Con Bo Ta Midi Éxito?

UN DICCIONARIO ta definí éxito como “logra rikesa, fabor of prominencia.” E definicion ei ta completo? Rikesa, fabor of prominencia ta e único midínan di éxito? Promé cu bo contestá, pensa riba esaki: Jesucristo no a adkerí rikesa material durante su bida riba tera. E no a gana fabor di mayoria hende; e no tabata masha bon mirá tampoco cerca esnan cu a establecé moda den su tempu. Tog, Jesus tabata un homber exitoso. Di con?

Tempu cu e tabata riba tera, Jesus tabata “ricu pa cu Dios.” (Lucas 12:21) Despues di su resureccion, Dios a recompens’é dor di coron’é “cu gloria i onor.” Jehova a halsa su Yu “na un puesto superior i bondadosamente a dun’é e nomber cu ta riba tur otro nomber.” (Hebreonan 2:9; Filipensenan 2:9) E manera cu Jesus a hiba su bida a alegrá Jehova su curason. (Proverbionan 27:11) Su bida terenal tabata exitoso pasobra el a logra su propósito. Jesus a haci Dios su boluntad i a duna onor na Su nomber. Dios, na su turno, a onra Jesus cu rikesa, fabor i prominencia dje clase cu ningun héroe académico, político of di deporte hamas lo experenciá.  Jesus realmente tabata e homber mas exitoso cu a yega di cana riba tera.

Mayornan cristian sa cu si nan yunan sigui e pasonan di Cristo, esta, bira ricu pa cu Dios manera Jesus tabata, nan lo cosechá bendicion abundante awor i den e binidero sistema di cosnan nan lo disfrutá di recompensanan inimaginabel. No tin mihó manera pa un hóben sigui den Cristo su pasonan cu haci e trabou cu Jesus a haci, esta, dor di participá den e ministerio di tempu completo si esei ta posibel.

Sin embargo den algun cultura, e custumber prevalente ta cu hóbennan no ta drenta den e ministerio di tempu completo. Ora un yoncuman caba scol, kisas ta ser verwagt di dje cu e ta haña un trabou di henter dia, ta casa i adoptá un estilo di bida sigur. Tin bes, hóbennan cu tin e antecedencia ei ta restringí nan mes eróneamente di drenta e ministerio di tempu completo. (Proverbionan 3:27) Di con? Debí na preshon, nan ta conformá nan na e normanan cultural cu ta dominá. Esei ta loke a sosodé cu Robert. *

Ora Cultura i Concenshi Ta na Conflicto

Robert a ser criá como un Testigo di Jehova. Tempu cu e tabata tiener, su conducta i manera di scoge amigu a laga hopi di deseá. El a cuminsá preocupá su mama. P’esei, e mama a pidi un pionero, un minister di tempu completo di Testigonan di Jehova, pa anim’é. Robert ta splica loke a pasa despues.

“Di berdad mi a apreciá e interes cu e ruman homber pionero a mustra den mi. Su bon ehempel a pone cu mi kier a haci e trabou di pionero mi carera asina cu mi caba scol. Esei ta e momento cu Mami a cuminsá preocupá atrobe—pero pa un otro motibu. Bo sa, den nos cultura no ta un problema si un mucha muher cuminsá traha pionero asina cu e caba scol, pero hende ta verwagt di un mucha homber p’e ta financieramente sigur promé, i despues e por cuminsá pensa riba e trabou di pionero.

Mi a siña un fishi i a cuminsá mi mes negoshi. No a dura mashá cu mi tabata asina profundo enbolbí den e negoshi, cu bai reunion i predicá a bira djis un rutina pa mi. Mi concenshi a molestiá mi—mi tabata sa cu mi por a sirbi Jehova mas plenamente. Apesar di esei, tabata un berdadero lucha pa libra for di loke otronan a verwagt di mi, pero mi ta contentu cu mi a hacié. Awor mi ta casá, i ami cu mi casá tin dos aña ta traha pionero. Recientemente, mi a ser nombrá como sirbidó ministerial den e congregacion. Mi por bisa onestamente cu awor mi ta sinti berdadero contentamentu sirbiendo Jehova cu henter mi curason, na mi máximo potencial.”

Bes tras bes e revista aki a animá hóbennan pa siña un fishi of desaroyá cierto cualidadnan útil—tanten cu nan ta na scol ainda, si esei ta posibel. Cu ki propósito? Pa bira ricu? No. E motibu principal ta pa asina nan por sostené nan mes apropiadamente como adulto i sirbi Jehova mas plenamente cu nan por, foral den e ministerio di tempu completo. Tog, hopi bes a sosodé cu homber i muhernan hóben a bira asina enbolbí den sigui tras di un carera seglar cu e ministerio ta bira ménos importante. Algun no ta pensa mes riba drenta e sirbishi di tempu completo. Pakico no?

Robert su comentarionan ta tira lus riba e asuntu. Despues cu Robert a siña su fishi, el a cuminsá cu un negoshi. No a dura  mashá cu e tabata den un rutina monótono cu no a hib’é ningun caminda. Su meta tabata pa haña siguridad financiero. Pero tin hende den e congregacion cristian of pafó cu a yega di logra e meta ei completamente? Cristiannan mester haci esfuerso pa nan ta hende financieramente responsabel, esta, cu ta cumpli diligentemente cu nan obligacionnan financiero; pero tambe nan mester realisá cu den e tempu insigur aki, poco hende ta yega di alcansá un punto cu realmente nan ta considerá cu nan ta sigur financieramente. P’esei, Jesus su promesa registrá na Mateo 6:33 ta un gran consuelo pa cristiannan.

Robert ta contentu cu el a dicidí di sigui loke su curason a deseá, en bes di loke su cultura ta dicta. Awe e ta disfrutá di un carera den e sirbishi di tempu completo. Sí, e ministerio di tempu completo ta un carera onorabel. Robert ta na pas cu su mes pasobra e ta sirbi Jehova, segun su palabranan, ‘te na su máximo potencial.’

Saca Mayor Probecho di Bo Talentonan

Tin hopi Testigo di Jehova cu talento. Algun tin abilidadnan intelectual sobresaliente; otronan tin talento den nan man. Tur e donnan aki ta bini di Jehova, kende ta duna “tur persona bida i rosea i tur cos.” (Echonan 17:25) Sin bida, e donnan aki lo no tabatin balor.

Pues anto, ta solamente corecto pa nos usa nos bida dedicá den e sirbishi di Jehova. Esei ta loke un yoncuman cu talento a dicidí di haci. El a biba den e promé siglo E.C. Como miembro di un famia prominente, el a pasa su hubentud den e stad famoso Tarso di Cilicia. Aunke e tabata hudiu di nacementu, el a heredá ciudadania romano for di su tata. Esaki a dun’é hopi derecho i privilegio. Ora el a bira mas grandi, el a studia e Ley cerca un dje “profesornan” principal dje tempu ei—Gamaliel. A parce cu denter di poco lo e tabatin ‘rikesa, fabor i prominencia.’—Echonan 21:39; 22:3, 27, 28.

Ken e yoncuman aki tabata? Su nomber tabata Saulo. Pero Saulo a bira cristian i cu tempu el a bira apostel Pablo. El a pone e aspiracionnan cu e tabatin promé un banda, i a dedicá henter su bida n’e sirbishi di Jehova como un cristian. Pablo a bira conocí no como un abogado di renombre, sino como un predicadó celoso dje bon nobo. Despues cu e tabatin casi 30 aña trahando como misionero, Pablo a skirbi su amigunan na Filípos un carta. Den dje el a repasá algun dje cosnan cu el a logra den pasado, promé cu el a bira cristian, i despues el a bisa: “Pa [Jesucristo] su motibu mi a sufri pérdida di tur cos i ta considerá nan como un monton di basura, pa mi gana Cristo.” (Filipensenan 3:8) No, Pablo no tabatin duele di e manera cu el a usa su bida!

Kico dje entrenamentu cu Pablo a ricibí di Gamaliel? El a yega di ta útil p’e? Sí! Na vários ocasion el a contribuí pa “defendé i establecé e bon nobo legalmente.” Pero Pablo su trabou principal tabata di predicá e bon nobo—algu cu su educacion di promé lo no por a siñ’é nunca.—Filipensenan 1:7; Echonan 26:24, 25.

Mescos awe tambe, algun ruman por a usa nan don i talentonan i asta nan educacion pa adelanto di interesnan di Reino. Amy, por ehempel, tin un grado universitario den comercio i tambe den derecho. Ántes e tabatin un trabou lucrativo na un oficina di abogado, pero awe e ta sirbi como un minister boluntario sin salario na un dje oficinanan di sucursal di Sociedad Watch Tower. Asin’akí, Amy ta describí su bida actual: “Mi ta kere cu mi a scoge lo mihó cu bida por ofrecé. . . . Mi no ta deseá di cambia lugá cu ningun di mi coleganan universitario. Mi ta orguyoso dje caminda cu mi a scoge. Mi tin tur loke mi mester i ta deseá—un bida contentu i felis i un carera recompensador i satisfaciente.”

Amy a scoge un caminda cu a dun’é pas mental, satisfaccion i bendicion di Jehova. Ta sigur cu mayornan cristian lo no kier nada ménos pa nan yunan!

Éxito den e Ministerio Cristian

Claro cu ta vital pa nos tin un punto di bista corecto di éxito den e ministerio cristian mes. No ta difícil pa sinti cu nos a logra éxito ora nos  tabatin un ratu placentero den ministerio di veld, lagando literatura bíblico of tabatin combersacionnan animá basá riba Bijbel cu doñonan di cas. Pero, si ta de bes en cuando nos ta haña hende pa scucha nos, por ta nos ta incliná na concluí cu nos ta perdiendo nos tempu. Pero, corda cu un dje definicionnan di éxito ta ‘logra fabor.’ Ken su fabor nos kier gana? Di Jehova, naturalmente. Nos por haña esaki sea hende ta scucha nos mensahe of no. Relacioná cu esaki, Jesus a siña su disipelnan un les poderoso.

Casi sigur bo ta corda cu Jesus a manda 70 predicadó di Reino “na tur stad i lugá unda e mes tabata pa bai.” (Lucas 10:1) Nan mester a predicá den stad i pueblonan sin cu Jesus a compañá nan. Esaki tabata un experencia nobo pa nan. P’esei, Jesus a duna nan instruccion specífico promé cu el a manda nan bai. Ora nan a topa “un amigu di pas,” nan mester a dun’é un testimonio cabal tocante e Reino. Sin embargo ora hende a rechasá nan, nan mester a sigui nan rumbo sin preocupá. Jesus a splica cu esnan cu a nenga di scucha nan en realidad tabata rechasando Jehova mes.—Lucas 10:4-7, 16.

Ora e 70 disipelnan a completá nan asignacion di predicá, nan a raportá bek cerca Jesus “cu goso, bisando: ‘Señor, asta e demoñonan ta keda sumiso na nos debí na uso di bo nomber.’” (Lucas 10:17) Lo mester tabata algu excitante pa e hombernan imperfecto ei cu nan por a saca criaturanan spiritual poderoso! Pero Jesus a concientisá su disipelnan entusiasmá: “No alegrá riba esaki, di cu e spiritunan ta keda sumiso na boso, sino alegrá pasobra boso nomber a ser inscribí den shelu.” (Lucas 10:20) Por ta cu no ta semper e 70 disipelnan tabatin e poder pa saca demoño, ni no ta semper nan lo tabatin resultadonan faborabel den e ministerio. Pero si nan a keda fiel, semper nan lo tabatin Jehova su aprobacion.

Bo Ta Apreciá Sirbidónan di Tempu Completo?

Un yoncuman a yega di bisa un anciano cristian: “Ora mi caba scol secundario, lo mi purba haña un trabou. Si mi no haña un trabou, e ora ei lo mi pensa riba drenta un of otro forma di sirbishi di tempu completo.” Sin embargo, esei no ta e punto di bista di mayoria ruman cu a drenta e ministerio di pionero. Pa nan por traha pionero, algun a bandoná oportunidadnan pa sigui tras di careranan lucrativo. Otronan a rechasá oportunidadnan interesante pa mas educacion. Nan a haci sacrificio mescos cu apostel Pablo, i mescos cu Pablo, Robert i Amy, nan no tin duele cu nan a scoge asina. Nan ta apreciá nan privilegio di por usa nan donnan pa alabá Jehova, kende ta digno di lo mihó cu nan por ofrecé.

Pa vários motibu, hopi Testigo fiel di Jehova no ta den un posicion pa traha pionero. Kisas nan tin obligacionnan bíblico pa cumpli cuné. Sin embargo, tanten cu nan ta sirbi Dios cu henter nan ‘curason, alma i mente,’ Jehova ta contentu cu nan. (Mateo 22:37) Aunke nan mes no por traha pionero, nan ta reconocé cu esnan cu ta traha pionero a scoge un excelente carera.

Apostel Pablo a skirbi: “Stop di ser formá segun e sistema di cosnan aki.” (Romanonan 12:2) Na armonia cu e conseho di Pablo, nos no mester permití normanan cultural of seglar dje sistema aki forma nos pensamentu. Sea cu bo por traha pionero of no, haci e sirbishi di Jehova e enfoke di bo bida. Tanten cu bo tin Jehova su aprobacion, lo bo tin éxito.

[Nota]

[Plachi na página 19]

No keda atrapá den un rutina monótono cu no ta hiba ningun caminda