Bo Ta Stima Jehova Su Recordatorionan Mashá?
Bo Ta Stima Jehova Su Recordatorionan Mashá?
“Mi alma a warda bo recordatorionan, i mi ta stima nan mashá.”—SALMO 119:167.
1. Unda principalmente nos ta haña bes tras bes referencia na Jehova su recordatorionan?
JEHOVA kier pa su pueblo ta felis. Claro cu pa nos por disfrutá di berdadero felicidad nos mester cana den Dios su ley i cumpli cu su ordunan. Cu tal fin, e ta duna nos recordatorio. Esakinan ta ser mencioná bes tras bes den e Scritura, specialmente den Salmo 119, un salmo cu posiblemente e hóben prins Ezekías di Huda a componé. E bunita cantica aki ta cuminsá cu e palabranan: “Felis ta esnan liber di culpa den nan caminda, esnan cu ta cana den e ley di Jehova. Felis ta esnan cu ta warda su recordatorionan; di henter curason nan ta keda busk’é.”—Salmo 119:1, 2.
2. Kico Dios su recordatorionan tin di haber cu felicidad?
2 Nos “ta cana den e ley di Jehova” dor di gana conocimentu exacto di su Palabra i dor di aplik’é den nos bida. Pero pa motibu cu nos ta imperfecto, nos tin mester di recordatorio. E palabra hebreo traducí como “recordatorio” ta indicá cu Dios ta trece su ley, ordu, regulacion, mandamentu i statutonan bek na nos mente. (Mateo 10:18-20) Nos lo keda felis únicamente si nos sigui cumpli cu tal recordatorionan, pasobra nan ta yuda nos evitá trampa spiritual cu ta hiba na calamidad i duele.
Pega na Jehova Su Recordatorionan
3. Ki confiansa Salmo 119:60 i 61 ta duna nos?
3 E salmista, kende a apreciá Dios su recordatorionan, a canta: “Mi a haci lihé, i no a tarda pa warda bo mandamentunan. Cabuya di esnan malbado mes a rondoná mi. Bo ley mi no a lubidá.” (Salmo 119:60, 61) Jehova su recordatorionan ta yuda nos wanta persecucion, dor cu nos ta confia cu nos Tata celestial por corta e cabuyanan di restriccion cu enemigunan ta mara rond di nos. Na su debido tempu e ta libra nos di e tipo di obstáculonan aki, pa nos por efectuá e trabou di predicá e Reino.—Marco 13:10.
4. Con nos mester reaccioná riba Dios su recordatorionan?
4 Tin bes cu Jehova su recordatorionan ta corigí nos. Laga nos semper apreciá tal coreccion, manera e salmista a haci. Den oracion el a bisa Dios: “Bo recordatorionan ta loke mi tin cariño p’e . . . Mi a stima bo recordatorionan.” (Salmo 119:24, 119) Nos tin mas recordatorio di Dios cu e salmista tabatin. E cientos di citanan for di e Scritura Hebreo cu ta aparecé den e Scritura Griego ta recordatorionan pa nos, tantu di Jehova su instruccionnan pa su pueblo bou dje Ley, como di su propósitonan relacioná cu e congregacion cristian. Ora Dios ta mira cu ta apropiado pa corda nos tocante cosnan cu tin di haber cu su ley, nos ta keda contentu cu tal guia. I dor di ‘pega na Jehova su recordatorionan’ nos ta evitá tentacionnan pecaminoso cu ta desagradá nos Creador i ta horta nos felicidad.—Salmo 119:31.
5. Con nos por yega na stima Jehova su recordatorionan mashá?
5 Cuantu nos mester stima Jehova su recordatorionan? E salmista a canta: “Mi alma a warda bo recordatorionan, i mi ta stima nan mashá.” (Salmo 119:167) Nos lo yega na stima Jehova su recordatorionan mashá si nos mira nan i aceptá nan como spiertamentu di un Tata cu tin berdadero interes den nos. (1 Pedro 5:6, 7) Nos tin mester di su recordatorionan, i nos amor pa nan lo crece segun cu nos mira con nan ta beneficiá nos.
Di Con Nos Tin Mester di Dios Su Recordatorionan
6. Cua ta un motibu di con nos tin mester di Jehova su recordatorionan, i kico lo yuda nos corda nan?
6 Un motibu di con nos tin mester di Jehova su recordatorionan ta cu nos ta lubidá. The World Book Encyclopedia ta bisa: “En general hende ta lubidá mas i mas cos segun tempu ta pasa. . . . Probablemente a yega di sosodé cu bo tin un nomber of un otro dato na punta di bo lenga i bo no por cord’é. . . . Un pérdida temporal asina di memoria, algu comun, ta ser yamá na ingles un ‘retrieval failure,’ un fayo pa recobrá informacion. Científiconan ta compará e fayo aki cu ora bo ta purba haña un obheto poné na un caminda robes, den un kamber bruhá. . . . Un bon manera pa garantisá cu bo ta keda corda un dato ta dor di sigui studi’é hopi tempu despues cu, segun bo, bo sabié bon-bon caba.” Studiamentu diligente i ripiticion lo yuda nos corda Dios su recordatorionan i cumpli cu nan pa nos mes bon.
7. Di con awe Dios su recordatorionan ta mas necesario cu nunca promé?
7 Nos tin mester di Jehova su recordatorionan mas cu nunca awe dor cu maldad a bira mas tantu cu nunca promé den historia humano. Si nos presta atencion na Dios su recordatorionan, nos ta obtené e perspicacia necesario pa evitá di ser tentá i hibá den e maldad di mundu. “Mas perspicacia cu tur mi maestronan mi a yega di tin,” segun e salmista, “pasobra bo recordatorionan ta di interes intenso pa mi. Mi ta comportá mi cu mas comprendimentu cu hombernan di edad, dor cu mi a cumpli cu bo propio ordunan. For di tur mal caminda mi a restringí mi pianan, cu e propósito di por warda bo palabra.” (Salmo 119:99-101) Dor di cumpli cu Dios su recordatorionan, nos lo no subi ningun “mal caminda,” i nos lo evitá di bira manera e masanan di humanidad cu ta “den scuridad mentalmente, i alehá for dje bida cu ta pertenecé na Dios.”—Efesionan 4:17-19.
8. Con nos por bira mihó prepará pa enfrentá pruebanan di fe cu éxito?
8 Dios su recordatorionan ta necesario tambe pasobra nan ta fortalecé nos pa wanta e cantidad di pruebanan cu nos ta enfrentá den e “tempu di fin” aki. (Daniel 12:4) Sin e recordatorionan ei nos lo bira “tendedó lubidadó.” (Santiago 1:25) Pero studio diligente di e Scritura, tantu personal como di congregacion, cu yudansa di publicacionnan dje “esclabo fiel i discreto,” lo yuda nos enfrentá pruebanan di fe cu éxito. (Mateo 24:45-47) E percuracionnan spiritual aki ta yuda nos mira kico nos mester haci pa agradá Jehova ora nos haña nos den circunstancianan cu ta pone nos na prueba.
E Papel Vital di Nos Reunionnan
9. Ken ta e “donnan den hende,” i con nan ta yuda nan compañeronan creyente?
9 E necesidad cu nos tin di Dios su recordatorionan ta ser satisfacé en parte na reunionnan cristian, caminda rumannan homber nombrá ta percurá instruccion. Apostel Pablo a skirbi cu ora Jesus a “subi na haltu el a hiba catibu; el a duna donnan den hende.” Pablo a agregá: “[Cristo] a duna algun como apostel, algun como profeta, algun como evangelisadó, algun como wardadó i maestro, cu un bista riba e reahuste dje santunan, pa trabou ministerial, p’e edificacion dje curpa di e Cristo.” (Efesionan 4:8, 11, 12) Esta gradicidu nos por ta cu e “donnan den hende” aki, ancianonan nombrá, ta dirigí nos atencion na Jehova su recordatorionan ora nos reuní huntu pa adorá!
10. Kico ta e punto principal di Hebreonan 10:24 i 25?
10 Gratitud pa percuracionnan divino lo motivá nos pa ta presente tur siman na nos cincu reunionnan di congregacion. Pablo a enfatisá cu ta necesario pa reuní huntu. El a skirbi: “Laga nos considerá otro pa incitá otro na amor i na obranan excelente, sin bandoná nos reunimentu huntu, manera algun tin pa custumber, sino animando otro, i tantu mas segun cu boso ta contemplá e dia yegando cerca.”—Hebreonan 10:24, 25.
11. Con cada un di nos reunionnan semanal ta beneficiá nos?
11 Abo ta apreciá loke nos reunionnan ta yuda nos cuné? E studio semanal di Toren di Vigilancia ta fortalecé nos fe, e ta yuda nos cumpli cu Jehova su recordatorionan, i e ta fortalecé nos contra “e spiritu di mundu.” (1 Corintionan 2:12; Echonan 15:31) N’e Reunion Público, oradornan ta presentá instruccion for di e Palabra di Dios, incluso Jehova su recordatorionan i Jesus su maraviyoso “dichonan di bida eterno.” (Juan 6:68; 7:46; Mateo 5:1–7:29) Nos abilidad di siña otro hende ta ser hací mas skerpi den e Scol di Ministerio Teocrático. E Reunion di Sirbishi ta sumamente balioso den yuda nos mehorá nos presentacion dje bon nobo di cas pa cas, na rebishita, na studionan di Bijbel na cas i den otro aspectonan di nos ministerio. Un grupo mas chikitu n’e Studio di Buki di Congregacion ta duna nos mas chens pa haci expresionnan personal, cu hopi bes tin di haci cu Dios su recordatorionan.
12, 13. Con Dios su pueblo na un pais asiático a manifestá nan aprecio pa reunionnan cristian?
12 Nos presencia regular na reunionnan di congregacion ta yuda nos corda Dios su mandamentunan, i ta yuda nos keda spiritualmente fuerte ora di enfrentá guera, dificultad económico i otro pruebanan di nos fe. Un 70 cristian bibá na un pais asiático a sinti bon cla con importante reunionnan ta, ora cu hende a saca nan for di nan cas i pone nan biba leu den mondi. Determiná pa sigui reuní huntu cu regularidad, nan a bai bek na nan pueblo destrosá dor di guera, a desmantelá loke a sobra di e Salon di Reino, anto a reconstruyé den mondi.
13 Jehova su pueblo na un otro parti dje mésun pais aki ta sigui sirbi cu celo, despues di a wanta añanan largu di guera. A puntra un dje ancianonan den e área ei: “Kico ta loke mas a yuda tene e rumannan huntu?” Kico el a contestá? “Den 19 aña, nunca nos a cancelá un reunion. Tin bes cu dor di bombardeo of otro dificultadnan algun ruman no por a yega n’e lugá di reuní, pero nunca nos a cancelá un reunion.” Sin duda e rumannan stimá aki ta comprendé con importante ta pa ‘no bandoná nan reunimentu huntu.’
14. Kico nos por siña dje custumber di Ana, e señora di edad?
14 Nunca Ana, e biuda di 84 aña, “no tabata falta den e tempel.” Como resultado, e tabata presente ora nan a trece Jesus einan como baby, poco despues cu el a nace. (Lucas 2:36-38) Bo ta determiná pa no perde reunion? Bo ta haci bo best pa t’ei na tur sesion di nos asamblea i congresonan? E instruccion spiritualmente beneficioso cu nos ta ricibí n’e reunionnan aki ta duna nos evidencia bon cla di cu nos Tata celestial ta cuida su pueblo. (Isaías 40:11) Ocasionnan asina ta promové goso tambe, i nos presencia ta demostrá nos aprecio pa Jehova su recordatorionan.—Nehemías 8:5-8, 12.
Apartá dor di Jehova Su Recordatorionan
15, 16. Ora nos ta cumpli cu Jehova su recordatorionan, ki efecto esei tin riba nos conducta?
15 Cumpli cu Dios su recordatorionan ta yuda apartá nos for dje mundu malbado aki. Por ehempel, tuma Dios su recordatorionan na pechu ta prevení nos di cometé inmoralidad sexual. (Deuteronomio 5:18; Proverbionan 6:29-35; Hebreonan 13:4) Nos por tin éxito den dominá tentacion pa gaña, ser desonesto of horta dor di cumpli cu recordatorionan divino. (Éxodo 20:15, 16; Levítico 19:11; Proverbionan 30:7-9; Efesionan 4:25, 28; Hebreonan 13:18) Cumpli cu Jehova su recordatorionan ta frena nos tambe di tuma vengansa, di carga rencor contra hende i di calumniá hende.—Levítico 19:16, 18; Salmo 15:1, 3.
16 Dor di tuma Dios su recordatorionan na pechu, nos ta permanecé santificá, esta, apartá, pa su sirbishi. I ta masha importante pa nos ta separá for dje mundu aki! Den oracion na Jehova riba e último anochi di su bida terenal, Jesus a haci e súplica aki pa su siguidónan: “Mi a duna nan bo palabra, pero mundu a odia nan, pasobra nan no ta parti di mundu, mescos cu ami no ta parti di mundu. Mi ta pidi bo, no pa bo saca nan for di mundu, sino pa bo vigilá riba nan pa causa di e malbado. Nan no ta parti di mundu, mescos cu ami no ta parti di mundu. Santificá nan pa medio dje berdad; bo palabra ta e berdad.” (Juan 17:14-17) Laga nos sigui atesorá e Palabra di Dios cu ta apartá nos pa su sirbishi sagrado.
17. Kico lo por pasa si nos ignorá Dios su recordatorionan, i pues, kico nos mester haci?
17 Como sirbidónan di Jehova, nos kier keda aceptabel pa ta den su sirbishi. Pero si nos ignorá Dios su recordatorionan, e spiritu dje mundu aki, cu gran parti dje abla, literatura, entretenimentu i conducta di mundu ta promové, lo por dominá nos. I definitivamente nos no kier bira stimadó di placa, presumido, halsá, malagradecidu, desleal, feros, cabesura, hinchá cu orguyo, stimadó di placer mas bien cu stimadó di Dios, djis pa mencioná algun característica cu hende alehá for di Dios ta manifestá. (2 Timoteo 3:1-5) Ya cu nos ta biba leu den e último dianan dje mal sistema di cosnan aki, laga nos keda pidi yudansa divino den oracion, pa nos por sigui cumpli cu Jehova su recordatorionan i di tal manera ‘mantené nos mes alerto conforme cu su palabra.’—Salmo 119:9.
18. Cumpli cu Dios su recordatorionan lo pone nos dal cua pasonan?
18 E recordatorionan di Jehova ta haci mas cu djis spierta nos di cos cu nos no mag haci. Cumpli cu su recordatorionan lo pone nos tuma accion, i haci nos confia Jehova completamente i stim’é cu tur nos curason, alma, mente i forsa. (Deuteronomio 6:5; Salmo 4:5; Proverbionan 3:5, 6; Mateo 22:37; Marco 12:30) Dios su recordatorionan ta motivá nos pa stima nos próhimo tambe. (Levítico 19:18; Mateo 22:39) Un manera principal cu nos ta desplegá nos amor pa Dios i pa nos próhimo ta dor di cumpli cu e boluntad divino i compartí e “conocimentu di Dios” dunador di bida cu otro hende.—Proverbionan 2:1-5.
Cumpli cu Jehova Su Recordatorionan Ta Nificá Bida!
19. Con nos por mustra otro hende cu ta práctico i beneficioso pa haci caso di Jehova su recordatorionan?
19 Si nos cumpli cu Jehova su recordatorionan i yuda otronan haci mescos, nos lo salba nos mes i esnan cu scucha nos. (1 Timoteo 4:16) Con nos por mustra otro hende, cu ta berdaderamente práctico i beneficioso pa haci caso di Jehova su recordatorionan? Dor di aplicá principio bíblico den nos propio bida. Asina, esnan “corectamente dispuesto pa bida eterno” lo tin evidencia di cu e curso cu e Palabra di Dios ta describí, di berdad ta esun mihó pa nos sigui. (Echonan 13:48) Tambe nan lo mira cu ‘Dios realmente ta meimei di nos,’ i nan lo sinti nan motivá pa uni cu nos den adorá e Señor Soberano Jehova.—1 Corintionan 14:24, 25.
20, 21. Kico Dios su recordatorionan i su spiritu lo yuda nos haci?
20 Dor di sigui studia e Scritura, pone loke nos ta siña na práctica, i saca máximo probecho di Jehova su percuracionnan spiritual, nos lo yega na stima su recordatorionan mashá. Si nos haci caso di nan, e recordatorionan aki lo yuda nos bisti “e personalidad nobo cu a ser creá segun e boluntad di Dios den berdadero husticia i lealtad.” (Efesionan 4:20-24) Jehova su recordatorionan i su spiritu santu lo yuda nos desplegá amor, goso, pas, gran pacenshi, amabilidad, bondad, fe, suavedad, dominio propio—cualidadnan hopi diferente for di e característicanan dje mundu drumí den poder di Satanas! (Galationan 5:22, 23; 1 Juan 5:19) P’esei nos por keda gradicidu ora nos ser recordá tocante Jehova su rekisitonan durante nos studio personal di Bijbel, dor di ancianonan nombrá, i na nos reunion, asamblea of congresonan.
21 Dor cu nos ta cumpli cu Jehova su recordatorionan, nos por alegrá asta ora nos ta sufri pa causa di husticia. (Lucas 6:22, 23) Nos ta acudí na Dios p’e scapa nos for di e situacionnan di mas peligroso. Esaki ta specialmente importante awor cu tur nacion ta siendo reuní “p’e guera dje gran dia di Dios e Todopoderoso” na Armagedon.—Revelacion 16:14-16.
22. Kico mester ta nos determinacion tocante e recordatorionan di Jehova?
22 Pa nos por ricibí e regalo inmerecí di bida eterno, nos mester stima Jehova su recordatorionan mashá, i cumpli cu nan di henter nos curason. P’esei, laga nos tin e mésun spiritu cu e salmista cu a canta: “E husticia di bo recordatorionan ta te na tempu indefiní. Haci mi comprendé, pa mi por keda biba.” (Salmo 119:144) Anto laga nos desplegá e determinacion cu ta bisto den e palabranan aki dje salmista: “Mi a inbocá bo [Jehova]. O salba mi! I lo mi warda bo recordatorionan.” (Salmo 119:146) Sí, cu echo i palabra, laga nos mustra cu di berdad nos ta stima Jehova su recordatorionan mashá.
Con Lo Bo Contestá?
• Con e salmista a considerá Jehova su recordatorionan?
• Di con nos tin mester di Dios su recordatorionan?
• Ki papel nos reunionnan ta hunga relacioná cu recordatorionan divino?
• Con Jehova su recordatorionan ta apartá nos for dje mundu aki?
[Preguntanan di Estudio]
[Plachi na página 15]
E salmista a stima Jehova su recordatorionan mashá
[Plachinan na página 16, 17]
Siguiendo ehempel di Ana, abo ta determiná pa no perde reunion?
[Plachi na página 18]
Haci caso di Jehova su recordatorionan ta apartá nos como limpi i aceptabel pa su sirbishi