Bo Mester Kere Esei?

E ALUMNO di 12 aña tabata haci esfuerso pa comprendé e principionan básico di wiskunde. Su maestro a duna e klas un fórmula di wiskunde cu a parce fácil.

El a cuminsá: “Laga x=y i laga nan tur dos ta ekivalente na 1.”

E studiante a pensa: ‘Te asina leu e ta parce bon.’

Sin embargo, despues di cuater liña di loke a parce un calculacion lógico, e maestro a yega na e resultado sorprendente: “P’esei, 2=1!”

El a reta su alumnonan confundí: “Proba mi cu esei no ta berdad.”

Cu e poco conocimentu di wiskunde cu e alumno hóben tabatin, e no por a mira con pa refutá esei. Cada paso den e calculacion a parce completamente válido. Esei kier men cu e mester kere e conclusion straño aki? Con cu bai bin, su maestro tabata mas versá den wiskunde cuné. Claro cu e no mester kere esaki! ‘Mi no tin cu refutá esaki,’ el a pensa den su mes. ‘Sano huicio ta bisa mi cu esaki ta absurdo.’ (Proverbionan 14:15, 18) E tabata sa cu ni su maestro ni ningun di su compañeronan di klas lo a cambia dos florin pa un florin!

Cu tempu e alumno di wiskunde a mira unda e fayo den e calculacion tabata. Miéntras tantu e experencia a siñ’é un les importante. Asta si un hende cu tin conocimentu hopi mas superior duna un argumento cuidadosamente diseñá i aparentemente indiscutibel, no ta asina cu un oyente mester kere un conclusion kens djis pasobra e no por refut’é n’e momento ei. Bon mirá, e alumno a sigui un principio bíblico masha práctico hañá den Bijbel na 1 Juan 4:1: no kere muchu lihé tur cos cu bo tende, asta si e ta parce di bini for di un fuente autoritativo.

Esaki no kier men cu bo mester pega di un manera terco na ideanan cu tabata existí promé. Ta un ekibocacion pa cera bo mente pa informacion cu por ahustá bo puntonan di bista robes. Pero tampoco bo mester ‘ser sagudí lihé for di bo huicio’ ora bo ta enfrentá preshon di un hende cu ta pretendé di tin mas tantu conocimentu of autoridad. (2 Tesalonicensenan 2:2) Ta claro cu e maestro tabata djis hungando un triki cu su alumnonan. Pero tin bes cos no ta asina inocente. Hende por ta masha “astuto den inventá eror.”—Efesionan 4:14; 2 Timoteo 2:14, 23, 24.

Expertonan Semper Tin Rason?

Ni maske cuanto conocimentu nan por tin, expertonan riba cualkier tereno por tin ideanan cu ta na conflicto cu otro i opinionnan cu ta cambia. Tuma por ehempel, e debate continuo den ciencia médico riba algu básico manera e causa di malesa. Un profesor di medicina na Universidad Harvard ta skirbi: “Den malesa e importancia relativo entre nos característicanan heredá i factornan sociológico i di medio ambiente, ta forma un base pa debatenan cayente entre científiconan.” Esnan cu ta den loke a ser yamá e campo determinista ta kere firmemente cu nos genenan ta hunga un papel decisivo den con vulnerabel nos lo ta pa cierto malesa. Sin embargo, otronan ta argumentá cu e medio ambiente i estilo di bida ta factornan principal den enfermedadnan humano. Ámbos banda ta lihé pa cita estudionan i estadísticanan pa sostené nan caso. Tog, e debate ta continuá.

Bes tras bes a ser probá cu pensadónan di mas renombrá tabata robes, maske loke nan a siña na un tempu a parce indiscutibel.  Filósofo Bertrand Russell a describí Aristóteles como un di “e filósofonan cu tabatin mas tantu influencia cu tur e otronan.” Tog, Russell tambe a señalá cu hopi di Aristóteles su doctrinanan tabata “completamente falsu.” El a skirbi: “Durante henter nos tempu moderno, casi tur avance científico, den lógica, of den filosofia, mester a ser hací cu oposicion directo di Aristóteles su disipelnan.”—History of Western Philosophy.

“Loke Falsamente Ta Yamá ‘Conocimentu’”

E cristiannan di promé probablemente a topa hopi disipel di e filósofonan griego bon conocí, manera Sócrates, Plato i Aristóteles. Hende educá dje tempu ei tabata mira nan mes como intelectualmente superior na mayoria cristian. No ta hopi disipel di Jesus a ser considerá como “sabí den sentido carnal.” (1 Corintionan 1:26) De facto, esnan educá den filosofia di e tempu ei tabata pensa cu loke cristiannan a kere tabata simplemente “bobedad” of “lokura.”—1 Corintionan 1:23; Beibel Santu.

Si bo tabata biba entre e cristiannan di promé ei, e argumentonan persuasivo dje élite intelectual dje dia ei lo a impresioná bo of lo bo a ser intimidá dor di nan despliegue di sabiduria? Lo no tabatin motibu pa esei, segun apostel Pablo. El a corda e cristiannan cu Jehova ta mira “e sabiduria di hende sabí” i e “inteligencia di hende intelectual” di e tempu ei como bobedad. (1 Corintionan 1:19) El a puntra: “Kico e filósofo, e escritor i e crítico dje mundu aki tin pa demostrá tur nan sabiduria?” (1 Corintionan 1:20, Phillips) Cu tur nan intelecto briyante, filósofo, escritor i críticonan di Pablo su dia no por a producí un berdadero contesta pa humanidad su problemanan.

P’esei cristiannan a siña evitá loke apostel Pablo a yama “contradiccionnan di loke falsamente ta yamá ‘conocimentu.’” (1 Timoteo 6:20) E motibu pakico Pablo a yama e conocimentu ei ‘falsu’ ta cu e tabata falta un factor crucial: un fuente of referencia di Dios cu lo por a proba nan teorianan. (Job 28:12; Proverbionan 1:7) Faltando esei, i n’e mésun momento ciegá dor di e gañadó principal, Satanas, esnan cu ta pega na tal conocimentu nunca por spera di haña e berdad.—1 Corintionan 2:6-8, 14; 3:18-20; 2 Corintionan 4:4; 11:14; Revelacion 12:9.

Bijbel—Un Guia Inspirá

Cristiannan di promé nunca a duda cu Dios a revelá su boluntad, propósito i principionan den e Scritura. (2 Timoteo 3:16, 17) Esaki a protehá nan pa no ser ‘hibá como víctima mediante e filosofia i engaño bano segun e tradicion di hende.’ (Colosensenan 2:8) Awe e situacion ta mescos. Na contraste cu e opinionnan confuso i conflictivo di hende, e Palabra inspirá di Dios ta duna un fundeshi sólido riba cua nos por basa nos creencianan. (Juan 17:17; 1 Tesalonicensenan 2:13; 2 Pedro 1:21) Sin dje nos lo ta den e situacion imposibel di purba traha algu sólido riba e santu cu ta blo cambia di teoria i filosofianan humano.—Mateo 7:24-27.

‘Pero warda,’ un hende por bisa. ‘No ta berdad cu echonan científico a mustra cu Bijbel ta robes i p’esei no ta mas confiabel cu filosofia di hende cu ta cambia constant?’ Por ehempel, Bertrand Russell a bisa cu “Copernicus, Kepler, i Galileo tabatin cu bringa tantu Aristóteles como Bijbel pa establecé e punto di bista cu tera no ta e centro di universo.” (Letternan cursivo ta di nos.) I no ta berdad cu awe, por ehempel, creacionistanan ta insistí cu Bijbel ta siña cu tera a ser creá den seis dia di 24 ora, miéntras cu tur echo ta mustra cu e tera mes ta miles di miyones di aña bieu?

En realidad, Bijbel no ta bisa cu tera ta e centro di universo. Esei tabata un siñansa di lidernan di iglesia kende nan mes no a pega na e Palabra di Dios. E relato di creacion  di Génesis ta duna e posibilidad cu tera por tin miles di miyones di aña bieu i no ta limitá cada dia di creacion na 24 ora. (Génesis 1:1, 5, 8, 13, 19, 23, 31; 2:3, 4) Un evaluacion onesto di Bijbel ta mustra cu miéntras e no ta un buki científico, siguramente e no ta “lokura.” E ta de facto, completamente na armonia cu ciencia comprobá. *

E “Facultad di Razoná”

Apesar cu mayoria di Jesus su disipelnan tabata homber i muhernan gewoon, posiblemente cu educacion limitá, nan tabatin un otro cos cu Dios a pone na nan disposicion. Sin importá nan pasado, tur tabata dotá cu facultad di razoná i cu abilidad di pensa. Apostel Pablo a animá su compañeronan cristian pa haci pleno uso di nan “facultad di razoná” pa “proba pa [nan] mes loke ta e bon i aceptabel i perfecto boluntad di Dios.”—Romanonan 12:1, 2.

Cu e “facultad di razoná” cu Dios a duna nan, e cristiannan di promé a mira claramente cu cualkier filosofia of siñansa cu no tabata na armonia cu e Palabra revelá di Dios tabata inútil. Den algun caso e hendenan sabí di nan dia en realidad tabata “sofocá e berdad” i a ignorá e evidencia rond di nan cu tin un Dios. “Aunke nan a pretendé di tabata sabí, nan a bira bobo,” apostel Pablo a skirbi. Como cu nan a rechasá e berdad tocante Dios i su propósito, nan “a bira cabes bashí den nan razonamentunan i nan curason estúpido a bira scur.”—Romanonan 1:18-22; Jeremías 8:8, 9.

Esnan cu ta pretendé cu nan ta sabí hopi bes ta saca conclusionnan manera: “No tin Dios” of: “Bo no por confia Bijbel” of: “Esakinan no ta e ‘último dianan.’” E ideanan ei ta mes kens den Dios su bista cu concluí cu “2=1.” (1 Corintionan 3:19) No ta importá ki autoridad hende ta duna nan mes, no ta asina cu bo mester aceptá nan conclusionnan si nan ta contradicí Dios, ta ignorá su Palabra i ta violá sano huicio. Den e análisis final, e curso sabí semper ta pa “laga Dios ser hañá berdadero, aunke tur hende ser hañá mentiroso.”—Romanonan 3:4.

[Nota]

[Plachi na página 31]

Contrali cu opinionnan di hende cu ta cambia constant, Bijbel ta duna un base sólido pa kere

[Rekonosementu]

Man robes, Epicuro: Potret sacá pa cortesia di Museo Británico; meimei ariba, Plato: Museo Nacional di Arkeologia, Aténas, Grecia; man drechi, Sócrates: Roma, Musei Capitolini