Cristiannan Ta Haña Felicidad den Rindi Sirbishi
Cristiannan Ta Haña Felicidad den Rindi Sirbishi
“Tin mas felicidad den duna cu tin den ricibí.”—ECHONAN 20:35.
1. Ki actitud robes ta reina awe, i pakico e ta perhudicial?
DURANTE e último décadanan di siglo 20, cu frecuencia hende a tende e expresion “ami promé.” Básicamente, e filosofia di “ami promé” ta denotá un actitud cu ta combiná egoismo i golosidad cu un falta di interes den otro hende. Nos por ta sigur cu den aña 2000, e filosofia di ami promé no ta morto. Cuantu bes bo no ta tende e preguntanan: “Kico tin aden pa mi?” of: “Kico mi ta gana cuné?” Un actitud egoista asina no ta hiba na felicidad. Esei ta net contrario cu e principio cu Jesus a declará: “Tin mas felicidad den duna cu tin den ricibí.”—Echonan 20:35.
2. Na kico bo por mira cu dunamentu ta trece felicidad?
2 Ta berdad cu dunamentu ta trece mas felicidad cu ricibí? Sí. Pensa riba Jehova Dios. E ta “e fuente di bida.” (Salmo 36:9) E ta percurá tur loke nos mester pa haci nos felis i productivo. Sí, e ta e Fuente di “tur bon don i tur regalo perfecto.” (Santiago 1:17) Jehova, “e Dios felis,” ta duna constantemente. (1 Timoteo 1:11) E ta stima su creacion humano, na cua e ta duna masha hopi. (Juan 3:16) Pensa tambe riba un famia humano. Si bo ta un mayor, bo sa cuantu sacrificio, cuantu dunamentu ta necesario pa lanta un yu. I pa hopi aña e yu no ta conciente dje sacrificionan cu bo ta haci. P’e ta algu gewoon. Tog, bo ta contentu pa mira bo yu crece i bona como resultado di bo dunamentu inegoista. Pakico? Pasobra bo stim’é.
3. Pakico ta un deleite pa sirbi Jehova i nos compañeronan creyente?
3 Den un manera similar, adoracion berdadero ta caracterisá pa dunamentu cu ta basá riba amor. Como cu nos ta stima Jehova i nos ta stima nos compañeronan creyente, ta un deleite pa sirbi nan, pa duna di nos mes na nan. (Mateo 22:37-39) Ken cu ta adorá Dios cu motibunan egoista ta haña masha poco goso. Pero esnan cu ta rindi sirbishi den un manera inegoista, siendo mas interesá den loke nan por duna cu loke nan ta spera di ricibí, en berdad ta haña felicidad. Bo por dicerní e berdad aki ora bo considerá con cierto palabra di Bijbel relacioná cu nos adoracion ta ser usá den e Scritura. Nos lo considerá tres dje palabranan aki den e artículo aki i esun cu ta sigui.
Jesus Su Sirbishi Público
4. Kico ta e caracter di “sirbishi público” den cristiandad?
4 Den e idioma griego original, un palabra importante cu tin di haber cu adoracion ta lei·tour·gía, cu e Traduccion di Mundu Nobo ta traducí como “sirbishi público.” Den cristiandad, e palabra “liturgia” ta bini di lei·tour·gía. * Sin embargo, e liturgianan formalístico di cristiandad no ta ègt un sirbishi público beneficioso.
5, 6. (a) Ki sirbishi público a ser efectuá den Israel, i cu ki beneficio? (b) Ki sirbishi hopi superior a remplasá esun efectuá den Israel, i pakico?
5 Apostel Pablo a usa un palabra griego relacioná cu lei·tour·gía ora el a referí na sacerdotenan israelita. El a bisa: “Tur sacerdote ta tuma su puesto dia tras dia pa rindi sirbishi público [un forma di lei·tour·gía] i pa ofrecé e mésun sacrificionan hopi bes.” (Hebreonan 10:11) Sacerdote levita a rindi un sirbishi público balioso den Israel. Nan a siña hende Dios su Ley i a ofrecé sacrificionan cu a cubri e picánan dje pueblo. (2 Crónicanan 15:3; Malakías 2:7) Ora e sacerdotenan i e pueblo a sigui Jehova su Ley, e nacion tabatin motibu pa ta gososo.—Deuteronomio 16:15.
6 Pa sacerdote israelita tabata un berdadero privilegio pa rindi sirbishi público bou dje Ley. Pero nan sirbishi no tabatin balor mas ora Dios a rechasá Israel pa motibu di nan infieldad. (Mateo 21:43) Jehova a haci areglo pa algu hopi superior—e sirbishi público cu Jesus, e gran Sumo Sacerdote, a efectuá. Nos ta lesa di dje: “Dor cu e ta sigui bibu pa semper, su sacerdocio ta sin ningun sucesor. P’esei, tambe e por salba completamente esnan cu ta acercá Dios mediante dje, pasobra e semper ta bibu pa boga pa nan.”—Hebreonan 7:24, 25.
7. Pakico Jesus su sirbishi público ta trece beneficionan sin igual?
7 Jesus ta sigui como sacerdote pa semper, sin sucesor. Pues, ta e so por salba hende completamente. E ta efectuá e sirbishi público sin igual ei, no den tempel trahá pa hende, sino den e tempel antitípico, Jehova su gran areglo pa adoracion cu a cuminsá funcioná na aña 29 E.C. Awor Jesus ta rindi sirbishi den e Santísimo dje tempel ei, den shelu. E ta “un sirbidó público [lei·tour·gós] dje lugá santu i dje berdadero tent, cu Jehova a lanta, i no hende.” (Hebreonan 8:2; 9:11, 12) Pa elevá cu Jesus su posicion ta, ainda e ta un “sirbidó público.” E ta usa su autoridad haltu pa duna, no pa tuma. I tal dunamentu ta trece goso p’e. Esei ta parti di “e goso cu a ser poné su dilanti” i cu a fortalec’é pa wanta durante henter su bida riba tera.—Hebreonan 12:2.
8. Con Jesus a efectuá un sirbishi público cu a remplasá e pacto di Ley?
8 Tin un otro aspecto di Jesus su sirbishi público. Pablo a skirbi: “Jesus a obtené un sirbishi público mas excelente, di manera cu tambe e ta mediador di un pacto corespondientemente mihó, cu a ser establecí legalmente riba mihó promesanan.” (Hebreonan 8:6) Moises tabata mediador dje pacto cu tabata base di Israel su relacion cu Jehova. (Éxodo 19:4, 5) Jesus tabata mediador di un pacto nobo, cu a haci posibel e nacementu di un nacion nobo, “e Israel di Dios,” cu ta consistí di cristiannan ungí cu spiritu for di hopi nacion. (Galationan 6:16; Hebreonan 8:8, 13; Revelacion 5:9, 10) Ki un excelente sirbishi público esei tabata! Ki contentu nos ta di conocé Jesus, un sirbidó público mediante ken nos por rindi adoracion aceptabel na Jehova!—Juan 14:6.
Cristiannan Tambe Ta Rindi Sirbishi Público
9, 10. Cua ta algun tipo di sirbishi público cu cristiannan ta efectuá?
9 Ningun hende ta efectuá un sirbishi público mes elevá cu esun di Jesus. Pero ora cristiannan ungí ricibí nan recompensa celestial, nan ta tuma nan lugá banda di Jesus i ta participá den su sirbishi público como rey i sacerdote celestial. (Revelacion 20:6; 22:1-5) Sin embargo, cristiannan riba tera tambe ta rindi un sirbishi público, i nan ta haña un goso grandi den esei. Por ehempel, tempu cu tabatin un scarcedad di cuminda na Palestina, apostel Pablo a hiba donacionnan dje rumannan na Europa pa yuda aliviá e afliccion dje cristiannan hudiu na Hudea. Esei tabata un sirbishi público. (Romanonan 15:27; 2 Corintionan 9:12) Awe, cristiannan ta contentu pa rindi un sirbishi similar, dunando yudansa mesora ora nan rumannan ta pasa afliccion, of sufri di desaster natural of otro calamidad.—Proverbionan 14:21.
10 Pablo a referí na un otro sirbishi público ora el a skirbi: “Aunke mi ta ser bashá manera un ofrenda di bebida riba e sacrificio i e sirbishi público na cua fe a hiba boso, mi ta contentu i ta alegrá cu boso tur.” (Filipensenan 2:17) Pablo su trabou duru na fabor dje filipensenan tabata un sirbishi público cu el a rindi cu amor i diligencia. Foral e cristiannan ungí cu ta sirbi como “e esclabo fiel i discreto,” i cu ta suministrá alimento spiritual n’e debido tempu, ta rindi un sirbishi público similar. (Mateo 24:45-47) Ademas, como grupo, esakinan ta “un sacerdocio santu,” comisioná “pa ofrecé sacrificionan spiritual aceptabel na Dios mediante Jesucristo” i pa “declará na tur parti e excelencianan di esun cu a yama [nan] for di scuridad na su lus maraviyoso.” (1 Pedro 2:5, 9) Mescos cu Pablo, nan ta alegrá den tal privilegio segun cu nan ta ‘basha nan mes’ cumpliendo cu nan responsabilidadnan. I nan compañeronan ‘otro carné’ ta djoin nan i apoyá nan den e trabou di conta humanidad tocante Jehova i su propósitonan. * (Juan 10:16; Mateo 24:14) Esta un sirbishi público magnífico i gososo esei ta!—Salmo 107:21, 22.
Rindi Sirbishi Sagrado
11. Con e profetisa Ana a pone un ehempel excelente pa tur cristian?
11 Un otro palabra griego cu tin di haber cu nos adoracion ta la·treía, traducí como “sirbishi sagrado” den e Traduccion di Mundu Nobo. Sirbishi sagrado tin di haber cu actonan di adoracion. Por ehempel, Bijbel ta describí e biuda i profetisa Ana di 84 aña di edad como unu “cu nunca no tabata falta den e tempel, rindiendo sirbishi sagrado [un palabra griego relacioná cu la·treía] di dia i anochi cu yunamentu i súplica.” (Lucas 2:36, 37) Ana a adorá Jehova cu constancia. E ta un ehempel excelente pa nos tur—hóben i bieu, homber i muher. Mescos cu Ana a haci oracion cu empeño i a adorá Jehova regularmente n’e tempel, nos sirbishi sagrado ta incluí oracion i asistencia regular na reunion.—Romanonan 12:12; Hebreonan 10:24, 25.
12. Kico ta un rasgo principal di nos sirbishi sagrado i con esaki tambe ta un sirbishi público?
12 Apostel Pablo a mencioná un rasgo principal di nos sirbishi sagrado ora el a skirbi: “Dios, na ken mi ta rindi sirbishi sagrado cu mi spiritu en coneccion cu e bon nobo tocante su Yu, ta mi testigo con sin stop mi ta haci mencion semper di boso den mi oracionnan.” (Romanonan 1:9) Sí, e predicacion dje bon nobo no ta solamente un sirbishi público na esnan cu ta tend’é sino tambe un acto di adoracion na Jehova Dios. Sea nos haña un orea receptivo of no, e trabou di predicá ta sirbishi sagrado cu nos ta rindi na Jehova. Nos esfuerso pa conta otronan tocante e cualidadnan excelente i propósitonan beneficioso di nos Tata celestial stimá, sigur ta duna nos gran goso.—Salmo 71:23.
Na Unda Nos Ta Rindi Sirbishi Sagrado?
13. Kico ta e speransa di esnan cu ta rindi sirbishi sagrado den e patio interior di Jehova su tempel spiritual, i ken ta alegrá cu nan?
13 Pablo a skirbi cristian ungí: “Siendo cu nos tin cu ricibí un reino cu no por ser sagudí, laga nos sigui tin bondad inmerecí, mediante cua nos por rindi na Dios sirbishi sagrado aceptablemente cu temor di Dios i respet profundo.” (Hebreonan 12:28) Cu e expectativa sigur di heredá e Reino, esnan ungí ta inmovibel den fe segun cu nan ta adorá e Haltísimo. Ta nan so por rindi sirbishi sagrado na dje den e compartimentu Santu i e patio interior di Jehova su tempel spiritual, i cu anticipacion nan ta anhelá pa sirbi huntu cu Jesus den e Santísimo, shelu mes. Nan compañeronan, e clase di otro carné, ta alegrá cu nan den nan speransa maraviyoso.—Hebreonan 6:19, 20; 10:19-22.
14. Con e multitud grandi ta beneficiá di Jesus su sirbishi público?
14 Pero kico dje otro carnénan ei? Manera apostel Juan a premirá, un multitud grandi di nan a presentá den e último dianan aki, i “nan a laba nan pañanan largu i a haci nan blancu den e sanger dje Lamchi.” (Revelacion 7:14) Esaki ta nificá cu mescos cu nan compañeronan di adoracion ungí, nan ta ehercé fe den Jesus su sirbishi público, e ofrenda di su bida humano perfecto na fabor di humanidad. E otro carnénan tambe ta beneficiá di Jesus su sirbishi público p’e echo cu nan ta “gara [Jehova su] pacto.” (Isaías 56:6) No, nan no ta participá den e pacto nobo, pero nan ta gar’é den e sentido cu nan ta obedecé e leynan relacioná cuné i ta cooperá cu e areglonan hací mediante dje. Nan ta asociá cu e Israel di Dios, alimentando n’e mésun mesa spiritual i trahando huntu cu su miembronan, alabando Dios públicamente i ofreciendo sacrificionan spiritual cu ta agrad’é.—Hebreonan 13:15.
15. Na unda e multitud grandi ta rindi sirbishi sagrado, i ki efecto e bendicion aki tin riba nan?
15 Segun e buki di Revelacion, e multitud grandi ta “pará dilanti dje trono i dilanti e Lamchi, bistí cu pañanan largu blancu.” Ademas, “nan ta dilanti dje trono di Dios; i nan ta rindiendo sirbishi sagrado na dje di dia i anochi den su tempel; i Esun sintá riba e trono lo span su tent riba nan.” (Revelacion 7:9, 15) Den Israel, e prosélitonan (hende cu a combertí bira hudiu) tabata adorá Dios den e patio exterior dje tempel di Sálomon. Mescos tambe, e multitud grandi ta adorá Jehova den e patio exterior di su tempel spiritual. E echo cu nan ta rindi sirbishi einan ta pone nan alegrá. (Salmo 122:1) Asta despues cu nan último socio ungí ricibí su herencia celestial, nan lo sigui rindi sirbishi sagrado na Jehova como su pueblo.—Revelacion 21:3.
Sirbishi Sagrado Cu Dios No Ta Aceptá
16. Ki spiertamentu Bijbel ta duna relacioná cu sirbishi sagrado?
16 Den tempu di Israel di antigwedad, hende mester a rindi sirbishi sagrado na armonia cu Jehova su leynan. (Éxodo 30:9; Levítico 10:1, 2) Mescos awe tambe, si nos kier pa Jehova aceptá nos sirbishi sagrado, nos tin cu cumpli cu cierto rekisitonan. P’e motibu ei Pablo a skirbi e colosensenan: “Nos . . . no a stop di haci oracion pa boso i di pidi pa boso por ser yená cu e conocimentu exacto di su boluntad den tur sabiduria i comprendimentu spiritual, pa boso cana di un manera digno di Jehova afin di agrad’é plenamente segun cu boso ta sigui producí fruta den tur bon obra i aumentá den e conocimentu exacto di Dios.” (Colosensenan 1:9, 10) No ta keda na nos pa determiná e forma corecto pa adorá Dios. Conocimentu exacto dje Scritura, comprendimentu spiritual i sabiduria divino ta vital. Di otro manera, e resultadonan por ta desastroso.
17. (a) Den ki manera hende a corumpí sirbishi sagrado den tempu di Moises? (b) Con asina awe hende por rindi sirbishi sagrado den un manera robes?
17 Corda e israelitanan den tempu di Moises. Nos ta lesa: “Dios a bira i a entregá nan pa nan rindi sirbishi sagrado na e ehército di shelu.” (Echonan 7:42) E israelitanan ei a mira Jehova su obranan poderoso na nan fabor. Tog nan a acudí na otro dios ora nan a pensa cu esei lo a cumbiní nan. Nan no tabata leal, i lealtad ta indispensabel si nos kier pa nos sirbishi sagrado agradá Dios. (Salmo 18:25) Ta cierto cu awe poco hende lo bira lomba pa Jehova i bai adorá strea of bisé di oro, pero tin otro formanan di idolatria. Jesus a spierta nos contra sirbi “Rikesa,” i Pablo a yama cudishi un forma di idolatria. (Mateo 6:24; Colosensenan 3:5) Satanas ta promové su mes como un dios. (2 Corintionan 4:4) Tur caminda tin e tipo di idolatria aki i nan ta un trampa. Pensa, por ehempel, riba un hende cu ta pretendé di ta sigui Jesus pero kende su berdadero meta den bida ta pa bira ricu of kende su confiansa ta den su mes i den su propio ideanan. Ken realmente e ta sirbiendo? Ki diferencia tin entre e i e hudiunan dje tempu di Isaías cu a hura den nomber di Jehova pero cu a duna ídolonan impuru e mérito pa su gran obranan?—Isaías 48:1, 5.
18. Con hende a efectuá sirbishi sagrado den un manera incorecto tantu den pasado como awe?
18 Jesus a spierta tambe: “E ora ta bini cu tur esnan cu ta mata boso lo pensa cu nan a rindi un sirbishi sagrado na Dios.” (Juan 16:2) Saulo, kende a bira apostel Pablo, sin duda a pensa cu e tabata sirbi Dios ora el a ‘aprobá e asesinato di Esteban’ i a ‘respirá menasa i asesinato contra e disipelnan di Señor.’ (Echonan 8:1; 9:1) Awe, algun di esnan cu ta cometé purificacion étnico i genocidio tambe ta pretendé di adorá Dios. Tin hopi hende cu ta pretendé di adorá Dios, pero en realidad nan adoracion ta ser dirigí n’e diosnan di nacionalismo, lealtad na tribu, rikesa, egoismo of otro dios.
19. (a) Con nos ta mira nos sirbishi sagrado? (b) Ki clase di sirbishi sagrado lo duna nos goso?
19 Jesus a bisa: “Ta Jehova bo Dios bo tin cu adorá, i ta na dje so bo tin cu rindi sirbishi sagrado.” (Mateo 4:10) Ei e tabata papia cu Satanas, pero ta masha vital pa nos tur tuma su palabranan na pechu! Ta un privilegio elevá i inspirador di temor pa rindi sirbishi sagrado n’e Señor Soberano di universo. I kico nos por bisa di efectuá sirbishi público cu ta ligá cu nos adoracion? Ora nos haci esaki na fabor di nos próhimo lo e ta un trabou gososo cu ta trece gran felicidad. (Salmo 41:1, 2; 59:16) Pero, tal sirbishi sagrado ta trece berdadero felicidad solamente ora nos ta ofrec’é di henter curason i den e manera corecto. Ken realmente ta adorando Dios den e manera corecto? Ken su sirbishi sagrado Jehova ta aceptá? Nos por contestá e preguntanan ei si nos considerá e di tres palabra di Bijbel cu tin di haber cu nos adoracion. Nos lo haci esaki den e siguiente artículo.
[Nota]
^ par. 4 Generalmente, cristiandad su liturgianan ta sea sirbishi di adoracion of ritonan specífico, manera e eucarestia den Iglesia Católico Romano.
^ par. 10 Echonan 13:2 ta informá cu profeta i maestro na Antiokia tabata “sirbiendo Jehova públicamente” (traduccion di un palabra griego relacioná cu lei·tour·gía). Probablemente, e ministerio público aki a encerá predicacion n’e público.
Con Lo Bo Contestá?
• Ki sirbishi público magnífico Jesus a efectuá?
• Ki sirbishi público cristiannan ta efectuá?
• Kico ta sirbishi sagrado cristian, i na unda e ta ser efectuá?
• Kico nos mester adkerí si nos kier pa nos sirbishi sagrado agradá Dios?
[Preguntanan di Estudio]
[Plachi na página 10]
Mayornan ta haña gran goso den duna
[Plachi na página 13]
Cristiannan ta rindi sirbishi público ora nan ta yuda otronan i ora nan ta proclamá e bon nobo
[Plachi na página 14]
Nos mester tin conocimentu exacto i comprendimentu pa haci sigur cu Dios ta aceptá nos sirbishi sagrado