Testigonan di Jehova—Moviendo Padilanti cu Conviccion Firme!

Informe di Reunion Anual

DEN e dianan aki di skepticismo i duda, Testigonan di Jehova ta resaltá como cristiannan cu tin conviccion firme. Esaki a bira bisto n’e reunion anual di Watch Tower Bible and Tract Society of Pennsylvania, cu a tuma lugá den e Salon di Asamblea di Testigonan di Jehova na Jersey City, New Jersey, riba diasabra, 7 di october 2000. *

Den su comentario di introduccion, e presidente di programa, John E. Barr, miembro dje Cuerpo Gobernante di Testigonan di Jehova, a bisa: “For di tur e miles di miyones di hendenan riba tera, nos sa i ta convencí cu Jehova su Yu stimá, Cristo Jesus, awor ta entronisá den shelu, gobernando meimei di su enemigunan.” Seis informe emocionante for di rond mundu a presentá evidencia di tal conviccion firme.

Berdad di Bijbel Ta Vence Spiritismo na Haiti

Na Haiti, spiritismo ta reina tur caminda. Segun John Norman, coordinadó dje Comité di Sucursal, “hopi bes hende ta practicá vudu pa protehá nan mes.” Un curandero a cuminsá haña duda despues cu el a perde un pia den un accidente. ‘Con un cos asina por pasa cu mi siendo cu mi tin proteccion dje spiritunan?’ el a puntra su mes. Mescos cu hopi otro hende, e homber aki a siña e berdad cerca Testigonan di Jehova i a ser yudá pa libra su mes for di spiritismo. E echo cu dia 19 di april 2000, cuater biaha e cantidad di publicadó di Reino den e pais ei a asistí n’e Memorial dje morto di Cristo, ta mustra cu tin un potencial pa crecementu.

Celo den e Inmenso Teritorio di Korea

Na Korea, 40 porciento di Testigonan di Jehova ta den sirbishi di tempu completo. “Cu e tremendo ehército aki,” Milton Hamilton, coordinadó dje Comité di Sucursal a bisa, “nos ta cubri nos teritorio di mas cu 47 miyon hende un bes pa luna.” Foral den e congregacionnan di idioma di seña e crecementu ta notabel. Den un circuito di idioma di seña, e rumannan ta conducí 800 studio di Bijbel. Esaki ta un promedio di un studio pa publicadó. Lamentablemente, ainda nan ta encarcelá nos rumannan homber yong pa motibu di nan neutralidad. Mester bisa sí cu e trato cu e fiel cristiannan aki ta haña den prizon ta faborabel, i hopi bes nan ta ser encargá cu trabou di confiansa.

 Satisfaciendo e Exigencianan di Crecementu na México

Na augustus 2000, un máximo di 533.665 proclamadó di Reino a entregá raport di sirbishi di veld na México. Mas cu tres biaha e cantidad di personanan ei a asistí n’e Memorial. “Nos meta p’e aña aki ta pa construí 240 Salon di Reino mas,” e coordinadó dje Comité di Sucursal, Robert Tracy, a bisa. “Ainda nos mester di hopi mas,” el a agregá.

E hóbennan Testigo di Jehova na México ta ehemplar. Un pastor católico a bisa di un cierto hóben: “Mi kier tin maske ta unu manera é den mi siguidónan. Mi ta admirá e hendenan aki pa nan boluntad firme i p’e manera sabí cu nan ta usa Bijbel. Nan a defendé Dios, asta riscando nan mes bida.”

Integridad Meimei di Disturbio na Sierra Leone

Desde april 1991, ora guera civil a dal aden na Sierra Leone, miles di hende a ser matá, heridá of mancá. “Guera i miseria tabatin un efecto profundo riba hende,” Bill Cowan, coordinadó dje Comité di Sucursal, a informá. “Hopi hende cu tabata indiferente pa cu nos mensahe awor ta scucha cu interes. No ta algu straño cu hende ta cana drenta Salon di Reino gewoon asina pa asistí na nan promé reunion. Hopi bes hende ta para rumannan riba caya pa pidi un studio di Bijbel.” Apesar dje pais su instabilidad continuo, e trabou di predicacion di Reino ta duna fruta na Sierra Leone.

Un Programa di Construccion Extenso na Sur África

Actualmente, tin un necesidad pa vários mil Salon di Reino den e teritorio cu ta cai bou dje oficina di sucursal na Sur África. Ya a construí cientos di salon caba. “En bes di reuní den un ket of bou di un palu, manera ántes, nos rumannan por reuní den un lugá adecuá cu caminda di sinta apropiado,” miembro dje Comité di Sucursal, John Kikot, a bisa. “Aunke mayoria dje Salonnan di Reino aki tin un diseño modesto, por lo general nan ta resaltá como e edificionan mas impresionante den nan localidad. Den algun área, nos a ripará cu despues di construí un Salon di Reino, e congregacion a bira mas cu dos bes mas grandi durante e siguiente aña.”

Un Generacion Nobo di Testigo na Ucrania

Durante e aña di sirbishi 2000, e pais aki a mira un máximo di 112.720 publicadó. Mas cu 50.000 di esakinan a siña e berdad di Bijbel durante e último cincu añanan. “Di berdad Jehova a lanta un generacion nobo i hóben di Testigo pa declará su nomber!” segun John Didur, coordinadó dje Comité di Sucursal. El a agregá: “Durante e último dos añanan, nos a laga mas cu 50 miyon revista, cu ta igual n’e poblacion dje pais. Como promedio, nos ta ricibí tur luna mil carta for di hende interesá cu ta pidi mas informacion.”

Otro Rasgonan Conmovedor dje Programa

Daniel Sydlik, miembro dje Cuerpo Gobernante, a duna un discurso interesantísimo. E artículo “E Diferencia Entre e Cuerpo Gobernante i un Corporacion Legal” cu ta aparecé den e revista aki, ta basá riba e presentacion informativo ei.

Theodore Jaracz dje Cuerpo Gobernante a duna un discurso cu ta stimulá pensamentu serio, titulá “Superintendente i Sirbidó Ministerial Nombrá Teocráticamente.” Un dje artículonan cu ta aparecé den e revista aki ta basá riba e tema ei.

Tambe e reunion anual a incluí un discurso conmovedor cu e miembro dje Cuerpo Gobernante David Splane a duna riba e texto di aña pa 2001. E ta basá riba apostel Pablo su palabranan: “Para completo i cu conviccion firme den henter e boluntad di Dios.” (Colosensenan 4:12) Rond mundu Testigonan di Jehova ta determiná pa haci esei segun cu nan ta predicá e bon nobo dje Reino di Dios fielmente den tur e tera.—Mateo 24:14.

[Nota]