Pakico Cultivá Birtud?

RECIENTEMENTE un homber hapones di rond di cuarenta aña cu yama Kunihito a imigrá pa Merca. * Un par di siman despues cu el a yega, el a haña su mes cara-cara cu un situacion cu por a daña su carera. Kunihito ta conta: “Ora mi supervisor a puntra mi si e por a encargá mi cu un cierto responsabilidad, mi tabata basta sigur cu lo mi acept’é. Pero, como cu mi criansa a siña mi mira modestia como un birtud, mi a contestá: ‘Mi no ta sigur cu mi por, pero lo mi haci mi best.’ Pa mi supervisor mericano, esaki a zona manera cos cu mi tabata incompetente i cu mi no tabatin confiansa. Ora mi a haña sa esei, mi a realisá cu mi mester a cambia mi manera di pensa.”

Maria, cu ta biba den e stad di New York, tabata un excelente studiante na scol, semper cla pa yuda su coleganan di klas. Juan, colega studiante di Maria, de bes en cuando tabata pidi Maria yud’é. Pero tambe e tabatin un interes romántico den dje i a purba impresion’é. Apesar di Maria su deseo pa keda moralmente decente, el a sucumbí na Juan su avancenan i a haña su mes den inmoralidad sexual.

Ta un desafio berdad pa desplegá birtud den e mundu moralmente corupto djawe cu su variedad di cultura. P’esei, pakico cultivá birtud? Pasobra un conducta cu ta reflehá birtud ta agradá Dios. I ta sigur cu mayoria di nos tin un deseo pa haña su aprobacion.

Bijbel, e Palabra di Dios, ta haci un yamada riba su lectornan pa cultivá birtud. Por ehempel, apostel Pablo ta skirbi: “Cualkier birtud cu tin i cualkier cos digno di alabansa cu tin, sigui considerá e cosnan aki.” (Filipensenan 4:8) I apostel Pedro ta urgi nos pa haci ‘esfuerso sincero pa agregá birtud na nos fe.’ (2 Pedro 1:5) Pero kico ta birtud? Ta algu cu bo por siña den un klas? Con nos lo por cultiv’é?

[Nota]