E Heridanan di Guera

“DEN guera no tin ganadó.” Esei ta loke un ex-soldá cu a bringá den Segundo Guera Mundial a remarcá. “Ta perdedó so tin.” Hopi hende lo bai di acuerdo cuné. Guera tin un costo horibel; tantu e vencedónan como esnan vencí ta paga un prijs teribel. Asta despues cu un conflicto armá a stop, miyones di hende ta sigui sufri dje heridanan teribel di guera.

Ki herida? Guera por caba cu gran parti di un poblacion, i laga un cantidad di huérfano i biuda atras. Hopi sobrebibiente ta keda cu herida físico teribel, ademas di sicatrisnan sicológico. Miyones di hende por keda sin pariba ni pabou, of ser forsá pa bira refugiado. Nos por imaginá nos e odio i pena cu lo mester ta keda atras den curason di esnan cu sobrebibí conflictonan asina?

Herida Infectá

E heridanan cu guera ta habri den curason di hende ta keda molestiá nan hopi tempu despues cu a logra un tregua, zonido di scopet a para i soldánan a bai cas. E siguiente generacionnan por sinti un rabia profundo pa otro. Asina, e heridanan di un guera por ta e rais di esun siguiente.

Por ehempel, e Tratado di Versailles firmá na 1919 pa trece un fin oficial na Promé Guera Mundial, a dicta condicionnan riba Alemania cu e ciudadanonan a considerá pisá i vengativo. Segun The Encyclopædia Britannica, e términonan dje tratado a “causa rencor cerca e alemannan, i a yuda stimulá nan pa busca vengansa.” Algun aña despues, “rencor contra e tratado di pas a duna Hitler un punto di salida” i tabata un dje factornan cu a hiba na Segundo Guera Mundial.

Segundo Guera Mundial a cuminsá na Polonia i a plama pa incluí e paísnan di Balkan. E heridanan cu gruponan étnico a causa otro den añanan ’40 a yuda prepará caminda p’e guera di Balkan den añanan ’90. “E círculo vicioso di odio i vengansa a para bira un spiral cu ta yega te den nos tempu actual,” segun e korant aleman Die Zeit.

Pa hende por biba na pas, definitivamente mester cura e heridanan di guera. Con por logra esaki? Kico por haci pa kita e odio i e pena ei? Ken por cura e heridanan di guera?

 [Rekonosementu pa Potrèt na página 2]

PORTADA: Fatmir Boshnjaku

[Rekonosementu pa Potrèt na página 3]

U.S. Coast Guard photo; UN PHOTO 158297/J. Isaac