Hacidónan dje Palabra di Dios Ta Haña Felicidad

Un dje promé oradornan na comienso dje Congreso di Distrito di Testigonan di Jehova “Hacidónan dje Palabra di Dios” a bisa: “Nos ta reconocé cu e congreso aki ta un otro provision di Jehova pa prepará nos pa mas actividad di Reino.” El a continuá: “Nos a prepará nos mes pa haña instruccion tocante bida di famia felis, pa ta animá pa keda cerca di Jehova su organisacion, pa ta motivá pa mantené nos celo den e sirbishi di Reino i pa ser recordá riba e necesidad di keda vigilá.”

FOR di aña pasá na final di luna di mei 2000, miles di hacidó dje palabra di Dios i nan amigunan a basha bai na miles di sitio rond mundu pa ricibí educacion bíblico di vital importancia. Kico nan a siña durante e congreso di tres dia?

Promé Dia—No Lubidá Jehova Su Echonan

Den e discurso di apertura, e presidente a invitá e auditorio pa experenciá e bendicionnan cu ta bini di adorá Jehova den unidad na congreso. El a sigurá tur presente cu nan fe lo aumentá i cu nan relacion personal cu Jehova lo bira mas fuerte.

“E Dios felis” sa kico nos tin mester pa nos felicidad individual. (1 Timoteo 1:11) P’esei, e discurso “Haci Dios Su Boluntad Ta Trece Felicidad” a enfatisá cu Jehova su Palabra, Bijbel, ta describí e mihó manera pa biba. (Juan 13:17) Diferente entrevista cu Testigonan di Jehova di hopi tempu a mustra con haci Dios su boluntad bou di vários circunstancia ta duna mas nificacion na nos bida. E siguiente discurso, “Bira Radiante pa Motibu dje Bondad di Jehova,” a enfatisá cu como “imitadónan di Dios,” cristiannan kier producí “tur sorto di bondad” den nan bida. (Efesionan 5:1, 9) Un manera sobresaliente pa haci esaki ta dor di predicá e bon nobo i haci disipel.—Salmo 145:7.

E discurso “Sigui Firme Como si Fuera Mirando Esun Cu Ta Invisibel” a mustra con fe fuerte ta yuda nos “mira” e Dios invisibel. E orador a describí con hende spiritual ta conciente di Dios su cualidadnan, incluso di su abilidad di sa asta loke nos ta pensa. (Proverbionan 5:21) Esnan cu a ser entrevistá a conta di e pasonan cu nan a dal pa desaroyá fe mas fuerte i pa pone interesnan spiritual na promé lugá den nan bida.

E sesion di mainta a concluí cu e discurso clave, “Alabá Jehova—E Hacidor di Cosnan Maraviyoso.” El a yuda e auditorio comprendé cu mas nos siña di Jehova, mas motibu nos ta haña pa alab’é como e Hacidor di cosnan maraviyoso. E orador a bisa: “Segun cu nos ta contemplá Dios su obranan maraviyoso di creacion huntu cu tur e cosnan magnífico cu e ta haciendo  awor akí mes pa nos, aprecio sincero ta conmové nos pa alab’é. Segun cu nos ta meditá riba e cosnan milagroso cu el a haci na fabor di su pueblo den pasado, nos kier alab’é. I segun cu nos ta contemplá e promesanan di cosnan maraviyoso cu Jehova lo haci ainda, nos ta busca maneranan pa expresá aprecio tambe.”

E sesion di atardi a cuminsá cu e discurso: “No Entregá den Haci Loke Ta Excelente,” cu a recordá tur hende den auditorio cu e preshonnan dje mundu aki ta confirmá cu e fin ta cerca. (2 Timoteo 3:1) Sin embargo, dor di no entregá, nos por proba cu nos ta “e clase cu tin fe cu ta conserbá e alma bibu.”—Hebreonan 10:39.

Ki conseho bíblico a ser duná tocante bida di famia? E promé simposio dje congreso—“Obedecé e Palabra di Dios”—a cuminsá cu e parti “Ora di Scoge Casá.” Scoge un casá ta un dje decisionnan di mas serio cu hende ta tuma. P’esei, cristiannan kier warda pa casa te ora nan ta maduro, i nan mester casa “solamente den Señor.” (1 Corintionan 7:39) E siguiente parti dje simposio a considerá Jehova su deseo pa tur famia cristian logra éxito como un unidad spiritual fuerte, i a ofrecé maneranan práctico pa logra esaki. E último parti a recordá mayornan cu siña nan yunan stima Dios ta cuminsá cu e mayornan su amor pa Dios.

E puntonan presentá den e discurso “Tene Cuidou cu Rumor i Redu” a yuda tur hende comprendé cu aunke cos straño sa pasa, nos tin cu reaccioná di un manera sabí, i no sea cla pa kere tur informe sensacional cu nos tende. Ta mihó pa cristiannan papia di loke nan sa cu ta e berdad: e bon nobo di Reino. Hopi hende a haña e siguiente discurso “Con pa Trata cu ‘un Sumpiña den Carni,’” masha consolador i animante. El a yuda nan mira cu apesar di prueba continuo cu nos lo por ta confrontá, Jehova por fortalecé nos mediante su spiritu santu, su Palabra i nos hermandad cristian. Nos a saca hopi animacion for dje experencia personal di apostel Pablo den e aspecto aki.—2 Corintionan 12:7-10; Filipensenan 4:11, 13.

E promé dia a terminá cu e discurso “Cana Pareu cu Jehova Su Organisacion.” A considerá tres área den cua e organisacion a haci progreso notabel: (1) e creciente comprendimentu di lus spiritual for di Jehova, (2) e ministerio cu Dios a confia nos cuné i (3) e ahustenan oportuno den proceduranan organisacional. Despues e orador a declará cu confiansa: “Nos  ta entusiasmá debí n’e futuro prospectonan.” El a puntra: “Por tin cualkier duda cu nos tin tur motibu pa mantené e confiansa cu nos tabatin na principio te na fin?” (Hebreonan 3:14) E contesta tabata obvio. Esei a hiba na presentacion dje foyeto nobo Bo Por Ta Amigu di Dios! Lo e sirbi como un medio di instruccion poderoso pa yuda personanan cu poco educacion of abilidad di lesa, siña tocante Jehova.

Di Dos Dia—Sigui Declará Dios Su Obranan Maraviyoso

Despues di a considerá e texto di dia, e di dos dia di congreso a sigui cu e simposio “Ministernan dje Palabra di Dios.” E promé parti a hala atencion n’e éxito actual di nos trabou mundial di predicá. Sin embargo, mayoria hende—cu ta rechasá e mensahe di Reino—ta desafiá nos awante den e trabou aki. Vários publicadó di hopi tempu a splica con nan a mantené nan goso den e ministerio dor di fortificá nan mente i curason pa enfrentá e desafio di apatia of oposicion. E segundo parti a recordá esnan presente n’e congreso, cu Testigonan di Jehova ta haci esfuerso pa alcansá hende tur caminda, tantu formalmente como informalmente. I e último parti a describí e variedad amplio di maneranan den cua tur cristian por expandé nan ministerio personal. E orador a enfatisá cu pa haci esaki, nos mester duna e Reino di Dios prioridad máximo, asta si haci esaki ta encerá incumbiniencia i cu nos mester nenga nos mes.—Mateo 6:19-21.

Ya cu nos ta biba den un mundu malbado yená cu un deseo insaciabel pa cos material, e discurso “Cultivá Debocion na Dios Huntu cu Keda Satisfecho cu Loke Bo Tin” tabata masha oportuno. Basando algun di su comentarionan riba 1 Timoteo 6:6-10, 18 i 19, e orador a mustra con debocion na Dios ta yuda cristiannan evitá amor pa placa, loke por desviá nan i causa hopi dolor. El a enfatisá cu sea cual sea nos situacion económico, felicidad ta dependé di nos relacion cu Jehova i di nos bienestar spiritual. Hopi ruman a keda profundamente conmoví dor dje puntonan presentá den e discurso “No Duna Dios  Ningun Motibu pa Bergwensa.” E orador a enfatisá e echo cu Jehova nunca ta lubidá su fiel Testigonan. E ehempel sin igual di Jesucristo—kende “ta e mésun ayera, i awe, i pa semper”—lo yuda hopi hende core cu awante e careda pa bida.—Hebreonan 13:8.

Na conclusion dje sesion di mainta tabatin e discurso di bautismo cu semper ta algu sobresaliente na reunionnan grandi di Testigonan di Jehova. Ta ki un goso pa mira esnan cu recientemente a dedicá nan mes, sigui e pasonan di Jesus dor di someté nan mes na bautismo bou di awa! (Mateo 3:13-17) Tur cu a tuma e paso aki, ya caba a logra hopi como hacidó dje palabra di Dios. Fuera di esei, ora nan a bautisá nan a bira ministernan ordená dje bon nobo, i nan ta haña hopi goso sabiendo cu nan ta participá den santificá e nomber di Jehova.—Proverbionan 27:11.

Conseho al caso a ser duná den e discurso “Madures Ta Necesario ‘pa Distinguí Tantu Loke Ta Bon Como Loke Ta Malu.’” Normanan mundano di loke ta bon i loke ta malu ta deplorablemente inadecuá. P’esei, nos mester dependé riba Jehova su normanan. (Romanonan 12:2) Tur hende a ser animá pa traha duru pa gana comprendimentu exacto di Dios su camindanan, i crece na madures. Anto, cu práctica nos facultadnan perceptivo lo ser entrená “pa distinguí tantu loke ta bon como loke ta malu.”—Hebreonan 5:11-14.

 Siguientemente tabatin e simposio “Traha Duru pa Cultivá Spiritualidad.” Cristiannan berdadero ta reconocé e importancia di desaroyá i mantené spiritualidad. Esaki ta encerá trabou duru: lesa, studia i meditá. (Mateo 7:13, 14; Lucas 13:24) Tambe hende spiritual ta sigui haci “tur forma di oracion i súplica.” (Efesionan 6:18) Nos ta realisá cu nos oracionnan ta revelá e profundidad di nos fe i debocion, e nivel di nos spiritualidad, i tambe kico nos ta considerá como “e cosnan mas importante.” (Filipensenan 1:10) A enfatisá tambe e importancia di desaroyá un relacion caluroso i amoroso cu Jehova manera di un yu obediente cu un tata bondadoso. Nos no tin djis un religion—maske e ta esun berdadero—mas bien nos kier edificá un fe fuerte, ‘como si fuera mirando Dios.’—Hebreonan 11:6, 27.

A considerá e tema di progreso spiritual mas aleu den e discurso “Laga Bo Progreso Sea Manifestá.” E discurso a trata tres área di tal progreso: (1) crece den conocimentu, comprendimentu i sabiduria, (2) producí e fruta di spiritu di Dios i (3) cumpli cu nos responsabilidadnan como miembro di famia.

Na final dje último discurso p’e dia ei, “Canando den e Lus Progresivo dje Palabra di Dios,” esnan cu tabata presente n’e congreso tabatin e goso di ricibí e buki nobo E Profecia di Isaías—Lus pa Henter Humanidad I. Esaki ta e promé di dos volúmen cu ta abarcá e buki bíblico di Isaías capítulo pa capítulo. “E buki di Isaías tin un mensahe pa nos awe,” e orador a remarcá. El a continuá: “Sí, hopi di su profecianan a cumpli aya den tempu di Isaías. . . . Sin embargo, hopi dje profecianan di Isaías ta cumpliendo awe, i tin cu lo cumpli den Dios su mundu nobo primintí.”

Di Tres Dia—Sea Hacidó dje Palabra di Jehova

E último dia di congreso a cuminsá cu un consideracion dje texto di dia. Despues tabatin e simposio “Sofonías Su Profecia Significativo pa Esnan Cu Ta Haci e Boluntad di Dios.” E tres discursonan dje simposio aki a mustra cu, mescos cu el a haci den tempu di Huda rebelde, Jehova lo trece afliccion riba esnan cu ta nenga di presta atencion na su spiertamentu awendia. Dor cu nan ta peca contra Dios, nan lo cana rond mes desampará cu hende ciegu, sin por haña scapatorio. Sin embargo, cristiannan berdadero ta sigui busca Jehova fielmente, i nan lo ser scondí den e dia di rabia di Dios. No esei so, sino tambe nan ta disfrutá di hopi bendicion asta awor. Nan tin e oportunidad  bendicioná di papia e “idioma puru” dje berdad di Bijbel. (Sofonías 3:9) E orador a bisa: “Papia e idioma puru ta encerá no solamente kere e berdad i siñ’é na otronan, sino tambe pone nos conducta na armonia cu e ley i principionan di Dios.”

Ansiosamente esnan presente n’e congreso a spera riba e drama “Ehempelnan Spiertador pa Nos Dia.” E drama aki den pleno trahe i esenario antiguo a mustra con miles di israelita a perde nan bida na rand dje Tera Primintí pasobra nan a lubidá Jehova i a ser seducí dor di muhernan pagano pa cometé fornicacion i participá den adoracion falsu. Na principio, Jamin—un dje personahenan principal—tabata dividí entre e atraccion dje muhernan moabita i su debocion na Jehova. E razonamentu falsu i forma di pensa engañoso dje malbado Zimri a destacá, mescos cu e fe i debocion di Fínehas. E peliger di asociá cu hende cu no ta stima Jehova a ser describí den un manera bibu.

E drama a prepará e auditorio p’e discurso cu a siguié, “No Bira Tendedó Lubidadó.” Un análisis di 1 Corintionan 10:1-10 a mustra cu Jehova ta test nos obedencia pa determiná si nos ta digno di ricibí un herencia den e mundu nobo. Pasobra cerca algun hende, deseo carnal por kita metanan spiritual for di bista asta awor cu nos ta cerca di drenta e sistema nobo. Tur presente a ser animá pa no perde e oportunidad di ‘drenta den e descanso di Jehova.’—Hebreonan 4:1.

E discurso público tabatin e tema “Pakico Presta Atencion na Dios Su Obranan Maraviyoso.” Jehova su “obranan maraviyoso” ta demostrá su sabiduria i su autoridad riba e creacion físico tur rond di nos. (Job 37:14) Un cantidad di pregunta penetrante di parti di Jehova tabata suficiente pa impresioná Job cu e poder dje Creador todopoderoso. Tambe Jehova lo haci futuro “obranan maraviyoso” na fabor di sirbidónan leal. E orador a concluí: “Nos tin motibu di sobra pa presta atencion na Jehova su obranan maraviyoso: loke el a haci den pasado, loke e ta haciendo rond di nos den creacion awe, i loke e ta primintí den futuro cercano.”

Despues di un resúmen dje artículo di studio dje Toren di Vigilancia di e siman ei, a presentá e discurso final dje congreso. E discurso emocionante aki cu e título “Apreciá Profundamente Bo Privilegio Como Hacidó dje Palabra di Dios,” a enfatisá cu ta un onor pa ta hacidónan dje palabra di Dios. (Santiago 1:22) E orador a recordá e auditorio cu nos tin un privilegio único como hacidónan dje palabra di Dios, i cu mas nos haci uso di dje, mas grandi nos aprecio p’e lo ta. Tur presente a ser animá pa reflehá e stimulacion beneficioso dje congreso di distrito aki den nan deseo pa ta hacidónan dje palabra di Dios te n’e grado máximo. Esei ta e único manera pa experenciá e mayor felicidad posibel.

[Kuadro/Plachinan na página 25]

Bo Por Ta Amigu di Dios!

Diabierne atardi a presentá un foyeto nobo cu e título Bo Por Ta Amigu di Dios! Na hopi parti di mundu tin un gran necesidad pa educacion bíblico simplificá, i lo usa e foyeto aki pa satisfacé e necesidad ei. Lo e ta un gran bendicion pa hende cu educacion limitá of cu no por lesa bon.

[Kuadro/Plachinan na página 26]

E Profecia di Isaías—Lus pa Henter Humanidad

Delegadonan di congreso a keda encantá di ricibí e Volúmen I dje set di dos volúmen di E Profecia di Isaías—Lus pa Henter Humanidad. Den e publicacion aki a pone énfasis riba e balor práctico dje profecia di Isaías pa nos tempu.