Pas p’e Milenio Nobo?

DIA 14 di september 1999 a inaugurá e Aña Internacional pa Cultura di Pas na Paris i New York City. Asamblea General di Nacionnan Uní a proclamá esaki pa aña 2000. Federico Mayor, ex-director general di UNESCO, a haci un apelacion serio “pa crea un movementu mundial na fabor di un cultura pa pas i di no-violencia.”

UNESCO tin un dicho cu ta bisa: “Ya cu guera ta cuminsá den mente di hende, ta den mente di hende mester construí e defensanan pa pas.” Na armonia cu esaki, e organisacion tin plan pa promové un cultura pa pas mediante “educacion, diálogo i cooperacion.” Sr. Mayor a remarcá cu no ta suficiente pa ta “pacífico, ni sikiera pa ta pacifista, sino cu hende mester ta hacidó di pas.”

Ta di lamentá cu aña 2000 tabata leu di ta un aña pacífico. Historia moderno, incluso e sucesonan den aña 2000, a enfatisá cu hende no tin e abilidad pa prevení guera i violencia aunke nan ta haci esfuerso sincero pa logra lo contrario.

Sin embargo, ta bon pa tuma nota cu en berdad pas ta conectá cu educacion. Un 2.700 aña pasá, profeta Isaías a predicí: “Tur bo yunan lo ta personanan siñá pa Jehova, i e pas di bo yunan lo ta abundante.” (Isaías 54:13) E mésun profeta a premirá cu lo bin un tempu durante cua hende di tur nacion lo basha bai n’e adoracion puru di Jehova Dios pa siña di Su camindanan. Cu ki resultado? “Nan lo tin cu bati nan spada na ploeg i nan lansa na skèr di corta mata. Nacion lo no hisa spada contra nacion, ni nan lo no siña di guera mas.” (Isaías 2:2-4) Na armonia cu e profecia ei, Testigonan di Jehova ta participá den un trabou di educacion mundial cu ya caba a yuda miyones di hende vence odio nacional i racial cu ta na rais di mayoria guera.

Bou dje Reino di Dios cu lo trece pas i siguridad duradero riba tera, finalmente lo no tin guera mas. (Salmo 72:7; Daniel 2:44) E ora ei e palabranan dje salmista lo cumpli: “Contemplá e actividadnan di Jehova, con el a establecé sucesonan asombroso riba tera. E ta haci gueranan stop te n’e extremidad dje tera.”—Salmo 46:8, 9.