Sea Edificá dor di Amor

“Bo tin cu stima Jehova bo Dios cu henter bo curason i cu henter bo alma i cu henter bo mente.”—MATEO 22:37.

1. (a) Kico ta algun cos cu un cristian ta cultivá? (b) Cua ta e cualidad cristian di mas importante, i di con?

UN CRISTIAN ta cultivá vários cos pa e por ta un minister eficas. E buki di Proverbionan ta resaltá e balor di conocimentu, comprendimentu i sabiduria. (Proverbionan 2:1-10) Apostel Pablo a trata e necesidad di fe sólido i speransa firme. (Romanonan 1:16, 17; Colosensenan 1:5; Hebreonan 10:39) Awante i dominio propio tambe ta vital. (Echonan 24:25; Hebreonan 10:36) Sin embargo, tin un elemento cu, si e ta falta, ta baha balor di tur e otro cualidadnan, i por asta haci nan completamente sin balor. E elemento ei ta amor.—1 Corintionan 13:1-3, 13.

2. Di ki manera Jesus a mustra con importante amor ta, i ki preguntanan esaki ta lanta?

² Jesus a mustra con importante amor ta, ora el a bisa: “Na esaki tur lo sa cu boso ta mi disipelnan, si boso tin amor entre boso.” (Juan 13:35) Ya cu amor ta e rasgo cu ta identificá un hende como un cristian berdadero, nos tin cu haci preguntanan manera: Kico ta amor? Pakico ta asina importante cu Jesus a bisa cu amor, mas cu tur cos, ta caracterisá su disipelnan? Con nos por cultivá amor? Na ken nos amor mester ta dirigí? Laga nos considerá e preguntanan aki.

Kico Ta Amor?

3. Con por describí amor, i di con e ta enbolbé tantu bo mente como bo curason?

³ Un descripcion di amor ta ‘un sintimentu di apego of afecto profundo, sinti un cariño tierno pa un otro persona of gust’é.’ E ta un cualidad cu ta motivá hende pa traha na fabor di otronan, tin bes a costo di un gran sacrificio personal. Amor manera Bijbel ta describié, tin di haber cu tantu bo mente como bo curason. Bo mente of intelecto ta hunga un rol, dor cu un hende cu ta stima ta haci esaki concientemente, reconociendo cu tantu e como otro hende cu e ta stima tin debilidad, i no cualidadnan bunita so. Ademas, bo intelecto ta enbolbí dor cu tin hende cu un cristian ta stima—tin bes kisas asta contra su inclinacion natural—dor cu el a lesa Bijbel i sa cu Dios kier p’e stima nan. (Mateo 5:44; 1 Corintionan 16:14) Sin embargo, ta di bo curason amor ta bini básicamente. Nunca amor berdadero dje tipo cu Bijbel ta revelá na nos no tin di haber cu djis bo mente so. E ta implicá sinceridad profundo i un compromiso emocional completo.—1 Pedro 1:22.

4. Di ki manera amor ta un laso poderoso?

⁴ Rara bes un hende di curason egoista por tin un relacion cu ta ègt basá riba amor, pasobra un hende cu ta stima ta dispuesto pa duna prioridad na interes di un otro persona. (Filipensenan 2:2-4) E palabranan di Jesus, “tin mas felicidad den duna cu tin den ricibí,” ta berdad specialmente ora cu bo ta duna como un acto di amor. (Echonan 20:35) Amor ta un  laso poderoso. (Colosensenan 3:14) Hopi bes e ta encerá amistad, pero e laso di amor ta mas fuerte cu di amistad. Tin bes e relacion romántico entre un esposo i su casá ta ser yamá amor; i sin embargo e amor cu Bijbel ta animá nos pa cultivá ta mas duradero cu atraccion físico. Si un pareha ta stima otro di berdad, nan ta keda huntu asta si un relacion físico no ta posibel mas dor di malesa of edad avansá, of dor cu un di nan ta incapacitá.

Amor—Un Cualidad Esencial

5. Di con amor ta un cualidad esencial pa un cristian?

⁵ Di con amor ta un cualidad esencial pa un cristian? Di promé, dor cu Jesus a manda su siguidónan pa nan stima otro. El a bisa: “Boso ta mi amigunan si boso haci loke mi ta manda boso. E cosnan aki mi ta manda boso, pa boso stima otro.” (Juan 15:14, 17) Di dos, dor cu Jehova ta e personificacion di amor, i como su adoradónan nos mester imit’é. (Efesionan 5:1; 1 Juan 4:16) Bijbel ta bisa cu gana conocimentu di Jehova i Jesus ta nificá bida eterno. Con nos por bisa cu nos conocé Dios si nos no ta purba ta manera e? Apostel Juan a razoná: “Esun cu no ta stima no a yega na conocé Dios, pasobra Dios ta amor.”—1 Juan 4:8.

6. Con amor por balansá diferente aspecto di nos bida?

⁶ Tin un di tres motibu pakico amor ta importante: E ta yuda nos balansá diferente aspecto di nos bida i ta duna nos e motivacion apropiado pa loke nos ta haci. Por ehempel, ta vital pa bo keda gana conocimentu continuamente di e Palabra di Dios. Tal conocimentu ta manera cuminda pa un cristian. E ta yud’é crece na madures i actua na armonia cu Dios su boluntad. (Salmo 119:105; Mateo 4:4; 2 Timoteo 3:15, 16) Sin embargo, Pablo a spierta: “Conocimentu ta hincha, pero amor ta edificá.” (1 Corintionan 8:1) No, no tin nada malu cu conocimentu exacto. E problema ta sinta cerca nos; nos tin tendencia pecaminoso. (Génesis 8:21) Si nos ta falta e influencia di amor pa pone un balansa, conocimentu lo por pone un hende hincha cu orguyo, pensa cu e ta mihó cu otronan. Esei lo no sosodé si su motivacion básico ta amor. “Amor . . . no ta broma, no ta hincha cu orguyo.” (1 Corintionan 13:4) Un cristian cu ta motivá dor di amor no ta bira orguyoso, maske e adkerí un conocimentu profundo. Amor ta ten’é humilde i ta previnié di kier traha un nomber pa su mes.—Salmo 138:6; Santiago 4:6.

7, 8. Con amor ta yuda nos enfocá riba e cosnan mas importante?

⁷ Pablo a skirbi e filipensenan: “Esaki ta loke mi ta sigui pidi den oracion, pa boso amor abundá mas i mas ainda cu conocimentu exacto i pleno dicernimentu; pa boso por haci sigur dje cosnan mas importante.” (Filipensenan 1:9, 10) Amor cristian lo yuda nos sigui e animacion aki pa haci sigur dje cosnan mas importante. Como ehempel, considerá e palabranan aki di Pablo na Timoteo: “Si un homber ta percurando pa alcansá un puesto di superintendente, e ta deseoso di un trabou excelente.” (1 Timoteo 3:1) Durante aña di sirbishi 2000, e cantidad di congregacion rond mundu a aumentá cu 1.502, formando un total nobo di 91.487. Pues, tin un gran necesidad pa mas anciano, i esnan cu ta purba alcansá tal privilegio ta di elogiá.

⁸ Sin embargo, si esnan cu ta purba alcansá privilegionan di superintendencia tene na mente kico ta e propósito di un privilegio asina, nan lo keda bon balansá. E cos importante no ta djis pa bo tin mas autoridad of mas prominencia. Ancianonan cu ta agradá Jehova ta ser motivá dor di amor p’e i pa nan rumannan. Nan no ta busca prominencia ni influencia. Despues cu apostel Pedro a consehá ancianonan di congregacion pa nan keda cu un bon actitud, el a enfatisá e necesidad pa “humildad di mente.” El a consehá tur esnan den e congregacion: “Humiyá boso mes . . . bou dje man poderoso di Dios.” (1 Pedro 5:1-6) Ta bon pa ken cu ta buscando privilegio considerá ehempel di tur e ancianonan rond mundu cu ta trahadó, humilde, i como tal, un bendicion pa nan congregacion.—Hebreonan 13:7.

 Bon Motivacion Ta Yuda Nos Keda Wanta

9. Pakico cristiannan ta tene Jehova su bendicionnan primintí na mente?

⁹ E importancia di ser motivá dor di amor ta keda bisto den un otro manera. Bijbel ta primintí bendicionnan grandi awor, i bendicionnan inimaginablemente maraviyoso den futuro, na esnan cu ta ehercé debocion na Dios motivá dor di amor. (1 Timoteo 4:8) Si un cristian ta kere firmemente den e promesanan aki, i ta convencí cu Jehova “ta bira e recompensador di esnan cu ta busk’é cu empeño,” esaki lo yud’é para firme den fe. (Hebreonan 11:6) Mayoria di nos ta anhelá e cumplimentu di Dios su promesanan i ta sinti mescos cu apostel Juan, cu a bisa: “Amen! Bin, Señor Jesus.” (Revelacion 22:20) Sí, meditá riba e bendicionnan cu ta warda nos si nos ta fiel, ta fortalecé nos pa keda wanta mescos cu Jesus a ser yudá pa wanta dor di tene na mente “e goso cu a ser poné su dilanti.”—Hebreonan 12:1, 2.

10, 11. Di ki manera ser motivá dor di amor ta yuda nos wanta?

¹⁰ Pero kico si nos deseo pa biba den e mundu nobo ta nos único motivacion pa sirbi Jehova? E ora ei ta fácil pa nos bira impaciente of disgustá ora situacion bira difícil, of ora cierto cos no tuma lugá manera nos ta spera, of ora nos ta spera. Nos por ta core peliger serio di drif bai. (Hebreonan 2:1; 3:12) Pablo a papia di Démas, un compañero di dje di ántes cu a bandon’é. Di con el a bandon’é? Dor cu “el a stima e sistema actual di cosnan.” (2 Timoteo 4:10) Ken cu sirbi pa motibunan puramente egoista ta core peliger di haci mescos cu Démas. E oportunidadnan a corto plaso cu mundu ta ofrecé por atraé nan, i nan por bira indispuesto pa haci sacrificio awor sperando riba e bendicionnan cu ta na caminda.

¹¹ Maske ta apropiado i natural pa nos tin un deseo di ricibí bendicionnan futuro, i e alivio cu nos ta spera for di nos pruebanan, amor ta edificá nos aprecio pa loke mester ta na promé lugá den nos bida. Ta e boluntad di Jehova ta e cos importante, no esun di nos. (Lucas 22:41, 42) Sí, amor ta edificá nos. E ta pone cu nos ta keda trankil segun cu nos ta spera cu pacenshi riba nos Dios, satisfecho cu e bendicionnan cu e duna nos, i cu confiansa cu na su debido tempu nos lo ricibí tur loke el a primintí, i asta mas. (Salmo 145:16; 2 Corintionan 12:8, 9) Entre tantu, amor ta yuda nos keda sirbi di manera inegoista, pasobra “amor . . . no ta busca su mes interes.”—1 Corintionan 13:4, 5.

Ken Cristiannan Mester Stima?

12. Segun Jesus, ken nos mester stima?

¹² Jesus a duna un regla general tocante ken nos mester stima ora el a cita dos declaracion dje Ley di Moises. El a bisa: “Bo tin cu stima  Jehova bo Dios cu henter bo curason i cu henter bo alma i cu henter bo mente,” i: “Bo tin cu stima bo próhimo mescos cu bo mes.”—Mateo 22:37-39.

13. Con nos por siña stima Jehova maske nos no por mir’é?

¹³ Di Jesus su palabranan ta bisto cu na promé lugá nos mester stima Jehova. Pero nos no ta nace cu un amor plenamente desaroyá pa Jehova. Esei ta algu cu nos mester cultivá. Ora cu nos a tende di Dios pa promé bes, loke nos a tende a atraé nos na dje. Tiki-tiki nos a siña con el a prepará tera pa humanidad. (Génesis 2:5-23) Nos a siña con el a trata cu humanidad, con e no a bandoná nos ora cu picá a invadí famia humano pa promé bes, sino a tuma paso pa rescatá nos. (Génesis 3:1-5, 15) El a trata bondadosamente cu esnan cu tabata fiel, i cu tempu el a percurá su Yu unigénito pa pordon di nos picánan. (Juan 3:16, 36) Nos aprecio pa Jehova a crece segun cu nos conocimentu di dje a aumentá. (Isaías 25:1) Rey David a bisa cu el a stima Jehova pa motibu di Su cuido amoroso. (Salmo 116:1-9) Awe, Jehova ta cuida nos, guia nos, fortalecé nos i animá nos. Mas nos siña di dje, mas profundo nos amor p’e ta bira.—Salmo 31:23; Sofonías 3:17; Romanonan 8:28.

Con Nos Por Demostrá Nos Amor?

14. Con nos por mustra cu nos amor pa Dios ta berdadero?

¹⁴ Claro cu hopi hende rond mundu ta bisa cu nan ta stima Dios, pero nan forma di actua ta contradicí loke nan ta pretendé. Con nos por sa cu nos ta stima Jehova di berdad? Nos por papia cuné den oracion i bis’é con nos ta sinti. Tambe nos por actua den un manera cu ta demostrá nos amor. Apostel Juan a bisa: “Ken cu ta warda [Dios] su palabra, berdaderamente den e persona aki e amor di Dios a ser hací perfecto. Den esaki nos tin e conocimentu di cu nos ta den union cuné.” (1 Juan 2:5; 5:3) Entre otro, e Palabra di Dios ta manda nos asociá cu otro i hiba un bida limpi i moral. Nos ta evitá hipocresia, nos ta papia e berdad, i ta tene nos pensamentu limpi. (2 Corintionan 7:1; Efesionan 4:15; 1 Timoteo 1:5; Hebreonan 10:23-25) Nos ta mustra amor dor di duna yudansa material na esnan den necesidad. (1 Juan 3:17, 18) I nos no ta keda sin conta otro hende tocante Jehova. Esei ta incluí nos participacion den e obra mundial di predicá e bon nobo dje Reino. (Mateo 24:14; Romanonan 10:10) Obedecé e Palabra di Dios den cosnan asina ta duna evidencia cu nos amor pa Jehova ta berdadero.

15, 16. Con amor pa Jehova a influenciá bida di hopi hende aña pasá?

¹⁵ Amor pa Jehova ta yuda hende tuma bon decision. Aña pasá, e amor ei a motivá 288.907 persona pa dedicá nan bida na dje i simbolisá tal decision mediante bautismo bou di awa. (Mateo 28:19, 20) Nan dedicacion tabata significativo. El a marca un cambio den nan bida. Gazmend por ehempel, tabata un dje streanan top di basketball na Albania. E cu su casá a studia Bijbel pa algun aña, i apesar di oposicion nan a cualificá pa bira publicadó di Reino. Aña pasá Gazmend a bautisá como un di e 366 personanan cu a bautisá na Albania durante e aña di sirbishi 2000. Un korant a publicá un artículo tocante dje i a bisa: “Su bida tin un  propósito, i dor di esei e cu su famia ta disfrutando di e dianan di mas felis di nan bida. P’e, ya no ta importante mas pa mira cuantu e por logra saca for di bida, sino mas bien, cuantu e por duna pa yuda otro hende.”

¹⁶ Di manera similar, un ruman muher recien bautisá cu ta traha pa un compania di petroli na Guam a ricibí un oferta tentador. Despues cu el a keda subi di puesto pa vários aña, finalmente nan a ofrec’é e oportunidad pa bira e promé muher vicepresidente den historia dje compania. Pero awor el a dedicá su bida na Jehova. Pues, despues di trata e asuntu cu su casá, e ruman muher nobo aki a nenga e oferta i na lugá di esei a regla p’e traha part-time, pa e por a avansá den direccion di traha como minister di tempu completo, un pionero. Amor pa Jehova a hacié deseá di sirbié como pionero, mas bien cu core tras dje interesnan financiero dje mundu aki. De echo, tal amor a motivá 805.205 ruman rond mundu pa participá den diferente rasgo dje trabou di pionero durante e aña di sirbishi 2000. Esta un expresion di amor i fe e pioneronan ei a haci!

Motivá pa Stima Jesus

17. Ki ehempel excelente nos ta mira den e caso di Jesus?

¹⁷ Jesus ta un ehempel excelente di un hende motivá dor di amor. Den su existencia prehumano, el a stima su Tata i a stima humanidad. Como e personificacion di sabiduria, el a bisa: “Mi a bira manera un obrero maestro banda di [Jehova], i mi a yega di ta esun pa ken e tabatin cariño special dia tras dia, i mi tabata alegre dilanti dje tur ora, alegre tocante e tereno productivo di su tera, i e cosnan cu ami tabatin cariño p’e tabata cu e yunan di hende.” (Proverbionan 8:30, 31) Jesus su amor a motiv’é pa entregá su bibá den shelu i nace como un baby indefenso. El a trata hende mansu i humilde cu pacenshi i bondad, i a sufri na man di enemigunan di Jehova. Finalmente, el a muri pa henter humanidad riba un staca di tormento. (Juan 3:35; 14:30, 31; 15:12, 13; Filipensenan 2:5-11) Esta un ehempel excelente di motivacion corecto!

18. (a) Con nos ta cultivá amor pa Jesus? (b) Di ki manera nos ta demostrá cu nos ta stima Jesus?

¹⁸ Ora hende cu tin un condicion di curason corecto lesa e relatonan di Jesus su bida den e  Evangelionan i nan meditá riba cuantu bendicion su curso di bida fiel a haci posibel pa nan, esaki ta haci un amor profundo p’e crece den nan. Awe nos ta manera esnan cu Pedro a dirigí su mes na dje ora el a bisa: “Aunke boso no a mira [Jesus] nunca, boso ta stim’é.” (1 Pedro 1:8) Nos ta demostrá nos amor ora nos ehercé fe den dje i imitá su bida di sacrificio propio. (1 Corintionan 11:1; 1 Tesalonicensenan 1:6; 1 Pedro 2:21-25) Dia 19 di april 2000, un total di 14.872.086 persona a ser recordá di nos motibunan pa stima Jesus ora nan a asistí na e Conmemoracion anual di su morto. Esta un gran cantidad! I esta fortalecedor ta pa sa cu tin tantu hende interesá den salbacion pa medio di Jesus su sacrificio! Di berdad e amor di Jehova i di Jesus pa nos, i nos amor pa nan, ta edificá nos.

19. Ki preguntanan tocante amor nos lo trata den e siguiente artículo?

¹⁹ Jesus a bisa cu nos mester stima Jehova cu henter nos curason, alma, mente i forsa. Pero tambe el a bisa cu nos mester stima nos próhimo mescos cu nos mes. (Marco 12:29-31) Ken ta incluí den esei? I con amor pa próhimo ta yuda nos mantené un bon balansa i un motivacion corecto? Nos lo trata e preguntanan aki den e siguiente artículo.

Bo Ta Corda?

• Di con amor ta un cualidad vital?

• Con nos por siña stima Jehova?

• Con nos conducta ta demostrá cu nos ta stima Jehova?

• Con nos ta demostrá nos amor pa Jesus?

[Preguntanan di Estudio]

[Plachinan na página 10, 11]

Amor ta yuda nos spera cu pacenshi riba alivio

[Plachi na página 12]

Jesus su gran sacrificio ta motivá nos pa stim’é