E Diferencia Entre e Cuerpo Gobernante i un Corporacion Legal

DESDE januari 1885 ta tene reunion anual di Watch Tower Bible and Tract Society of Pennsylvania. Durante cu recogementu dje cristiannan ungí tabata tumando lugá na final di siglo 19, e directornan i funcionarionan principal di e corporacion aki tabatin e speransa celestial. De facto, casi semper esaki tabata asina.

Tabatin un solo excepcion. Na 1940, Hayden C. Covington—e tempu ei asesor hurídico di Sociedad i miembro dje “otro carnénan” cu e speransa terenal—a ser elegí como un director di Sociedad. (Juan 10:16) El a sirbi como vicepresidente di Sociedad for di 1942 te 1945. E aña ei, ruman Covington a baha como director pa cumpli cu loke e tempu ei a parce di ta e boluntad di Jehova, esta, pa tur e director i funcionarionan principal dje corporacion di Pennsylvania ta cristiannan ungí. Lyman A. Swingle a remplasá Hayden C. Covington den e hunta di directornan, i Frederick W. Franz a ser elegí como vicepresidente.

Di con e sirbidónan di Jehova a kere cu tur e director i funcionarionan principal di Watch Tower Bible and Tract Society of Pennsylvania mester ta cristiannan ungí? Pasobra e tempu ei, tabata identificá e hunta di directornan i funcionarionan principal dje corporacion di Pennsylvania estrechamente cu e Cuerpo Gobernante di Testigonan di Jehova, cu semper a consistí totalmente di hombernan ungí cu spiritu santu.

Un Reunion Anual Histórico

N’e reunion anual tené dia 2 di october 1944, na Pittsburgh, e miembronan dje corporacion di Pennsylvania a adoptá seis resolucion cu a modificá su statuto. E statuto a stipulá cu mester a duna derecho di voto na esnan cu tabata contribuí cu fondo p’e obra di Sociedad, pero e di tres modificacion a eliminá e stipulacion ei. Un informe tocante e reunion anual ei a declará: “Lo limitá membresia dje Sociedad na no mas cu 500 . . . Cada persona scogí mester ta un sirbidó di tempu completo di Sociedad of un sirbidó part-time di un compania [congregacion] di testigonan di Jehova i mester reflehá e spiritu di Señor.”

Despues di esei, ta personanan cu tabata completamente dedicá na Jehova tabata vota pa scoge e directornan di Sociedad, sin importá e cantidad di cen cu nan a contribuí cuné pa adelanto dje obra di Reino. Esaki a resultá di ta na armonia cu e refinamentu progresivo predicí na Isaías 60:17. Einan nos ta lesa: “En bes di koper lo mi trece oro, i en bes di heru lo mi trece plata, i en bes di palu, koper, i en bes di piedra, heru; i lo mi nombra pas como bo superintendentenan i husticia como esnan cu ta asigná tarea na bo.” Dor di referí na “superintendentenan” i “esnan cu ta asigná tarea,” e profecia aki a indicá cu lo tin un mehoracion den proceduranan organisacional den e pueblo di Jehova.

E paso importante aki pa ahustá e organisacion teocráticamente, a cuminsá na fin di e “dos mil treshen anochi i mainta” cu Daniel 8:14 ta mencioná. N’e tempu ei a “hiba e lugá santu na su condicion corecto.”

Sin embargo, despues dje reunion anual histórico na 1944, a keda un pregunta importante. Ya cu e Cuerpo Gobernante tabata estrechamente identificá cu e hunta cu a consistí di shete director dje corporacion di Pennsylvania, esaki a nificá cu e Cuerpo Gobernante nunca no por a consistí di mas cu shete cristian ungí? Ademas, siendo cu ta e miembronan dje corporacion ta elegí e directornan, esei tabata kier  men cu tur aña n’e reunion anual e miembronan dje corporacion tabata eligí e miembronan di Cuerpo Gobernante? Acaso e directornan i funcionarionan principal di Watch Tower Bible and Tract Society of Pennsylvania i e miembronan dje Cuerpo Gobernante ta e mésun hendenan of nan ta distinto?

Un Otro Reunion Anual Inolvidabel

A contestá e preguntanan aki n’e reunion anual tené dia 1 di october 1971. Na e ocasion ei un dje oradornan a indicá cu e cuerpo gobernante di “e esclabo fiel i discreto” a existí cientos di aña promé cu Watch Tower Bible and Tract Society of Pennsylvania. (Mateo 24:45-47) A forma un cuerpo gobernante na Pentecoste di aña 33 E.C., mas cu 18 siglo promé cu e corporacion di Pennsylvania a bini na existencia. Na principio, e cuerpo gobernante tabata consistí di, no 7 homber, sino di 12 apostel. Evidentemente a aumentá e cantidad aki despues, pasobra ta “e apostelnan i e ancianonan den Jerusalem” tabata hiba delantera.—Echonan 15:2.

Na 1971, e mésun orador a splica cu e miembronan di Sociedad Watch Tower no por a vota pa elegí e miembronan di Cuerpo Gobernante. Di con? El a bisa: “Pasobra, e cuerpo gobernante dje clase di ‘esclabo’ no ta ser nombrá dor di ningun hende. E ta ser nombrá dor di . . . Jesucristo, e Cabes dje berdadero congregacion cristian i e Señor i Doño dje clase di ‘esclabo fiel i discreto.’” Tabata bisto anto cu miembronan di ningun corporacion no por a vota pa scoge miembronan dje Cuerpo Gobernante.

E orador a continuá i a haci e declaracion sumamente significativo aki: “E cuerpo gobernante no tin funcionarionan principal manera tin den e Hunta di Directornan di Sociedad, esta, presidente, vicepresidente, secretario-tesorero i asistent secretario-tesorero. E tin solamente un presidente, es decir, unu cu ta presidí.” Pa hopi aña e presidente dje corporacion di Pennsylvania tabata tambe e miembro principal dje Cuerpo Gobernante. Esaki lo no a bai sigui asina mas. Aunke nan no tin e mésun experencia i abilidad, e miembronan dje Cuerpo Gobernante lo bai tin e mésun responsabilidad. E orador a agregá: “Cualkier miembro dje cuerpo gobernante por ta esun cu ta presidí sin cu na mésun tempu e ta presidente di . . . Sociedad . . . Tur cos ta dependé dje sistema rotativo di fungi como esun cu ta presidí den e cuerpo gobernante.”

N’e reunion anual inolvidabel ei na 1971, a haci un distincion cla entre e miembronan ungí dje Cuerpo Gobernante i e directornan dje corporacion di Pennsylvania. No obstante, miembronan dje Cuerpo Gobernante a sigui sirbi como director i funcionarionan principal di Sociedad. Sin embargo, awe ta surgi e pregunta: Tin un motibu bíblico pakico e directornan di Watch Tower Bible and Tract Society of Pennsylvania mester ta miembro dje Cuerpo Gobernante?

E contesta ta no. E corporacion di Pennsylvania no ta e único entidad hurídico cu Testigonan di Jehova ta usa. Tin mas. Un di nan ta Watchtower Bible and Tract Society of New York, Inc. E ta facilitá nos trabou na Merca. Sin duda e corporacion aki tin Jehova su bendicion, aunke mayoria di su director i funcionarionan principal ta dje “otro carnénan.” Na Gran Bretania Testigonan ta usa e Asociacion Internacional di Studiantenan di Bijbel. Den otro paisnan nan ta usa otro entidadnan legal pa promové interesnan di Reino. Armoniosamente nan tur ta yuda i hunga un papel den logra p’e bon nobo ser predicá rond e tera. Sin importá unda nan ta situá of ken ta sirbi como director of funcionario principal, e entidadnan aki ta ser usá i guiá teocráticamente dor dje Cuerpo Gobernante. Pues, e entidadnan ei tin tareanan asigná pa cumpli cuné pa adelanto di interesnan di Reino.

E entidadnan legal aki ta di probecho pa nos. Mediante nan nos ta cumpli cu leynan local i nacional, manera e Palabra di Dios ta rekerí. (Jeremías 32:11; Romanonan 13:1) Entidadnan legal ta facilitá nos trabou di plama e  mensahe di Reino dor di imprimí Bijbel, buki, revista, foyeto i otro material. E entidadnan ei ta sirbi tambe como instrumentonan hurídico pa trata asuntunan relacioná cu derechonan di propiedad, programa di auxilio, contractnan pa usa facilidadnan di congreso, etcétera. Nos ta gradicidu n’e entidadnan legal ei p’e servicio cu nan ta percurá.

Jehova Su Nomber Ta Haña Prominencia

Na 1944 a modificá Artículo 2 dje statuto di Watch Tower Bible and Tract Society of Pennsylvania pa enfatisá e obhetivonan dje corporacion aki. Segun e statuto, e propósitonan di Sociedad ta incluí e propósito principal aki: “Predicá e evangelio dje reino di Dios bou di Cristo Jesus na tur nacion como un testimonio p’e nomber, palabra i supremacia di Dios Todopoderoso JEHOVA.”

Desde 1926, “e esclabo fiel” a duna e nomber di Jehova prominencia. Foral aña 1931 tabata remarcabel, tempu cu Studiantenan di Bijbel a adoptá e nomber Testigonan di Jehova. (Isaías 43:10-12) Publicacionnan di Sociedad cu a pone énfasis riba e nomber di Dios tabata entre otro e bukinan Jehova (1934), “Laga Bo Nomber Sea Santificá” (1961) i “E Nacionnan Lo Sa Cu Ami Ta Jehova”—Con? (1971).

Mester haci mencion special di e Traduccion di Mundu Nobo dje Santu Scritura, publicá completo na ingles na 1960. E ta contené e nomber di Jehova tur caminda cu e Tetragramaton ta aparecé den e Scritura Hebreo. Tambe e traduccion aki ta pone e nomber di Dios na 237 lugá den e Scritura Griego Cristian caminda análisis cuidadoso a indicá cu esaki ta hustificá. Esta gradicidu nos ta cu den vários manera Jehova a permití e “esclabo” i su Cuerpo Gobernante usa nan recursonan di publicacion i entidadnan legal pa haci su nomber conocí rond e tera!

Nan A Promové Distribucion dje Palabra di Dios

Consistentemente e pueblo di Jehova a duna testimonio di su nomber i a apoyá su Palabra dor di publicá i distribuí miyones di Bijbel i tambe publicacionnan basá riba Bijbel. Na principio di añanan 1900, Sociedad Watch Tower a haña derecho di autor riba The Emphatic Diaglott, un version interlineal griego-ingles dje Scritura Griego Cristian di Benjamin Wilson. Sociedad a publicá e edicion di King James Version dje Studiantenan di Bijbel cu a incluí un apéndix di 500 página. Na 1942 a publicá e edicion di King James Version cu tin referencia den márgen. Anto na 1944 Sociedad a cuminsá imprimí American Standard Version edicion di 1901 cu ta usa e nomber di Dios. E nomber di Jehova tambe tabata un rasgo di The Bible in Living English, di Stephen T. Byington, cu Sociedad a publicá na 1972.

Entidadnan legal cu Testigonan di Jehova a usa, a yuda pa imprimí i distribuí tur e traduccionnan di Bijbel ei. Sin embargo, loke tabata mas notabel ta e estrecho cooperacion entre Sociedad Watch Tower i e grupo di Testigonan di Jehova ungí cu ta forma e Comité di Traduccion di Bijbel di Mundu Nobo. Nos ta alegrá cu te awor, mas cu 106.400.000 ehemplar dje traduccion aki, sea completo of en parti, a ser imprimí den 38 idioma. Watch Tower Bible and Tract Society of Pennsylvania ta en berdad un sociedad di Bijbel!

“E esclabo fiel” a ser ‘nombrá riba tur e pertenencianan di su doño.’ Esakinan ta incluí e facilidadnan n’e sede na Estado di New York, Merca, i e 110 sucursalnan cu actualmente ta funcioná rond mundu. E miembronan dje  clase di esclabo sa cu lo exigí cuenta di nan p’e manera cu nan a usa loke a ser confiá na nan. (Mateo 25:14-30) Sin embargo, esaki no ta stroba e ‘esclabo’ di permití superintendentenan cualificá entre e “otro carnénan” atendé responsabilidadnan hurídico i administrativo rutinario. De facto, esaki ta permití miembronan dje Cuerpo Gobernante dedicá mas tempu “na oracion i na e ministerio dje palabra.”—Echonan 6:4.

Tanten cu e condicionnan den e mundu aki ta permití, e Cuerpo Gobernante—representando “e esclabo fiel i discreto”—lo haci uso dje entidadnan legal aki. Nan ta útil, pero no indispensabel. Si un decreto di gobiernu disolvé un entidad legal, e trabou di predicá lo sigui tog. Asta awor, den paisnan caminda tin restriccion i Sociedad no ta usa entidadnan legal, Testigonan ta predicá e mensahe di Reino i haci disipel, i aumento di teocracia ta sigui. Esaki ta sosodé pasobra Testigonan di Jehova ta planta i muha, i ‘Dios ta sigui hacié crece.’—1 Corintionan 3:6, 7.

Miéntras nos ta mira na futuro, nos tin confiansa cu Jehova lo soru p’e necesidad spiritual i material di su pueblo. E cu su Yu, Jesucristo, lo sigui percurá instruccion i apoyo celestial necesario pa completá e obra di predicá e Reino. Ta claro cu kico cu nos logra como sirbidónan di Dios ta ser hací ‘no pa medio di un forsa militar, ni pa medio di poder, sino pa medio di Jehova su spiritu.’ (Zacarías 4:6) P’esei nos ta pidi yudansa divino den oracion, sabiendo cu debí n’e fortalesa cu Jehova ta duna, nos lo por terminá e trabou cu el a duna nos pa haci den e tempu di fin aki!