Superintendente i Sirbidó Ministerial Nombrá Teocráticamente

“Presta atencion na boso mes i na henter e tou, entre cua e spiritu santu a nombra boso como superintendente.”—ECHONAN 20:28.

1, 2. Con Isaías 60:22 ta hañando su cumplimentu?

HOPI tempu pasá Jehova a profetisá cu algu remarcabel lo a tuma lugá den e tempu di fin. Pa boca di profeta Isaías, el a declará: “E chikitu mes lo bira mil, i esun menor un nacion poderoso. Ami mes, Jehova, lo aceler’é na su debido tempu.”—Isaías 60:22.

² Tin evidencia cu e profecia aki ta hañando su cumplimentu awe? Sí, asina mes! Durante e añanan 1870, a forma un congregacion di Jehova su pueblo na Allegheny, Pennsylvania, Merca. For dje cuminsamentu chikitu ei, dies di miles di congregacion a spruit i ta plamando rond mundu. Miyones di proclamadó di Reino—un nacion poderoso—ta asociando awor cu mas cu 91.000 congregacion den 235 pais rond mundu. Indudablemente, esaki ta confirmá cu Jehova ta acelerando e recogementu di adoradónan berdadero promé cu e “tribulacion grandi” cu ta asina cerca awor, dal aden.—Mateo 24:21; Revelacion 7:9-14.

3. Kico ta nificá bautisá ‘den e nomber dje Tata, dje Yu i dje spiritu santu’?

³ Despues di a haci un dedicacion personal na Jehova, i na armonia cu Jesus su instruccionnan, e miyones di personanan aki a ser bautisá “den e nomber dje Tata i dje Yu i dje spiritu santu.” (Mateo 28:19) Bautisá “den e nomber dje Tata” ta nificá cu e personanan dedicá aki ta reconocé Jehova como nan Tata celestial i Dunador-di-Bida i ta someté na su soberania. Bautismo ‘den e nomber dje Yu’ ta nificá cu nan ta confesá Jesucristo como nan Rescatador, Lider i Rey. Tambe nan ta reconocé e papel cu Dios su spiritu santu, of forsa activo, ta hunga den dirigí nan bida. Esaki ta indicá cu nan a ser bautisá ‘den nomber dje spiritu santu.’

4. Con ministernan cristian ta ser ordená?

⁴ Na momento cu disipelnan nobo bautisá, nan ta ser ordená como minister di Jehova Dios. Ken ta ordená nan? Den un sentido, e palabranan registrá na 2 Corintionan 3:5 ta aplicá na nan: “E echo cu nos ta adecuadamente capacitá [como minister] ta bini di Dios.” Nan lo no por deseá un onor mas grandi cu esun di ser ordená dor di Jehova Dios mes! Despues di nan bautismo, nan lo sigui crece spiritualmente como minister dje “bon nobo” tanten cu nan ta aceptá e guia di Dios su spiritu i ta sigui aplicá su Palabra.—Mateo 24:14; Echonan 9:31.

Nombramentu Teocrático i No Democrático

5. Superintendente cristian i sirbidó ministerial ta ser scogé democráticamente? Splica.

⁵ Mester di superintendente capacitá cu por ehercé supervision na un manera maduro i tambe e yudansa competente di sirbidó ministerial pa atendé e necesidadnan spiritual dje creciente cantidad di ministernan activo. (Filipensenan 1:1) Con e nombramentu dje hombernan spiritual aki ta bai? No dor di métodonan manera esnan cu cristiandad ta usa. Por ehempel, superintendentenan cristian no  ta keda eligí na un manera democrático, esta, dor di ricibí voto di mayoria persona asociá cu un congregacion. Mas bien, e nombramentunan aki ta tuma lugá na un manera teocrático. Kico esei ta nificá?

6. (a) Kico ta un berdadero teocracia? (b) Pakico e nombramentu di superintendente i sirbidó ministerial ta teocrático?

⁶ Simpel bisá, un berdadero teocracia ta gobernacion di parti di Dios. Testigonan di Jehova ta someté nan mes boluntariamente na su gobernacion i ta cooperá huntu pa por haci e boluntad divino. (Salmo 143:10; Mateo 6:9, 10) Nombramentu di superintendente cristian, of anciano i sirbidó ministerial ta teocrático pasobra e proceso di recomendá i nombra hombernan responsabel asina ta ser efectuá segun e areglo di Dios describí den e Scritura Santu. I claro cu Jehova, como e “cabes riba tur,” tin e derecho pa determiná con su organisacion visibel lo funcioná.—1 Crónicanan 29:11; Salmo 97:9.

7. Con Testigonan di Jehova ta ser goberná?

⁷ Na contraste cu hopi grupo religioso den cristiandad, no ta Testigonan di Jehova ta dicidí pa nan mes bou di ki forma di structura religioso nan ta funcioná. E cristiannan sincero aki ta haci esfuerso pa pega na Jehova su normanan. Superintendente no ta ser nombrá dor di un forma di gobernacion di iglesia dirigí pa congregacion, herarkia of presbiterio. Si elementonan di mundu ta trata na interferí cu e nombramentunan aki, Jehova su pueblo ta nenga di haci compromiso. Cu firmesa nan ta adoptá e posicion cu e apostelnan di promé siglo a expresá asina bon, ora nan a bisa: “Nos tin cu obedecé Dios como gobernante mas bien cu hende.” (Echonan 5:29) Asina, e Testigonan ta someté nan mes na Dios den tur cos. (Hebreonan 12:9; Santiago 4:7) Siguimentu di procedura teocrático ta trece aprobacion divino.

8. Con proceduranan democrático i teocrático ta diferenciá for di otro?

⁸ Como sirbidó dje Gran Teócrata, Jehova, nos ta haci bon di corda e diferencianan entre procedura democrático i teocrático. Procesonan democrático ta exigí representacion igual i hopi bes ta caracterisá pa hibamentu di campaña pa obtené un puesto i ser elegí dor di voto di mayoria. Den nombramentu teocrático no tin e proceduranan ei. Esakinan no ta bini di hende; ni nan no ta basá riba un of otro entidad legal. Refiriendo aparentemente na su mes nombramentu dor di Jesus i Jehova como “un apostel dje nacionnan,” Pablo a bisa e galationan cu el a ser nombrá “ni di parti di hende ni mediante un hende, sino mediante Jesucristo i Dios e Tata, cu a lant’é for di morto.”—Romanonan 11:13; Galationan 1:1.

Nombrá pa Spiritu Santu

9. Kico Echonan 20:28 ta bisa tocante e nombramentu di superintendente cristian?

⁹ Pablo a recordá e superintendentenan cu tabata biba na Efeso cu Dios a nombra nan mediante spiritu santu. El a bisa: “Presta atencion na boso mes i na henter e tou, entre cua e spiritu santu a nombra boso como superintendente, pa pastoreá e congregacion di Dios, cua el a cumpra cu e sanger di su propio Yu.” (Echonan 20:28) E superintendentenan cristian ei mester a sigui laga spiritu santu guia nan segun cu nan a cumpli cu nan debernan como wardadó dje tou di Dios. Ora un homber cu ta ocupá un puesto nombrá no ta cumpli mas cu e norma divino, spiritu santu cu tempu lo obra pa kit’é for di su posicion.

10. Den ki sentido spiritu santu ta hunga un papel crucial den nombramentu teocrático?

¹⁰ Den ki sentido spiritu santu ta hunga un papel crucial? Na promé lugá, ta spiritu santu a inspirá e registro cu ta describí e rekisitonan pa por ehercé supervision spiritual. Den su cartanan na Timoteo i Tito, Pablo a describí e normanan cu superintendente i sirbidó ministerial tin cu cumpli cuné. Na tur, el a mencioná un 16 rekisito asina. Por ehempel, superintendentenan mester tabata ireprensibel,  moderá den custumber, di sano huicio, ordená, hospitalario, capacitá pa siña i ehemplar como cabes di famia. Nan mester tabata balansá den uso di bebida alcohólico, nan no mester tabata stimadó di placa i mester a ehercé dominio propio. Mescos tambe, tin normanan haltu pa esnan cu ta haci esfuerso pa bira sirbidó ministerial.—1 Timoteo 3:1-10, 12, 13; Tito 1:5-9.

11. Cua ta algun dje cualificacionnan cu hombernan cu ta haci esfuerso pa alcansá responsabilidad den congregacion mester cumpli cuné?

¹¹ Un repaso dje cualificacionnan aki ta mustra cu esnan cu ta hiba delantera den Jehova su adoracion mester ta ehemplar den conducta cristian. Hombernan cu ta haci esfuerso pa alcansá responsabilidad den congregacion mester duna evidencia cu spiritu santu ta obra riba nan. (2 Timoteo 1:14) Mester ta bisto cu e spiritu di Dios ta producí den e hombernan aki e fruta di “amor, goso, pas, gran pacenshi, amabilidad, bondad, fe, suavedad, dominio propio.” (Galationan 5:22, 23) E fruta ei lo keda manifestá den nan trato cu compañeronan creyente i cu otro hende. Claro cu kisas algun ta sobresalí den manifestá cierto fruta di spiritu, miéntras kisas otronan ta cumpli na un grado superior cu otro cualificacionnan pa superintendente. Sin embargo, den nan patronchi general di bida, tur cu ta spera di ser nombrá como superintendente of sirbidó ministerial mester demostrá cu nan ta hombernan spiritual cu ta cumpli adecuadamente cu e rekisitonan dje Palabra di Dios.

12. Di ken nos por bisa cu ta spiritu santu a nombra nan?

¹² Ora Pablo a urgi otro hende pa bira imitadó di dje, e por a haci esei cu frankesa di expresion pasobra e mes tabata imitando Jesucristo, kende a ‘laga un modelo pa nos sigui su pasonan cu sumo cuidou i atencion.’ (1 Pedro 2:21; 1 Corintionan 11:1) Pues, nos por bisa di esnan cu ta cumpliendo cu e rekisitonan bíblico na momento cu nan a ser nombrá como superintendente of sirbidó ministerial, cu ta spiritu santu a nombra nan.

13. Con spiritu santu ta yuda esnan cu ta haci recomendacion di ruman homber pa sirbi den e congregacion?

¹³ Tin un otro factor cu ta indicá con e spiritu santu ta obra ora di recomendá i nombra superintendente. Jesus a bisa cu ‘e Tata den shelu ta duna spiritu santu na esnan cu ta pidié.’ (Lucas 11:13) Pues, ora e ancianonan den e congregacion local ta reuní pa recomendá hombernan pa responsabilidad den congregacion, nan ta pidi p’e spiritu di Dios guia nan. Nan ta basa nan recomendacion riba loke Dios su Palabra inspirá ta bisa, i spiritu santu ta yuda nan dicerní si un individuo cu ta ser evaluá pa nombramentu ta cumpli cu e rekisitonan bíblico. Esnan cu ta haci recomendacion no mester laga aparencia externo, logro den educacion of abilidad natural influenciá nan indebidamente. Nan enfoke primario mester ta si e persona ta un homber spiritual of no, un persona cu miembronan dje congregacion lo no vacilá pa acercá pa busca conseho spiritual.

14. Kico nos ta siña for di Echonan 6:1-3?

¹⁴ Aunke e superintendente biahero huntu cu e cuerpo di anciano ta recomendá un ruman pa sirbi como anciano of sirbidó ministerial, e nombramentu mes ta ser hací segun e patronchi establecí den e promé siglo. Na un ocasion, a surgi un necesidad pa hombernan spiritualmente capacitá percurá pa un asignacion importante. E cuerpo gobernante a duna e siguiente instruccion: “Busca pa boso mes shete homber acreditá di den boso, yen di spiritu i sabiduria, pa nos por nombra nan riba e asuntu necesario aki.” (Echonan 6:1-3) Aunke ta e hombernan directamente enbolbí cu e situacion a haci e recomendacionnan, ta e hombernan encargá cu e responsabilidad aya na Jerusalem, a haci e nombramentunan. Awe nos ta sigui un patronchi similar.

15. Con e Cuerpo Gobernante ta enbolbí den e asuntu di nombra ruman homber?

¹⁵ E Cuerpo Gobernante di Testigonan di  Jehova ta nombra tur miembro di Comité di Sucursal directamente. Ora di dicidí ken por asumí un responsabilidad pisá asina, e Cuerpo Gobernante ta tene Jesus su declaracion na mente: “Tur hende cu a ser duná hopi, hopi lo ser exigí di dje; i esun cu a ser poní na encargo di hopi, nan lo exigí di dje mas di loke ta custumber.” (Lucas 12:48) Ademas di nombra miembronan di Comité di Sucursal, e Cuerpo Gobernante ta nombra anciano di Betel i superintendente biahero. Sin embargo, nan ta comisioná rumannan confiabel sí pa actua na nomber di nan ora di haci cierto otro nombramentu. Tin un ehempel bíblico pa esaki tambe.

‘Haci Nombramentu, Conforme cu e Ordunan Cu Mi A Duna Bo’

16. Pakico Pablo a laga Tito na Creta, i kico esaki ta indicá relacioná cu nombramentu teocrático awe?

¹⁶ Pablo a bisa su colaboradó Tito: “P’e motibu aki mi a laga bo na Creta, pa bo por corigí loke tabata defecto i haci nombramentu di anciano den stad tras di stad, conforme cu e ordunan cu mi a duna bo.” (Tito 1:5) Anto Pablo a describí e cualificacionnan cu Tito mester a busca den hende homber cu lo a cualificá pa tal nombramentu. P’esei, awe e Cuerpo Gobernante ta nombra rumannan capacitá n’e sucursalnan pa represent’é den nombra anciano i sirbidó ministerial. E Cuerpo Gobernante ta haci sigur cu esnan cu ta represent’é i cu ta actua na nomber di dje ta comprendé e guia bíblico claramente i ta sigui esakinan pa haci tal nombramentu. P’esei, ta bou di direccion dje Cuerpo Gobernante ta nombra hombernan capacitá pa nan sirbi den e congregacionnan di Testigonan di Jehova rond mundu.

17. Con un oficina di sucursal ta atendé recomendacion pa nombra superintendente i sirbidó ministerial?

¹⁷ Ora someté recomendacion pa nombra superintendente i sirbidó ministerial na un oficina di sucursal di Sociedad Watch Tower, hombernan experenciá ta confia riba Dios su spiritu pa guia nan ora di haci nombramentu. E hombernan aki sa cu nan tin cu duna cuenta i rason, i p’esei nan ta realisá cu nan no mester ta lihé pa pone man riba ningun  homber, pa nan no participá den su picánan.—1 Timoteo 5:22.

18, 19. (a) Con e congregacion ta haña sa di cierto nombramentunan? (b) Con henter e proceso di recomendacion i nombramentu ta bai?

¹⁸ Ta informá e congregacion di cierto nombramentunan kisas via un carta cu tin un stempel oficial di un entidad legal. Sucursal por usa un carta asina pa nombra mas cu un ruman den e congregacion.

¹⁹ Nombramentu teocrático ta bini di Jehova mediante su Yu i Dios su canal terenal visibel, esta, “e esclabo fiel i discreto” i su Cuerpo Gobernante. (Mateo 24:45-47) Ta spiritu santu ta dirigí of guia henter e proceso ei di recomendacion i nombramentu. Esei ta asina pasobra e cualificacionnan ta describí den e Palabra di Dios, cu ta inspirá pa spiritu santu, i e individuo nombrá ta duna evidencia cu e ta producí e fruta dje spiritu ei. P’esei, mester mira nombramentunan como un obra di spiritu santu. Mescos cu a nombra anciano i sirbidó ministerial den e promé siglo na un manera teocrático, asina ta sosodé awe tambe.

Gradicidu p’e Guia di Jehova

20. Pakico nos ta compartí David su sintimentunan registrá na Salmo 133:1?

²⁰ Den e tempu aki di prosperidad spiritual i aumento teocrático den e actividad di predicá e Reino, nos ta gradicidu cu Jehova ta esun primordialmente responsabel pa nombramentu di superintendente i sirbidó ministerial. E areglo bíblico aki ta yuda mantené Dios su normanan haltu di husticia entre nos como Testigo di Jehova. Ademas, e spiritu cristian i esfuerso diligente dje hombernan aki ta contribuí hopi na nos pas i unidad maraviyoso como Jehova su sirbidónan. Mescos cu salmista David, nos ta sinti nos impulsá pa sclama: “Mira! Ki bon i ki agradabel ta pa rumannan biba huntu den unidad!”—Salmo 133:1.

21. Con Isaías 60:17 ta hañando su cumplimentu awe?

²¹ Ki gradicidu nos ta na Jehova pa su guia mediante su Palabra i spiritu santu! I en berdad e palabranan registrá na Isaías 60:17 ta significativo: “En bes di koper lo mi trece oro, i en bes di heru lo mi trece plata, i en bes di palu, koper, i en bes di piedra, heru; i lo mi nombra pas como bo superintendentenan i husticia como esnan cu ta asigná tarea na bo.” Segun cu progresivamente a implementá proceduranan teocrático di un manera mas cabal entre Testigonan di Jehova, nos a experimentá e condicionnan bendicioná aki den henter Dios su organisacion terenal.

22. Pa kico nos tin motibu pa ta gradicidu, i kico nos mester ta determiná pa haci?

²² Nos ta profundamente gradicidu p’e areglonan teocrático cu nos tin den nos seno. I nos ta apreciá mashá e trabou duru pero satisfaciente cu superintendente i sirbidó ministerial nombrá teocráticamente ta haci. Di henter curason nos ta alabá nos Tata celestial, kende a duna nos prosperidad spiritual i a bendicioná nos asina ricamente. (Proverbionan 10:22) P’esei, laga nos keda determiná pa cana pareu cu Jehova su organisacion. Riba tur cos, laga nos sigui sirbi unidamente huntu p’e onor, gloria i alabansa di Jehova su nomber grandi i santu.

Con Lo Bo Contestá?

• Pakico nos por bisa cu e nombramentu di superintendente i sirbidó ministerial ta teocrático i no democrático?

• Con asina spiritu santu ta nombra hombernan cristian responsabel?

• Den ki manera e Cuerpo Gobernante ta enbolbí den e nombramentu di superintendente i sirbidó ministerial?

• Pa loke ta nombramentu teocrático, di con nos mester ta gradicidu na Jehova?

[Preguntanan di Estudio]

[Plachinan na página 15]

Anciano i sirbidó ministerial a ricibí e privilegio di sirbi pa medio di un nombramentu teocrático