“Warda Mi Mandamentunan i Sigui Biba”

E TABATA hóben, inteligente, cu “bunita figura i di bunita aparencia.” Esposa di su doño di trabou tabata sensual i descará. Siendo iresistiblemente atraí na e yoncuman, diariamente e tabata purba seducié. “A sosodé cu riba e dia aki mescos cu riba otro dianan, el a drenta den e cas pa atendé su asuntunan, i no tabatin ei den e cas niun dje hombernan di cas. Anto e muher a gar’é na su paña, i a bisa: ‘Drumi cu mi!’” Pero Josef, yu dje patriarca Jacob, a laga su paña atras i a hui for dje esposa di Pótifar.—Génesis 39:1-12.

Claro cu no ta tur hende ta hui di un situacion tentador. Por ehempel, considerá e caso di un yoncuman cu rey Sálomon di antiguo Israel a mira riba caya anochi. Ora un muher den mal caminda a seducié, “mesora e hoben ta bai su tras, manera un buey ta bai pa wòrdu matá.”—Proverbionan 7:21, 22, Beibel Santu.

Bijbel ta urgi cristiannan pa “hui di fornicacion.” (1 Corintionan 6:18) Apostel Pablo a skirbi e hóben disipel cristian Timoteo: “Hui for di e deseonan cu ta pertenecé na hubentud.” (2 Timoteo 2:22) Ora nos haña nos confrontá cu situacionnan cu ta promové fornicacion, adulterio of otro malechonan moral, nos tambe tin cu hui mésun decididu cu Josef a hui for dje esposa di Pótifar. Kico lo yuda nos pa ta determiná pa haci esei? Den capítulo 7 dje buki bíblico di Proverbionan, Sálomon ta duna nos algun conseho baliosísimo. E ta papia no solamente di siñansanan cu ta protehá nos dje trikinan di hende inmoral, sino tambe ta exponé nan manera di actua dor di describí den un forma bibu un senario den cua un muher indecente ta seducí un yoncuman.

‘Mara Mi Mandamentunan na Bo Dedenan’

E rey ta cuminsá cu e conseho paternal: “Mi yu, warda mi dichonan, i mare bo atesorá cu bo mi propio mandamentunan. Warda mi mandamentunan i sigui biba, i mi ley manera bo pret’i wowo.”—Proverbionan 7:1, 2.

Mayornan, foral e tata, tin e responsabilidad duná pa Dios di siña nan yunan Dios su normanan di loke ta bon i loke ta malu. Moises a urgi tatanan: “E palabranan aki cu mi ta mandando bo awe mester resultá di ta riba bo curason; i bo tin cu inculcá nan den bo yu homber i papia di nan ora bo ta sinta den bo cas i ora bo ta cana riba caminda i ora bo ta bai drumi i ora bo ta lanta.” (Deuteronomio 6:6, 7) I apostel Pablo a skirbi: “Boso, tatanan, no iritá boso yunan, sino sigui cria nan den e disiplina i reglamentu mental di Jehova.” (Efesionan 6:4) Pues, e instruccionnan di un mayor cu yunan tin cu atesorá, es decir, duna gran balor, sigur ta encerá recordatorio, mandamentu i leynan hañá den e Palabra di Dios, Bijbel.

Instruccion di mayor por encerá otro reglamentunan tambe: reglanan di famia. Esakinan ta pa bienestar dje miembronan di famia. Ta cierto cu, dependiendo dje necesidad, e reglanan por varia di un famia pa otro. Sin embargo, mayornan tin e tarea di dicidí loke ta mihó pa nan propio famia. I e reglanan cu nan pone ta por lo general un expresion di nan amor i interes genuino. E conseho na hóbennan ta pa nan cumpli cu e reglanan aki huntu cu e siñansanan bíblico cu nan ta ricibí di nan mayornan. Sí, ta necesario pa trata  e instruccionnan ei “manera bo pret’i wowo,” protehando nan cu sumo cuidou. Esei ta e manera pa evitá e efecto mortal di ignorá e normanan di Jehova, i pues “sigui biba.”

“Mara nan [mi mandamentunan] na bo dedenan, i skirbi nan riba e tabla di bo curason,” Sálomon ta sigui bisa. (Proverbionan 7:3) Como cu nos dedenan ta semper den nos bista i ta vital pa efectuá loke nos ta proponé pa haci, e lesnan siñá for di un criansa bíblico of e ganamentu di conocimentu bíblico mester ta un recordatorio constante pa nos i guia den tur loke nos ta haci. Nos tin cu inscribí nan riba e tabla di nos curason, haciendo nan parti di nos naturalesa.

Sin lubidá e importancia di sabiduria i comprendimentu, e rey ta urgi: “Bisa sabiduria: ‘Bo ta mi ruman muher’; i mare bo yama comprendimentu mes ‘Pariente.’” (Proverbionan 7:4) Sabiduria ta e abilidad pa haci bon aplicacion di conocimentu cu Dios ta duna. Nos mester tin cariño pa sabiduria manera pa un ruman muher masha stimá. Kico ta comprendimentu? Esei ta e abilidad di analisá un asuntu i capta su sentido dor di comprendé e coneccion entre su diferente partinan i e totalidad. Nos mester ta mes cerá cu comprendimentu cu nos ta cu un amigu íntimo.

Pakico nos mester pega na entrenamentu bíblico i cultivá intimidad cu sabiduria i comprendimentu? Pa asina “warda [nos mes] dje muher straño, dje stranhera cu a haci su propio dichonan suave.” (Proverbionan 7:5) Sí, haciendo esei lo protehá nos dje manera suave i persuasivo di un hende straño, of stranhero, es decir, un persona inmoral. *

E Yoncuman Ta Topa ‘un Muher Astuto’

Siguientemente e rey di Israel ta describí un esena cu e mes a observá: “Na bentana di mi cas, dor dje yaluzí mi a wak abou, pa mi por a loer esnan inexperto. Mi tabata interesá pa dicerní entre e yu hombernan un yoncuman cu falta curason, cu a pasa riba caya cerca di [e muher straño] su skina, i den e caminda cu ta hiba na su cas e ta marcha, den scuritu, ora anochi ta cera, ora anochi i scuridad ta acercá.”—Proverbionan 7:6-9.

E bentana dor di cua Sálomon ta wak tin yaluzí, aparentemente un structura di trali di lata i kisas cu cosnan elaborá grabá riba dje. Segun cu anochi ta cera, scuridad ta yena caya. Sálomon ta mira un yoncuman cu ta particularmente vulnerabel. Dor cu e yoncuman no tin dicernimentu, esta sano huicio, e falta curason. Probablemente, e sa den ki tipo di bario el a drenta i kico lo por pasa cuné  einan. E yoncuman ta yega cerca di e muher straño “su skina,” cu ta riba e caminda cu ta hiba na e muher su cas. Ken e muher ta? Ki intencion e muher tin?

E rey observadó ta sigui bisa: “Mira! un muher tabata bin pa top’é, cu paña di un prostituta i astuto di curason. E ta bochinchera i terco. Su pianan no ta keda biba den su cas. Awor e ta pafó, awor e ta den e plasanan público, i na tur skina e ta drumi warda.”—Proverbionan 7:10-12.

E muher aki su manera di bisti ta indicá bon cla ken e ta. (Génesis 38:14, 15) E ta bistí inmodestamente, manera un prostituta. Ademas, e ta astuto di curason, su mente ta “traicionero,” su intencion ta “mañoso.” (An American Translation; New International Version) E ta bochinchera i terco, ta papia hopi i ta cabesura, un muher lawai i pa su cuenta, descará i tribí. En bes di keda cas, e ta preferá di frecuentá lugánan público, drumi warda na skina di caya pa gara su víctima. E ta wardando pa haña un hende manera e yoncuman.

Un ‘Abundancia di Persuasion’

Pues, un yoncuman ta topa un muher indecente cu tin un plan mañoso. Esaki sí a capta e atencion di Sálomon! E ta conta: “E muher a gar’é i a dun’é un sunchi. E muher a pone un cara descará, i ta cuminsá bis’é: ‘Mi tabatin cu ofrecé sacrificio di comunion. Awe mi a paga mi votonan. Ta p’esei mi a sali pa bin topa bo, pa busca bo cara, pa mi por haña bo.’”—Proverbionan 7:13-15.

E muher aki ta labioso. Descaradamente e ta expresá su palabranan cu confiansa. Tur cos cu e bisa ta cuidadosamente calculá pa seducí e yoncuman. Dor di bisa cu el a ofrecé sacrificio di comunion riba e dia ei i a paga su votonan, e ta haci como si fuera e ta hustu, insinuando cu e no falta spiritualidad. Sacrificio di comunion na e tempel den Jerusalem a consistí di carni, hariña, zeta i biña. (Levítico 19:5, 6; 22:21; Númeronan 15:8-10) Como cu esun cu a ofrecé e sacrificio di comunion por a tuma un parti di dje pa su mes i pa su famia, e muher pues a indicá cu tabatin yen di cos di come i bebe na su cas. E implicacion ta masha cla: E yoncuman lo a pasa bon na su cas. El a sali for di su cas specíficamente pa busca e yoncuman. Esta conmovedor no, basta un hende por a kere un cuenta asina. Un erudito bíblico ta bisa: “Ta berdad cu e muher tabata buscando un hende, pero realmente el a sali bin busca net e homber en particular aki? Ta un bobo so—kisas esun akí—lo a ker’é.”

Despues di a haci su mes atractivo cu e bista di su bistí, cu e zonido di su palabranan labioso, cu e toke di su abraso, i cu e sabor di su lipnan, e muher seductor ta haci uso dje sentido di holó. E ta bisa: “Mi a dorna mi cama cu bedsprei, cu cosnan di hopi color, linen di Egipto. Mi a sprengu mi cama cu mirra, aloé i cané.” (Proverbionan 7:16, 17) El a prepará su cama bunita cu linen colorido for di Egipto i a perfum’é cu fragancianan selecto di mirra, aloé i cané.

“Ban, laga nos sacia nos mes bebiendo di amor te mainta,” e muher ta sigui bisa, “sí, laga nos gosa di otro cu expresionnan di amor.” E invitacion ta pa haci algu mas cu djis un cena placentero pa dos persona. E ta primintié cu nan lo disfrutá di intimidad sexual. Pa e yoncuman, e apelacion ta aventuroso i excitante! Como un incentivo adicional, e muher ta agregá: “Pasobra e esposo no ta na su cas; el a bai di biahe pa un caminda leu. Un sacu di placa el a bai cuné den su man. Riba e dia di luna yen lo e bini su cas.” (Proverbionan 7:18-20) Nan lo ta perfectamente safe, e muher ta sigur’é, pasobra su esposo ta afó riba un biahe di negoshi i e no ta sper’é bek pa awor akí. Esta un talento e muher tin pa engañá un hóben! “El a engañ’é cu e abundancia di su persuasion. Cu e suavedad di su lipnan el a seducié.” (Proverbionan 7:21) Un homber mester ta dje caliber di Josef pa resistí un apelacion asina tentador. (Génesis 39:9, 12) E yoncuman aki ta dje caliber ei?

 ‘Manera un Toro pa Ser Matá’

“Di ripiente e [yoncuman] ta bai su tras,” Sálomon ta informá, “manera un toro cu ta bini pa ser matá, i net como si fuera di bui pa e disiplina di un homber bobo, te ora cu un flecha habri su higra, mescos cu un para ta pura drenta e trampa, i e no tabata sa cu esei ta encerá su propio alma.”—Proverbionan 7:22, 23.

E invitacion ta resultá iresistibel pa e yoncuman. Ignorando tur sano huicio, e ta bai tras dje muher ‘manera un toro pa ser matá.’ Manera un homber di bui no por scapa su castigu, asina e yoncuman ta ser hibá na picá. E no ta mira e peliger di tur esei, sino te ora “un flecha habri su higra,” es decir, te ora e ricibí un herida cu por causa su morto. E morto por ta físico dor cu e ta exponé su mes na malesanan fatal transmití sexualmente. * Tambe e herida por causa su morto spiritual, “esei ta encerá su propio alma.” Henter su ser i su bida ta ser afectá seriamente, i el a peca gravemente contra Dios. Pues e ta pura bai den e gara di morto manera un para ta pura drenta un trampa!

“No Cana Dual Drenta den Su Bereanan”

Sacando un les for di loke el a mira, e rey sabí ta urgi: “I awor, o yu hombernan, scucha mi i presta atencion n’e dichonan di mi boca. Mare bo curason no desviá bai na e camindanan di e muher. No cana dual drenta den su bereanan. Pasobra hopi ta esnan cu el a pone cai abou morto, i numeroso ta tur esnan cu el a mata. Su cas ta e camindanan di Sheol; nan ta baha bai na e kambernan interior di morto.”—Proverbionan 7:24-27.

Ta keda claro cu e conseho di Sálomon ta pa apartá for dje camindanan mortal di un persona inmoral i “sigui biba.” (Proverbionan 7:2) Esta oportuno e conseho aki ta pa nos tempu! Sigur ta necesario pa evitá lugánan cu ta ser frecuentá pa esnan cu ta drumi warda pa gara víctima. Pakico bo mester someté bo mes na nan tácticanan dor di bai lugánan asina? Sí, pakico bo mester ta esun cu “falta curason” i cana dual drenta e bereanan di un “stranhero”?

E “muher straño” cu e rey a mira, a tenta e yoncuman cu un invitacion pa “gosa di otro cu expresionnan di amor.” Acaso hende no a probechá di hopi hóben—foral di mucha muher—den un manera similar? Pero considerá esaki: Ora un hende ta purba tenta bo pa participá den mal conducta sexual, esei ta amor berdadero of pasion egoista? Di con un homber cu di berdad ta stima un mucha muher lo preshon’é p’e violá su concenshi i entrenamentu cristian? “Mare bo curason no desviá bai” na e camindanan ei, Sálomon a spierta.

Por lo general e palabranan di un seductor ta suave i bon calculá. Manteniendo sabiduria i comprendimentu na nos banda lo yuda nos ripará nan berdadero intencion. Nos lo ser protehá dor di no lubidá nunca loke Jehova ta manda. P’esei, laga nos semper haci esfuerso pa ‘warda Dios su mandamentunan i sigui biba,’ sí, asta pa semper.—1 Juan 2:17.

[Nota]

[Plachi na página 29]

Con bo ta mira e reglanan di bo mayornan?

[Plachi na página 31]

Warda Dios su mandamentunan ta nificá bida