“Core di Tal Manera”

IMAGINÁ cu bo ta den un stadion di deporte yen-yen cu hende excitá. E atletanan ta marcha subi tereno. E multitud ta grita ora nan héroenan aparecé. Huesnan ta cla pará pa implementá e reglanan. Segun cu e eventonan ta tuma lugá, gritunan di triunfo ta mescla cu esnan di decepcion. Aplauso durísimo ta saludá esnan victorioso!

Bo ta asistiendo, no na un evento deportivo moderno, sino na unu cu a ser tené un 2.000 aña pasá riba e pida tera smal yamá Ístmo di Corinto. N’e sitio aki, for di siglo 6 P.E.C. te na siglo 4 E.C., a tene e famoso Weganan Ístmico cada dos aña. Pa hopi dia e evento a capta interes di Grecia completo. E weganan tabata mas cu simpel competencia atlético. Atletanan tabata símbolo di con bon prepará un nacion tabata militarmente. E ganadónan, cu hende a idolatrá como héroe, a ricibí corona trahá di blachi di palu. Nan a haña masha hopi regalo mes, i e stad a duna nan un suma grandi na penshon pa resto di nan bida.

Apostel Pablo tabata conocí cu e Weganan Ístmico den becindario di Corinto i el a compará e curso di bida di un cristian cu un competencia di atletismo. Refiriendo na coredó, luchadó i boxdó, el a ilustrá aptamente e recompensanan di un bon entrenamentu, esfuersonan bon dirigí i awante. Ta claro cu e cristiannan na ken el a skirbi e carta, tambe tabata conocé e weganan. Sin duda algun di nan a yega di ta entre e multitud cu tabata grita den stadion. Pues, nan lo a comprendé unbes e ilustracionnan di Pablo. Kico di nos awe? Nos tambe ta den un careda: pa bida eterno. Con nos por beneficiá for di Pablo su referencianan n’e competencianan aki?

‘Compitiendo Segun Regla’

E rekisitonan pa por a drenta e weganan antiguo tabata masha estricto. Un oficial tabata presentá cada atleta n’e observadónan i e tabata grita: ‘Tin un hende cu por acusá e homber aki di cualkier crímen? E ta un ladron of malbado i inmoral den su bida i su maneranan?’ Segun Archaeologia Graeca, “no a permití ningun persona cu tabata un criminal notorio, of cu tabata famia [djacerca] di un hende asina, competí.” I nan tabata castigá violacion di regla dje weganan severamente dor di saca e violadónan for di competencia.

E detaye aki ta yuda nos comprendé e declaracion di Pablo: “Si un hende ta competí asta den e weganan, e no ta ser coroná a ménos cu e competí segun regla.” (2 Timoteo 2:5) Di igual manera, pa core den e careda di bida, nos  tin cu cumpli cu Jehova su rekisitonan, dor di someté nos mes na su normanan moral elevá manera Bijbel ta describí nan. Sin embargo, Bijbel ta advertí nos: “E inclinacion di curason di hende ta malu for di su hubentud.” (Génesis 8:21) Pues, asta despues cu nos a drenta e careda, nos tin cu tene cuidou pa nos sigui competí di acuerdo cu e reglanan pa asina nos sigui disfrutá di Jehova su aprobacion i gana bida eterno.

Loke mas por yuda nos pa actua den e manera aki ta amor pa Dios. (Marco 12:29-31) E amor ei lo pone cu nos kier agradá Jehova i actua di acuerdo cu su boluntad.—1 Juan 5:3.

“Kita Tur Carga”

Den e weganan antiguo, e coredónan no tabata cargá cu paña of ekipo. “N’e caredanan na pia, . . . esnan cu ta competí tabatin custumber di aparecé completamente sunú,” segun e buki The Life of the Greeks and Romans. E echo cu e atletanan no tabata bisti paña a haci nan mas ágil i ábil i nan por a move mas fácil. Nan no a gasta energia debí na carga innecesario. Ta probabel cu Pablo tabatin esaki na mente ora el a skirbi e cristiannan hebreo: “Laga nos tambe kita tur carga . . . , i laga nos core e careda cu ta poné dilanti nos cu awante.”—Hebreonan 12:1.

Ki sorto di carga por stroba nos den e careda pa bida? Unu di nan lo por ta e deseo di acumulá cosnan material innecesario of pa mantené un estilo di bida costoso. Por ta algun hende ta dependé riba rikesa pa haña siguridad of nan ta mir’é como un fuente di felicidad. Tal exceso di “carga” lo por baha velocidad di un coredó asina tantu cu, despues di tempu, Dios realmente lo no ta masha importante p’e. (Lucas 12:16-21) Bida eterno lo por bin parce manera un speransa hopi leu. Kisas un persona ta razoná: ‘E mundu nobo lo bini un dia, pero miéntras tantu, nos por bien probechá bon di loke e mundu aki ta ofrecé.’ (1 Timoteo 6:17-19) Un punto di bista materialista asina por desviá un persona fácilmente for dje careda pa bida of asta strob’é di cuminsá e careda.

Den e Sermon Riba Ceru, Jesus a declará: “Ningun hende por sirbi como esclabo pa dos doño; pasobra sea lo e odia esun i stima e otro, of lo e pega na esun i despreciá e otro. Boso no por sirbi como esclabo pa Dios i pa Rikesa.” Anto despues di conta con Jehova ta percurá p’e necesidadnan di bestia i mata, i bisa cu hende ta bal mas cu esakinan, el a spierta: “P’esei nunca no sea anshá i bisa: ‘Kico nos lo come?’ of: ‘Kico nos lo bebe?’ of: ‘Kico nos lo bisti?’ Pasobra tur e cosnan aki e nacionnan ta sigui tras di nan cu empeño. Pasobra boso Tata celestial sa cu boso tin mester di tur e cosnan aki. Sigui busca, anto, promé e reino i Su husticia, i tur e otro cosnan aki lo ser agregá na boso.”—Mateo 6:24-33.

‘Core cu Awante’

No ta tur e antiguo caredanan na pia tabata di distancia corticu. Un careda cu tabata yama dó·li·khos, tabatin un distancia di mas o ménos 4 kilometer. E tabata un test pisá p’e fortalesa i awante di e atletanan. Segun tradicion, un atleta cu yama Ageas, despues cu el a gana e careda aki na 328 P.E.C., a core henter e caminda pa bai su stad natal Argos, pa anunciá su victoria. E dia ei, el a core aproximadamente 110 kilometer!

E careda cristian tambe ta un careda di distancia largu cu ta test nos awante. Nos mester  wanta den e careda aki te na fin pa nos por gana e aprobacion di Jehova i e premio di bida eterno. Pablo a core e careda di tal manera. Casi na fin di su bida, e por a bisa: “Mi a lucha e lucha excelente, mi a core e careda te na fin, mi a warda e fe. Dje tempu aki padilanti tin reservá pa mi e corona di husticia.” (2 Timoteo 4:7, 8) Mescos cu Pablo nos tin cu core “te na fin.” Si nos awante ta mengua djis pasobra e careda ta un tiki mas largu cu nos a verwagt na principio, nos lo keda sin gana nos recompensa. (Hebreonan 11:6) Mirando cu nos ta asina cerca dje liña final, ki un tragedia esei lo ta!

E Premio

Ganadónan den antiguo competencianan griego di atletismo tabata ricibí krans cu generalmente tabata trahá di blachi di palu i dorná cu flor. Den e Weganan Pítico, e ganadónan tabata ricibí un corona di blachi di laurel. Den e Weganan Olímpico nan tabata haña corona di blachi di olijfi di mondi, miéntras cu den e Weganan Ístmico nan a haña corona trahá di rama di pino. Un erudito di Bijbel ta remarcá: “Pa incitá e fervor dje competidónan, tabata pone e coronanan, e premionan pa victoria, i e ramanan di palma riba un ‘driepoot’ of un mesa den stadion durante e competencia caminda e competidónan por a mira nan bon cla.” Pa e ganadó, bisti e corona tabata un señal di gran onor. Ora el a bolbe cas, el a core triunfalmente drenta e stad riba garoshi.

Cu esaki na mente, Pablo a puntra su lectornan di Corinto: “Boso no sa cu tur coredó den un careda ta core, pero cu ta un so ta ricibí e premio? Core di tal manera pa boso por alcans’é. . . . Awor nan, naturalmente, ta hacié pa nan obtené un corona coruptibel, pero nos unu incoruptibel.” (1 Corintionan 9:24, 25; 1 Pedro 1:3, 4) Ki un contraste! Distinto for di coronanan cu ta caba na nada den weganan di antigwedad, e premio cu ta spera esnan cu core e careda pa bida te na fin lo no perecé nunca.

Relacioná cu e corona mas excelente aki, apostel Pedro a skirbi: “Ora e wardador principal a ser manifestá, boso lo ricibí e corona di gloria cu no ta marchitá.” (1 Pedro 5:4) Cualkier premio cu e mundu aki ta ofrecé por ta compará cu e premio di bida incoruptibel den e gloria celestial huntu cu Cristo?

Awendia, e gran mayoria di coredónan cristian no ta ungí dor di Dios pa ta su yunan celestial i nan no tin e speransa celestial. Nan no ta coriendo p’e premio di inmortalidad. Sin embargo, pa nan tambe Dios tin un premio sin igual. Esei ta bida eterno den perfeccion riba un tera paradísico bou dje Reino celestial. Sea cual sea e premio cu e coredó cristian ta haci esfuerso pa logra, e mester core cu mas determinacion i vigor cu cualkier coredó den un competencia di atletismo. Di con? Pasobra e premio nunca lo marchitá: “Esaki ta e cos primintí cu e mes a primintí na nos, e bida eterno.”—1 Juan 2:25.

Cu un premio incomparabel asina su dilanti, con e coredó cristian mester mira e tentacionnan di e mundu aki? E mester tin e punto di bista di Pablo, kende a bisa: “Ami en berdad ta considerá tambe cu tur cos ta pérdida pa causa dje balor sobresaliente dje conocimentu di Cristo Jesus mi Señor. Pa su motibu mi a sufri pérdida di tur cos i ta considerá nan como un monton di basura.” Na armonia cu esaki, Pablo sí a core duru! “Rumannan, mi no ta considerá cu mi a haña gara di dje ainda; pero tin un solo cos tocante dje: Lubidando loke ta patras i forsando  padilanti pa loke ta mas ayá, mi ta sigui den direccion dje meta p’e premio.” (Filipensenan 3:8, 13, 14) Pablo a core cu su bista firmemente clabá riba e premio. Asina nos mester core.

Nos Mihó Ehempel

Den e weganan di antigwedad, e campionnan a disfrutá di admiracion amplio. Poëtanan a skirbi di nan, i escultornan a traha estatua di nan. Historiadó Věra Olivová ta bisa cu nan “tabata landa den gloria i a disfrutá di inmenso popularidad.” Tambe nan a sirbi como modelo ehemplar pa un generacion mas hóben di campion.

Ken ta e “campion” cu ta pone e mihó ehempel pa cristiannan? Pablo ta contestá: “Laga nos core e careda cu ta poné dilanti nos cu awante, miéntras nos ta mira atentamente n’e Agente Principal i Perfeccionador di nos fe, Jesus. P’e goso cu a ser poné su dilanti el a wanta un staca di tormento, despreciando bergwensa, i a sinta na man drechi dje trono di Dios.” (Hebreonan 12:1, 2) Sí, pa nos ta victorioso den nos careda pa bida eterno, nos mester mira atentamente na nos Ehempel, Jesucristo. Nos por haci esaki dor di lesa riba un base regular, e relatonan di Evangelio i meditá riba maneranan cu nos por imitá Jesus. Un estudio asina lo yuda nos comprendé mas plenamente cu Jesucristo a obedecé Dios i cu el a duna prueba dje calidad di su fe mediante su awante. Como recompensa pa su awante, el a ricibí e aprobacion di Jehova Dios huntu cu hopi privilegio maraviyoso.—Filipensenan 2:9-11.

Claro cu e cualidad mas sobresaliente di Jesus ta su amor. “Ningun hende tin amor mas grandi cu esaki, cu un hende entregá su alma na fabor di su amigunan.” (Juan 15:13) El a duna un nificacion mas profundo n’e palabra “amor,” dor di bisa nos pa stima asta nos enemigunan. (Mateo 5:43-48) Dor cu Jesus a stima su Tata celestial, e tabatin goso den haci boluntad di su Tata. (Salmo 40:9, 10; Proverbionan 27:11) E echo cu nos ta mira riba Jesus como nos Ehempel i como esun cu ta fiha e ritmo pa nos core den e careda agotador di bida, tambe lo motivá nos pa stima Dios i nos próhimo, i pa haña berdadero goso den nos sirbishi sagrado. (Mateo 22:37-39; Juan 13:34; 1 Pedro 2:21) Tene na mente cu Jesus no ta pidi algu imposibel. E ta sigurá nos: “Mi ta di genio suave i humilde di curason, i boso lo haña refrescamentu pa boso alma. Pasobra mi yugo ta suave i mi carga ta leve.”—Mateo 11:28-30.

Mescos cu Jesus, nos tin cu keda cu nos bista clabá riba e premio cu ta reservá pa tur hende cu wanta te na fin. (Mateo 24:13) Si nos competí segun regla, si nos kita tur carga i si nos core cu awante, nos por ta sigur cu nos lo sali victorioso. E meta na bista ta motivá nos pa sigui padilanti! E ta renobá nos forsa debí n’e goso cu e ta inculcá den nos, un goso cu ta haci e caminda nos dilanti mas fácil pa core riba dje.

[Plachi na página 29]

E careda cristian ta un careda di distancia largu—e ta exigí awante

[Plachi na página 30]

Distinto dje atletanan cu a ricibí un corona, cristiannan por mira padilanti na un premio cu lo no caba na nada

[Plachi na página 31]

E premio ta pa tur hende cu wanta te na fin

[Rekonosementu pa Potrèt na página 28]

Copyright British Museum