Con pa Cura e Heridanan di Guera

ABRAHAM tabata den un ehército di gueriya pa 20 aña largu. * Pero el a stop di bringa, i lo no bai guera nunca mas. De echo, awor algun di su enemigunan di ántes ta su mihó amigunan. Kico a pon’é cambia? Bijbel. Bijbel a duna Abraham speransa i perspicacia, cu a yud’é mira asuntunan humano for di Dios su punto di bista. Bijbel a kita su deseo di bringa, i a cuminsá cura e tristesa, pena, odio i amargura cu e tabatin. El a descubrí cu Bijbel ta contené un remedi potente pa curason di hende.

Con Bijbel ta yuda un hende cura heridanan emocional? Bijbel no por a cambia loke a sosodé cu Abraham. Tog, dor di lesa i meditá riba e Palabra di Dios, Abraham su manera di pensa a bin cuadra cu esun dje Creador. Awor e tin un speransa pa futuro, i su prioridadnan ta otro. Cos cu ta importante pa Dios a bira importante p’e. Una bes cu esaki a cuminsá tuma lugá, e heridanan den su curason a cuminsá cura. Ta asina Abraham a ser yudá pa cambia.

Pushá den Guera Civil

Abraham a nace den añanan ’30 na África. Despues dje di dos guera mundial, un nacion bisiña poderoso tabata goberná su pais, pero hopi di Abraham su paisanonan tabata kier independencia. Na 1961 Abraham a djoin un movementu di liberacion cu tabata bringa un guera di gueriya contra di e bisiña poderoso.

“Nan tabata nos enemigu. Nan tabatin planeá di mata nos, pues nos a busca moda di mata nan,” segun Abraham ta splica.

Hopi bes Abraham su bida tabata na peliger. P’esei na 1982, despues di 20 aña di lucha armá, el a hui bai Europa. P’e tempu ei e tabatin casi 50 aña, i como cu e tabatin hopi tempu na su disposicion, el a refleccioná riba su bida. Kico a para di su soñonan? Kico futuro lo trece? Abraham a topa algun Testigo di Jehova i a cuminsá asistí na nan reunionnan. El a corda cu un par di aña promé na África, el a lesa un tratado cu un Testigo a dun’é. E tratado a describí un paradijs binidero riba tera, i un gobiernu celestial cu lo goberná humanidad. E cos ei por tabata berdad?

 Abraham ta bisa: “Mi a siña den Bijbel cu tur e añanan cu mi a pasa ta bringa tabata tempu perdí. E único gobiernu cu lo trata tur hende cu husticia ta e Reino di Dios.”

Poco tempu despues cu Abraham a bautisá como Testigo di Jehova, un homber cu yama Robert a hui for di África bai e stad Europeo caminda Abraham tabata biba. Robert i Abraham a bringa den e mésun guera, pero na e bandanan opuesto. Hopi bes Robert a yega di puntra su mes kico ta e berdadero propósito di bida. E tabata un homber religioso, i dor cu el a lesa algun parti di Bijbel, e tabata sa cu Dios su nomber ta Jehova. Ora e Testigonan di Abraham su congregacion a ofrecé Robert pa nan yud’é comprendé Bijbel mihó, el a aceptá mesora.

Robert ta splica: “For dje promé momento, mi a keda impresioná cu e manera con Testigonan ta usa e nombernan di Jehova i Jesus, reconociendo cu nan ta dos persona distinto. Esei tabata na armonia cu loke mi a lesa caba den Bijbel. Ademas Testigonan ta bisti nèchi i nan ta trata otro hende bon, sin importá nan nacionalidad. Cosnan asina tabatin un impacto profundo riba mi.”

Enemigu Ta Bira Amigu

Robert cu Abraham, cu ántes tabata enemigu di otro, awor ta amigu íntimo. Nan ta sirbi como evangelisadó di tempu completo den e mésun congregacion di Testigonan di Jehova. Abraham ta splica: “Durante e guera, mi a puntra mi mes hopi bes con ta posibel cu hende di paisnan bisiña, i hopi di nan dje mésun religion, por odia otro. Ami cu Robert a pertenecé n’e mésun iglesia, i tog nos a bai guera contra otro. Awor nos tur dos ta Testigo di Jehova, i nos fe a uni nos.”

Robert ta agregá: “Esei ta e diferencia. Awor nos ta pertenecé na un fe cu ta haci nos forma parti di un berdadero hermandad. Nunca nos lo bolbe bai guera.” Bijbel tabatin un influencia poderoso riba curason di e enemigunan aki di ántes. Poco-poco odio i amargura a cambia bira confiansa i amistad.

N’e mésun tempu cu Abraham i Robert tabata den guera, dos otro hóben tabata na bandanan opuesto di un otro conflicto entre dos pais bisiña. Den poco tempu Bijbel a sirbi como un remedi potente pa cura nan curason tambe. Con?

Mata—Anto Muri Como Mártir

Gabriel, cu a crece den un famia religioso, a siña cu su pais natal tabata luchando un guera santu. P’esei, cu 19 aña di edad el a ofrecé su mes como boluntario pa sirbishi militar, i a pidi pa nan mand’é frente di bataya. Durante 13 luna e tabata den e bataya di mas feros, tin bes apénas un kilometer i mei leu for dje enemigu. E ta conta: “Tin un ocasion en particular cu mi a keda corda. Nos comandante a bisa nos cu e enemigu lo atacá e anochi ei. Nos tabata asina nervioso cu nos a keda tira nos  mortiernan henter anochi.” El a considerá hende dje pais bisiña como enemigu cu merecé morto. “Mi intencion tabata di mata mas tantu di nan posibel. Despues, mescos cu hopi di mi amigunan, mi kier a muri como mártir.”

Sin embargo, cu tempu Gabriel a bira desilusioná. El a hui bai den ceru, a sluip crusa frontera pa drenta un pais neutral, anto a biaha bai Europa. E tabata puntra Dios constantemente di con bida ta asina difícil, i si problemanan ta un castigu di Dios. El a haña contacto cu Testigonan di Jehova, cu a mustr’é den Bijbel di con bida ta asina yen di problema awe.—Mateo 24:3-14; 2 Timoteo 3:1-5.

Mas Gabriel a siña for di Bijbel, mas el a realisá cu e ta contené e berdad. “Mi a siña cu nos por biba pa semper den un paradijs riba tera. Pa straño cu por parce, esei ta algu cu mi a anhelá como mucha.” Bijbel a consolá Gabriel i a calma su curason angustiá. Su heridanan emocional di mas profundo a cuminsá cura. Pues, pa tempu cu el a conocé Daniel, un enemigu di ántes, Gabriel no tabata sinti odio mas. Pero kico a pone Daniel bai Europa?

“Si di Berdad Bo Ta Existí, Por Fabor Yuda Mi!”

Daniel a lanta como católico, i na edad di 18 aña nan a yam’é pa sirbishi militar. Nan a mand’é bringa e mésun guera cu Gabriel, pero na e banda opuesto. Daniel tabata core un tanki cerca dje liña di bataya ora un proyectil a dal e. Su amigunan a muri. E a keda seriamente heridá, i nan a tum’é prizonero. El a pasa lunanan largu den hospital i den un campo promé cu nan a deport’é pa un pais neutral. Solitario i sin nada, el a pensa riba suicidio. Daniel a pidi Dios den oracion: “Si di berdad bo ta existí, por fabor yuda mi!” E siguiente dia mes Testigonan di Jehova a bishit’é, i por a contestá hopi di su preguntanan. Finalmente el a biaha bai Europa como refugiado. Atrobe Daniel a asociá cu Testigonan di Jehova i a studia Bijbel. Loke el a siña a calma su ansiedad i su amargura.

Awor Gabriel cu Daniel ta bon amigu, uní den un hermandad spiritual como Testigonan di Jehova bautisá. “Mi amor pa Jehova i mi conocimentu di Bijbel a yuda mi mira cos manera e ta mira nan. Daniel no ta mi enemigu mas. Algun aña pasá lo mi a mat’é gustosamente. Bijbel a siña mi net lo contrario—cu mi mester ta dispuesto di muri p’e,” segun Gabriel.

Daniel ta bisa: “Mi a mira hende di diferente religion i nacionalidad asesiná otro. Anto hende di e mésun religion na e bandanan opuesto dje guera tabata mata otro. Ora mi a mira esaki, mi a sinti cu ta Dios su falta. Awor mi sa cu ta Satanas  ta tras di tur guera. Ami cu Gabriel ta compañero di creencia awor. Nunca nos lo bolbe bringa!”

“E Palabra di Dios Ta Bibu i Ta Ehercé Poder”

Pakico Abraham, Robert, Gabriel i Daniel a cambia di un manera asina drástico? Con nan por a kita odio i tristesa cu tabatin rais asina profundo, for di nan curason?

Cada un dje hombernan aki a lesa e berdad den Bijbel, a meditá riba dje i a siñ’é, i Bijbel ta “bibu i ta ehercé poder.” (Hebreonan 4:12) E Autor di Bijbel ta e Creador di humanidad, cu sa con pa ehercé un influencia positivo riba curason di un hende cu ta dispuesto di scucha i siña. “Tur Scritura ta inspirá di Dios i probechoso pa siña, pa reprendé, pa rectificá cosnan, pa disipliná den husticia.” Una bes cu un lesadó permití Bijbel gui’é, e ta adoptá un conhunto nobo di norma i balor. E ta cuminsá siña con Jehova ta mira asuntunan. E proceso aki ta trece hopi beneficio, incluso e ta cura heridanan di guera.—2 Timoteo 3:16.

E Palabra di Dios ta splica cu ningun grupo nacional, racial ni étnico ta mihó of ménos bon cu un otro. “Dios no ta parcial, sino cu den tur nacion e hende cu ta tem’é i ta obra husticia ta aceptabel p’e.” E lesadó cu aceptá esaki ta ser yudá pa gradualmente superá sintimentunan di odio racial of nacional.—Echonan 10:34, 35.

Profecianan di Bijbel ta indicá cu pronto Dios lo remplasá e sistema actual di gobernacion humano, cu su Reino Mesiánico. Pa medio dje gobiernu aki, Dios “ta haci gueranan stop te n’e extremidad di tera.” Lo e deshací di institucionnan cu ta promové guera i ta pusha hende pa bringa den nan. Lo e resucitá víctimanan di guera i duna nan un chens pa biba riba un tera paradísico. Niun hende lo tin cu hui pa un agresor of opresor.—Salmo 46:9; Daniel 2:44; Echonan 24:15.

Bijbel ta bisa tocante hende cu lo biba den e tempu ei: “Nan sigur lo traha cas i biba den nan; i nan sigur lo planta hofi di wijndruif i come nan fruta. Nan lo no traha cas i otro hende biba aden . . . Nan lo no traha duru por nada, ni nan lo no duna lus pa disturbio.” No tin daño ni herida cu lo no ser curá. Dor di pone fe den un speransa asina, poco-poco tristesa i pena ta disparcé for di un hende su curason.—Isaías 65:21-23.

En berdad Bijbel ta un remedi potente pa curason. Su siñansanan ta curando heridanan di guera caba. Enemigunan di ántes ta uniendo den un hermandad internacional. E proceso di curacion aki lo sigui den Dios su sistema nobo te ora cu no tin mas odio i amargura, tristesa ni pena den curason di hende. E Creador ta primintí cu “e cosnan anterior lo no ser recordá, ni nan lo no subi na curason.”—Isaías 65:17.

[Nota]

[Komentario na página 4]

“Mi a siña den Bijbel cu tur e añanan cu mi a pasa ta bringa tabata tempu perdí”

[Komentario na página 5]

Bijbel por tin un influencia poderoso riba enemigunan di ántes

[Komentario na página 6]

Poco-poco odio i amargura a cambia bira confiansa i amistad

[Komentario na página 6]

Una bes cu un lesadó permití Bijbel gui’é, e ta adoptá un conhunto nobo di norma i balor

[Plachi na página 7]

Enemigunan di ántes ta uniendo awor den un hermandad internacional

[Rekonosementu pa Potrèt na página 4]

Campo di refugiado: UN PHOTO 186811/J. Isaac