Te Con Leu Bo Amor Ta Yega?

“Bo tin cu stima bo próhimo mescos cu bo mes.”—MATEO 22:39.

1. Si nos ta stima Jehova, di con nos mester stima nos próhimo tambe?

ORA cu nan a puntra Jesus cua ta e mandamentu di mas grandi, el a contestá: “Bo tin cu stima Jehova bo Dios cu henter bo curason i cu henter bo alma i cu henter bo mente.” Su tras el a cita un di dos mandamentu cu ta similar na esun promé: “Bo tin cu stima bo próhimo mescos cu bo mes.” (Mateo 22:37, 39) Sí, amor pa próhimo ta identificá un cristian. Sin duda, si nos ta stima Jehova, nos mester stima nos próhimo. Di con? Pasobra nos ta demostrá nos amor pa Dios dor di obedecé su Palabra, i su Palabra ta manda nos stima nos próhimo. P’esei, si nos no ta stima nos rumannan, nos amor pa Dios no por ta berdadero.—Romanonan 13:8; 1 Juan 2:5; 4:20, 21.

2. Ki tipo di amor nos mester tin pa nos próhimo?

² Ora Jesus a bisa cu nos mester stima nos próhimo, e tabata papia di mas cu simpel amistad. I el a referí na un tipo di amor cu ta diferente cu esun cu ta existí naturalmente den famia of entre un homber i un muher. E tabata papia di e tipo di amor cu Jehova tin pa su sirbidónan dedicá, i cu nan tin p’e. (Juan 17:26; 1 Juan 4:11, 19) Un escriba hudiu—cu manera Jesus a dicerní, a papia inteligentemente—a bai di acuerdo cu Jesus, cu amor pa Dios mester ta “cu tur bo curason i cu tur bo comprendimentu i cu tur bo forsa.” (Marco 12:28-34) E tabatin rason. E amor cu un cristian ta desaroyá tantu pa Dios como pa su próhimo tin di haci cu nos emocionnan i cu nos intelecto. Bo ta sintié den bo curason, i bo mente ta gui’é.

3. (a) Con Jesus a siña un “homber versá den e Ley” cu e mester tin un punto di bista amplio di ken ta su próhimo? (b) Ki nificacion Jesus su ilustracion tin pa cristiannan awe?

 ³ Manera Lucas a informá, ora Jesus a bisa cu nos mester stima nos próhimo, “un cierto homber versá den e Ley” a puntra: “Ken realmente ta mi próhimo?” Jesus a contestá cu un comparacion. Tabatin un cierto homber cu nan a bati, horta, i laga mitar morto cant’i caminda. Promé un sacerdote i despues un levita a cana pasa banda di dje. Tur dos a ignor’é. Finalmente, un samaritano a pasa, el a wak e homber heridá, i a actua cuné cu hopi bondad. Cua di nan tres tabata un próhimo pa e homber heridá? E contesta tabata obvio. (Lucas 10:25-37) Podisé e homber versá den e Ley a keda scandalisá di tende Jesus bisa cu un samaritano lo por ta un mihó próhimo cu un sacerdote of un levita. Ta bisto cu Jesus tabata purba yuda e homber stima su próhimo den un manera mas amplio. Cristiannan tambe ta stima dje manera ei. Considerá ken ta tur esnan cu un cristian ta stima.

Amor den Famia

4. Unda un cristian ta cuminsá na mustra amor?

⁴ Cristiannan ta stima nan miembronan di famia: e esposa ta stima su esposo, e esposo ta stima su esposa, i e mayornan ta stima nan yunan. (Eclesiástes 9:9; Efesionan 5:33; Tito 2:4) Ta berdad cu lasonan natural di amor ta existí den mayoria famia. Sin embargo, informenan tocante famia kibrá, maltrato di casá, i yu neglishá of bandoná, ta mustra cu awendia famia ta bou di preshon, i sintimentunan natural den famia tin bes no ta suficiente pa tene e famia huntu. (2 Timoteo 3:1-3) Pa logra berdadero éxito den bida di famia, cristiannan mester ehercé e clase di amor cu Jehova i Jesus tin.—Efesionan 5:21-27.

5. Na ken mayornan ta acudí pa yuda nan cria nan yunan, i ki resultado hopi di nan tabatin?

⁵ Mayornan cristian ta sinti cu nan yunan ta algu cu Jehova a confia nan cuné, i nan ta acudí cerca dje p’e yuda nan cria e yunan. (Salmo 127:3-5; Proverbionan 22:6) Asina nan ta cultivá amor cristian, loke ta yuda nan protehá nan yunan contra e influencianan corupto cu hóbennan por bira víctima di dje. Como resultado, hopi mayor cristian a experenciá un goso similar cu esun di un mama na Hulanda. Despues cu el a mira su yu homber bautisá como un dje 575 personanan cu a bautisá na Hulanda aña pasá, el a skirbi lo siguiente: “N’e momento aki mi inversion dje último 20 añanan a duna fruta. Awor mi a lubidá tur e tempu i energia, i tambe e dolor emocional, esfuerso i tristesa.” Esta felis e ta cu su yu a dicidí di sirbi Jehova di su propio boluntad liber. E máximo di 31.089 publicadó cu a raportá na Hulanda aña pasá ta incluí hopi ruman cu a siña stima Jehova for di nan mayornan.

6. Con amor cristian por yuda fortalecé e laso matrimonial?

⁶ Pablo a yama amor “un laso perfecto di union,” i e por preservá un matrimonio asta atrabes di mal tempu. (Colosensenan 3:14, 18, 19; 1 Pedro 3:1-7) Ora cu un homber na Rurutu, un isla chikitu rond di 700 kilometer leu di Tahiti, a cuminsá studia Bijbel cu Testigonan di Jehova, su casá a opon’é fuertemente. Un dia el a coge e muchanan, bai laga e homber, i a bai biba na Tahiti. Tog e homber a demostrá su amor dor di manda cen p’e regularmente i yama na telefon pa puntra si tabatin ki-cu-ta cu e mama of e muchanan tabatin mester. Asina el a haci su best pa cumpli cu su obligacionnan cristian. (1 Timoteo 5:8) El a resa constantemente pa su famia por uni di nobo, i cu tempu su casá a bini bek cerca dje. Ora el a bolbe, e homber a trat’é cu “amor, awante, genio suave.” (1 Timoteo 6:11) Na 1998 e homber a bautisá, i despues el a yena di goso ora su casá a aceptá pa studia Bijbel. E studio ei tabata un dje 1.351 studionan conducí den e teritorio cu ta cai bou dje sucursal di Tahiti aña pasá.

7. Segun un homber na Alemania, kico a fortalecé su matrimonio?

⁷ Na Alemania un homber a oponé e interes di su casá den e berdad di Bijbel, i tabata convencí cu Testigonan di Jehova kier a engañá e  casá. Pero despues el a skirbi e promé Testigo cu a drenta den contacto cu su casá, i a bis’é: “Masha danki cu bo a introducí Testigonan di Jehova na mi casá. Promé mi tabata preocupá dor cu mi a tende asina tantu cos malu tocante nan. Pero awor cu mi a asistí n’e reunionnan cu mi casá, mi ta realisá con robes mi tabata. Mi sa cu ta e berdad mi ta tendiendo, i el a haci nos matrimonio hopi mas fuerte.” Entre e 162.932 Testigonan di Jehova na Alemania, i e 1.773 Testigonan riba e islanan cu ta cai bou dje sucursal di Tahiti, tin hopi famia cu ta uní den amor divino.

Amor pa Nos Rumannan Cristian

8, 9. (a) Ken ta siña nos stima nos rumannan, i kico amor ta motivá nos pa haci? (b) Duna un ehempel cu ta mustra con amor por yuda rumannan apoyá otro mutuamente.

⁸ Pablo a bisa e cristiannan di Tesalónica: “Dios mes a siña boso stima otro.” (1 Tesalonicensenan 4:9) Sí, esnan “siñá pa Jehova” ta stima otro. (Isaías 54:13) Nan ta expresá nan amor cu echo, manera Pablo a mustra ora el a bisa: “Mediante amor traha como esclabo pa otro.” (Galationan 5:13; 1 Juan 3:18) Nan ta haci esaki, por ehempel, ora cu nan bishitá rumannan cu ta enfermo, ta curashá esnan deprimí, i ta apoyá esnan débil. (1 Tesalonicensenan 5:14) Nos amor cristian genuino ta contribuí n’e crecementu di nos paradijs spiritual.

⁹ Den Congregacion Ancón, un di e 544 congregacionnan na Ecuador, e rumannan a demostrá nan amor den un manera práctico. Un crísis financiero a laga nan sin trabou i sin entrada, di manera cu e publicadónan a dicidí di gana placa dor di bende cuminda cu e piscadónan local ora nan bolbe cas despues di pisca durante anochi. Tur hende a cooperá, asta e muchanan. Nan mester a cuminsá 1’or di mardugá pa nan tin e cumindá cla pa 4’or di mardugá, ora e piscadónan a bolbe. Nan a parti e cen cu nan a gana entre nan mes segun cada un su necesidad. E yudansa mutuo ei a duna prueba di berdadero amor cristian.

10, 11. Con nos por mustra amor pa rumannan cu nos no conocé personalmente?

¹⁰ Sin embargo, nos amor no ta limitá na cristiannan cu nos conocé personalmente. Apostel Pedro a bisa: “Tene amor pa henter  e asociacion di rumannan.” (1 Pedro 2:17) Nos ta stima tur nos rumannan dor cu nan ta adorá Jehova Dios huntu cu nos. Tempunan di crísis por duna nos oportunidad pa duna muestra dje amor aki. Por ehempel, durante e aña di sirbishi 2000, inundacionnan pisá a destrosá Mozambique, i un guera civil continuo na Angola a laga hopi hende den pobresa. Un gran cantidad di e 31.725 rumannan na Mozambique i e 41.222 rumannan na Angola a keda afectá dor dje sosodementunan aki. P’esei, Testigonan den e pais bisiña Sur África a manda un gran cantidad di artículo di promé necesidad pa aliviá e afliccion di nan rumannan den e paisnan ei. Nan buena gana pa contribuí cu nan “exceso” na nan rumannan den necesidad a duna muestra di nan amor.—2 Corintionan 8:8, 13-15, 24.

¹¹ Otro manera cu amor ta bira bisto ta ora cu rumannan na hopi pais ta contribuí cu construccion di Salon di Reino i Salon di Asamblea den paisnan ménos próspero. Un ehempel ta Islanan Sálomon. Apesar di hopi disturbio, Islanan Sálomon a experimentá un crecementu den publicadó di 6 porciento aña pasá, cu un máximo di 1.697 publicadó. Nan tabatin planeá di traha un Salon di Asamblea. Apesar cu hopi hende tabata hui for di Islanan Sálomon, boluntarionan a bini for di Australia pa yuda construí e salon. A sosodé cu e boluntarionan a haña nan ta bai for dje pais, pero promé cu nan a bai nan a siña e rumannan local con pa completá e fundeshi. Nan a manda e structura di staal prefabricá cu barcu for di Australia, i ora finalisá e excelente edificio pa adoracion aki, den un tempu ora cu hopi sitio di construccion ta para bandoná, lo e ta un excelente testimonio pa Jehova su nomber i dje amor di e rumannan.

Mescos cu Dios, Nos Tambe Ta Stima Mundu

12. Con nos ta imitá Jehova den nos actitud pa esnan cu no ta di nos fe?

¹² Nos amor ta limitá na nos famia i nos hermandad? No si nos ta “imitadónan di Dios.” Jesus a bisa: “Dios a stima mundu asina tantu cu el a duna su Yu unigénito, pa tur cu ehercé fe den dje no sea destruí sino haña bida eterno.” (Efesionan 5:1; Juan 3:16) Mescos cu Jehova Dios, nos ta actua di un manera amoroso cu tur hende, incluso cu esnan cu no ta di nos fe. (Lucas 6:35, 36; Galationan 6:10) Den e contexto aki specialmente, nos ta predicá e bon nobo dje Reino i conta otro hende tocante Dios su gran acto di amor na nan beneficio. Esaki por resultá den salbacion pa ken cu scucha.—Marco 13:10; 1 Timoteo 4:16.

13, 14. Cua ta algun experencia di rumannan cu a mustra amor na hende cu no ta Testigo, asta ora esei a nificá un gran incumbiniencia personal?

¹³ Considerá cuater pionero special na Népal. A asigná nan na un ciudad den e parti zuidwest dje pais, i durante e último cincu añanan, nan a duna muestra di nan amor dor di predicá cu pacenshi den e ciudad i e pueblonan rond. Pa nan cubri nan teritorio, hopi bes nan ta biaha oranan largu riba baiskel den temperaturanan riba 40 grado Celsius. Nan amor i nan “perseverancia den obra cu ta bon” a producí resultadonan excelente ora cu un grupo di studio di buki a keda formá den un dje pueblonan. (Romanonan 2:7) Na mart 2000, 32 hende a bin tende e discurso público cu e superintendente di circuito a duna. Népal tabatin un máximo di 430 publicadó aña pasá, un aumento di 9 porciento. Claramente Jehova ta bendicionando e celo i amor dje rumannan den e pais ei.

¹⁴ Na Colombia, pioneronan special temporal a bai predicá n’e indjannan guayú. Pa nan por a hacié, nan mester a siña un idioma nobo, pero nan interes amoroso a ser recompensá ora cu, apesar di yobida pisá, 27 hende a asistí na un discurso público. Celo amoroso manera esun cu e pioneronan aki a demostrá, a contribuí na un aumento di 5 porciento na Colombia, i un máximo di 107.613 publicadó. Na Dinamarca, un ruman muher di edad kier a compartí e bon nobo cu otro hende, pero e tabata desabilitá. Sin laga esei strob’é, el a drenta den contacto cu hende interesá dor di skirbi  carta. Actualmente e ta tene corespondencia cu 42 hende i ta conducí 11 studio di Bijbel. E ta den e máximo di 14.885 publicadó cu a raportá na Dinamarca aña pasá.

Stima Bo Enemigunan

15, 16. (a) Segun Jesus, te con leu nos amor mester yega? (b) Con rumannan responsabel a trata den un manera amoroso cu un hende cu a haci acusacion falsu contra Testigonan di Jehova?

¹⁵ Jesus a bisa e homber versá den e Ley, cu un samaritano por a ser considerá como un próhimo. Den su Sermon Riba Ceru, Jesus a bai asta mas leu ora el a bisa: “Boso a tende cu a ser bisá: ‘Bo tin cu stima bo próhimo i odia bo enemigu.’ Sin embargo, ami ta bisa boso: Sigui stima boso enemigunan i haci oracion pa esnan cu ta persiguí boso; pa boso demostrá di ser yunan di boso Tata cu ta den shelu.” (Mateo 5:43-45) Asta ora un hende oponé nos, nos ta purba “sigui vence malu cu bon.” (Romanonan 12:19-21) Si ta posibel, nos ta compartí nos posesion di mas precioso cuné, e berdad.

¹⁶ Na Ucrania, un artículo den e korant Kremenchuk Herald a mencioná Testigonan di Jehova como un secta peligroso. Esaki tabata un cos serio, pasobra na Europa algun hende ta papia dje manera aki di Testigonan di Jehova pa persuadí otro hende na pensa cu mester restringí of prohibí actividadnan di Testigonan. P’esei, e Testigonan a acercá e redactor i a pidié publicá un comunicado di prensa cu lo corigí e artículo. El a bai di acuerdo, pero huntu cu e comunicado el a imprimí un declaracion cu ta bisa cu e artículo original tabata basá riba echo. Pues, rumannan responsabel a bolbe acerk’é cu mas informacion. Finalmente e redactor a bin realisá cu e artículo original tabata robes, i el a publicá un declaracion den cua el a hala atras loke e artículo a bisa. Dor di trat’é cu frankesa i bondad, e rumannan a manehá e asuntu di un manera amoroso, loke a hiba na bon resultado.

Con Nos Por Cultivá Amor?

17. Kico ta mustra cu kisas no ta semper fácil pa actua amorosamente cu otro hende?

¹⁷ Ora un baby nace, su mayornan ta stim’é mesora. No ta semper bo ta trata hende adulto cu amor instintivo asina. Posiblemente ta p’esei Bijbel ta bisa nos bes tras bes pa nos stima otro. Ta algu cu nos mester traha ariba.  (1 Pedro 1:22; 4:8; 1 Juan 3:11) Jesus tabata sa cu nos amor lo ser poní na prueba ora el a bisa cu nos mester pordoná nos ruman “te cu setentishete biaha.” (Mateo 18:21, 22) Pablo tambe a urgi nos pa “sigui soportá otro.” (Colosensenan 3:12, 13) Nada straño cu Bijbel ta bisa nos: “Sigui tras di amor”! (1 Corintionan 14:1) Con nos por haci esaki?

18. Kico lo yuda nos cultivá amor pa otro hende?

¹⁸ Na promé lugá, nos por semper tene na mente e amor cu nos tin pa Jehova Dios. E amor aki ta un motivacion fuerte pa nos stima nos próhimo. Di con? Dor cu ora nos actua asina, esaki ta un bon testimonio pa nos Tata celestial, i ta dun’é gloria i alabansa. (Juan 15:8-10; Filipensenan 1:9-11) Na di dos lugá, nos por purba mira cosnan manera Jehova ta mira nan. Cada bes cu nos peca, ta contra Jehova nos ta peca; sin embargo, bes tras bes e ta pordoná nos i ta sigui stima nos. (Salmo 86:5; 103:2, 3; 1 Juan 1:9; 4:18) Si nos desaroyá Jehova su manera di mira cosnan, nos lo ta dispuesto di stima otronan i pordoná nan ofensanan contra nos. (Mateo 6:12) Na di tres lugá, nos por trata otronan manera nos kier pa nan trata nos. (Mateo 7:12) Dor cu nos ta imperfecto, nos tin mester di pordon frecuentemente. Por ehempel, ora nos bisa algu cu ta duel otro hende, nos ta spera cu nan lo corda cu tur hende ta peca cu nan lenga de bes en cuando. (Santiago 3:2) Si nos kier pa otronan trata nos cu amor, nos mester trata nan cu amor.

19. Con nos por busca yudansa dje spiritu santu pa nos cultivá amor?

¹⁹ Na di cuater lugá, nos por busca yudansa dje spiritu santu, pasobra amor ta parti dje fruta di spiritu. (Galationan 5:22, 23) Hopi bes amistad, sintimentu di famia i amor romántico ta instintivo. Pero nos tin mester di yudansa di Jehova su spiritu pa cultivá e amor cu Jehova tin, e amor cu ta un laso perfecto di union. Nos por busca yudansa di spiritu santu dor di lesa Bijbel, cu a ser inspirá. Por ehempel, si nos studia e bida di Jesus, nos lo mira con el a trata cu hende, i nos por siña imit’é. (Juan 13:34, 35; 15:12) Ademas, nos por pidi Jehova spiritu santu, principalmente den situacionnan ora ta difícil pa nos actua di un manera amoroso. (Lucas 11:13) Finalmente, nos por sigui tras di amor dor di keda den un relacion estrecho cu e congregacion cristian. Asociacion cu rumannan amoroso ta yuda nos cultivá amor.—Proverbionan 13:20.

20, 21. Ki muestra sobresaliente di amor Testigonan di Jehova a duna durante e aña di sirbishi 2000?

²⁰ Aña pasá tabatin un máximo di 6.035.564 publicadó dje bon nobo rond mundu. Testigonan di Jehova a dedicá un total di 1.171.270.425 ora buscando hende pa conta nan tocante e bon nobo. Ta amor a pone nan soportá e calor, awaceru i e friu miéntras nan tabata efectuá e trabou aki. Ta amor a motivá nan pa papia cu compañeronan di scol i di trabou, i pa acercá hende straño riba caya i otro caminda. Hopi hende cu e Testigonan a bishitá no tabatin interes, i algun a oponé nan. Sin embargo, algun a mustra interes, di manera cu nan a haci 433.454.049 rebishita, i a conducí 4.766.631 studio di Bijbel. *

²¹ Tur esaki tabata un gran muestra dje amor cu Testigonan di Jehova tin pa nan Dios i pa nan próhimo! Nunca e amor ei lo no fria. Nos tin confiansa cu e aña di sirbishi 2001 lo mira un testimonio asta mas grandi ser duná na humanidad. Jehova sigui bendicioná su adoradónan leal i celoso, segun cu nan ta ‘laga tur nan asuntunan tuma lugá cu amor’!—1 Corintionan 16:14.

[Nota]

Bo Por Splica?

• Ken nos ta imitá ora nos ta stima nos próhimo?

• Con leu nos amor mester yega?

• Cua ta algun experencia cu ta duna muestra di amor cristian?

• Con nos por cultivá amor cristian?

[Preguntanan di Estudio]

 [Tabèl na página 18-21]

RAPORT DI AÑA DI SIRBISHI 2000 DI TESTIGONAN DI JEHOVA MUNDIALMENTE

 (Wak e edishon imprimí di e revista akí)

[Plachinan na página 15]

Amor cristian por tene un famia huntu

[Plachinan na página 17]

Amor ta motivá nos pa compartí nos speransa cu otro hende