Para Completo cu Conviccion Firme

“Semper [e ta] haciendo su esfuerso pa boso den su oracionnan, pa boso finalmente para completo i cu conviccion firme den henter e boluntad di Dios.”—COLOSENSENAN 4:12.

1, 2. (a) Kico hende djafó a nota tocante e cristiannan di promé siglo? (b) Con e buki di Colosensenan ta reflehá interes amoroso?

JESUS su siguidónan tabata profundamente interesá den nan compañeronan di adoracion. Tertuliano (un escritor di siglo 2 i 3 E.C.) a papia dje bondad cu nan tabata mustra na huérfanonan, na hende pober i hende di edad. E evidencianan ei di amor den accion a impresioná hende incrédulo asina tantu cu algun a bisa dje cristiannan: ‘Mira con nan ta stima otro.’

² E buki di Colosensenan ta reflehá e mésun clase di interes amoroso cu apostel Pablo i su compañero Epafras tabatin pa e rumannan na Colósas. Pablo a skirbi nan: Epafras ta “semper haciendo su esfuerso pa boso den su oracionnan, pa boso finalmente para completo i cu conviccion firme den henter e boluntad di Dios.”  Durante aña 2001, Testigonan di Jehova lo tin e palabranan aki di Colosensenan 4:12 como nan texto di aña: “Para completo i cu conviccion firme den henter e boluntad di Dios.”

3. Cua dos cos Epafras a pidi p’e den oracion?

³ Bo por mira cu e oracionnan di Epafras na fabor di su rumannan stimá a trata dos aspecto: (1) pa nan “finalmente para completo” i (2) pa nan para “cu conviccion firme den henter e boluntad di Dios.” A incluí e informacion aki den e Scritura pa nos beneficio. P’esei, puntra bo mes: ‘Kico ami personalmente tin cu haci pa finalmente mi para completo i cu conviccion firme den henter e boluntad di Dios? I segun mi ta haci esei, kico lo ta e efecto?’ Laga nos wak.

Haci Esfuerso pa “Para Completo”

4. E colosensenan mester tabata “completo” den ki sentido?

⁴ Epafras tabata profundamente interesá pa su rumannan spiritual na Colósas “finalmente para completo.” E palabra cu Pablo a usa cu a ser traducí aki como “completo,” por tin e sentido di perfecto, plenamente desaroyá of maduro. (Mateo 19:21; Hebreonan 5:14; Santiago 1:4, 25) Probablemente bo sa cu e echo cu un persona ta un Testigo di Jehova bautisá riba su mes no kier men cu e ta un cristian plenamente desaroyá. Pablo a skirbi e efesionan, cu a biba na west di Colósas, cu e wardadónan i maestronan mester purba yuda “tur logra alcansá unidad den e fe i den e conocimentu exacto dje Yu di Dios, te na un homber maduro, te n’e midí di estatura cu ta pertenecé n’e plenitud di e Cristo.” Den otro cartanan Pablo a urgi cristiannan pa bira “plenamente desaroyá den e facultad di comprendimentu.”—Efesionan 4:8-13; 1 Corintionan 14:20.

5. Con nos por haci biramentu completo un meta principal?

⁵ Si algun cristian na Colósas ainda no tabata plenamente desaroyá of maduro den sentido spiritual, esei mester tabata nan meta. Mescos no mester ta e caso awe? Sea cu nos a bautisá décadanan pasá of recientemente, nos por mira cla cu nos a progresá den nos abilidad di razoná i nos puntonan di bista? Nos ta considerá principionan bíblico promé cu nos tuma decision? Asuntunan relacioná cu Dios i interesnan di congregacion ta hungando un papel mas i mas grandi den nos bida, en bes di ta cosnan secundario? Nos no por ilustrá aki tur e maneranan den cua nos por reflehá tal progreso den direccion di bira completo, pero considerá dos ehempel.

6. Riba ki tereno un hende lo por haci progreso den direccion di bira perfecto manera Jehova?

⁶ Promé ehempel: Suponé cu nos a lanta den un ambiente marcá pa prehuicio of hostilidad contra hende di otro rasa, nacionalidad of region. Awor nos sa cu Dios no ta parcial i nos tampoco no mester ta. (Echonan 10:14, 15, 34, 35) Den nos  congregacion of circuito tin personanan dje otro antecedencia ei, pues nos ta rond di nan. Sin embargo, te con leu nos tin den nos ainda algun sintimentu negativo of sospecho contra hende dje antecedencia ei? Nos ta cla pa rabia, lihé pa pensa algu negativo si un hende dje antecedencia ei cometé un eror of ofendé nos den un cos chikitu? Puntra bo mes: ‘Mi mester haci mas progreso den direccion di tin Dios su punto di bista imparcial?’

7. Bira completo como cristian kisas ta encerá cu nos mester cuminsá mira otronan di ki manera?

⁷ Di dos ehempel: Segun Filipensenan 2:3, nos no mester “haci nada motivá pa gana di pleita of motivá pa egoismo, sino considerá cu humildad di mente cu e otronan ta superior.” Con nos ta progresando den e aspecto aki? Cada persona tin puntonan débil i fuerte. Si ántes nos tabata lihé pa nota e puntonan débil di otro hende, nos a haci progreso i no ta verwagt mas pa nan ta casi “perfecto”? (Santiago 3:2) Awor, mas cu promé, nos por mira—i ta asta busca pa mira—maneranan den cua otronan ta superior? ‘Mi tin cu admití cu e ruman muher aki ta superior cu mi den mustra pacenshi.’ ‘Esun ei ta reflehá un fe mas optimista cu mi.’ ‘Francamente, e ruman homber ei ta un mihó maestro cu mi.’ ‘E ruman muher ei ta superior den controlá su genio.’ Kisas algun na Colósas tabatin cu haci progreso den e aspecto aki. Nos tambe?

8, 9. (a) Den ki sentido Epafras a pidi den oracion p’e colosensenan “para” completo? (b) “Para completo” a implicá kico relacioná cu futuro?

⁸ Epafras a pidi den oracion pa e colosensenan “para completo.” Ta bisto cu Epafras tabata pidi Dios pa te na e grado cu e colosensenan tabata cristiannan completo, maduro i plenamente desaroyá, nan por a “para,” esta, sigui asina.

⁹ Nos no por asumí cu cada persona cu bira un cristian, asta bira unu maduro, lo sigui asina. Jesus a bisa cu un yu angelical di Dios “no a para firme den e berdad.” (Juan 8:44) I Pablo a corda e corintionan cu algun hende di pasado a sirbi Jehova pa un tempu, pero despues a fracasá. El a spierta rumannan ungí pa spiritu: “Laga esun cu ta kere cu e ta pará tene cuidou p’e no cai.” (1 Corintionan 10:12) Esaki ta duna mas forsa na e oracion pa e colosensenan “finalmente para completo.” Una bes nan a bira completo, plenamente desaroyá, nan mester a persistí, no hala atras, cansa of drif bai. (Hebreonan 2:1; 3:12; 6:6; 10:39; 12:25) Asina nan lo ta “completo” den e dia di nan inspeccion i aprobacion final.—2 Corintionan 5:10; 1 Pedro 2:12.

10, 11. (a) Epafras a pone ki ehempel pa nos en cuanto oracion? (b) Di acuerdo cu loke Epafras a haci, kico lo bo kier dicidí di haci?

¹⁰ Ya caba nos a trata e importancia di haci oracion pa otro hende pa nomber, pidiendo Jehova specíficamente pa yuda nan, consolá nan, bendicioná nan i duna nan spiritu santu. Epafras su oracionnan pa e colosensenan tabata dje clase ei. I nos por—de echo nos mester—haña den e palabranan ei un idea balioso di kico nos mester pidi Jehova den oracion pa nos mes. Sin duda nos tin cu pidi Jehova su yudansa pa asina nos individualmente por “finalmente para completo.” Bo ta hacié?

¹¹ Pakico no mencioná bo situacion den oracion? Papia cu Dios tocante e grado di progreso cu bo a haci pa ta “completo,” plenamente desaroyá i maduro. Rogu’é p’e yuda bo reconocé riba ki tereno ainda bo tin cu crece spiritualmente. (Salmo 17:3; 139:23, 24) Sin duda, bo mester tin algun tereno pa traha ariba. Anto, en bes di keda desanimá pa motibu di esaki, suplicá Dios bon cla, specíficamente pa yuda bo progresá. Haci esaki mas cu un biaha. De echo, pakico no dicidí cu e siman cu ta bini aki lo bo haci oracion extenso pa pidi pa bo por “finalmente para completo.” I planea pa haci esei mas biaha segun cu bo ta considerá e texto di aña. Den bo oracionnan, concentrá riba e inclinacion cu kisas bo tin pa hala atras, cansa of drif bai for di Dios su sirbishi i con bo por evitá di haci esei.—Efesionan 6:11, 13, 14, 18.

Pidi den Oracion pa Conviccion Firme

12. Cua ta e motibu principal di con e colosensenan tabatin mester di “conviccion firme”?

¹² Epafras a pidi pa un otro cos mas cu tabata vital pa por a haña e colosensenan pará aceptabel  pa Dios finalmente. E ta mes necesario pa nos. Kico e ta? El a pidi pa nan por a para “cu conviccion firme den henter e boluntad di Dios.” Nan tabata rondoná pa apostasia i filosofianan cu ta corumpí hende, i algun tabatin un parecido engañoso cu adoracion berdadero. Por ehempel, nan tabata bou di preshon pa celebrá dianan special cu yunamentu of cu comementu, manera un tempu tabata necesario den adoracion hudiu. Maestronan falsu a enfocá riba angel, e spiritunan poderoso cu a ser usá pa entregá e Ley di Moises. Imaginá bo bou di e clase di preshon ei! Tabatin un cantidad confuso di ideanan contradictorio.—Galationan 3:19; Colosensenan 2:8, 16-18.

13. Reconociendo ki factor lo por a yuda e colosensenan, i con esei por yuda nos?

¹³ Pablo ta reaccioná dor di enfatisá e papel di Jesucristo. “Ya cu boso a aceptá Cristo Jesus e Señor, sigui cana den union cuné, cu rais den dje i siendo edificá den dje i siendo stabilisá den e fe, net manera boso a ser siñá.” Sí, tabata necesario pa (e colosensenan i nos) tin pleno conviccion relacioná cu e papel di Cristo den e propósito di Dios i den nos bida. Pablo a splica: “Ta den dje tur e plenitud di e cualidad divino ta biba corporalmente. I p’esei boso tin den boso un plenitud pa medio di dje, cu ta cabes di tur gobiernu i autoridad.”—Colosensenan 2:6-10.

14. Di con speransa tabata un cos real pa e cristiannan na Colósas?

¹⁴ E colosensenan tabata cristiannan ungí pa spiritu. Nan tabatin un speransa remarcabel, bida den shelu, i nan tabatin tur motibu pa mantené e speransa ei briyante. (Colosensenan 1:5) Tabata “e boluntad di Dios” pa nan tin un conviccion firme cu nan speransa ta sigur. Cualkier un di nan mester tabatin duda? Absolutamente cu no! Awe mester ta otro pa esnan cu tin e prospecto cu Dios ta duna di bida den un paradijs terenal? Sigur cu no! E speransa válido ei ta claramente parti di “e boluntad di Dios.” Awor considerá e preguntanan aki: Si bo ta haciendo esfuerso pa ta parti dje “multitud grandi” cu lo sobrebibí “e tribulacion grandi,” con real bo speransa ta? (Revelacion 7:9, 14) E ta parti di bo “conviccion firme den henter e boluntad di Dios”?

15. Pablo a describí ki seri di punto cu ta incluí speransa?

¹⁵ Cu “speransa” nos no kier men un deseo vago of un soñamentu lantá. Nos por mira esaki for dje seri di puntonan cu Pablo a presentá mas promé n’e romanonan. Den e seri ei, cada cos mencioná ta conectá cu e siguiente of ta hiba na dje. Paga tinu na unda Pablo ta pone “speransa” den su razonamentu: “Laga nos hubilá miéntras cu nos ta den tribulacion, siendo cu nos sa cu tribulacion ta producí awante; awante, na su turno, un condicion aprobá; e condicion aprobá, na su turno, speransa, i e speransa no ta hiba na desilusion; pasobra e amor di Dios a ser dramá den nos curason mediante e spiritu santu.”—Romanonan 5:3-5.

16. Segun cu bo tabata siña berdadnan bíblico, ki speransa bo a adkerí?

¹⁶ Ora Testigonan di Jehova a compartí e mensahe di Bijbel cu bo pa promé bes, kisas un cierto berdad a capta bo atencion, por ehempel e condicion dje mortonan of e resureccion. Pa hopi hende, e cos nobo principal cu nan a realisá ta cu tin e posibilidad basá riba Bijbel pa biba den un paradijs terenal. Corda tempu bo a tende e siñansa ei pa promé bes. Esta un speransa maraviyoso: lo no tin malesa ni behes mas, bo por sigui biba pa disfrutá dje fruta di bo trabou, i lo tin pas cu bestia! (Eclesiástes 9:5, 10; Isaías 65:17-25; Juan 5:28, 29; Revelacion 21:3, 4) Bo a adkerí un speransa maraviyoso!

17, 18. (a) Con e seri di puntonan cu Pablo a presentá na e romanonan a hiba na speransa? (b) Ki clase di speransa Pablo kier men na Romanonan 5:4 i 5, i abo tin esei?

¹⁷ Cu tempu, probablemente bo a confrontá algun oposicion of persecucion. (Mateo 10:34-39; 24:9) Asta den tempu reciente, nan a plunder cas di Testigonan den vários pais of a forsa nan bira refugiado. Tin cu a ser atacá físicamente, a confiscá nan literatura bíblico of nan tabata obheto di informenan falsu den medionan di comunicacion. Sea cual sea e forma di persecucion cu bo por a confrontá, manera Romanonan 5:3 ta bisa, bo por a hubilá den e tribulacion, i esei a trece  resultado excelente. Asta manera Pablo a skirbi, e tribulacion a producí awante den bo. Anto awante a hiba na un condicion aprobá. Bo tabata sa cu bo ta haciendo lo corecto, e boluntad di Dios, pues bo a sinti bo sigur cu bo tabatin su aprobacion. Usando e palabranan di Pablo, bo a sinti cu bo tabata den “un condicion aprobá.” Pablo a sigui skirbi cu “e condicion aprobá, na su turno, [ta producí] speransa.” Esei por parce un poco straño. Di con Pablo a mencioná “speransa” casi te na final dje seri? Bo no tabatin speransa hopi tempu promé cu esei, for di ora bo a tende e bon nobo pa promé biaha?

¹⁸ Ta bisto cu aki Pablo no ta referí na nos sintimentu inicial di speransa di ricibí bida perfecto. Loke e ta referí na dje ta bai mas ayá cu esei; e ta  mas profundo, mas motivador. Ora nos ta wanta fielmente i pues ta realisá cu nos tin e aprobacion di Dios, esei tin e efecto profundo di aumentá i fortalecé nos speransa inicial. E speransa cu nos tabatin ta bira hopi mas real awor, mas sólido, mas personal. E speransa mas profundo aki ta briya mas cla. E ta penetrá den henter nos ser, den henter nos esencia. “I e speransa no ta hiba na desilusion; pasobra e amor di Dios a ser dramá den nos curason mediante e spiritu santu.”

19. Con bo speransa mester ta parti di bo oracionnan regular?

¹⁹ Epafras su oracion ferviente tabata pa su rumannan na Colósas keda conmoví i convencí di loke tabatin nan dilanti, teniendo “conviccion firme den henter e boluntad di Dios.” Laga nos cada un di igual manera acercá Dios regularmente tocante nos speransa. Den bo oracionnan privá, incluí bo speransa relacioná cu e mundu nobo. Expresá na Jehova cuantu bo ta anhel’é, cu pleno conviccion cu lo e bini. Suplik’é pa yuda bo profundisá i amplia bo conviccion. Mescos cu Epafras a pidi den oracion pa e colosensenan tin “conviccion firme den henter e boluntad di Dios,” abo haci mescos. Hacié cu regularidad.

20. Pakico si un cantidad relativamente chikitu desviá for dje caminda cristian, esaki no mester ta un motibu pa desanimá nos?

²⁰ Bo no mester ser distraí ni desanimá dor dje echo cu no ta tur cristian ta para completo i cu conviccion firme. Algun por fracasá, ser desviá of ta simplemente entregá. Esei a sosodé entre esnan mas cerca di Jesus, su apostelnan. Pero ora Hudas a bira traidor, e otro apostelnan a baha man of a stop? Sigur cu no! Pedro a aplicá Salmo 109:8 pa mustra cu un otro persona lo a tuma e lugá di Hudas. Nan a scoge un remplaso, i Dios su lealnan a sigui padilanti activamente cu nan asignacion di predicá. (Echonan 1:15-26) Nan tabata decididu pa para completo cu conviccion firme.

21, 22. Den ki sentido hende lo ripará cu bo ta para completo cu conviccion firme?

²¹ Bo por ta absolutamente sigur cu lo no keda sin ser ripará cu bo ta para completo i cu conviccion firme den henter e boluntad di Dios. Otronan lo ripará i apreciá esei. Ken?

²² Wel, bo rumannan, cu conocé bo i stima bo, lo ripará. Asta si mayoria no expres’é cu palabra, e efecto lo ta similar na loke nos ta lesa na 1 Tesalonicensenan 1:2-6: “Nos semper ta gradicí Dios ora nos ta haci mencion di boso den nos oracion, pasobra nos ta tene presente tur ora boso fiel obra i boso amoroso labor i boso awante debí na boso speransa den nos Señor Jesucristo dilanti nos Dios i Tata. Pasobra . . . e bon nobo cu nos ta predicá no a resultá di ta entre boso cu papiamentu so, sino tambe cu poder i cu spiritu santu i conviccion fuerte . . . ; i boso a bira imitadó di nos i di Señor.” E cristiannan leal rond di bo lo sinti mescos segun cu nan ta observá cu bo ta “para completo i cu conviccion firme den henter e boluntad di Dios.”—Colosensenan 1:23.

23. Durante e aña binidero, kico mester ta bo determinacion?

²³ Mes sigur tambe bo Tata celestial lo observá i lo keda contentu. Sea sigur di esei. Di con? Pasobra bo ta parando completo i cu conviccion firme “den henter e boluntad di Dios.” Pablo a skirbi cu animacion n’e colosensenan tocante nan canamentu “di un manera digno di Jehova afin di agrad’é plenamente.” (Colosensenan 1:10) Sí, ta posibel pa hende imperfecto agrad’é plenamente. Bo rumannan di Colósas a hacié. Cristiannan rond di bo ta haciend’e awor akí mes. Bo tambe por! Pues, den transcurso dje aña binidero aki, laga bo oracionnan diario i bo accionnan regular duna prueba cu bo ta determiná pa “finalmente para completo i cu conviccion firme den henter e boluntad di Dios.”

Bo Ta Corda?

• Kico “para completo” ta encerá?

• Cua cosnan tocante bo mes bo mester incluí den oracion?

• Manera Romanonan 5:4 i 5 ta duna di comprendé, ki clase di speransa bo kier tin?

• Nos studio a stimulá bo pa bo tin ki meta durante e aña binidero?

[Preguntanan di Estudio]

[Plachi na página 20]

Epafras a pidi den oracion pa su rumannan para completo, cu conviccion firme tocante Cristo i nan speransa

[Plachinan na página 23]

Miyones di otro hende ta compartí bo speransa sigur i conviccion firme