Con Bo Por Haña Amigu

“UN AMIGU DURANTE BO BIDA TA BASTA BON; DOS TA HOPI BON; TRES TA CASI IMPOSIBEL.”—Henry Brooks Adams.

E TIPO di remarke aki ta duna e idea cu berdadero amigu ta scars. Hopi bes bo ta tende for di boca di hende masha solitario cu ta busca amistad, comentarionan manera: “Mi no tin ningun hende pa acudí na dje,” “Mi no por confia ningun hende,” of “Mi cachó ta mi mihó amigu.”

Ta un desafio pa cera i mantené amistad duradero. Un encuesta di mercado a revelá cu “na Merca 25 porciento di e poblacion adulto ta sufri di ‘soledad crónico’ i . . . na Francia mitar dje grupo a experenciá sintimentunan fuerte di isolacion.” E aumento den clubnan pa ‘date’ i ‘chat room’ di computer i e gran cantidad di aviso cu esnan cu ta busca compaño ta pone den korant, ta indicá cu hende ta anhelá contacto humano.

Soledad no ta afectá solamente un persona su estado mental sino tambe su salú físico, segun neurosicólogo dr. David Weeks. “Mi tin un proporcion haltu di pashent cu fobia di ansiedad i depresion kendenan bo por describí como solitario. Tin un relacion entre e severidad di depresion i e severidad di soledad.”

Divorcio i bida di famia kibrá ta pone mas i mas hende biba nan so. A concluí for di un encuesta realisá na Gran Bretania cu pa comienso di siglo 21, te cu 30 porciento dje poblacion dje nacion ei lo bai pertenecé na famia di un solo persona.

E Scritura inspirá a predicí cu un spiritu di egoismo lo dominá den “e último dianan.” (2 Timoteo 3:1-5) Ta parce cu hopi hende ta mas interesá den posesionnan material, manera cas of auto, of den nan trabou cu den cultivá relacion cu otro hende. Autor Anthony Storr ta  remarcá: “En bes di concentrá riba casá i yunan, nan bida ta basá riba nan oficina.”

BERDADERO AMIGU TIN BALOR INCALCULABEL

E calidad di bo bida ta dependé hopi dje calidad di bo amistadnan. Hopi bes hende cu ta biba pa nan mes no ta felis dor cu nan no tin amigu pa compartí nan cosnan of pensamentunan cuné. E palabranan di Jesucristo ta berdad: “Tin mas felicidad den duna cu tin den ricibí.” (Echonan 20:35) E poëta ingles George Byron a ripití e berdad aki ora el a skirbi: “Tur hende cu haña alegria mester compartié.”

Kico ta un amigu? Un diccionario ta definí un amigu como “un hende cu ta pegá na un otro dor di cariño of aprecio profundo.” Un berdadero amigu ta yuda bo dirigí bo pensamentunan na cos bon. E por animá bo i edificá bo den tempu di necesidad. E asta por compartí bo tristesa. Rey Sálomon a bisa: “Un berdadero compañero ta stima na tur tempu, i ta un ruman cu a nace pa ora tin angustia.” (Proverbionan 17:17) Miéntras cos material hopi bes ta perde nan balor segun tempu ta pasa, berdadero amistad ta crece i ta florecé cu tempu.

E Scritura ta consehá cristiannan pa “hancha” den nan cariño. (2 Corintionan 6:13) Tin sabiduria den haci esfuerso pa haña amistad. Na Eclesiástes 11:1 i 2 nos ta lesa: “Manda bo pan riba superficie di awa, pasobra despues di hopi dia lo bo hañ’é bek. Duna un porcion na shete, of asta na ocho, pasobra bo no sa ki calamidad por sosodé riba tera.” Con e principio aki ta aplicá na amistad? Si bo a cultivá amistad cu hopi hende, algun di nan kisas ta bin yuda bo ora dificultad presentá.

Berdadero amigu ta un proteccion pa bo den un otro manera. Proverbionan 27:6 ta bisa: “E heridanan causá pa un cu ta stima ta fiel.” Maske ken-cu-ta por duna bo palabranan di encomendacion, solamente amigunan berdadero lo tin suficiente aprecio pa bo pa mustra bo, bo fayonan serio i duna bo conseho constructivo den un manera amoroso.—Proverbionan 28:23.

Bon amigu íntimo ta entre e tipo di regalonan scars cu por producí un influencia positivo riba bo. Na Echonan capítulo 10, nos ta lesa di un suceso den bida di Cornelio, un oficial di ehército romano, cu a haña informacion di un angel cu su oracionnan a ser scuchá. Den expectativa dje bishita di apostel Pedro, Cornelio “a reuní su famianan i amigunan íntimo huntu.” E amigunan íntimo ei di Cornelio tabata entre e promé gentilnan incircuncidá cu a aceptá e bon nobo i a ser ungí pa spiritu santu, cu e prospecto di reina cu Cristo den Dios su Reino. Esei sí tabata  un bendicion pa Cornelio su amigunan íntimo!—Echonan 10:24, 44.

Kico anto, bo por haci pa haña amigu? Bijbel, cu tin hopi di bisa tocante amistad, ta duna conseho práctico. (Mira cuadro aki bou.)

CAMINDA BO POR HAÑA BERDADERO AMIGU

E mihó caminda cu bo por haña berdadero amigu ta relacioná cu e congregacion cristian. Na promé lugá, bo por probechá dje oportunidad di bira amigu di Jehova, bo Creador i Tata celestial, i di Jesucristo, bo Salbador. Jesus, cu ta invitá bo pa bira su amigu, a bisa: “Ningun hende tin amor mas grandi cu esaki, cu un hende entregá su alma na fabor di su amigunan.” (Juan 15:13, 15) Dor di bira amigu di tantu Jehova como di Jesucristo, bo por ta sigur cu nan lo “ricibí [bo] den e lugánan di habitacion eterno.” Sí, amistad cu Jehova i Jesus ta nificá bida eterno.—Lucas 16:9; Juan 17:3.

Con bo por haña nan amistad caluroso? E rekisitonan pa bira un huésped den Jehova su tent como un di su amigunan ta describí na Salmo 15. Busk’é den bo Bijbel, i lesa e cincu versículonan dje salmo ei. Tambe, Jesucristo a bisa: “Boso ta mi amigunan si boso haci loke mi ta manda boso.”—Juan 15:14.

Sí, dor di studia i aplicá cuidadosamente e guia di e Palabra di Dios, Bijbel, bo ta demostrá  cu bo kier ta un amigu di Jehova i Jesus. Pa logra esaki, bo tin cu asistí tambe regularmente na reunionnan cristian, caminda bo ta haña conocimentu di Jehova Dios. Si bo haci esfuerso pa scucha Jehova fielmente, lo bo hala mas cerca di dje i su Yu.

Na e reunionnan bo por cera conocí tambe cu hende cu ta stima Jehova i ta manifestá e frutanan di spiritu den nan bida, esta amor, goso, pas, gran pacenshi, amabilidad, bondad, fe, suavedad i dominio propio. (Galationan 5:22, 23) Si di berdad bo kier haña amigu i core cu soledad, asistí na e reunionnan cristian tur siman. Ora bo haci esei bo ta pone bo mes n’e lugá i momento apropiado pa cultivá amistad duradero cu Dios su pueblo bendicioná.

AMIGU PA SEMPER

Amistad berdadero ta un regalo maraviyoso di Jehova Dios. Esei ta algu cu ta sali di su personalidad i composicion. Pa motibu di su spiritu amoroso i generoso, el a yena tera cu criatura inteligente cu kende abo por desaroyá amistad. Asociá cu compañeronan cristian. Animá nan. Traha cu nan den e ministerio. Haci oracion cu nan i pa nan regularmente. E ora ei lo bo ta imitando Jehova i su Yu, Jesucristo.

Amistad ta un regalo cu tur hende por duna i ricibí. Den un futuro no muchu leu, lo bo tin e oportunidad di haci bo círculo di amigu mas grandi. Lo bo por bira amigu tantu di e miyones di hende cu ta biba awor, como di esnan di generacionnan pasá cu ta drumí den morto, wardando e resureccion ora “lo no tin morto mas.” (Revelacion 21:4; Juan 5:28, 29) Haci esfuerso awor pa ta amigabel, i cera amistad cu esnan cu ta stima Jehova. Busca amistad cu Jehova Dios i Jesucristo dor di scucha n’e Palabra inspirá di Dios. E ora ei, pa henter eternidad, lo bo no sinti bo nunca mas bo so.

[Kuadro/Plachinan na página 22, 23]

SEIS PASO PA UN AMISTAD DURADERO

1. SER UN AMIGU. Abraham a ser yamá “amigu di Jehova” pa motibu di su fe inkebrantabel. (Santiago 2:23) Pero tabatin un motibu mas. Bijbel ta bisa cu Abraham a demostrá su cariño pa Dios. (2 Crónicanan 20:7) El a tuma e iniciativa i a laga Jehova sa di su sintimentunan. (Génesis 18:​20-33) Sí, tuma iniciativa ta necesario pa duna prueba di bo amistad. Jesus a bisa: “Practicá dunamentu, i hende lo duna na boso.” (Lucas 6:38) Un palabra di animacion of yuda cu algu por ta e simia cu ta crece bira un gran amistad. Escritor americano Ralph Waldo Emerson a bisa un biaha: “E único manera pa bo tin un amigu ta dor di ser un amigu.”

2. TRAHA TEMPU PA CULTIVÁ UN AMISTAD. Mayoria hende ta deseá e beneficionan di amistad. Sin embargo, nan ta muchu ocupá pa invertí e tempu necesario. Romanonan 12:15 i 16 ta animá nos pa compartí e alegria i éxito, e tristesa i decepcion di otro hende. E ta bisa: “Alegrá cu hende cu ta alegrá; yora cu hende cu ta yora. Mustra e mésun disposicion na otronan cu boso ta mustra na boso mes.” Maske Jesucristo tabata un homber ocupá, semper el a saca tempu pa su amigunan. (Marco 6:​31-34) Corda cu amistad, mescos cu un mata cu ta saca flor, mester di awa i cuido p’e florecé​—i esei ta tuma tempu.

3. PRESTA ATENCION ORA OTRONAN TA PAPIA. Hende cu ta bon scuchadó i atento, hopi bes ta nota cu ta mas fácil pa nan cera amistad. Disipel Santiago ta bisa: “Tur hende mester ta lihé pa tende, slow pa papia.” (Santiago 1:19) Ora bo ta combersá cu otronan, mustra interes personal den nan sintimentunan. Animá nan pa papia tocante nan mes. Hiba delantera den mustra onor na nan. (Romanonan 12:10) E ora ei nan lo kier ta huntu cu bo. Di otro banda, si bo ta monopolisá tur combersacion, of constantemente ta pone bo mes den spotlight, lo bo tin dificultad pa haña un hende cu ta cla pa scucha bo of cu ta interesá den bo sintimentu i necesidadnan.

4. PORDONÁ. Un biaha Jesus a bisa Pedro p’e ta cla pa pordoná “te cu setentishete biaha.” (Mateo 18:​21, 22) Un berdadero amigu ta lihé pa pasa por haltu di fayonan chikitu. Pa ilustrá: Algun hende no ta gusta come guyaba dor cu e tin hopi pipita chikitu. Sin embargo, esnan cu ta gusta come e fruta aki no ta wori cu e pipitanan. Berdadero amigunan ta ser stimá pa nan excelente cualidadnan; nan fayonan chikitu ta ser pasá por haltu. Pablo a exhortá nos: “Sigui soportá otro i pordoná otro libremente.” (Colosensenan 3:13) Esnan cu siña pordoná ta mantené nan amigunan.

5. RESPETÁ PRIVACIDAD DI OTRO HENDE. Tur hende mester di un poco privacidad, incluso bo amigunan. Proverbionan 25:17 ta bisa sabiamente: “Haci bo pia scars n’e cas di bo próhimo, p’e no fada di bo i ciertamente odia bo.” Pues, sea razonabel en cuanto e frecuencia i largura di bo bishitanan cerca amigunan. Evitá di ta posesivo, loke por hiba na yalursheid. Sea discreto ora di expresá gustu personal i opinion riba asuntunan. Esaki lo contribuí na un amistad refrescante i agradabel.

6. SEA GENEROSO. Amistad ta ser cultivá mediante generosidad. Apostel Pablo ta consehá pa “ta generoso, cla pa compartí.” (1 Timoteo 6:18) Por ehempel, compartí palabranan animador cu otro hende. (Proverbionan 11:25) Libremente duna encomendacion sincero i papia di cosnan edificante. Ora bo mustra interes genuino den e bienestar di otro hende, bo ta atraé nan na bo. Pensa riba loke abo por haci pa nan en bes di enfocá riba loke nan por haci pa bo.