Cana Pareu cu Jehova Su Organisacion

“E Dios di pas . . . ekipá boso cu tur cos bon pa haci su boluntad.”—HEBREONAN 13:20, 21.

1. Con grandi e poblacion mundial ta, i cuantu di nan ta miembro di cierto religionnan?

NA AÑA 1999, e poblacion di tera a alcansá seis mil miyon hende! The World Almanac ta indicá cu dje cantidad aki rond di 1.165.000.000 ta moslim; 1.030.000.000 ta católico romano; 762.000.000 ta hindú; 354.000.000 ta budista; 316.000.000 ta protestant; i 214.000.000 ta ortodox.

2. Kico nos por bisa tocante e situacion religioso cu ta existí awe?

² En bista dje division i confusion religioso cu ta existí awe, tur e miyones di hendenan aki por ta actuando na armonia cu e boluntad di Dios? No, “pasobra Dios no ta un Dios di desordu, sino di pas.” (1 Corintionan 14:33) Di otro banda, kico dje hermandad internacional di Jehova su sirbidónan? (1 Pedro 2:17) Un investigacion cuidadoso ta proba cu ‘e Dios di pas ta ekipá nan cu tur cos bon pa haci su boluntad.’—Hebreonan 13:20, 21.

3. Kico a sosodé den Jerusalem na Pentecoste di 33 E.C., i pakico?

³ Claro cu no ta e cantidad di esnan cu ta asociá cu Testigonan di Jehova ta un criterio pa determiná si nan tin e aprobacion divino; cantidad di aumento tampoco no ta impresioná Dios. E no a scoge e israelitanan pa motibu cu nan tabata “mas hopi” cu tur otro pueblo. De facto, nan tabata esun “mas chikitu” di nan. (Deuteronomio 7:7) Pero dor cu Israel a resultá di ta infiel, Jehova a transferí su fabor na Pentecoste di 33 E.C. pa e congregacion nobo cu tabata consistí dje siguidónan di Jesucristo. Nan a ser ungí cu Jehova su spiritu santu i cu celo nan a sali pa declará e berdad tocante Dios i Cristo na otro hende.—Echonan 2:41, 42.

Moviendo Constantemente Padilanti

4. Pakico lo bo bisa cu e congregacion cristian di promé tabata move constantemente padilanti?

⁴ Den e promé siglo, e congregacion cristian tabata move constantemente padilanti, predicando den teritorio nobo, haciendo disipel i ganando un mihó comprendimentu di Dios su propósito. E cristiannan di promé a cana pareu cu e iluminacion spiritual cu  nan a haña for dje cartanan cu Dios a inspirá. Stimulá dor di bishita dje apostelnan i otro rumannan, nan a cumpli cu nan ministerio. Esaki ta bon documentá den e Scritura Griego Cristian.—Echonan 10:21, 22; 13:46, 47; 2 Timoteo 1:13; 4:5; Hebreonan 6:1-3; 2 Pedro 3:17, 18.

5. Pakico Dios su organisacion ta progresando awe, i pakico nos mester cana pareu cuné?

⁵ Mescos cu e cristiannan di promé, Jehova su Testigonan di tempu actual a desaroyá for di un cuminsamentu chikitu. (Zacarías 4:8-10) For di cabamentu di siglo 19, tabatin evidencia cla cu e spiritu di Dios tabata riba su organisacion. Dor cu nos a confia, no riba poder humano, sino riba e guia di spiritu santu, nos a sigui progresá den nos comprendimentu dje Scritura i den haci e boluntad di Dios. (Zacarías 4:6) Awor cu nos ta den “e último dianan,” ta vital pa nos cana pareu cu Jehova su organisacion progresivo. (2 Timoteo 3:1-5) Dor di haci esei nos por tene nos speransa bibu i participá den duna un testimonio tocante e Reino establecí di Dios promé cu e fin yega riba e sistema di cosnan aki.—Mateo 24:3-14.

6, 7. Ki tres área nos lo considerá den cua Jehova su organisacion a move padilanti?

⁶ Den nos filanan tin rumannan cu a cuminsá asociá cu Jehova su organisacion den añanan di 1920, ’30 i ’40. Durante e promé añanan ei, ken di nos por a imaginá e crecementu remarcabel i e desaroyo progresivo dje organisacion te n’e dia djawe? Pensa riba e logronan significativo cu a ser alcansá den nos historia moderno! Sí, ta spiritualmente refrescante pa refleccioná riba loke Jehova a realisá pa medio di su pueblo organisá na un manera teocrático.

⁷ David di antigwedad a keda profundamente impresioná ora el a contemplá Jehova su obranan maraviyoso. “Si mi incliná mi mes pa informá i papia di nan,” el a bisa, “nan a bira mas numeroso di loke mi por relatá.” (Salmo 40:5) Nos ta enfrentá e mésun limitacion, incapas pa relatá Jehova su hopi echonan grandi i elogiabel den nos tempu. No obstante, laga nos considerá tres área den cua Jehova su organisacion a move padilanti: (1) iluminacion spiritual progresivo, (2) un ministerio mihó i mas grandi i (3) ahustenan oportuno den procedura di organisacion.

Gradicidu pa Iluminacion Spiritual

8. Na armonia cu Proverbionan 4:18, kico iluminacion spiritual a permití nos dicerní relacioná cu e Reino?

⁸ Pa loke ta iluminacion spiritual progresivo, Proverbionan 4:18 a resultá di ta cierto. E ta bisa: “E caminda dje hustunan ta mescos cu e lus briyante cu ta bira mas i mas cla te ora e dia ta firmemente establecí.” Ki gradicidu nos ta p’e iluminacion spiritual progresivo cu nos a experenciá! N’e congreso di Cedar Point, Ohio, na 1919, e Reino di Dios a keda resaltá. Jehova ta usa e Reino pa santificá su nomber i vindicá su soberania. Eigenlijk ta iluminacion spiritual a permití nos dicerní cu for di Génesis te Revelacion, Bijbel ta duna testimonio di Jehova su propósito pa santificá su nomber pa medio dje Reino dirigí pa su Yu. Eiden ta sinta e speransa magnífico pa tur amante di husticia.—Mateo 12:18, 21.

9, 10. Den añanan ’20, kico a sali na cla tocante e Reino i tocante dos organisacion pará contra otro, i den ki manera esaki tabata probechoso?

 ⁹ N’e congreso di Cedar Point na 1922, e orador principal, J. F. Rutherford, a urgi e pueblo di Dios pa “anunciá, anunciá, anunciá e Rey i su reino.” Den e artículo “Nacementu dje Nacion,” publicá den E Toren di Vigilancia [na ingles] di 1 di mart 1925, a hala atencion na e perspicacia spiritual relacioná cu profecianan cu a señalá na establecimentu dje Reino di Dios na 1914. Tambe a dicerní den añanan ’20 cu tin dos organisacion pará contra otro, esta esun di Jehova i esun di Satanas. E lucha entre nan ta sigui, i nos lo ta na e banda victorioso solamente si nos cana pareu cu e organisacion di Jehova.

¹⁰ Con e iluminacion spiritual ei a yuda nos? Ya cu e Reino di Dios i e Rey Jesucristo no ta parti di mundu, nos tampoco no por ta parti di mundu. Dor di keda separá for di mundu, nos ta mustra cu nos ta na banda dje berdad. (Juan 17:16; 18:37) Ora nos observá e problemanan complicá cu ta plaga e sistema malbado aki, esta gradicidu nos ta cu nos no ta parti dje organisacion di Satanas! I ki privilegiá nos ta di por tin siguridad spiritual den e organisacion di Jehova.

11. Ki nomber bíblico e pueblo di Dios a adoptá na 1931?

¹¹ N’e congreso di Columbus, Ohio, na 1931, a haci aplicacion apropiado di Isaías 43:10-12. E Studiantenan di Bijbel a adoptá e nomber distintivo Testigonan di Jehova. Ta ki un privilegio magnífico pa declará e nomber di Dios di manera cu otronan por inbok’é i asina ser salbá!—Salmo 83:18; Romanonan 10:13.

12. Ki iluminacion spiritual relacioná cu e multitud grandi a ser percurá na 1935?

¹² Promé cu añanan ’30, gran parti dje pueblo di Dios tabata un poco insigur tocante nan speransa di bida den futuro. Algun tabata pensa riba bida celestial, pero e siñansanan di Bijbel tocante un paradijs riba tera a fasiná nan. N’e congreso di Washington, D.C., na 1935, tabata emocionante pa siña cu e multitud grandi di Revelacion capítulo 7 ta un grupo cu un speransa terenal. For dje tempu ei, e recogementu dje multitud grandi a move padilanti cu asta mayor empuhe. Nos no ta gradicidu cu e identidad dje multitud grandi no ta un misterio pa nos? E realidad di recogementu di hende na gran cantidad for di tur nacion, tribu i lenga ta motivá nos pa acelerá nos pasonan segun cu nos ta cana pareu cu e organisacion di Jehova.

13. Ki cuestion grandi a keda resaltá n’e congreso di St. Louis na 1941?

¹³ N’e congreso di St. Louis, Missouri, na 1941, a resaltá e cuestion grandi mes cu mester interesá sociedad humano. Esei ta dominacion of soberania universal. Esaki ta e cuestion cu mester ser resolvé pronto, i e dia grandi i inspirador di temor pa esei tuma lugá ta acercando rápidamente! Tambe a bini padilanti na 1941 e cuestion di integridad, cu ta conectá cu esun di promé, cu ta permití nos cada un mustra unda nos ta pará pa loke ta e soberania di Dios.

14. N’e congreso internacional na 1950, kico e rumannan a siña tocante e prinsnan mencioná na Isaías 32:1 i 2?

¹⁴ N’e congreso internacional na New York City, na 1950, a identificá ken exactamente ta e prinsnan di Isaías 32:1 i 2. Tabata un momento electrisante ora ruman Frederick Franz a papia riba e tema aki i splica cu e prinsnan dje tera nobo tabata entre nos. N’e congreso ei i na esnan cu a sigui despues, tabatin vários rayo di lus spiritual. (Salmo 97:11) Ki gradicidu nos ta cu nos caminda “ta mescos cu e lus briyante cu ta bira mas i mas cla”!

Moviendo Padilanti den Nos Ministerio

15, 16. (a) Con nos a move padilanti den nos ministerio durante e añanan ’20 i ’30? (b) Ki publicacionnan a duna empuhe n’e ministerio cristian den décadanan recien?

¹⁵ Un di dos manera cu e organisacion di  Jehova a move padilanti tin di haber cu nos trabou principal, esta, predicá e Reino i haci disipel. (Mateo 28:19, 20; Marco 13:10) Pa cumpli cu e trabou aki, e organisacion a pone nos dilanti e importancia di expandé nos ministerio. Na 1922 a urgi tur cristian pa participá den e trabou di predicá. Tabata na cada un di nan pa laga nan lus briya i asina participá personalmente den duna testimonio dje berdad. (Mateo 5:14-16) Na 1927 a dal paso pa apartá diadomingo como un dia pa sirbishi di veld. Cuminsando na februari di 1940, a bira normal pa mira e Testigonan riba caya den áreanan di negoshi ta ofrecé E Toren di Vigilancia i Consolacion (awor Spierta!).

¹⁶ Aña 1937 a mira e introduccion dje foyeto Estudio Modelo cu a enfatisá e necesidad di haci rebishita pa por siña otro hende e berdad di Bijbel. Den e añanan despues di esei, e actividad di studio di Bijbel a haña hopi énfasis. Cu publicacion dje buki “Laga Dios Sea Hañá Berdadero” na 1946 i E berdad cu ta hiba na bida eterna na 1968, e rasgo aki dje ministerio a haña un empuhe. Actualmente, nos ta usa e buki Conocimentu cu Ta Hiba na Bida Eterno. Un estudio den e publicacion ei ta pone un base bíblico sólido pa haci disipel.

Moviendo Padilanti cu Ahustenan den Procedura di Organisacion

17. Na armonia cu Isaías 60:17, con e organisacion di Jehova a move padilanti?

¹⁷ Un di tres manera den cua e organisacion di Jehova a move padilanti tin di haber cu ahustenan den procedura di organisacion. Di acuerdo cu Isaías 60:17, Jehova a primintí: “En bes di koper lo mi trece oro, i en bes di heru lo mi trece plata, i en bes di palu, koper, i en bes di piedra, heru; i lo mi nombra pas como bo superintendentenan i husticia como esnan cu ta asigná tarea na bo.” Na armonia cu e profecia aki, a dal paso pa mehorá e supervision dje trabou di predicá e Reino i di pastoreá e tou.

18, 19. Ki ahustenan den procedura di organisacion a tuma lugá atrabes di añanan?

¹⁸ Na 1919 a nombra un director di sirbishi den tur congregacion cu a pidi pa ser organisá pa sirbishi di veld. Esaki a duna empuhe na nos ministerio den veld. Na 1932 a stop di eligí anciano i diácono, loke a pone fin na métodonan democrático. Na 1938 a alcansá un otro logro significativo ora a cuminsá nombra tur sirbidó den e congregacion mas estrechamente na armonia cu e areglonan pa nombramentu teocrático den e congregacion cristian di promé siglo. (Echonan 14:23; 1 Timoteo 4:14) Na 1972 a nombra superintendente i sirbidó ministerial pa sirbi, mescos cu e hombernan cu a sirbi entre e promé cristiannan. En bes di laga un homber so sirbi como e superintendente di un congregacion, Filipensenan 1:1 i otro textonan ta indicá cu esnan cu ta cumpli cu e rekisitonan bíblico pa superintendente ta forma un cuerpo di anciano.—Echonan 20:28; Efesionan 4:11, 12.

¹⁹ Na 1975 a drenta na vigor un areglo pa comiténan dje Cuerpo Gobernante di Testigonan di Jehova supervisá e actividadnan mundial dje organisacion di Dios. A nombra Comité di Sucursal pa supervisá e trabou den nan respectivo teritorionan. Dje tempu ei padilanti, a duna atencion na simplificá e trabou n’e sede i n’e sucursalnan di Sociedad Watch Tower pa asina “haci sigur dje cosnan mas importante.” (Filipensenan 1:9, 10) E responsabilidadnan cu Cristo su subwardadónan ta carga ta encerá hiba delantera den e trabou di evangelisá, siña den congregacion i pastoreá e tou di Dios na un manera corecto.—1 Timoteo 4:16; Hebreonan 13:7, 17; 1 Pedro 5:2, 3.

Jesus Su Liderato Activo

20. Si nos kier cana pareu cu e organisacion di Jehova, kico nos tin cu reconocé tocante e posicion di Jesus?

²⁰ Si nos kier cana pareu cu e organisacion progresivo di Jehova, nos tin cu reconocé e papel  cu Dios a duna Jesucristo como “cabes dje congregacion.” (Efesionan 5:22, 23) Tambe, ta notabel loke Isaías 55:4 ta bisa nos: “Mira! Como un testigo pa gruponan nacional mi [Jehova] a dun’é, como un lider i comandante pa gruponan nacional.” Jesus sigur sa con pa hiba delantera. Tambe e conocé su carnénan i nan echonan. De facto, ora el a inspeccioná e shete congregacionnan na Asia Menor, cincu bes el a bisa: “Mi conocé bo echonan.” (Revelacion 2:2, 19; 3:1, 8, 15) Tambe Jesus conocé nos necesidadnan, mescos cu su Tata, Jehova. Promé cu el a duna e Oracion Modelo, Jesus a bisa: “Dios boso Tata sa kico boso mester asta promé cu boso pidié.”—Mateo 6:8-13.

21. Con Jesus su liderato ta ser manifestá den e congregacion cristian?

²¹ Con Jesus su liderato ta ser manifestá? Un manera ta mediante superintendentenan cristian, e “donnan den hende.” (Efesionan 4:8) Revelacion 1:16 ta mustra cu superintendente ungí ta manera den e man drechi di Cristo, bou di su control. Awe, ta Jesus ta dirigí e areglo pa anciano, sea cu e hombernan ei tin un speransa celestial of terenal. Manera e artículo anterior a splica, nan ta nombrá pa spiritu santu na armonia cu rekisito bíblico. (1 Timoteo 3:1-7; Tito 1:5-9) Den e promé siglo, tabatin un cuerpo gobernante cu a consistí di un grupo di anciano den Jerusalem cu tabata supervisá e congregacionnan i e actividad di predicá e Reino en general. Awe e organisacion di Jehova ta sigui e mésun patronchi.

Cana Pareu!

22. Ki yudansa e Cuerpo Gobernante ta duna?

²² E interesnan di Reino riba tera a ser confiá na “e esclabo fiel i discreto.” E Cuerpo Gobernante di Testigonan di Jehova ta representá e clase ei. (Mateo 24:45-47) E Cuerpo Gobernante ta ocupá su mes principalmente cu percurá instruccion i guia spiritual p’e congregacion cristian. (Echonan 6:1-6) Sin embargo, ora desaster natural afectá compañeronan di adoracion, e Cuerpo Gobernante ta pidi un of mas entidad legal pa suministrá alivio i pa drecha of restorá cas i Salon di Reino dañá. Ora cierto rumannan cristian ta ser tratá cu severidad of persiguí cruelmente, e ta tuma medida pa edificá nan spiritualmente. I “den tempu difícil,” e ta haci tur esfuerso pa laga e trabou di predicá sigui move padilanti.—2 Timoteo 4:1, 2.

23, 24. Ni maske kico bini riba su pueblo, kico Jehova ta percurá constantemente, i kico mester ta nos determinacion?

²³ Ni maske kico bini riba su pueblo, Jehova ta percurá alimento spiritual i guia necesario constantemente. Tambe Dios ta duna dicernimentu i perspicacia na rumannan den puesto di responsabilidad pa prepará pa mas progreso i ahuste den organisacion teocrático. (Deuteronomio 34:9; Efesionan 1:16, 17) Jehova ta percurá sin falta loke nos mester pa por cumpli cu nos comision di haci disipel i pa por efectuá nos ministerio rond mundu.—2 Timoteo 4:5.

²⁴ Nos tin pleno confiansa cu hamas Jehova lo bandoná su pueblo fiel; lo e salba nan for dje binidero “tribulacion grandi.” (Revelacion 7:9-14; Salmo 94:14; 2 Pedro 2:9) Nos tin tur motibu pa mantené firmemente e confiansa cu nos tabatin na principio te na fin. (Hebreonan 3:14) P’esei, laga nos ta determiná pa cana pareu cu e organisacion di Jehova.

Con Lo Bo Contestá?

• Pakico nos por bisa cu e organisacion di Jehova ta sigui move padilanti?

• Ki evidencia tin cu e pueblo di Dios ta ricibí iluminacion spiritual progresivo?

• Con asina tabatin mehoransa den e ministerio cristian?

• Ki ahustenan oportuno a tuma lugá den procedura di organisacion entre Jehova su sirbidónan?

[Preguntanan di Estudio]

[Plachi na página 17]

Mescos cu David, nos no por relatá tur Jehova su obranan maraviyoso

[Plachi na página 18]

E tou di Dios a beneficiá di ahustenan oportuno den procedura di organisacion