Bijbel—Un Buki pa Mustra Bo Con pa Biba

“E PALABRA di Dios ta bibu i ta ehercé poder i ta mas skerpi cu cualkier spada di dos fila . . . i por dicerní pensamentunan i intencionnan di curason.” (Hebreonan 4:12) Sin duda e descripcion aki di loke e Palabra di Dios por logra, ta distinguí Bijbel como algu mas cu djis un bon buki.

Cu poco palabra, un escritor religioso a splica e asuntu asin’akí: “Su mensahe ta mes vital pa nos bida, cu nos siguiente rosea.” Anto el a agregá: “Si bo pensa riba nos anhelo i necesidad pa curacion awendia, i lesa Bijbel cu esei na mente, e resultado ta asombroso.” Mescos cu un lampi cu ta briya, Bijbel ta tira lus riba hopi cuestion i problema complicá di bida moderno.—Salmo 119:105.

En berdad, e sabiduria cu Bijbel ta trece dilanti tin poder pa ahustá nos manera di pensa, yuda nos resolvé problema, mehorá nos calidad di bida, i ekipá nos cu e abilidadnan necesario pa enfrentá situacionnan cu nos no por cambia. Mas importante, Bijbel ta capacitá nos pa siña conocé Dios i stim’é.

Un Buki Cu Ta Duna Hende Propósito

E Autor di Bijbel, Jehova Dios, ‘ta familiarisá cu tur nos camindanan.’ E sa mas di nos necesidadnan físico, emocional i spiritual, cu nos mes. (Salmo 139:1-3) Cu nos interes na pechu, e ta pone límite bon cla pa comportacion humano. (Mikéas 6:8) Ta sabí pa nos purba comprendé e límite i guianan ei, i siña biba di acuerdo cu nan. Felis ta e homber kende “su deleite ta den e ley di Jehova,” segun e salmista. “Tur loke e haci lo tin éxito.” (Salmo 1:1-3) Sigur ta bale la pena pa nos examiná e posibilidad ei.

Maurice, un maestro di scol penshoná, semper a pensa cu Bijbel tin cierto balor histórico i literario. Sin embargo, e tabatin duda tocante si ta Dios a inspir’é. Despues cu el a scucha un splicacion di pakico Dios a duna hende su Palabra skirbí, Maurice a examiná vários profecia bíblico. Como hóben, el a studia historia antiguo, literatura, ciencia i geografia. E ta reconocé cu e tabata muchu sabí den su propio bista pa el a mira e cantidad di ehempel cu ta apoyá autenticidad di Bijbel. “Mi tabata atrapá den e corementu ciegu tras di comodidad,  rikesa i placernan di bida. Lamentablemente, mi a keda sin informacion i ignorante en cuanto e bunitesa i veracidad dje buki mas grandioso cu a yega di ser skirbí.”

Awor cu Maurice tin setent’i picu aña, refiriendo na e relato tocante Jesus su aparicion na apostel Tomas, e ta bisa cu aprecio: “Mi man a ser guiá na e ‘herida sangrando’ cu pa semper lo kita tur duda for di mi mente tocante si Bijbel ta e berdad.” (Juan 20:24-29) Manera apostel Pablo a bisa corectamente, Bijbel ta exponé intencion di curason, i e ta duna bida nificacion. Di berdad e ta un buki pa mustra bo con pa biba.

E Ta Duna Mas Stabilidad na un Bida Yen di Problema

Tambe Bijbel ta duna conseho cu ta yuda hende libra nan mes di mal hábito. Daniel a logra vence e hábito impuru di humamentu, i tambe el a stop di core paranda i abusá di alcohol. (Romanonan 13:13; 2 Corintionan 7:1; Galationan 5:19-21) Realísticamente mirá, esfuerso cu determinacion ta necesario pa deshací di mal hábitonan asina i bisti “e personalidad nobo.” (Efesionan 4:22-24) “Tabata un berdadero reto,” segun Daniel, “pasobra nos ta hopi imperfecto.” Apesar di esei, e tabatin éxito. Awor Daniel ta lesa e Palabra di Dios tur dia, loke ta ten’é den un relacion íntimo cu Jehova.

Tempu cu e tabata crece, semper Daniel tabatin respet profundo pa Bijbel, maske nunca el a yega di les’é, i e tabata haci oracion na Dios tur anochi. Pero algu tabata falta. E no a logra haña felicidad. E gran cambio a sosodé ora el a mira e nomber di Dios den Bijbel pa promé bes. (Éxodo 6:3; Salmo 83:18) Despues di esei, e tabata usa e nomber di Jehova ora di haci oracion, i su oracionnan a bira hopi mas personal. “Jehova a bira e persona mas íntimo pa mi, i ainda e ta mi amigu mas íntimo.”

Promé cu el a siña tocante Bijbel, Daniel su punto di bista di futuro tabata scur. E ta bisa: “Bo no tin nodi ta hopi inteligente pa bo comprendé loke ta pasando na mundu. Mi tabatin miedu, i mi a purba keda ocupá pa evitá di pensa ariba.” Anto e ora ei el a siña cu Dios lo establecé husticia pa tur hende riba un tera hací limpi, caminda hende obediente lo por gosa di pas eterno i felicidad. (Salmo 37:10, 11; Daniel 2:44; Revelacion 21:3, 4) Awor Daniel tin un speransa sigur. E influencia stabilisador aki di Bijbel ta yud’é keda cu un punto di bista positivo di bida.

Yudansa pa Vence Problema Emocional

George tabatin shete aña ora su mama a muri. E tabatin miedu di bai drumi anochi, pasobra e no tabata sa si lo e lanta e siguiente dia. Despues el a lesa loke Jesus a bisa tocante morto i resureccion: “E ora ta bini den cua tur esnan cu ta den grafnan conmemorativo lo tende [Jesus] su bos i lo sali.” E palabranan aki di Jesus tambe a conmov’é: “Ami ta e resureccion i e bida. Esun cu ehercé fe den mi, asta si e muri, lo biba.” (Juan 5:28, 29; 11:25) E pensamentunan ei a zona razonabel, lógico i consolador. Segun George: “E berdad aki no ta zona bon den bo mente so, sino ta toca bo curason tambe.”

Daniel, mencioná anteriormente, tambe tabatin miedu. Su mama no por a cri’é riba su mes, pues nan a pon’é biba cerca diferente famia di criansa. Semper el a sinti manera un straño den nan, i el a anhelá e siguridad cu bo ta sinti como parti di un famia amoroso. Finalmente el a haña loke e tabata busca, danki na su studio di Bijbel. Daniel a cuminsá asociá cu e congregacion cristian di Testigonan di Jehova  i el a bira parti di un famia spiritual, unda el a experenciá e sintimentu di aceptacion i di ta stimá pa otronan. Sí, Bijbel ta beneficioso den un sentido práctico i cu ta satisfacé bo emocionalmente.

Corda, Jehova ta mira kico tin den nos curason i e sa kico nos ta busca. Dios ta “evaluando e curasonnan” i e ta duna “cada un di acuerdo cu su camindanan.”—Proverbionan 21:2; Jeremías 17:10.

Conseho Práctico pa Bida di Famia

Bijbel ta duna conseho práctico tocante asuntunan di relacion humano. George ta bisa: “Conflicto di personalidad i malcomprendimentu ta algun dje situacionnan cu ta duna mas stres den bida.” Con e ta enfrentá nan? “Si mi sinti cu un hende tin algu contra mi, mi ta aplicá e conseho directo di Mateo 5:23 i 24: ‘Haci pas cu bo ruman.’ E simpel echo cu mi por papia tocante e desacuerdo ya ta producí resultado. Mi por sinti e pas di Dios cu Bijbel ta papia di dje. E ta duna resultado. E ta sumamente práctico.”—Filipensenan 4:6, 7.

Ora un esposo i esposa tin un desacuerdo, tur dos mester ta “lihé pa tende, slow pa papia, slow pa rabia.” (Santiago 1:19) Un conseho asina ta mehorá comunicacion. George ta agregá: “Ora mi aplicá e conseho pa stima mi casá i trat’é manera mi mes, mi ta mira resultado unbes. Ta mas fácil p’e respetá mi.” (Efesionan 5:28-33) Sí, Bijbel ta siña nos con pa reconocé i trata cu nos imperfeccionnan, i con pa trata cu éxito cu esnan di otro hende.

Conseho Cu No Ta Bira Bieu

Sálomon e rey sabí a bisa: “Confia den Jehova cu tur bo curason i no lèn riba bo mes comprendimentu. Den tur bo camindanan tuma nota di dje, i e mes lo haci bo camindanan stret.” (Proverbionan 3:5, 6) Esta simpel, i na mes momento profundo, e palabranan ei ta!

Bijbel ta duna bo forsa pa logra cos positivo. E ta permití hende cu ta stima Dios pone nan bida na armonia cu su boluntad, i haña felicidad ‘canando den e ley di Jehova.’ (Salmo 119:1) Sin importá ki circunstancia nos ta aden, Bijbel tin e guia i conseho cu nos tin mester. (Isaías 48:17, 18) Les’é tur dia, meditá riba loke bo ta lesa, i pon’é na práctica. Lo e tene bo mente cla i enfocá riba cos puru i sano. (Filipensenan 4:8, 9) Lo bo siña, no solamente con pa biba i disfrutá di bida, sino tambe con pa stima e Creador di bida.

Si bo sigui un curso asina, Bijbel lo bira mas cu djis un bon buki pa bo, mescos cu el a bira caba pa miyones di otro hende. Di berdad lo e resultá di ta un buki pa mustra bo con pa biba!

[Plachi na página 6]

Bijbel por fortalecé bo decision pa stop cu hábitonan perhudicial

[Plachi na página 7]

Bijbel ta siña bo con pa bira mas íntimo cu Dios