Ken Ta e Ministernan di Dios Awe?

“E echo cu nos ta adecuadamente capacitá ta bini di Dios, kende en berdad a capacitá nos adecuadamente pa ta ministernan di un pacto nobo.”—2 CORINTIONAN 3:5, 6.

1, 2. Ki responsabilidad tur cristian di promé siglo tabatin, pero con cosnan a cambia?

DEN e promé siglo di nos Era Comun, tur cristian tabatin un responsabilidad importante: e deber di predicá e bon nobo. Nan tur tabata ungí i tabata ministernan dje pacto nobo. Algun tabatin responsabilidad adicional, por ehempel como maestro den e congregacion. (1 Corintionan 12:27-29; Efesionan 4:11) Mayornan tabatin obligacionnan pisá den famia. (Colosensenan 3:18-21) Pero tur a participá den e obra básico i vital di predicá. Den e idioma griego original dje Scritura Cristian, e responsabilidad aki tabata un di·a·ko·nía, esta, un sirbishi of ministerio.—Colosensenan 4:17.

² Segun cu tempu a pasa, cosnan a cambia. A desaroyá un clase, conocí como clero, cu a reservá e privilegio di predicá pa su so. (Echonan 20:30) E miembronan di clero tabata un minoria di esnan cu tabata yama nan mes cristian. E gran mayoria a bira conocí como e laiconan. Aunke a siña e laiconan cu nan tin cierto obligacionnan, incluso esun di duna contribucion pa mantené e clero, mayoria a bira meramente oyente pasivo den e asuntu di predicá.

3, 4. (a) Con individuonan den cristiandad ta bira minister? (b) Ken ta ser considerá un minister den cristiandad, i pakico cosnan ta diferente den Testigonan di Jehova?

³ Miembronan di clero ta pretendé di ta  minister (for di minister, un traduccion latin di di·á·ko·nos, “criá” of “sirbidó”). * Pa logra esaki, nan ta gradua for di universidad of seminario i ta ser ordená. The International Standard Bible Encyclopedia ta bisa: “Por lo general, ‘ordená’ i ‘ordenacion’ ta referí na un státus special cu ta ser duná na un minister of sacerdote mediante ritonan basá riba decretonan eclesiástico oficial, cu énfasis asociá riba autoridad pa proclamá e Palabra of pa administrá sacramento, of pa haci ámbos.” Ken ta ordená e ministernan? The New Encyclopædia Britannica ta bisa: “Den e iglesianan cu a retené e rango episcopal histórico, e minister cu ta ordená semper ta un obispu. Den iglesianan presbiteriano, ta e ministernan na cabes ta efectuá e ordenacion.”

⁴ Pues, den e iglesianan di cristiandad, nan a limitá mashá e privilegio di ta minister. Sin embargo, esaki no ta e caso cerca Testigonan di Jehova. Pakico no? Pasobra esei no tabata asina den e congregacion cristian di promé siglo.

Ken Realmente Ta Ministernan di Dios?

5. Segun Bijbel, ken ta entre esnan cu ta sirbi como minister?

⁵ Segun Bijbel, tur adoradó di Jehova—celestial i terenal—ta minister of sirbidó. Angelnan a sirbi Jesus. (Mateo 4:11; 26:53; Lucas 22:43) Ademas, angelnan ta “sirbi na fabor di esnan cu lo heredá salbacion.” (Hebreonan 1:14; Mateo 18:10) Jesus tabata un minister. El a bisa: “E Yu di hende a bini, no pa ser sirbí, sino pa sirbi.” (Mateo 20:28; Romanonan 15:8) P’esei, siendo cu Jesus su siguidónan mester a “sigui su pasonan cu sumo cuidou i atencion,” no ta nada straño cu nan tambe mester ta minister.—1 Pedro 2:21.

6. Con Jesus a indicá cu su disipelnan mester tabata minister?

⁶ Djis promé cu Jesus a subi na shelu, el a bisa su disipelnan: “Bai . . . i haci disipel di hende di tur nacion, bautisando nan den e nomber dje Tata i dje Yu i dje spiritu santu, siñando nan pa warda tur loke mi a manda boso.” (Mateo 28:19, 20) Jesus su disipelnan mester tabata hacidó di disipel, esta, minister. E disipelnan nobo cu nan a forma lo mester a siña warda tur e cosnan cu Jesus a manda, incluso e mandamentu di bai i haci disipel. Homber of muher, adulto of mucha, un berdadero disipel di Jesucristo lo tabata un minister.—Joël 2:28, 29.

7, 8. (a) Cua textonan ta mustra cu tur cristian berdadero ta minister? (b) Ki preguntanan ta lanta tocante ordenacion?

⁷ Na armonia cu esaki, riba dia di Pentecoste aña 33 E.C., tur Jesus su disipelnan presente, homber i muher, a participá den declará na otronan “e cosnan magnífico di Dios.” (Echonan 2:1-11) Ademas, apostel Pablo a skirbi: “Cu curason hende ta ehercé fe pa husticia, pero cu boca hende ta haci declaracion público pa salbacion.” (Romanonan 10:10) Pablo no a dirigí e palabranan ei na un grupo limitá di clero, sino “na tur esnan cu [tabata] na Roma como stimánan di Dios.” (Romanonan 1:1, 7) Di igual manera, tur ‘e santunan na Efeso i e fielnan den union cu Cristo Jesus’ mester tabatin nan “pianan bistí cu e ekipo dje bon nobo di pas.” (Efesionan 1:1; 6:15) I tur esnan cu a tende e carta dirigí n’e hebreonan mester a ‘tene firmemente gará e declaracion público di nan speransa sin vacilá.’—Hebreonan 10:23.

 ⁸ Pero, ki ora un persona ta bira un minister? Cu otro palabra, ki ora e ta ser ordená? I ken ta orden’é?

Ordenacion Como Minister—Ki Ora?

9. Na ki tempu Jesus a ser ordená, i dor di ken?

⁹ Relacioná cu ki ora i dor di ken un persona ta ser ordená, considerá e ehempel di Jesucristo. E no tabatin un certificado di ordenacion ni un diploma di un seminario pa proba cu e tabata un minister, i no ta ningun hende a orden’é. Pakico nos por bisa anto, cu e tabata un minister? Pasobra Isaías su palabranan inspirá a cumpli riba dje: “E spiritu di Jehova ta riba mi, pasobra el a ungi mi pa declará bon nobo.” (Lucas 4:17-19; Isaías 61:1) E palabranan ei no ta laga duda cu Jesus a ser comisioná pa declará e bon nobo na otronan. Comisioná dor di ken? Siendo cu ta Jehova su spiritu a ungié p’e trabou, ta claro anto cu ta Jehova Dios a ordená Jesus. Na ki tempu esaki a sosodé? En realidad Jehova su spiritu a bini riba Jesus ora el a ser bautisá. (Lucas 3:21, 22) P’esei, tabata na su bautismo cu el a ser ordená.

10. Dor di ken un minister cristian ta bira “adecuadamente capacitá”?

¹⁰ Kico di Jesus su siguidónan di promé siglo? Nan státus como minister tambe a bini for di Jehova. Pablo a bisa: “E echo cu nos ta adecuadamente capacitá ta bini di Dios, kende en berdad a capacitá nos adecuadamente pa ta ministernan di un pacto nobo.” (2 Corintionan 3:5, 6) Con Jehova ta capacitá su adoradónan pa ta minister? Considerá e ehempel di Timoteo, kende Pablo a yama “minister di Dios den e bon nobo tocante e Cristo.”—1 Tesalonicensenan 3:2.

11, 12. Con Timoteo a haci progreso den direccion di bira un minister?

¹¹ E siguiente palabranan dirigí na Timoteo ta yuda nos comprendé con el a bira un minister: “Sin embargo, abo sigui den e cosnan cu bo a siña i a keda persuadí pa kere, sabiendo for di ki personanan bo a siña nan i cu for di infancia bo a conocé e scrituranan santu, cu por haci bo sabí pa salbacion mediante e fe en relacion cu Cristo Jesus.” (2 Timoteo 3:14, 15) E fundeshi di Timoteo su fe, cu lo a impuls’é pa haci un declaracion público, tabata conocimentu dje Scritura. Lesamentu personal tabata e único cos necesario pa esaki? No. Timoteo tabatin mester di yudansa pa gana conocimentu exacto i comprendimentu spiritual di loke el a lesa.  (Colosensenan 1:9) Asina Timoteo a ser “persuadí pa kere.” Siendo cu el a conocé e Scritura “for di infancia,” su promé instructornan lo mester tabata su mama i su wela, ya cu tur cos ta mustra cu su tata no tabata un creyente.—2 Timoteo 1:5.

¹² Sin embargo, mas tabata enbolbí den Timoteo su formacion como minister. Na promé lugá, e asociacion cu cristiannan dje congregacionnan den becindario a fortalecé su fe. Con nos por sa esei? Pasobra ora Pablo a topa Timoteo pa promé bes, “e rumannan na Listra i Iconio a duna bon informe” dje yoncuman aki. (Echonan 16:2) Ademas, den e tempu ei algun ruman homber tabata skirbi carta n’e congregacionnan pa fortalecé nan. I superintendentenan tabata bishitá nan pa animá nan. E percuracionnan ei a yuda cristiannan manera Timoteo progresá spiritualmente.—Echonan 15:22-32; 1 Pedro 1:1.

13. Na ki tempu Timoteo a ser ordená como minister, i pakico lo bo bisa cu su progreso spiritual no a caba ei?

¹³ En bista di Jesus su mandamentu registrá na Mateo 28:19 i 20, nos por ta sigur cu na un momento dado Timoteo su fe a impuls’é p’e imitá Jesus i bautisá. (Mateo 3:15-17; Hebreonan 10:5-9) Esaki tabata un símbolo di Timoteo su dedicacion di henter alma na Dios. Na su bautismo, Timoteo a bira un minister. Dje ora ei padilanti, su bida, su forsa i tur loke e tabatin a pertenecé na Dios. Esaki tabata un parti integral di su adoracion, “un sirbishi sagrado.” Sin embargo, Timoteo no a keda satisfecho cu e simpel echo cu e tabata un minister. El a sigui crece spiritualmente i a bira un minister cristian maduro. Esaki a tuma lugá debí na Timoteo su asociacion estrecho cu cristiannan maduro manera Pablo, su mes studio personal i su actividad celoso di predicá.—1 Timoteo 4:14; 2 Timoteo 2:2; Hebreonan 6:1.

14. Awe, con un persona “corectamente dispuesto pa bida eterno” ta progresá den direccion di bira un minister?

¹⁴ Awe, ta mescos cu e ordenacion p’e ministerio cristian. Pa medio di un studio di Bijbel nos ta yuda un persona cu ta “corectamente dispuesto pa bida eterno” siña tocante Dios i su propósito. (Echonan 13:48) E individuo ta siña aplicá principionan di Bijbel den su bida i haci oracion significativo na Dios. (Salmo 1:1-3; Proverbionan 2:1-9; 1 Tesalonicensenan 5:17, 18) E ta asociá cu otro creyentenan i ta probechá dje percuracionnan i areglonan cu “e esclabo fiel i discreto” ta haci. (Mateo 24:45-47; Proverbionan 13:20; Hebreonan 10:23-25) Asina e ta haci progreso den un proceso structurá di educacion.

15. Kico ta sosodé ora un persona ser bautisá? (Mira tambe nota na pia di página.)

¹⁵ Cu tempu, e studiante di Bijbel, despues di a desaroyá amor pa Jehova Dios i un fe fuerte den e sacrificio di rescate, ta deseá na dedicá su mes completamente na su Tata celestial. (Juan 14:1) E ta haci e dedicacion ei den oracion personal i despues ta ser bautisá como símbolo público  dje acto privá ei. Su bautismo ta su ceremonia di ordenacion pasobra ta e ora ei e ta ser reconocé como un sirbidó (criá) completamente dedicá, un di·á·ko·nos di Dios. E tin cu keda separá for di mundu. (Juan 17:16; Santiago 4:4) El a presentá henter su ser como “un sacrificio bibu, santu, aceptabel pa Dios” sin reserva of condicion. (Romanonan 12:1) * E ta minister di Dios, imitando Cristo.

Kico Ta e Ministerio Cristian?

16. Kico tabata algun di Timoteo su responsabilidadnan como minister?

¹⁶ Kico e ministerio di Timoteo a encerá? E tabatin debernan special como Pablo su compañero di biahe. I ora el a bira anciano, Timoteo a traha duru pa siña i fortalecé compañeronan cristian. Pero e parti central di su ministerio, mescos cu tabata e caso cu Jesus i Pablo, tabata e trabou di predicá e bon nobo i haci disipel. (Mateo 4:23; 1 Corintionan 3:5) Pablo a bisa Timoteo: “Pero, abo mantené bo huicio den tur cos, sufri maldad, haci e trabou di un evangelisadó, cumpli cu bo ministerio plenamente.”—2 Timoteo 4:5.

17, 18. (a) Den ki ministerio cristiannan ta participá? (b) Con importante e trabou di predicá ta pa un minister cristian?

¹⁷ Ta mescos cu ministernan cristian awe. Nan ta participá den un ministerio público, un trabou di evangelisá, dirigiendo otronan na salbacion a base di Jesus su sacrificio i ta siña e mansunan inbocá Jehova su nomber. (Echonan 2:21; 4:10-12; Romanonan 10:13) Nan ta proba for di Bijbel cu e Reino ta e único speransa pa hende cu ta sufri i ta mustra cu awor aki mes cos ta bai mihó ora nos ta biba segun principionan di Dios. (Salmo 15:1-5; Marco 13:10) Pero un minister cristian no ta predicá un evangelio social. Mas bien, e ta siña otronan cu ‘debocion na Dios ta encerá e promesa dje bida djawor i di esun pa bini.’—1 Timoteo 4:8.

¹⁸ Ta cierto cu mayoria minister tin maneranan adicional pa sirbi, loke por varia di un cristian pa otro. Hopi tin obligacion di famia. (Efesionan 5:21–6:4) Anciano i sirbidónan ministerial tin tareanan den e congregacion. (1 Timoteo 3:1, 12, 13; Tito 1:5; Hebreonan 13:7) Hopi cristian ta yuda construí Salon di Reino. Algun tin e privilegio maraviyoso di traha como boluntario den un di Sociedad Watch Tower su casnan di Betel. Sin embargo, tur minister cristian ta participá den e predicacion dje bon nobo. No tin excepcion. Ta dor di participá den e trabou aki bo ta identificá bo mes públicamente como un berdadero minister cristian.

E Actitud di un Minister Cristian

19, 20. Ki actitud ministernan cristian mester cultivá?

¹⁹ Mayoria minister di cristiandad ta verwagt pa hende duna nan un trato special, i nan ta carga título manera “reverendo” i “pader.” Sin embargo, un minister cristian sa cu ta Jehova so ta digno di tal respet reverencial. (1 Timoteo 2:9, 10) Ningun minister cristian ta pretendé cu otro hende mester dun’é tal respet haltu ni e no ta aspirá títulonan special. (Mateo 23:8-12) E sa cu e nificacion básico di di·a·ko·nía ta “sirbishi.” Tin bes Bijbel ta usa e verbo asociá cuné relacioná cu servicio personal, manera esun di waiter cu ta sirbi na mesa. (Lucas 4:39; 17:8; Juan 2:5) Maske su uso den relacion cu e ministerio cristian ta mas elevá, un di·á·ko·nos ta keda un sirbidó.

²⁰ P’esei ningun minister cristian tin motibu pa sinti su mes importante. Berdadero ministernan cristian—asta esnan cu tin responsabilidad special den congregacion—ta esclabo humilde. Jesus a bisa: “Ken cu kier bira grandi den boso mester ta boso minister, i ken cu kier ta e promé den boso mester ta boso esclabo.” (Mateo 20:26, 27) Ora Jesus a mustra su disipelnan e actitud corecto cu nan mester a cultivá, el a laba nan pia, haciendo e trabou dje esclabo mas abou. (Juan 13:1-15) Ki un sirbishi humilde! P’esei, ministernan cristian ta sirbi Jehova Dios i Jesucristo humildemente. (2 Corintionan 6:4;  11:23) Nan ta demostrá humildad di mente ora nan ta sirbi otro. I ora nan ta predicá e bon nobo, nan ta sirbi nan próhimo no-creyente na un manera inegoista.—Romanonan 1:14, 15; Efesionan 3:1-7.

Perseverá den e Ministerio

21. Con Pablo a ser recompensá p’e echo cu el a perseverá den e ministerio?

²¹ Pa Pablo, ser minister a exigí perseverancia. El a bisa e colosensenan cu el a sufri hopi pa por a predicá e bon nobo na nan. (Colosensenan 1:24, 25) Sin embargo, dor cu el a perseverá, hopi hende a aceptá e bon nobo i a bira minister. Nan a ser ungí como yu di Dios i ruman di Jesucristo, cu e prospecto di bira criatura spiritual huntu cuné den shelu. Ki un recompensa glorioso pa su perseverancia!

22, 23. (a) Pakico ministernan cristian djawe tin mester di perseverancia? (b) Ki fruta maraviyoso perseverancia cristian ta trece cuné?

²² Awe perseverancia ta necesario pa esnan cu berdaderamente ta minister di Dios. Hopi ta lucha tur dia cu enfermedad of cu e dolornan di behes. Mayornan ta traha duru pa lanta nan yunan, i hopi di nan sin un casá. Cu curashi, muchanan na scol ta resistí e mal influencianan rond di nan. Hopi cristian ta lucha duru pa tene cabes riba awa económicamente. I hopi ta sufri persecucion of ta pasa berans debí n’e “tempu crítico, duru pa trata cuné” djawe! (2 Timoteo 3:1) Sí, awe e casi seis miyon ministernan di Jehova por bisa huntu cu apostel Pablo: “Di tur manera nos ta recomendá nos mes como ministernan di Dios, dor di wanta hopi.” (2 Corintionan 6:4) Ministernan cristian no ta entregá. Nos tin cu ègt encomendá nan pa nan perseverancia.

²³ Ademas, manera tabata den e caso di Pablo, perseverancia ta trece fruta maraviyoso. Dor di perseverá, nos ta conserbá nos relacion íntimo cu Jehova i ta haci su curason alegrá. (Proverbionan 27:11) Nos ta fortalecé nos mes fe i ta haci disipel, aumentando e hermandad cristian. (1 Timoteo 4:16) Jehova a sostené su ministernan i a bendicioná nan ministerio durante e último dianan aki. Como resultado, e último miembronan dje 144.000 a ser recogé, i miyones di hende mas tin e speransa sigur di disfrutá di bida eterno den un paradijs riba tera. (Lucas 23:43; Revelacion 14:1) Berdaderamente, e ministerio cristian ta un expresion di Jehova su misericordia. (2 Corintionan 4:1) Laga nos tur atesor’é i ser gradicidu cu su fruta lo permanecé pa semper.—1 Juan 2:17.

[Nota]

Bo Por Splica?

• Ki responsabilidad tur cristian di promé siglo tabatin?

• Ki ora i dor di ken un minister cristian ta ser ordená?

• Ki actitud un minister cristian mester cultivá?

• Pakico un minister cristian mester perseverá apesar di dificultad?

[Preguntanan di Estudio]

[Plachinan na página 16, 17]

Nan a siña Timoteo e Palabra di Dios for di infancia. El a bira un minister ordená ora el a bautisá

[Plachi na página 18]

Bautismo ta simbolisá dedicacion na Dios i ta marca un persona su ordenacion como minister

[Plachi na página 20]

Ministernan cristian ta dispuesto pa sirbi