Historia di Bida

Sirbiendo di Henter Alma Apesar di Prueba

SEGUN E RELATO DI RODOLFO LOZANO

Mi a nace na México den e stad Gómez Palacio, Estado Durango, dia 17 di september 1917. Revolucion mexicano tabata den ‘full swing.’ Aunke e revolucion a terminá na 1920, e disturbionan a sigui pa hopi tempu despues den e área caminda nos tabata biba. Esei a haci bida hopi difícil.

UN BIAHA cu Mama a haña sa cu lo a bai tin un confrontacion entre e forsanan rebelde i e ehército, el a tene ami cu mi tres ruman hombernan i mi dos ruman muhernan vários dia den cas. Nos tabatin tiki cuminda, i mi ta corda con ami cu mi ruman muher mas chikitu tabata sconde bou di cama. Despues di esei, Mama a dicidí di bai cu nos Merca, caminda mi tata lo a djoin nos despues.

Nos a yega California na 1926, djis promé cu e Gran Depresion a asotá Merca. Caminda cu nos por a haña trabou nos tabata muda bai. Nos a bai lugánan manera San Joaquin Valley, Santa Clara, Salinas i King City. Nos a siña traha den cunucu i cosechá tur sorto di fruta i berdura. Aunke mi mester a traha hopi duru den mi hubentud, e tabata un tempu masha dushi di mi bida.

Berdad di Bijbel A Yega Cerca Nos

Na mart 1928, un Studiante di Bijbel, manera tabata yama Testigonan di Jehova e tempu ei, a bishitá nos. E tabata un homber di edad di abla spañó cu yama Esteban Rivera. Título i tambe e contenido dje foyeto chikitu cu el a laga atras, “Unda e Mortonan Ta?,” a impresioná mi. Maske mi tabata yong, mi a busca pa studia Bijbel i asociá cu e Studiantenan  di Bijbel. Cu tempu, mi mama i mi ruman muher Aurora tambe a bira alabadó celoso di Jehova.

Meimei di añanan ’30, e Testigonan a traha un Salon di Reino na San Jose pa e congregacion di abla ingles. Ya cu tabatin hopi hende di abla spañó ta traha den haciendanan den e área, nos a cuminsá predicá na nan i tene e Studio di Toren di Vigilancia. Nos a haci esaki cu yudansa dje Testigonan di abla spañó di San Francisco, cu tabata ubicá un 80 kilometer mas leu. Cu tempu nos tabatin un asistencia di 60 persona n’e reunionnan na spañó den e Salon di Reino na San Jose.

Finalmente, dia 28 di februari 1940, mi a simbolisá mi dedicacion na Jehova mediante bautismo bou di awa na un asamblea na San Jose. E siguiente aña mi a ser nombrá como pionero, un minister di tempu completo di Testigonan di Jehova. Anto na april 1943, mi a haña invitacion pa muda bai Stockton, un stad situá rond di 130 kilometer leu, pa forma un congregacion di abla spañó. E tempu ei mi tabata sirbi como superintendente presidente dje congregacion ingles na San Jose, i tambe mi tabata percurá pa e Testigonan di abla spañó einan. Despues di a haci areglo pa otro hende percurá p’e responsabilidadnan aki, mi a muda bai Stockton.

Integridad Poné na Prueba

Na principio di 1940, bes tras bes nan a yama mi dilanti dje comité cu ta selectá hende pa servicio militar, pero cada bes nan a respetá mi posicion di no kier drenta servicio militar pa motibu di mi principionan. Djis despues cu Merca a drenta segundo guera mundial na december 1941, e comité a intensificá su preshon. Finalmente na 1944, nan a hinca mi den prizon. Miéntras mi tabata warda riba mi sentencia, nan a pone mi den un bodega huntu cu criminalnan. Ora nan a haña sa cu mi ta un Testigo di Jehova, hopi di nan kier a sa con e crímennan cu nan a cometé ta afectá nan posicion dilanti Dios.

Testigonan na San Jose a paga mi fiansa i asina mi por a haña mi libertad, pendiente di mi caso. Un abogado na Los Angeles cu ta defendé acusadonan den casonan di derecho civil a aceptá mi caso sin cobra. E hues a dicidí cu e ta laga mi liber basta mi stop di traha pionero, busca un trabou seglar i raportá tur luna na autoridadnan federal. Mi no a aceptá e veredicto ei, pues el a sentenciá mi na dos aña den e prizon di McNeil Island na Estado di Washington. Eiden mi a usa mi tempu pa haci studio intensivo di Bijbel. Tambe mi a siña tik. Den  ménos cu dos aña, mi a haña mi libertad debí na bon conducta. Mesora mi a haci areglo pa sigui den e ministerio di pionero.

Mas Actividad

Den winter di 1947, mi a haña asignacion pa predicá na e hendenan di abla spañó di Colorado City, Texas, huntu cu un compañero pionero. Pero tabata asina friu cu nos a bai San Antonio pa disfrutá di un clima mas cayente. Sin embargo, awaceru a cai asina hopi einan cu el a stroba nos ministerio di cas pa cas. No a dura mashá, cu nos placa a caba. Pa simannan largu nos a biba riba sandwich di kolo curú i te di alfalfa. Mi compañero a bai cas bek, pero ami a keda. Ora e Testigonan di abla ingles a haña sa di mi necesidadnan físico, nan a cuminsá yuda mi.

E siguiente lente, mi a regresá na mi asignacion na Colorado City, i cu tempu nos a forma un congregacion chikitu di abla spañó. Despues mi a muda bai Sweetwater, Texas, caminda mi a yuda forma un otro congregacion spañó. Miéntras mi tabata na Sweetwater, mi a ricibí un carta di invitacion p’e di 15 klas dje Scol Bíblico di Galad di Watchtower pa entrenamentu di misionero cu a cuminsá dia 22 februari 1950. Despues di a gradua e zomer ei na e congreso internacional na Yankee Stadium di New York City, mi a keda tres luna n’e sede di Testigonan di Jehova na Brooklyn. Einan mi a ricibí entrenamentu pa mi asignacion n’e oficina di sucursal na México.

Trabou na México

Mi a yega Ciudad di México dia 20 di october 1950. Mas o ménos dos siman despues mi a ser nombrá como superintendente di sucursal, un asignacion cu mi a cumpli cuné pa cuater aña i mei. E experencia cu mi a haña den e sirbishi di pionero, den prizon, na Galad i na Brooklyn, a resultá di ta masha beneficioso. Ora mi a yega México, mi a ripará mesora cu mester a edificá e spiritualidad di nos rumannan mexicano. Tabatin un necesidad special pa yuda nan mantené nan n’e normanan moral haltu dje Palabra di Dios.

Den paisnan latinoamericano, incluso México, tabata un custumber pa parehanan biba huntu sin cu nan ta legalmente casá. Religionnan di cristiandad, foral Iglesia Católico Romano, a permití e práctica no-bíblico aki prevalecé. (Hebreonan 13:4) Asina, algun a bira miembro dje congregacionnan di Testigonan di Jehova aunke nan no tabata casá legalmente. E ora ei a haci areglo pa duna e personanan ei seis luna pa legalisá nan matrimonio. Di otro manera lo no reconocé nan mas como Testigo di Jehova.

Pa hopi di nan tabata fácil pa nan a drecha nan bida. E único cos cu nan mester a haci ta legalisá nan relacion dor di casa. Tabatin otronan cu situacionnan mas complicá. Por ehempel, tabatin cu a casa dos bes, i asta tres bes, sin cu nunca nan a divorciá legalmente. Ora cu por fin e situacionnan matrimonial di Jehova su pueblo tabata na armonia cu e siñansanan dje Palabra di Dios, e congregacionnan a disfrutá di bendicionnan spiritual ricu.—1 Corintionan 6:9-11.

Den e tempunan ei, e nivel di educacion na México tabata generalmente abou. Asta promé cu mi a yega na 1950, e oficina di sucursal a cuminsá organisá lesnan pa siña lesa i skirbi den e congregacionnan. Awor a reorganisá e lesnan ei, i a haci areglo pa registrá nan cerca gobiernu. Desde 1946, ora a cuminsá tene registro, mas cu 143.000 persona na México a siña lesa i skirbi na les cu Testigonan a duna!

México tabatin leynan masha restrictivo pa loke ta religion. Sin embargo, den añanan recien a bini cambionan importante den e aspecto aki. Na 1992 nan a pasa un ley nobo tocante asuntunan religioso, i consecuentemente Testigonan di Jehova na México a ser registrá como un organisacion religioso na 1993.

Pa mi e cambionan aki tabata un fuente di gran goso, algu cu añanan promé lo mi a  pensa ta imposibel. Atrabes di hopi aña, bes tras bes mi a bishitá oficinanan di gobiernu i a topa cu un actitud di basta desconfiansa. Sin embargo, ta dushi pa mira con e Departamento Hurídico di nos oficina di sucursal a trata e asuntunan aki, di manera cu awor nos ta haña nos cu relativamente poco strobansa den e trabou di predicá.

Sirbiendo Huntu cu un Partner Misionero

Ora mi a yega México, ya caba tabatin einan hopi graduado di klasnan anterior di Galad. Un di nan tabata Esther Vartanian, un Testigo armenio cu a cuminsá traha pionero na Vallejo, California, na 1942. Nos a casa dia 30 di juli 1955, i despues di esei nos a sigui den nos asignacion na México. Esther a keda den e trabou di misionero na Ciudad di México, i nos a biba na sucursal caminda ami a sigui sirbi.

Na 1947, Esther a yega na su promé asignacion di misionero na Monterrey, Nuevo León, México. Na Monterrey tabatin solamente un congregacion di 40 Testigo, pero p’e tempu cu nan a mand’é Ciudad di México na 1950, tabatin cuater congregacion. Actualmente na nos sucursal cerca di Ciudad di México tin dos hóben cu ta desendiente di famianan cu Esther a studia Bijbel cuné tempu cu e tabata sirbi na Monterrey.

Aya na 1950, e teritorio di predicá dje misioneronan na Ciudad di México a encerá gran parti dje stad. Nan a pasa dor di nan teritorio asigná na pia of den busnan masha bieu mes yen-yen cu hende. Ora ami a yega einan na final di 1950, tabatin shete congregacion. Awor esakinan a aumentá te na mas o ménos 1.600 congregacion cu mas di 90.000 publicadó di Reino na Ciudad di México, i aña pasá, mas cu 250.000 persona a asistí n’e Memorial dje morto di Cristo einan! Atrabes di añanan, ami cu Esther tabatin e privilegio di sirbi den hopi dje congregacionnan aki.

 Ora ami cu Esther cuminsá un studio di Bijbel, semper nos ta purba lanta interes dje tata di famia pa asina henter e famia keda enbolbí. P’esei, nos a mira hopi famia grandi cuminsá sirbi Jehova. Mi ta kere cu un dje motibunan pakico adoracion berdadero a crece rápidamente na México, ta pasobra hopi bes famianan completo a djoin e adoracion berdadero unidamente.

Jehova A Bendicioná e Trabou

Desde 1950 tabatin un progreso remarcabel den e trabou na México, tantu den e cantidad como den ahustenan den e organisacion. Ta un berdadero goso di por a contribuí den un manera chikitu na e aumento, trahando huntu cu un pueblo asina hospitalario i felis.

Karl Klein, kende ta sirbi como miembro dje Cuerpo Gobernante di Testigonan di Jehova, i su casá, Margaret, a bishitá nos durante nan vakansi algun aña pasá. Ruman Klein mes kier a mira con e trabou ta bai den nos teritorio mexicano, p’esei e cu su casá Margaret a bini Congregacion San Juan Tezontla, cerca di Ciudad di México, caminda nos tabata asistí e tempu ei. Nos salon tabata chikitu, rond di 4,5 meter hanchu pa 5,5 meter largu. Ora nos a yega tabatin rond di 70 hende presente caba, i casi no a sobra lugá pa hende para. Esnan di mas edad tabata sintá riba stul, esnan mas hóben riba banki i e mucha chikitunan riba bloki of riba flur.

Ruman Klein a keda masha impresioná pasobra tur mucha tabata prepará cu nan Bijbel, i nan tabata busca e textonan di Bijbel huntu cu e orador. Despues dje discurso público, ruman Klein a papia riba Mateo 13:19-23 i el a bisa cu na México tin hopi dje “tera excelente” cu Jesus a mencioná. Actualmente, shete dje muchanan cu tabata presente e dia ei, ta trahando riba e inmenso proyecto pa expandé e facilidadnan di sucursal banda di Ciudad di México. Un otro ta sirbi na Betel i vários otro ta pionero!

Ora ami a bini Ciudad di México, nos sucursal tabatin 11 miembro so. Awor nos tin mas o ménos 1.350 persona ta traha n’e sitio i rond di 250 di nan ta traha den construccion dje edificionan nobo di sucursal. Ora cu caba cu tur e trabou aki, posiblemente na aña 2002, nos lo por acomodá rond di 1.300 persona den nos facilidadnan expandé. Anto djis pensa cu na 1950 nos tabatin ménos cu 7.000 publicadó di Reino den e henter e pais, pero awor nos tin hopi mas cu 500.000! Mi curason ta basha over di goso ora mi mira e manera cu Jehova a bendicioná e esfuerso humilde di nos rumannan na México cu ta traha asina duru pa alab’é.

Enfrentando un Desafio Grandi

Último tempu, malesa ta un di mi desafionan di mas grandi. Generalmente, mi tabata un persona salú. Pero na november 1988, mi a haña un atake celebral cu a afectá mi facultadnan físico masha hopi. Danki na Jehova cu mediante ehercicio i otro terapia mi a recuperá te na cierto grado, pero tin algun parti di mi curpa cu no ta reaccioná manera lo mi kier. Mi ta sigui ricibí tratamentu i atencion médico pa evitá dolor di cabes intenso i otro consecuencianan cu t’ei ainda.

Maske mi no por haci hopi mas manera lo mi tabata kier, mi ta sinti contentu sabiendo cu mi tabatin e oportunidad pa yuda hopi hende siña di e propósitonan di Jehova i bira su sirbidó dedicá. Tambe mi ta disfrutá di combersá cu mas tantu ruman cristian posibel ora nan bishitá nos sucursal; mi ta sinti cu nos ta animá otro mutuamente.

Sabiendo cu Jehova ta apreciá nos sirbishi na dje i cu loke nos a haci no ta en bano, a fortalecé mi mashá. (1 Corintionan 15:58) Apesar di mi limitacionnan i malesa, mi a tuma na pechu e palabranan di Colosensenan 3:23 i 24: “Cualkier cos cu boso ta haciendo, traha riba dje cu henter boso alma como pa Jehova, i no pa hende, pasobra boso sa cu ta di Jehova boso lo ricibí e debido recompensa dje herencia.” Na armonia cu e conseho aki, mi a siña sirbi Jehova di henter alma apesar di prueba.

[Plachi na página 24]

Na 1942 tempu mi tabata pionero

[Plachi na página 24]

Mi casá a cuminsá cu su asignacion di misionero na México na 1947

[Plachi na página 24]

Huntu cu Esther awe

[Plachinan na página 26]

Ariba banda robes: Nos famia di Betel na 1952 i ami ta dilanti

Ariba: Mas cu 109.000 persona a reuní den e stadion di Ciudad di México aki pa un congreso di distrito na 1999

Abou banda robes: Nos facilidadnan di sucursal nobo cu awor ta cerca di bin cla