Pregunta di Lector

Te con leu un esposa cristian fiel mester bai contra di un caso di divorcio cu su casá a entamá?

Na inicio di matrimonio humano, Dios a bisa cu un esposo i esposa mester “pega” na otro. (Génesis 2:18-24) Hende a bira imperfecto, i esaki a hiba na problema den hopi matrimonio. Tog Dios ta deseá pa parehanan pega na otro apesar di esei. Apostel Pablo a skirbi: “Mi ta duna instruccion na hende casá, sin embargo no ta ami sino Señor, cu un esposa no mester bai for di su esposo; pero si realmente e bai, lagu’e keda sin casa of, si no, reconciliá cu su esposo; i un esposo no mester bandoná su esposa.”—1 Corintionan 7:10, 11.

E palabranan aki ta reconocé cu tin bes entre hende imperfecto, un partner ta dicidí di laga e otro. Por ehempel, Pablo a bisa cu si un casá bai, tur dos mester “keda sin casa.” Di con? Wel, e casá a bai, pero den bista di Dios nan dos ta keda mará na otro. Pablo por a bisa esaki pasobra Jesus a establecé e norma pa matrimonio cristian: “Ken cu divorciá di su esposa, cu no ta pa motibu di fornicacion [na griego por·neí·a], i ta casa cu un otro ta cometé adulterio.” (Mateo 19:9) Sí, e único base pa divorcio cu bíblicamente ta pone fin na un matrimonio ta “fornicacion,” esta, inmoralidad sexual. Evidentemente, den e caso cu Pablo a referí na dje, niun dje dos partnernan no a cometé inmoralidad. Pues, ora e esposo of e esposa bai laga e otro, den bista di Dios e matrimonio no a terminá.

Despues Pablo a papia di un situacion den cua un cristian berdadero tin un casá incrédulo. Considerá e instruccionnan di Pablo: “Si esun incrédulo procedé di bai, lagu’e bai; un ruman homber of un ruman muher no ta den servidumbre bou di circunstancianan asina, sino Dios a yama boso pa pas.” (1 Corintionan 7:12-16) Kico un esposa fiel lo por haci si su esposo incrédulo bandon’é i asta ta busca manera pa divorciá legalmente di dje?

Kisas e ta preferá p’e esposo keda cerca dje. Por ta e ta stima su esposo ainda, i ta conciente di nan necesidadnan emocional i sexual mutuo, i sa cu e i su yunan menor di edad tin mester di sosten material. Kisas e ta spera tambe cu su esposo, cu tempu, lo bira creyente i ser salbá. Sin embargo, si e homber a tuma pasonan pa pone fin na e matrimonio (riba cierto base no-bíblico), e esposa lo por “lagu’e bai,” manera Pablo a skirbi. E mésun principio lo tabata aplicabel si un esposo creyente a ignorá Dios su punto di bista di matrimonio i a insistí pa bai laga su casá.

Pero den un situacion asina por ta necesario p’e esposa protehá su mes i su yunan. Con asina? Lo e kier keda cu tutela di su yunan stimá p’e por sigui mustra nan amor di mama, duna nan entrenamentu moral i inculcá fe den nan basá riba siñansanan bíblico excelente. (2 Timoteo 3:15) Divorcio por pone su derechonan na peliger. P’esei, lo e por tuma pasonan p’e ser representá apropiadamente dilanti autoridadnan pa asina por protehá su derecho di tin acceso na su yunan i pa ta sigur cu nan ta obligá su esposo pa sostené e famia cu e ta bandonando. Na algun lugá, un esposa cu ta contra di un divorcio por firma documentonan legal cu ta stipulá percuracionnan pa tutela di yu i sosten financiero, sin cu e ta bai di acuerdo cu e divorcio cu su esposo ta buscando. Otro caminda, e palabranan dje documentonan ta indicá cu e ta bai di acuerdo cu e divorcio; pues, si su esposo ta culpabel di adulterio, e echo cu e esposa ta firma e documentonan aki lo nificá cu e ta rechasá su esposo.

Mayoria hende den comunidad i den congregacion lo no ta na altura dje detayenan, manera por ehempel si e divorcio a ser obtené riba base bíblico of no. P’esei, promé cu cosnan yega asina leu, lo ta consehabel p’e ruman muher informá e superintendente presidente i un otro anciano di congregacion (preferiblemente por escrito) dje echonan. Asina nan por tin e datonan ei disponibel den caso cu cualkier pregunta lanta, sea e ora ei of despues.

Laga nos ban bek na Jesus su comentario: “Ken cu divorciá di su esposa, cu no ta pa motibu di fornicacion, i ta casa cu un otro ta cometé adulterio.” Si en berdad un esposo tabata culpabel di inmoralidad  sexual pero kier keda casá cu su esposa, e muher (esun inocente den e ehempel di Jesus) tin cu scoge si e ta pordon’é i sigui compartí cama matrimonial cuné of si e ta rechas’é. Si e esposa ta dispuesto pa pordoná i sigui huntu cu su esposo legal, e no ta haci nada inmoral.—Oséas 1:1-3; 3:1-3.

Den un caso cu un esposo inmoral ta busca divorcio, bo por haña cu tog un esposa lo por ta dispuesto pa pordoná cu e speransa di haña su esposo bek. Ta keda na dje pa dicidí, a base di su concenshi i e situacion, si e ta bai contra e divorcio cu e esposo a entamá. Den algun lugá, un hende muher cu ta contra un divorcio lo por firma documentonan cu ta stipulá tutela dje muchanan i sosten financiero, sin indicá cu e ta bai di acuerdo cu e divorcio; e echo cu e ta firma e papelnan ei, riba su mes no ta un indicacion cu e ta rechasando e homber. Sin embargo, tin otro caminda cu nan lo por pidi un esposa cu ta contra un divorcio p’e firma documentonan cu ta indicá cu e ta di acuerdo cu e divorcio; firmando e papelnan ei ta mustra bon cla cu e ta rechasá su esposo culpabel.

Pa evitá mal comprendimentu, lo ta consehabel pa den e caso aki tambe e esposa duna e ancianonan di congregacion un carta cu ta describí e pasonan cu ta ser tumá i su posicion tras dje pasonan aki. E por declará cu el a bisa su esposo cu e ta dispuesto pa pordon’é i pa keda su casá. Esei lo nificá cu e divorcio ta contra su deseonan; i cu en bes di rechasá su esposo, ainda e ta cla pa pordoná. Pues despues cu el a haci cla cu e tabata dispuesto pa pordoná i keda casá, e echo cu e ta firma documentonan cu djis ta indicá con mester resolvé asuntunan financiero i/of di tutela, lo no indicá cu e ta rechasá su esposo. *

Despues di a establecé cu e ta dispuesto pa pordoná asta despues di divorcio, ni e ni su esposo lo no ta liber pa casa cu un otro persona. Si e, esta, e partner inocente kende su oferta di pordon a ser rechasá, despues dicidí di rechasá su esposo pa motibu di su inmoralidad, nan tur dos lo ta liber e ora ei. Jesus a mustra cu e partner inocente tin derecho di tuma un decision asina.—Mateo 5:32; 19:9; Lucas 16:18.

[Nota]