Sirbi Dios cu un Spiritu Dispuesto

“CU MUCHU gustu lo mi gasta i keda completamente gastá pa boso alma,” apostel Pablo a skirbi. (2 Corintionan 12:15) Kico e palabranan aki ta bisa bo dje punto di bista i actitud cu sirbidónan di Jehova mester purba cultivá? Segun un erudito di Bijbel, ora Pablo a skirbi e palabranan ei na cristiannan den Corinto, eigenlijk e tabata bisando: “Mi ta dispuesto pa gasta mi forsa i tempu i bida i tur loke mi tin, pa boso bienestar, manera un tata ta hacié gustosamente pa su yunan.” Pablo tabata prepará pa “keda completamente gastá,” of “ser agotá i gastá,” si esei tabata loke a rekerí p’e cumpli cu su ministerio cristian.

Ademas, Pablo a haci tur esaki “cu muchu gustu.” E tabata “perfectamente dispuesto” pa haci esei, The Jerusalem Bible ta bisa. Kico di abo? Abo ta dispuesto pa gasta bo tempu, energia, talentonan i recurso sirbiendo Jehova Dios i e interesnan di otronan, asta si esei ta nificá keda “agotá i gastá” tin biaha? I lo bo haci esaki “cu muchu gustu”?

Nan Ta Nenga Mes di Sirbi

Mayoria hende no ta djis vacilá pa sirbi Dios, sino ta nenga redondamente di haci esei. Nan tin un spiritu di ingratitud, independencia egoista i asta rebelion. Satanas a tenta Adam cu Eva pa pensa dje manera ei. El a bisa eróneamente cu nan lo “ta manera Dios, conociendo bon i malu,” esta, capas pa dicidí pa nan mes loke ta bon i loke ta malu. (Génesis 3:1-5) Esnan cu tin e mésun spiritu ei awe ta pensa cu nan mester tin libertad completo pa haci precis loke nan ta deseá sin ningun obligacion na Dios of sin cu e ta interferí den nan bida. (Salmo 81:11, 12) Nan kier usa tur loke nan ta poseé pa sigui tras di nan propio interesnan personal.—Proverbionan 18:1.

Probablemente abo no ta compartí e punto di bista extremo aki. Ta probabel cu bo ta ègt apreciá e don di bida cu bo ta disfrutá di dje awor i e prospecto asta mas maraviyoso ainda di biba pa semper riba un tera paradísico. (Salmo 37:10, 11; Revelacion 21:1-4) Tal bes bo ta profundamente gradicidu na Jehova pa su bondad na bo. Pero nos tur mester ta alerto pa e peliger cu Satanas por troce nos forma di pensa di tal manera cu de echo nos sirbishi por bira inaceptabel pa Dios. (2 Corintionan 11:3) Con esaki lo por sosodé?

Sirbishi Dispuesto Ta un Rekisito

Jehova kier sirbishi dispuesto, di henter curason. Nunca e ta forsa nos haci su boluntad. Ta Satanas ta esun cu lo haci cualkier cos pa preshoná of tenta hende pa haci su boluntad. En coneccion cu sirbi Dios, Bijbel ta papia di obligacion, mandamentunan, rekisitonan, etcétera. (Eclesiástes 12:13; Lucas 1:6) Sin embargo, nos motibu principal pa sirbi Dios ta pasobra nos stim’é.—Éxodo 35:21; Deuteronomio 11:1.

Pablo tabata sa cu sin importá cuantu el a gasta su mes den sirbishi di Dios, esaki lo no a  nificá nada ‘si e no tabatin amor.’ (1 Corintionan 13:1-3) Ora escritornan di Bijbel ta referí na cristiannan como esclabo di Dios, nan no ta referí na sirbishi forsá como un criá despreciabel. (Romanonan 12:11; Colosensenan 3:24) Loke nan kier men ta sumision dispuesto, esta di buena gana, basá riba amor profundo i sincero pa Dios i pa su Yu, Jesucristo.—Mateo 22:37; 2 Corintionan 5:14; 1 Juan 4:10, 11.

Tambe nos sirbishi na Dios tin cu reflehá un amor profundo pa hende. Pablo a skirbi na e congregacion na Tesalónica: “Nos a bira amabel meimei di boso, manera ora un mama cu ta duna pechu ta cariciá su mes yunan.” (1 Tesalonicensenan 2:7) Den hopi pais awe, mamanan tin un obligacion legal pa cuida nan yunan. Pero sigur mayoria mama no ta haci esei djis pa obedecé e ley, no ta asina? No. Nan ta hacié pasobra nan tin masha cariño pa nan yunan. Sí, un mama cu ta duna pechu, gustosamente ta haci sacrificionan grandi pa su yunan! Debí cu Pablo tabatin mésun “tierno cariño” pa esnan cu el a sirbi, “cu muchu gustu” (Beibel na papiamentu koriente: e tabata “dispuesto”; Testament Nobo: tabata “un goso” pa) el a usa su bida mes pa yuda nan. (1 Tesalonicensenan 2:8) Amor ta motivá nos pa imitá Pablo su ehempel.—Mateo 22:39.

Kico di Sirbishi di Mala Gana?

Claro cu nos no tin cu laga amor pa nos mes surpasá amor pa Dios i hende. Sino, ta existí e peliger cu kisas nos lo rindi solamente sirbishi di mala gana, sin entusiasmo. Nos por asta cuminsá desaroyá un poco rencor, i keda malcontentu pasobra nos no por biba nos bida completamente segun nos propio deseonan. Esaki a sosodé cu algun israelita cu a perde nan amor pa Dios pero cu ainda tabata rindi un poco sirbishi na dje debí na un sentido di deber. Kico tabata e resultado? Sirbi Dios a bira “un cansancio” pa nan.—Malakías 1:13.

Cualkier ofrenda cu nos duna Dios semper mester ta “sano,” sin defecto, lo “mihó” cu tin disponibel. (Levítico 22:17-20; Éxodo 23:19) Sin embargo, den tempu di Malakías, en bes di duna Jehova nan mihó bestianan, e hendenan a cuminsá ofrecé esnan cu eigenlijk nan no tabata kier pa nan mes. Con Jehova a reaccioná? El a bisa e sacerdotenan: “Ora boso ta presentá un bestia ciegu pa sacrificio [boso ta bisa]: ‘Esei no ta nada malu.’ I ora boso ta presentá un bestia coho of enfermo: ‘Esei no ta nada malu.’ Trec’é cerca, por fabor, pa bo gobernadó. Lo e hiba gustu di bo, of lo e ricibí bo bondadosamente? . . . I boso a trece algu rancá, i e coho, i e enfermo; sí, boso a trec’é como regalo. Mi por tin placer den dje na boso man?”—Malakías 1:8, 13.

Con esaki por sosodé cu cualkier un di nos? Nos sacrificionan lo por bira “un cansancio” pa nos si nos no tin un curason i spiritu realmente dispuesto. (Éxodo 35:5, 21, 22; Levítico 1:3; Salmo 54:6; Hebreonan 13:15, 16) Por ehempel, Jehova ta haña loke a sobra di nos tempu?

Acaso un hende por a kere seriamente cu lo tabata aceptabel pa Dios si un miembro di famia bon intencioná of un levita celoso di un manera of otro forsa un israelita indispuesto p’e scoge su mihó bestia pa sacrificio ora cu realmente e no kier a ofrec’é? (Isaías 29:13; Mateo 15:7, 8) Jehova a rechasá tal tipo di sacrificio i cu tempu asta e pueblo cu a ofrecé nan.—Oséas 4:6; Mateo 21:43.

Haña Deleite den Haci e Boluntad di Dios

Pa ofrecé Dios sirbishi cu e ta aceptá, nos tin cu sigui e ehempel di Jesucristo. “Mi no ta busca mi mes boluntad, sino e boluntad di esun cu a manda mi,” el a bisa. (Juan 5:30) Jesus a haña gran felicidad den sirbi Dios di buena gana. Jesus a cumpli cu e palabranan profético di David: “Den haci bo boluntad, o mi Dios, mi tabatin deleite.”—Salmo 40:8.

Aunke Jesus tabatin deleite den haci e boluntad di Jehova, esaki no tabata semper fácil. Considerá loke a sosodé djis promé cu su aresto, huicio i ehecucion. Ora e tabata den e hofi di Getsémani, Jesus tabata “profundamente afligí” i a ‘drenta den agonia.’ E preshon emocional tabata asina intenso cu, segun e tabata haci oracion, “su sodó a bira manera gota di sanger  cu tabata cai na suela.”—Mateo 26:38; Lucas 22:44.

Di con Jesus a experenciá asina un agonia? Sigur no pasobra e tabata interesá den su mes of tabatin un mala gana pa haci e boluntad di Dios. E tabata prepará pa muri, i a asta reaccioná fuerte riba e palabranan di Pedro: “Sea bondadoso cu bo mes, Señor; abo absolutamente lo no tin e destino aki.” (Mateo 16:21-23) Loke a preocupá Jesus tabata con su morto como un criminal despreciá lo a afectá Jehova i Su nomber santu. Jesus tabata sa cu su Tata lo a sufri mashá di mira su Yu stimá ser tratá den un manera asina bárbaro.

Tambe Jesus a comprendé cu e tabata acercando un momento crucial den e realisacion di Jehova su propósito. Pega fielmente na e leynan di Dios lo a demostrá fuera di tur duda cu Adam lo por a tuma e mésun decision. Jesus su fieldad lo a exponé como completamente falsu Satanas su afirmacion, cu ora hende ta bou di prueba nan lo no sirbi Dios di buena gana i fielmente. Mediante Jesus, Jehova finalmente lo aplastá Satanas i eliminá e efectonan di su rebelion.—Génesis 3:15.

Esta un tremendo responsabilidad tabatin riba Jesus su scouder! Nomber di su Tata, pas universal i salbacion dje famia humano, tur a dependé di Jesus su fieldad. Realisando esaki, el a resa: “Mi Tata, si ta posibel, laga e copa aki pasa mi forbij. Sin embargo, no manera mi kier, sino manera abo kier.” (Mateo 26:39) Asta bou dje prueba di mas severo, Jesus nunca a vacilá pa ser dispuesto na someté n’e boluntad di su Tata.

‘E Spiritu Ta Ansioso, Pero e Carni Ta Swak’

Siendo cu Jesus a sufri tension emocional intenso ora e tabata sirbi Jehova, nos por verwagt cu Satanas lo pone preshon riba nos como sirbidónan di Dios. (Juan 15:20; 1 Pedro 5:8) Ademas, nos ta imperfecto. Pues asta si nos ta sirbi Dios di buena gana, lo no ta fácil pa nos haci esei. Jesus a mira con su apostelnan a lucha pa haci tur loke el a pidi nan. P’esei el a bisa: “E spiritu, naturalmente ta ansioso, pero e carni ta swak.” (Mateo 26:41) Den e naturalesa di Jesus su carni humano perfecto no tabatin nada débil. Sin embargo, e tabatin na mente e debilidad di carni di su disipelnan, e imperfeccion cu nan a heredá di Adam imperfecto. Jesus tabata sa cu debí na imperfeccion heredá i e limitacionnan humano cu esei a trece cuné, nan lo tabatin cu lucha pa logra haci tur loke nan tabata kier den e sirbishi di Jehova.

Pues anto, tal bes nos ta sinti manera apostel Pablo, kende tabata profundamente afligí ora imperfeccion a stroba su abilidad di sirbi Dios plenamente. Pablo a skirbi: “Facultad di deseá ta presente cu mi, pero e facultad di obra loke ta excelente no ta presente.” (Romanonan 7:18) Nos tambe ta haña cu nos no por efectuá completamente tur e bon cosnan cu nos ta deseá di haci. (Romanonan 7:19) Esaki no ta debí na ningun mala gana di nos parti. Ta simplemente debí cu e debilidad dje carni ta stroba asta nos mihó esfuersonan.

Laga nos no desesperá. Si di curason nos ta dispuesto pa haci tur loke nos por, Dios sigur lo aceptá nos sirbishi. (2 Corintionan 8:12) Laga nos ‘haci nos sumo posibel’ pa imitá Cristo su spiritu di sumision completo na e boluntad di Dios. (2 Timoteo 2:15; Filipensenan 2:5-7; 1 Pedro 4:1, 2) Jehova lo recompensá i apoyá tal spiritu dispuesto. Lo e duna nos “e poder mas ayá di loke ta normal” pa compensá nos debilidadnan. (2 Corintionan 4:7-10) Cu Jehova su yudansa, nos, mescos cu Pablo, ‘cu muchu gustu lo gasta i keda completamente gastá’ den Su sirbishi precioso.

[Plachi na página 21]

Pablo cu un spiritu dispuesto a sirbi Dios lo mihó cu e por

[Plachi na página 23]

Asta bou dje prueba di mas severo Jesus a haci e boluntad di su Tata