Nos Ta e Clase Cu Tin Fe

Predicando e Reino Riba e Altiplano na Perú

ENTRE e caredanan oost i west di cerunan di Ándes—caminda Bolivia i Perú ta topa otro—tin e Altiplano. Su nomber ta nificá “yanura haltu” of “plateau.” Mayor parti di dje ta den Bolivia.

E Altiplano ta 100 kilometer hanchu i mas cu 1.000 kilometer largu, i su elevacion promedio ta di rond di 3.700 meter riba nivel di laman. Na bordo di un avion cu ta bula bai einan for di Lima, Perú su stad capital cant’i costa, bo ta pasa riba El Misti cubrí cu sneu, un volcan cu ta yega te den nubia na un haltura di 5.822 meter. Pasando 6.000 meter di haltura tin na un distancia e puntanan cubrí cu sneu di Nevado Ampato i Nevado Coropuna. Di ripiente bo ta mira un plateau inmenso—e parti zuid dje Altiplano di Perú.

E capital dje Altiplano di Perú ta Puno, situá n’e punta nortwest di lago Titicaca, e lago mas haltu na mundu den cua boto por nabegá. Dor cu e region ta mas cu tres kilometer haltu, ta tuma un tiki tempu pa bishitantenan ahustá n’e aire fini. Banda di lago Titicaca ta biba e indjannan quechua i aymara. Bistí den trahenan colorido corá, berde of blou, bo por mira nan traha riba nan chacras, of cunucu chikitu. Aunke spañó ta e idioma principal di Perú, nan ta papia quechua i aymara tambe riba e Altiplano.

Encabesando e Trabou di Predicá

Recientemente, hopi hende humilde i trahadó cu ta papia quechua i aymara a haña un conocimentu exacto dje berdad di Bijbel. Esaki ta principalmente debí cu Jehova a bendicioná ricamente e esfuersonan celoso di proclamadónan di Reino di tempu completo cu ta sirbi como pionero special.

Por ehempel, e pioneronan special José i Silvia tabata asigná n’e pueblo di Putina, rond di 50 kilometer for di lago Titicaca. Den dos luna, Silvia tabata conducí 16 studio di Bijbel, i José, 14. Den apénas seis luna, e cantidad di publicadó di congregacion a aumentá for di 23 pa 41. Miéntras tantu, asistencia na reunion a crece for di 48 pa un máximo di 132.

José ta bisa: “Ora nos ta cuminsá cu reunionnan di congregacion den e comunidadnan isolá aki, nos a haña ta práctico pa cuminsá cu e Reunion Público i e Studio di Buki di Congregacion. Asina ta mas fácil pa esnan recien interesá cuminsá asistí na reunion.”

Dos ruman muher—un di nan pionero—tabata e proménan pa hiba e bon nobo n’e comunidad isolá di Muñani, rond di 20 kilometer for di Putina. Ei nan a cuminsá un studio di Bijbel cu un homber ciegu cu yama Lucio. * Lucio a invitá su ruman Miguel, un misionero católico laico i lider di comunidad for di un área den becindario. Ora un amigu a puntra Miguel pakico e ta bai Muñani tur siman, el a bisa cu esei tabata pa siña tocante Jehova i su Palabra. Anto e pregunta a lanta: “Pakico nos no ta studia Bijbel aki?” Pa motibu dje interes cu e hendenan den e comunidad di Miguel a mustra, no a tarda muchu cu e Testigonan a haci areglo pa tene reunion ei.

Miguel a cuminsá compartí cu otro hende loke e tabata siña. Pero kico di su posicion como misionero católico laico i gezaghebber? Den un reunion n’e centro di bario, el a anunciá su renuncia como misionero católico. Nan lo a nombra un otro persona? Un hende den auditorio a bisa: “Pakico nos mester di un otro misionero si nos ta siñando e berdad?” Claro cu esaki a referí na loke Testigonan di Jehova ta siña. Un otro persona a agregá:  “Nos no ta di acuerdo cu abo so ta renunciá. Pakico nos tur no ta renunciá?” E ora ei tur hende den auditorio a grita pareu: “Nos tur ta renunciá!”

Djis despues di esei na un reunion di comunidad nan a papia tocante dios falsu i crucifiho. Un homber a pidi tur presente lesa Deuteronomio 7:25 cu ta bisa: “Bo tin cu kima e imágennan grabá di nan diosnan den candela. Bo no mag deseá ni e plata ni e oro riba nan, ni realmente tum’é pa bo mes, pa temor cu dor di dje bo cai den un las; pasobra e ta un cos detestabel pa Jehova bo Dios.”

Anto e homber a pidi esnan cu tabata na fabor pa kima tur e diosnan falsu hisa man. Mesora tur man a bai laira. (Echonan 19:19, 20) Awor 23 dje 25 famianan den e comunidad ta studiando e Palabra di Dios. Dos persona ta sirbiendo como publicadó no-bautisá, i cincu pareha tin planeá pa legalisá nan matrimonio pa nan haña un posicion aprobá dilanti Jehova.—Tito 3:1; Hebreonan 13:4.

Siñando cu Grabacion di Caset

Ya cu masha poco hende riba e Altiplano sa lesa i skirbi, Sociedad su grabacionnan di video i caset den idiomanan local ta un gran yudansa—asta pa conducí studio di Bijbel. Cu yudansa di un audio caset, un pionero special cu yama Dora ta conducí studio den e foyeto Kico Dios Ta Rekerí di Nos? Despues cu e caba di toca un paragraf, e ta haci e studiante di Bijbel pregunta riba e material cu el a caba di tende.

Un emisora local ta transmití regularmente partinan dje foyeto Rekerí den e idioma quechua. E ta haci mescos cu partinan dje revista Spierta! na spañó. P’esei, hopi hende ta reconocé e mensahe di Reino i kier siña mas ora Testigonan di Jehova pasa na nan cas.

E Altiplano ta leu for di bista di mundu en general pero no for di bista di Dios. Danki na Jehova su amor pa humanidad, hopi hende cu ta biba na haltu riba e Altiplano di Ándes ta birando parti dje multitud cu ta glorificá su cas mahestuoso di adoracion berdadero.—Ageo 2:7.

[Nota]