Nos Por Siña for dje Promé Pareha Humano

DIOS a inspeccioná planeta Tera. E tabata preparand’e pa hende por biba riba dje. El a mira cu tur cos cu e tabata trahando tabata bon. De echo, ora e trabou aki a caba, el a declará cu e tabata “hopi bon.” (Génesis 1:12, 18, 21, 25, 31) Sin embargo, promé cu Dios a yega na e conclusion perfecto ei, el a papia di algu cu “no ta bon.” Claro cu Dios no a traha nada imperfecto. Simplemente su creacion no tabata completo ainda. Jehova a bisa: “No ta bon p’e homber sigui su so. Mi ta bai traha un yudante p’e, como un complemento di dje.”—Génesis 2:18.

Jehova su propósito tabata pa sociedad humano disfrutá di bida eterno cu salú, felicidad i abundancia den un paradijs terenal. E tata di henter humanidad tabata Adam. Su esposa, Eva, a bira “mama di tur hende cu ta biba.” (Génesis 3:20) Aunke awe mundu ta yen cu miles di miyones  di nan desendencia, hende ta leu di ta perfecto.

E historia di Adam cu Eva ta bon conocí. Pero di ki beneficio práctico e ta pa nos? Kico nos por siña for dje experencianan dje promé pareha humano?

“Machu i Hembra El A Crea Nan”

Ora Adam tabata duna e bestianan nomber, el a mira cu nan tabatin un partner pero e sí no tabatin. P’esei ora el a mira e bunita criatura cu Jehova a forma for di su repchi, el a alegrá. Realisando cu den un forma único e criatura tabata un parti di dje, Adam a sclama: “Esaki por fin ta wesu di mi wesunan i carni di mi carni. Esun aki lo ser yamá Muher, pasobra for di homber esun aki a ser tumá.”—Génesis 2:18-23.

Homber tabatin mester di “un yudante.” Awor e tabatin un cu tabata pas net p’e. Eva tabata pas perfectamente como complemento di Adam: pa cuida nan hogar-hardin i e bestianan, pa producí yu i pa duna e estímulo intelectual i apoyo di un berdadero compañera.—Génesis 1:26-30.

Jehova a suministrá tur loke razonablemente e pareha lo por tabatin deseo di dje. Dor di trece Eva cerca su casá i asina formalisá nan union, Dios a funda e institucion di matrimonio i famia mediante cua mester a organisá sociedad. E relato di Génesis ta bisa: “Un homber lo bandoná su tata i su mama i e tin cu pega na su esposa i nan tin cu bira un solo carni.” I ora Jehova a bendicioná e promé pareha casá i a bisa nan pa ta fructífero, su intencion claramente tabata pa tur yu nace den un famia amoroso, cu un tata i mama pa cuid’é.—Génesis 1:28; 2:24.

“Den Imágen di Dios”

Adam tabata un yu perfecto di Dios, trahá den Su ‘imágen i semehansa.’ Pero siendo cu “Dios ta un Spiritu,” e parecido lo no por tabata físicamente. (Génesis 1:26; Juan 4:24) E semehansa ta den cualidadnan cu a haci hende superior na bestia. Sí, for di principio Dios a implantá den hende e cualidadnan di amor, sabiduria, poder i husticia. Hende tabata dotá cu boluntad liber i e capacidad di spiritualidad. Un sentido moral den hende, esta concenshi, a permitié distinguí bon for di malu. Hende tabatin capacidad intelectual, loke a haci posibel cu e por a meditá riba e motibu pakico hende ta existí, acumulá conocimentu di su Creador i desaroyá intimidad cuné. Ekipá dje manera ei, Adam tabatin tur loke e mester pa cumpli cu su papel como administradó di Dios su creacion terenal.

Eva Ta Kibra Ley

Sin duda, Adam a informá Eva unbes dje único prohibicion cu Jehova a imponé: Nan por a come di fruta di tur e palunan den nan hogar-hardin cu excepcion di unu, e palu di conocimentu di bon i malu. Nan no tabatin mag di come di dje. Si nan a hacié, riba e dia ei nan lo a muri.—Génesis 2:16, 17.

No a tarda mashá cu un cuestion a lanta relacioná cu e fruta prohibí. Un colebra, usá como portabos dor di un spiritu invisibel, a abordá Eva. Hungando rol di inocente, e colebra a puntra: “Di berdad ta asina cu Dios a bisa cu boso no mag come di tur palu dje hofi?” Eva a contestá cu nan tabatin mag di come di tur palu cu excepcion di unu. Anto e ora ei e colebra a contradicí Dios, bisando e muher: “Boso positivamente lo no muri. Pasobra Dios sa cu riba e mésun dia cu boso come di dje, boso wowonan lo tin cu habri i boso lo tin cu ta manera Dios, conociendo bon i malu.” E muher a cuminsá mira e fruta prohibí den un lus diferente. “E palu tabata bon pa cuminda i . . . e tabata algu pa wowo anhelá.” Completamente engañá, Eva a kibra Dios su ley.—Génesis 3:1-6; 1 Timoteo 2:14.

Eva su picá tabata inevitabel? Di ningun manera! Pone bo den su lugá. Loke e colebra a pretendé a troce loke Dios i Adam a bisa. Con abo lo a sinti si un persona desconocí acusá un hende cu bo ta stima i confia, cu e ta  desonesto? Eva lo mester a reaccioná otro manera, demostrando disgustu i indignacion, i asta nengando di scucha. Al fin i al cabo, ken e colebra tabata pa e cuestioná Dios su husticia i e palabra di su casá? Pa respet pa e principio di hefatura, Eva lo mester a busca conseho promé cu el a tuma cualkier decision. Asina nos lo mester haci si un dia nos haña nos cu informacion contrali na e instruccionnan di Dios. Sin embargo, Eva a confia e palabranan dje Tentador, deseando di dicidí pa su mes kico tabata bon i kico tabata malu. Mas el a pensa riba e idea, mas e idea a atra’é. Ki un eror el a haci dor di keda pensa riba un mal deseo, en bes di sak’é for di su mente of papia dje asuntu cu su cabes di cas!—1 Corintionan 11:3; Santiago 1:14, 15.

Adam Ta Scucha Su Casá

Djis despues Eva ta persuadí Adam pa uni cuné den su picá. Con nos mester splica e manera cu Adam a bai di acuerdo sin pone resistencia? (Génesis 3:6, 17) Adam a hañ’é cu un conflicto di lealtad. Lo el a obedecé su Creador, kende a dun’é tur cos, incluso su casá stimá, Eva? Adam lo a busca Dios su guia en cuanto kico e tabatin cu haci awor? Of lo el a dicidí di djoin su casá den e picá? Adam tabata sa masha bon cu loke Eva a spera di gana dor di come e fruta prohibí tabata un ilusion. Apostel Pablo a ser inspirá pa skirbi: “Adam no a ser gañá, pero e muher a ser completamente gañá i a yega di ta den transgresion.” (1 Timoteo 2:14) Pues Adam a scoge deliberadamente pa desobedecé Jehova. Su temor di ser separá for di su esposa tabata evidentemente mas grandi cu su fe den Dios su abilidad di remediá e situacion.

Adam su accion tabata un acto di suicidio. Tambe esei tabata igual na asesinato di tur e desendientenan cu Jehova misericordiosamente a permitié procreá, ya cu nan tur a  nace bou di picá su condenacion na morto. (Romanonan 5:12) Esta un prijs haltu pa desobedencia egoista!

E Consecuencianan di Picá

E efecto inmediato di picá tabata bergwensa. En bes di core bai papia contentu cu Jehova, e pareha a bai sconde. (Génesis 3:8) Nan amistad cu Dios a ser destrosá. Ora Dios a interogá nan tocante loke nan a haci, nan no a mustra remordimentu, aunke tur dos tabata conciente cu nan a kibra Dios su ley. Dor di come dje fruta prohibí, nan a bira lomba pa bondad divino.

Como resultado, Dios a indicá cu e dolor di duna lus lo a aumentá. Eva lo tabatin deseo intenso pa su esposo, i e esposo lo a domin’é. Pues su intento pa gara independencia a resultá den net lo contrario. Awor Adam lo a come e producto dje tera cu dolor. En bes di satisfacé su hamber sin tin cu traha duru den Eden, lo e tabatin cu lucha pa haña e necesidadnan di bida te ora cu el a bolbe na e stòf for di cua el a ser trahá.—Génesis 3:16-19.

Finalmente, Adam cu Eva a ser sacá for dje hofi di Eden. Jehova a bisa: “Ata e hende a bira mescos cu un di nos conociendo loke ta bon i loke ta malu, i awor, pa e no saca su man i realmente coge fruta tambe dje palu di bida i come i biba pa tempu indefiní . . .” “E frase ta stop na mitar,” segun e erudito Gordon Wenham, i ta keda na nos pa suministrá e resto di Dios su pensamentu, probablemente, “laga mi sak’é for dje hofi.” Por lo general, un escritor bíblico ta mencioná Dios su pensamentu completo. Pero aki, Wenham ta sigui bisa, “e echo cu no tin un conclusion, ta transmití e velocidad di Dios su accion. Apénas Dios a caba di papia cu el a saca nan for dje hofi.” (Génesis 3:22, 23) Cu esei, ta parce cu tur comunicacion entre Jehova i e promé pareha a terminá.

Adam cu Eva no a muri físicamente durante e dia di 24 ora ei. Sin embargo, nan a muri den un sentido spiritual. Alehá iremediablemente for dje Fuente di bida, nan a cuminsá degenerá rumbo pa morto. Imaginá bo con amargo nan promé encuentro cu morto lo mester tabata, ora cu nan primogénito Cain a asesiná nan di dos yu, Abel!—Génesis 4:1-16.

Despues di esei, nos sa masha tiki dje promé pareha humano. Nan di tres yu homber, Set, a nace ora Adam tabatin 130 aña. Adam a muri 800 aña despues, na edad di 930 aña, despues cu el a bira tata di “yu homber i yu muher.”—Génesis 4:25; 5:3-5.

Un Les pa Nos

Fuera di revelá e causa dje condicion degenerá di sociedad humano awe, e relato dje promé pareha casá ta siña nos un les fundamental. Cualkier pretencion di independencia for di Jehova Dios ta puru bobedad. Hende cu ta realmente sabí ta ehercé fe den Jehova i su Palabra, no den nan propio supuesto conocimentu completo. Jehova ta determiná loke ta bon i loke ta malu, i básicamente, haci loke ta corecto ta nificá obedec’é. Malecho ta nificá violá su leynan i ignorá su principionan.

Dios a ofrecé i ainda ta ofrecé tur loke humanidad por deseá: bida eterno, libertad, satisfaccion, felicidad, salú, pas, prosperidad i descubrimentu di cosnan nobo. Sin embargo, pa nos disfrutá di tur esaki ta rekerí pa nos reconocé cu nos ta dependé totalmente di nos Tata celestial, Jehova.—Eclesiástes 3:10-13; Isaías 55:6-13.

[Kuadro/Plachi na página 26]

Adam cu Eva—Djis un Mito?

Entre antiguo babilonio, asirio, egipcio i otro pueblonan tabata reina e creencia den un paradijs original cu a bai perdí debí na picá. Algu cu hopi dje relatonan tabatin en comun tabata un palu di bida cua su fruta por a duna bida eterno na esnan cu come di dje. Pues humanidad ta corda cu algu trágico a sosodé den Eden.

Awe, hopi hende ta rechasá e relato bíblico di Adam cu Eva como djis un mito. Sin embargo, mayoria científico ta reconocé cu e rasa humano ta un solo famia cu un orígen comun. Hopi teólogo ta haña cu ta imposibel pa nenga cu e efectonan di picá original cu un antepasado comun a cometé a ser transmití na humanidad. Pa kere cu hende a desaroyá for di mas cu un fuente lo obligá nan bisa cu ta vários antepasado a cometé un picá original. Na su turno, esaki lo obligá nan nenga cu Cristo, “e último Adam,” a rescatá humanidad. Pero Jesus i su disipelnan no a confrontá un dilema asina. Nan a reconocé cu e relato di Génesis ta berdad.—1 Corintionan 15:22, 45; Génesis 1:27; 2:24; Mateo 19:4, 5; Romanonan 5:12-19.