Moralidad Bíblico Ta Esun Mihó?

“SOCIEDAD mester di un structura di balornan básico cu ta duna su miembronan siguridad i guia.” Esei ta loke un escritor i moderadó di television aleman cu experencia a comentá. Esei sigur-sigur ta zona lógico. Pa sociedad humano ta stabil i próspero, hende mester tin un fundeshi di normanan ampliamente aceptá cu ta mustra kico ta corecto of incorecto, bon of malu. E pregunta ta: Cua ta e mihó normanan, tantu pa sociedad como pa su miembronan?

Si ta e balornan moral di Bijbel ser adoptá como norma, nan lo mester yuda hende hiba un bida stabil i felis. Esei kier men cu un sociedad di hende cu ta tene nan mes na e balornan ei lo ta mas felis i mas stabil. Esei ta e caso? Laga nos examiná loke Bijbel tin di bisa riba dos asuntu importante: fieldad den matrimonio i onrades den bida diario.

Pega na Bo Pareha

Nos Creador a crea Adam, i despues a traha Eva pa ta su partner. Nan union tabata e promé matrimonio di historia, i e mester a bira un relacion duradero. Dios a bisa: “Un homber lo bandoná su tata i su mama i e tin cu pega na su esposa.” Un 4.000 aña despues, Jesucristo a ripití e norma matrimonial aki pa tur su siguidónan.  Ademas el a condená relacion sexual pafó di matrimonio.—Génesis 1:27, 28; 2:24; Mateo 5:27-30; 19:5.

Segun Bijbel, dos clave importante pa un matrimonio felis ta amor i respet di parti di ámbos partner. E esposo, cu ta cabes dje famia, mester mustra amor inegoista dor di busca bentaha di su casá. E mester biba cuné “segun conocimentu,” i no mester “rabia amargamente” cuné. E esposa mester trata su casá cu “respet profundo.” Si partnernan matrimonial sigui e principionan aki, nan lo por evitá of superá mayoria problema di matrimonio. E esposo lo kier pega na su esposa, i e esposa na su esposo.—1 Pedro 3:1-7; Colosensenan 3:18, 19; Efesionan 5:22-33.

E norma bíblico di pega fielmente na bo pareha ta contribuí na un matrimonio felis? Wel, wak e resultado di un encuesta efectuá na Alemania. Nan a puntra hende ki factornan ta importante pa un bon matrimonio. Fieldad mutuo tabata te na cabes dje lista. Bo no ta di acuerdo cu hende casá ta hopi mas felis si nan sa cu nan partner ta fiel?

Kico Si Problema Surgi?

Pero kico si esposo i esposa tin desacuerdo serio? Kico si nan amor fria? Bou di tal circunstancia, no ta mihó nan terminá e matrimonio? Of asta asina e norma bíblico di pega fielmente na bo pareha ta e mihó cos pa haci?

Escritornan di Bijbel a reconocé cu tur pareha casá lo tin problema como resultado di imperfeccion humano. (1 Corintionan 7:28) Sin embargo, parehanan cu ta tene nan mes na e normanan moral di Bijbel ta purba pordoná, i resolvé nan problemanan huntu. Claro cu tin circunstancia, manera adulterio of abusu físico, caminda apropiadamente un cristian lo por evaluá pa divorciá of separá. (Mateo 5:32; 19:9) Pero terminá un matrimonio muchu lihé, sin cu tin un motibu masha serio, pa bo drenta cu un otro pareha, ta evidencia di un falta di consideracion egoista pa otronan. Di ningun manera e no ta trece stabilidad ni felicidad den bo bida. Laga nos wak un ehempel.

Peter a sinti cu su matrimonio a perde e chispa cu e tabatin un tempu. * Pues, el a bai laga su casá, anto a drenta cu Monika, cu tambe a bandoná su casá. Con cos a bai? Despues di un par di luna, Peter a admití cu biba cu Monika no tabata “fácil manera mi a imaginá.” Di con no? Faltanan humano tabata mes bisto den su relacion nobo, cu den esun anterior. Pa colmo su decision purá i egoista a hink’é den problema financiero serio. Ademas, Monika su yunan a keda emocionalmente aplastá dor dje cambio asina grandi den nan bida di famia.

Manera e experencia aki ta mustra, ora un matrimonio hañ’é den mal tempu, mayoria bes e contesta no ta pa bandoná e barcu. Di otro banda, ora un matrimonio enfrentá tormenta, hopi bes e por logra keda riba awa i yega laman mas calmu si e partnernan biba segun e balornan moral di e Palabra di Dios, Bijbel. Esei tabata asina den e caso di Thomas cu Doris.

Thomas cu Doris tabatin mas cu 30 aña casá tempu Thomas a cuminsá bebe di mas. Doris a cai den depresion, i nan a papia cu otro di divorcio. Doris a confia un Testigo di Jehova su problema. E Testigo a mustra Doris kico Bijbel ta bisa tocante matrimonio, i a anim’é p’e no core separá, sino traha cu su casá promé pa purba yega na un solucion. Esei ta loke Doris a haci. Den un par di luna, nan no a pensa mas riba divorcio. Thomas cu Doris a traha huntu riba nan problemanan. Sigui e conseho di Bijbel a fortalecé nan matrimonio, i el a duna nan tempu pa resolvé nan problemanan.

Onrades den Tur Cos

Pega fielmente na bo pareha den matrimonio ta rekerí fortalesa moral i amor pa  principio. E mésun cualidadnan aki ta necesario pa keda onrado den un mundu desonrado. Bijbel ta papia hopi tocante onrades. Apostel Pablo a skirbi e cristiannan di promé siglo na Hudea: “Nos ta deseá na comportá nos mes onradamente den tur cos.” (Hebreonan 13:18) Kico esei ta encerá?

Un persona onrado ta papia berdad i no ta mete cu fraude. E ta hustu den su trato cu otronan, franco i onorabel; no engañoso. Ademas, un hende onrado ta un persona íntegro cu no ta nek su próhimo. Hende onrado ta contribuí na un ambiente di confiansa, cu ta producí actitudnan saludabel i promové relacionnan humano stabil.

Hende onrado ta felis? Wel, nan tin motibu pa ta felis. Apesar cu tin corupcion i ladronicia tur caminda—of kisas pa e motibu ei mes—generalmente hende onrado tin admiracion di otronan. Segun un encuesta realisá bou di hóben, onrades ta un birtud cu a scor haltu cerca 70 porciento di esnan cu a tuma parti den e encuesta. Mas ainda, sin importá nos edad, onrades ta un rekisito masha importante pa esnan cu nos ta considerá nos amigunan.

Nan a siña Christine horta for di tempu cu e tabatin 12 aña. Segun añanan a pasa el a bira un ‘zakkenroller’ experto. “Tin dia mi tabata bini cas cu asta 5.000 mark aleman [3.850 florin] cash,” segun e ta splica. Pero nan a yega di arestá Christine vários bes, i e tabata biba cu e rísico constante di bai prizon. Ora Testigonan di Jehova a splica Christine loke Bijbel ta bisa tocante onrades, e normanan moral di Bijbel a atra’é. El a siña obedecé e spiertamentu aki: “Laga esun cu ta horta no horta mas.”—Efesionan 4:28.

Pa ora Christine a bautisá como Testigo di Jehova, ya e no tabata ladron mas. E tabata haci su esfuerso pa ta onrado den tur cos, ya cu Testigonan ta duna hopi énfasis na onestidad i otro cualidadnan cristian. E korant Lausitzer Rundschau ta informá: “Conceptonan moral manera onestidad, moderacion i amor pa próhimo ta ser balorá altamente den e fe di Testigonan.” Con Christine ta sinti tocante e cambio ei den su bida? “Mi ta hopi mas felis awor cu mi a stop di horta. Mi ta sinti cu mi ta un miembro onorabel di sociedad.”

Sociedad Henter Ta Beneficiá

Hende cu ta onrado i fiel na nan pareha no únicamente ta mas felis nan mes, sino ta beneficiá sociedad en general. Doñonan di trabou ta preferá trahadó cu no ta violá regla. Nos tur gusta tin bisiña confiabel, i nos gusta cumpra cos den negoshinan manehá dor di negoshante onesto. Acaso nos no ta respetá político, polis i hues cu no ta mete cu corupcion? Comunidad ta beneficiá hopi ora su miembronan ta comportá nan mes onestamente pa motibu di principio, i no djis ora e ta bentahoso pa nan.

Ademas, parehanan fiel den matrimonio ta forma e base pa famianan stabil. I mayoria hende lo bai di acuerdo cu e político europeo cu a declará: “Te n’e dia djawe, famia [tradicional] ta keda e refugio principal di siguridad humano, cu ta duna hende sentido den bida.” Caminda tin unidad familiar pacífico tantu hende grandi como mucha tin mihó chens di sinti nan mes emocionalmente sigur. Asina, hende fiel den matrimonio ta yuda crea un sociedad stabil.

Pensa cuanto tur hende lo beneficiá si no tabatin esposo of esposanan bandoná, caso di divorcio den corte of lucha pa tutela di yu. I ke tal si no tabatin mas ‘zakkenroller,’ ladron, hende cu ta cometé fraude, funcionario corupto of científico fraudulento? Esei ta zona manera djis un soño? No pa hende cu tin interes profundo den Bijbel i loke Bijbel ta bisa tocante nos futuro. E Palabra di Dios ta primintí cu pronto Jehova su Reino Mesiánico lo tuma over gobernacion di henter sociedad humano riba tera. Bou  di e Reino ei, lo siña tur su súbditonan biba segun moralidad bíblico. N’e tempu ei, “e hustunan mes lo poseé tera, i nan lo biba pa semper riba dje.”—Salmo 37:29.

Moralidad Bíblico Ta Esun Mihó

Miyones di hende cu a examiná e Scritura Santu mas djacerca a bin mira cu consehonan di Bijbel ta basá riba sabiduria divino cu ta hopi superior cu pensamentu humano. Hende asina ta considerá Bijbel confiabel i importante pa bida den nos mundu moderno. Nan sa cu sigui e consehonan den e Palabra di Dios ta bon pa nan mes.

Pues, tal individuonan ta tuma e conseho di Bijbel na pechu: “Confia den Jehova cu tur bo curason i no lèn riba bo mes comprendimentu. Den tur bo camindanan tuma nota di dje, i e mes lo haci bo camindanan stret.” (Proverbionan 3:5, 6) Dor di haci esei, nan bida ta mehorá masha tantu, i tambe nan ta beneficiá hende rond di nan. I nan ta desaroyá un confiansa firme den “e bida . . . pa bini,” ora henter humanidad lo sigui moralidad bíblico.—1 Timoteo 4:8.

[Nota]

[Komentario na página 5]

Ora un matrimonio enfrentá mal tempu, hopi bes e por logra keda riba awa, i yega laman mas calmu si nan biba segun normanan di Bijbel

[Komentario na página 6]

Apesar cu tin corupcion tur caminda—of kisas pa e motibu ei mes—generalmente hende onrado tin admiracion di otronan