltu?
• Ki lesnan nos por siña dje picánan dje yoncuman cu Sálomon a mencioná?
• Kico David su ehempel ta siña nos en cuanto repentimentu?
[Preguntanan di Estudio]
[Plachi na página 13]
Ta un proteccion pa laga otro hende sa cua ta bo posicion relacioná cu asuntunan di moralidad
[Plachinan na página 16, 17]
Dor cu David a repentí sinceramente, Jehova a pordon’é