Bijbel—Stimá i Prohibí

“Lo mi tabata kier pa nan a traducí e bukinan santu na tur idioma.” Esei ta loke Desiderius Erasmus, e intelectual hulandes aclamá di siglo 16, a skirbi.

ERASMUS su mayor deseo tabata pa tur hende por a lesa i comprendé e Scritura. Pero esnan cu a oponé Bijbel a rechasá e idea ei ferosmente. De echo, n’e tempu ei Europa tabata un lugá sumamente peligroso pa cualkier hende cu por tabatin djis un tiki curiosidad tocante contenido di Bijbel. Na Inglatera nan a pasa un ley parlamentario cu a manda pa “ken cu lesa e Scritura na ingles perde tera, pertenencia, bienes i bida . . . i, si nan keda cabesura, of ripití e malecho despues di ricibí pordon, promé mester horca nan pa traicion contra rey, i despues kima nan pa herehia contra Dios.”

Na Europa continental, Inkisicion Católico a core brutalmente tras di sectanan “herehe,” entre otro waldensenan frances, i a persiguí nan en particular pa motibu di nan custumber di predicá “for dje evangelionan i e cartanan apostólico i otro scrituranan santu, . . . ya cu predicacion i splicacion di scritura santu [tabata] completamente prohibí pa laico.” Un cantidad incontabel di hende homber i muher a sufri tortura teribel i morto pa motibu di nan amor pa Bijbel. Nan a risca di haña e castigunan di mas pisá si nan a djis ripití e Oracion di Nos Tata of e Dies Mandamentunan, i siña nan na nan yunan.

 Tal debocion p’e Palabra di Dios a sigui biba den curason di hopi peregrino cu a subi barcu bai colonisá Norteamérica. Na comienso na Merca, “lesamentu i religion tabata mará inseparablemente cu otro, loke a forma un cultura basá completamente riba conocimentu di Bijbel,” segun e buki A History of Private Life—Passions of the Renaissance. (Un Historia di Bida Privá—Debocionnan di Renacementu) De echo, un sermon publicá na Boston na 1767 a recomendá esaki: “Sea diligente den lesa e scritura santu. Tur mainta i tur anochi bo mester lesa un capítulo di bo Bijbel.”

Segun Barna Research Group na Ventura, California, mas cu 90 porciento di mericano tin un promedio di tres Bijbel. Pero un estudio recien ta mustra cu maske ainda nan tin masha respet pa Bijbel na Merca, “dedicá tempu na les’é, studi’é i aplik’é . . . ta un cos di pasado.” Mayoria hende conocé su contenido ariba-ariba so. Un columnista di korant a remarcá: “E pensamentu di cu ainda [Bijbel] lo por tin algu di bisa tocante problemanan of asuntunan actual, no ta algu comun.”

Pensamentu Seglar Ta Lanta

Un idea popular ta cu nos por logra éxito den bida dor di djis usa nos facultad di razoná, i haña cooperacion di hende. Hende ta trata Bijbel como djis un buki mas tocante opinion religioso i experencia personal, no como un buki di echo i berdad.

Pues, con mayoria hende ta trata cu cuestionnan di bida cu ta birando cada bes mas complicá i preocupante? Hende asina ta funcioná den un bashí spiritual, sin ningun norma i instruccion moral i religioso sólido. Nan a bira manera barcu sin timon, “tirá p’aki i p’aya i hibá di aki p’aya dor di tur rosea di siñansa di hende, . . . pa medio di astucia i maña di hende.”—Efesionan 4:14, The Twentieth Century New Testament.

Pues, e pregunta ta: Bijbel ta djis un buki religioso mas? Of di berdad e ta e Palabra di Dios, cu informacion práctico i esencial? (2 Timoteo 3:16, 17) Ta bale la pena considerá Bijbel? E siguiente artículo lo trata e preguntanan aki.

[Plachi na página 3]

Desiderius Erasmus

[Rekonosementu]

For dje buki Deutsche Kulturgeschichte

[Plachi na página 4]

Nan a persiguí waldensenan en particular, dor cu nan a predicá for di e Scritura

[Rekonosementu]

Stichting Atlas van Stolk, Rotterdam