Informe di Proclamadónan di Reino

Jehova Ta Percurá un Lugá di Descanso pa Su Pueblo

UN LUGÁ cu sombra riba un caminda den ceru ta un bista mashá placentero pa un biahero cansá. Na Népal nan ta yama lugánan di descanso asina cháutara. Un típico cháutara lo por ta banda di un palu di banyan (un tipo di fícus) yen di blachi, un pida sombra pa sinta sosegá. Traha un cháutara ta un acto di bondad, i mayoria dje benefactornan cu ta hacié ta keda anónimo.

Experencianan for di Népal ta mustra con Jehova Dios a bira un Fuente di goso i refrescamentu spiritual pa hopi “biahero” cansá den e sistema di cosnan aki.—Salmo 23:2.

• Lil Kumari ta biba den e bunita stad Pokhara, cu un bista magnífico dje cerunan di Himalaya tapá cu sneu. Pero Lil Kumari tabata preocupá tocante e situacion financiero di su famia, i el a sinti cu e no tabatin masha speransa pa futuro. Ora un Testigo di Jehova a bishit’é, e speransa briyante di Bijbel a emocion’é i el a pidi un studio di Bijbel na cas mesora.

Aunke Lil Kumari a disfrutá dje studio, dor di oposicion fuerte di parti di su famia no tabata fácil pa el a sigui studia. Pero e no a entregá. El a asistí regularmente na reunionnan cristian, i a pone loke el a siña na práctica, foral loke ta toca sumision di esposa. Como resultado, su esposo i su mama a bin realisá cu Lil Kumari su studio di Bijbel tabata trece beneficio pa henter e famia.

Su esposo i vários miembro di su famia ta studia e Palabra di Dios awor. Na un asamblea recien na Pokhara, Lil Kumari a disfrutá dje programa huntu cu 15 miembro di su famia. E ta bisa: “Mi cas a bira un lugá trankil dor cu mi famia ta uní awor den adoracion berdadero, i mi a haña berdadero pas mental.”

• Aunke discriminacion di casta ta ilegal na Népal, ainda e tin un influencia poderoso den bida di hende. P’esei hopi hende ta interesá den loke Bijbel tin di bisa tocante igualdad i imparcialidad. Bida di Surya Maya i su famia a cambia mashá dor cu nan a siña cu “Dios no ta parcial.”—Echonan 10:34.

Surya Maya tabata afligí dor dje inhusticia di discriminacion di casta i e carga di tradicion i custumbernan firmemente ankrá. Como un muher deboto, Surya Maya a pidi su ídolonan yudansa pa hopi aña largu. Pero su oracionnan no tabata ricibí contesta. Un dia ora e tabata sclama pa yudansa, su nieta Babita di seis aña a bini cerca dje anto puntr’é: “Pakico Wela ta yora pidi yudansa dilanti ídolo cu no por haci nada?”

A resultá cu Babita su mama tabata studia Bijbel cu un Testigo di Jehova. Babita a invitá su wela yen di entusiasmo p’e asistí na un reunion cristian. Ora Surya Maya a bai, el a keda sorprendí di mira hende di diferente casta ta disfrutá di otro su compania sin ningun discriminacion. El a pidi un studio di Bijbel mesora. Apesar cu dor di esei su bisiñanan a evitá su compania, e no a desanimá; i su capacidad limitá di lesa i skirbi tampoco no a strob’é di haci progreso spiritual.

Ocho aña a pasa, i seis miembro di su famia, incluso su esposo i tres di su yunan a bira Testigo di Jehova. Awor Surya Maya ta un minister di tempu completo, un pionero regular, cu ta yuda otronan cu goso pa nan kita nan carga pisá, na e berdadero lugá di descanso cu Jehova so por percurá.